رواية قسوة احفاد ال هتان الفصل الحادي عشر 11 - بقلم هاجر النعيمي

تيم: أي شكد صغيرة، بعدج بالمدرسة. هاجر: هههه، تحسسني أنت متخرج، هو أنت هسه أول سنة، صدك، شلون الجامعة حلوة؟ تيم: تخبل، غير والله فد بنات، وحدة أحلى من الثانية. هاجر: يبو، ولج، الحكي إيلا. سد حلكي وكال: تيم: والله جذب، كلهم يلعبون بالنفس، وحتى ما أدحك على وحدة، بربج اسكتي لا تفضحيني، هسه تطلكني. بعدت ايده وحجيت: هاجر: تستاهل خاين، عايف حبيبتك بالبيت وهي واثقة بيك، وأنت بالجامعة تلعب بكيفك.

تيم: هههه، تحسسيني جاي أخون زوجتي، يمعودة، والله جماعتي يدحكون ويزحفون، وأني كاعد، صاحبي يكلي هيج تخاف من حبيبتك. هاجر: حلو، طلعت تخاف من إيلا، بسيطة، أله أفضحك وأكولهم يخاف من حبيبته. تيم: دفوتي، جاي نحجي بالشارع، فوتي. دخلنا، نزعت حذائي ولزمته بيدي، لأن أخليها بغرفتي، عندي مكان بالكونتور خاص بيهن. حطيتهن، وبدلت وطلعت، كعدت مع الكل، وجان إلياس يكول: إلياس: جدي، شلون تخلي هاجر تطلع بدون حجاب؟

كبرت وصارت العين عليها، ولحد هسه تطلع سفري؟ من إيمتى أنت تقبل؟ جدو: أي والله، كلامك صحيح، هاجر، تحجبي. هاجر بعصبية: من أقتنع ألبس حجاب، مو هسه، وبعدين بابا ما قال البسي، وأني أسمع كلام أبويه وبس. جدو: صوتكِ أدبسزز. عفتهم وطلعت، أيع، ولا طايقة أحد، رحت للغرفة، شوية وانفتح الباب وفاتوا تيم وإيلا ورسل، كلت بسرعة:

هاجر: هاي مو حالة، والله مليت منهم ومن نقهم، كل يوم مطلعيلي سالفة جديدة، وهذا إلياس الخيخة، كل يوم يسوي سالفة، تعبت منهم. أجه تيم يمي وحط إيده على كتفي وكال: تيم: والله أعرف الي تمرين بيه صعب، وأعرف إلياس شكد نذل، بس الي ما أعد أفهمه، ليش كل هاي الشغلات، شيريد منج؟ ما أعرف. هاجر: مبين يريد يخرب حياتي، الكلب، ليش عنده غير شي؟ رسل: أي، لأن هو وأسيل كل كم يوم مشكلة، ويجي يطلع حرتو بيج. هاجر: شعرفج؟

رسل: سمعتهم أكثر من مرة. تيم: أي صح، كل يوم مشكلة، ويجي أبو راس يطلعها بينه، تعرفين كل يوم يسوي مشكلة ويا لارا، خطية البارحة كاللها جيبي مي، وهيا ملتهية، وهو عصب وكام ضربها، وأمي ما حكت لابويه حتى لا تصير سالفة، وغير يارا الي واكفة وياه. هاجر: هيج حامية السالفة، عجل؟ تيم: الله لا يشوفج، الي جاي نشوفه، لعبت رواحنا. هاجر: وليش ساكتين له؟ انفتح الباب واجه إلياس وأسيل وياه، عبالك راح نخطفه منها إذا تعوفه دقيقة.

كال إلياس: إلياس: شنو هاي الجمعة الحلوة؟ هاجر: جانت حلوة، بس لوما جيتوا. إلياس: لا، ما حبيتها منج. هاجر: طبك مرض، لا تحبها. أسيل: هاجر، احجي بأدب. هاجر: ليش عيني، قابل كدامي مؤدبين حتى أحجي بأدب؟ إلياس: هيو، بلا سخافتك، هسه. هاجر: هيو بعينك، وبعد لا تدخل بأموري، خوش، تدخل بهاي. أشرت على أسيل وكالت أسيل: أسيل: ما اسمي هاي، اسمي أسيل. هاجر: خره عليج وعلى اسمج وعلى الي يمج هم. عاط بيه إلياس وكال:

إلياس: كافي، وخليني أحترمك، ولا تحجين شي، فهمتي؟ هاجر: أوي، خفت. تيم، خبيني بجيب بنطرونك، حباب. شفت إلياس عصب حيل، وأسيل لزمت إيده وكالت: أسيل: عوفها حبيبي، هي مضغوطة من عرسنا. هاجر: هههههه، والله حلوة هاي النكتة، ليش أني وين عبرتكم؟ وبعدين ما حاجة أعيد، لأن لو أريد إلياس، آخذه منج وبسهولة. أسيل: ههههه، ليش عيني، خوما هيج، أني رخيصة؟ هاجر: لوما رخيصة، ما تلعبون لعبة نفس وجهكم، أنتي وهو.

