رواية قصة وحيد الفصل الثاني 2 - بقلم يارا محمد

قربت من رجب وقالت: وانت مال امك، اقصد الست الوالده يعني. رجب: انت واحده قليلة الأدب والتربية، ما هي اللي تبقى في شقة واحد غريب عنها، استنى منها إيه. البنت: من بعض ما عندكم، استاذ جعورة بيه باشا. تقدر تتفضل انت وشوية الناس اللي بتحب الزيطة دي، كله بيتك بيتك، يلا يا بابا، يلا يا حبيبي، يلا علشان هنرش ميه. رجب بغضب: جعورة! انت بتقولي عليا أنا كده؟

إيه رأيك إننا مش ماشيين بقى غير لما نعرف انت مين، وإيه اللي يخلي الأستاذ المحترم يجيبك بيته. البنت: ما يخصكش أصلاً، يا ريت تخلي مناخيرك في وشك بدل ما هي في حياة الناس كده. الشيخ عثمان أحد الجيران: يا بنتي الله يرضى عليك، قولي انت مين بدل ما حد يظن ظن خطأ في عم وحيد. البنت: انت مش شايف يا عمو الشيخ الراجل ده بيتكلم إزاي؟ الشيخ عثمان: معلش يا بنتي، حقك عليا، بس انت مين؟

البنت: أنا بنت الراجل المحترم اللي عم فاتح زوره عمال يعيب فيه من ساعتها. اتصدم وحيد من اللي قالته!! بنته!! قلبه كان حاسس، بس إزاي؟!! رجب: بنته أه، موت يا حمار، مهو أي تلزيق وخلاص عشان تخلص نفسها من الفضيحة. البنت: لا يا حبيب والديك، أنا مايان وحيد الأسيوطي، بنت وحيد الأسيوطي، الرجل المحترم موظف البنك. تحب أوريك الباسبور في المرة.

الكل كان في حالة صدمة، وخصوصاً أن أغلب الجيران جدد، وأقدم حد فيهم مكملش 3 سنين، وما يعرفش أصلاً أن وحيد كان متجوز ومخلف، لأنه على طول منعزل ومش بيتكلم مع أي حد. انسحب الجميع، متبقيش غير الشيخ عثمان ومرام وبنته. بصت مرام للشيخ عثمان بمعنى نعمل إيه، هز أكتافه وشاورلها أنهم يقفوا بعيد عنهم شوية. لفت مايان لوحيد اللي كان واقف مصدوم، وفجأة لقيته

حضنها بقوة وهو بيقول: والله كان قلبي حاسس من أول ما شفتك، بس كنت بكذب نفسي عشان مديهاش أمل كذاب. وكل شوية يبعدها يبص على ملامحها وكأنه بيحفرها في ذاكرته، ويرجع ياخدها في حضنه مرة تانية. مايان: طب يا حاج، ممكن كفاية أحضان ونروح ناكل، جعاااانة، جعاااانة يا بشر. بصلها وحيد بصدمة، وبعدها ابتسم: تعالي يا حبيبتي، كلي كل اللي نفسك فيه.

شاف مرام اللي واقفة ومعاها لوسيندا، والشيخ عثمان اللي كان بيتكلم في التليفون، شاور لهم يدخلوا، لكن الشيخ عثمان استأذن لأن عنده مشوار مهم. مرام بضيق من مايان اللي قاعدة تاكل بلا مبالاة لأي حاجة بتحصل حواليها، ولا أنها غايبة عن أبوها 11 سنة كاملة: ما كفاية أكل بقى، واحكي للراجل الغلبان ده بدل ما هو قاعد على نار كده. مايان وهي بتمضغ الأكل: لا بس تسلم إيدك يا طنط، أكلك تحفة، أنا لازم أتعلم منك. مرام بصدمة: طنط!!

نططوكي على حبل السيرك مع قردة قرعة، قال طنط قال مين يا بت دي اللي طنط؟!! أنا لسه ما كملتش الـ 36 سنة. وحيد: معلش يا مرام، حقك عليا، أنا وأسف ليكي بالنيابة عنها. مايان ببرود هيشل مرام: إلا قوليلي يا حاجة، يعني إيه قردة قرعة؟ هو في قردة قرعة؟ مرام وهي حاسة ببوادر شلل ثلاثي الأبعاد: حاجة!!! ....... وقبل ما تكمل كلامها كان وحيد قال: يا مرام خلاص امسحيها فيا المرة دي، عيلة وغلطت. مايان بصدمة: عيلة؟؟

بقى كده يا باباتي، ما كنتش متخيلة إنك شايفني كده، ده أنا عندي 18 سنة و 3 أيام. مرام بغيظ: لا لا البنت دي مستفزة، قومي يا لوسيندا، أنا حاسة إني هتشل. وحيد: معلش يا مرام امسحيها فيا، هبقى أعقلها. لوسيندا: متقلقيش يا ديدو، ماما مش زعلانة، هي هتتشل بس. مرام شالت لوسيندا من قفاها: يلا يا أم نص لسان، معلش يا وحيد، هطلع أذاكر للوسي وهبقى أعدي عليك وقت تاني، وبصت لمايان بقرف.

مايان: أخيرا الملزقة دي مشت، أعوذ بالله من غضب الله، هي مين دي؟ وحيد: دي حبيبة قلبك مرام بنت الحاج عبد الكريم. مايان بصدمة: لا بالله عليك لا تقول هذا، يا الله ماذا أرى؟ ماذا أفعل؟ وحيد: انت مالك قلبتي على الدبلجة كده ليه؟ المهم احكيلي انت إزاي هنا؟

مايان: لا أنا هحكيلك من الأول خالص، من يوم ممشينا. أول ما مشينا من هنا رحنا شقة تانية ما اعرفش بتاعة مين، بس قعدنا هناك أسبوعين، وكل ما كنا نسألها كانت تقول بخلص إجراءات في المحكمة. وبعدها سافرنا على روسيا بلد جدتي تقريباً على حد ما فهمت. بس كنا عايشين هناك مع راجل كده اسمه فلوباتير، هو تقريباً حاجة كده من عيلة ماما مش متأكدة يعني. مكملناش هناك أكتر من شهرين وسافرنا كوريا بس بهويات غير بتاعتنا. عشنا في كوريا 5 سنين

متواصلين، ما رجعناش روسيا ولا مرة، ولما رجعنا قعدنا شهرين ورجعنا تاني كوريا 5 سنين. كان فلوباتير بينزل روسيا كتير بس لوحده، وأحياناً مع ماما، كانوا بيخلصوا شغل ويرجعوا تاني. والسنة الأخيرة دي فضلنا عايشين في روسيا بهويات مزيفة وباسبورات غير اللي سافرنا بيها، أو بمعنى أصح في كل مرة كنا بنسافر كنا بنغير الهوية والباسبور.

وحيد: طب اختك فين؟ ليه مش معاكي يا مايان؟ مايان ببرود وهي بتقشر موزة: متصابة برصاصة وشوية كدمات، عشان في ناس سحلوها ضرب وهي في غيبوبة بقالها كده يجي سنة و 3 أيام. وحيد كان باصص ليها بصدمة:......