إلياس: كافي، عاد، وهاجر، البسي حجاب، حجي مفهوم. هاجر: Bardon، ليش منو أنت؟ إلياس: أنتِ ما عليج بمنو، أني، المهم، حجي يتنفذ. هاجر: أسيل الثولة، هي تنفذ حجيك، مو هاجر. إلياس: لا تحجين على خطيبتي. تيم: إلياس، كافي لخاطر الله، ترا كلنا بزعنا منك ومن عمايلك، عوفنا بحالنا، مثل ما جاي تشوف، محد يريدوك، وغير مرحب بيك بينه، ياريت تاخذ مرتك وتطلعون. إلياس: انجب، حيوان، من إيمتى العجايا يحجون؟ هنا ما تحملت، طفح الكيل،

كلت بصوت عالي: هاجر: والله محد غيرك العجي، تيم، محد يحجي ويا هيجي، مفهوم؟ وإذا تحجي كلام زايد ناقص، ساعتها أشوفكم جناني شلون يصير. إلياس: يعني هذا تهديد؟ هاجر: مثل ما تريد اعتبره، والله ثم والله، أحجي كل شي موجود بكلبي، وما عندي مانع أطلع حجي، أنتو بغنى عنه. إلياس: يعني تتهمينه؟ هاجر: أي، بشي صار وما صار. أسيل: أنت ما تخافين الله؟

هاجر: أني لو أنتو، وين ما أروح أشوفكم كدامي، لعبت نفسي منكم ومن فعايلكم، كل ما تشوفوني وأذوب بين كلام، عبالك لهسه أحب إلياس، من يوم الي خطبج بي، طلع من راسي وما عاد له وجود بحياتي، وهو مصدق روحه يجي يكلي تحبيني وراح أخليج تحبيني، عتقوني لوجه الله. الكل ضل صافن، وعلامات تعجب على روسهم، وإلياس هادئ بشكل، حتى رد فعل ماكو. فوراً أسيل بجت وكالت:

أسيل: من أكلك بعدك تحبها، تكلي لا، حرام عليك الي تسوي بيه، حرام، يكفي عاد، تحملتك كثير. عافت الغرفة وطلعت، إلياس راح وراها يراضيها. تيم كال: تيم: أخيراً، ولو. رسل: كل هذا إلياس مسوي؟ هاجر: أي. تيم: وأني أشهد. بقينة نسولف شوية، وبعدها طلعنا، صار العصر، كلت لتيم: تعال درسني، وما كال شي، أجه وبدأ بالشرح، جان شرحه حلو بشكل، يعني يفهم الغبي. كمل وكال: تيم: اسمعي، عندي دفاتر بيها كل الحلول موجودة، أجبلج هما.

هاجر: ياريت والله. تيم: خليها يمي. صار يصفح بالكتب، بعدها كال: تيم: شيلي، وخلي نطلع بره يمهم. هاجر: يلا، امشي. طلعنا، وجان الكل بالصالة ويحجون بعرس إلياس وأسيل. عمي ثامر كال: ثامر: العرس ماريد يصير هسه، خلي بعدين، بعد ما كمل جهاز البنت. بقوا شوية يحجون بالموضوع. تيم جان كاعد يمي، كال بهمس: تيم: أنتي ضايجة من حجيهم؟ هاجر: لا، أبد. تيم: أكيد؟ هاجر: أكيد.

وفعلاً، ما كنت ضايجة، عادي حاله حال كل يوم، يمكن هسه اقتنعت بأنو الي يصير لصالحي، وربي بعدني عن واحد حقير ومتسلط. صار الليل وراحوا الكل، والكل نام. دخلت بوبجي ألعب شوية وأتونس. أول ما فتحت اللعبة، تميم دزلي، انصدمت، بالعادة أمير أو زهراء يدزون. تميم صاير أحسن وما يتعارك وياي دائماً، هاي بس إذا مات وعصب، يفشر ويحجي على الكل. دخلت وياهم، والكل رحب بيه، حتى تميم ترحيبه جان حلو. استغربت، هو من إيمتى هيج؟ كلت:

هاجر: أوي، خجلتوني والله. أمير: فدوه للخجلانة. سولفنا شوية ودخلنا كيم، جان الكيم حماسي وكله جلد. تميم كتل ثلاثة، وأمير كتل واحد، وكال تميم: تميم: شو محد سمعني؟ الكفو شسالفة؟ ترا كتلت ثلاثة. أمير كال بستةزاء: أمير: كفو، كفو، من شاربك. تميم: جان المفروض أخليهم وليّة مال مخانيث عليك، وبعدها تبوس رجلي، ما عالجك ابن ال***. لا تضل تستهزء. أمير: أبو ال****، لا تفشر على أمي. حجيهم جان وصخ بشدة. كال تميم:

تميم: أروح أشرب ماء شوية وأجي. أمير: لا تجي، غير مرحب بيك. ضحكنا، واختفى صوت تميم. كالت زهراء: زهراء: أمير، مو عيب تفشرون كدام البنية؟ هسه شتحجي علينا؟ تكول معدان. هاجر: لا حبيبي، على شنو أحجي عليك؟ بعد كل واحد براحته، شعليه، المهم أنتِ يمي، طز بكلشي. زهراء: أروحلج فدوه يكلبي، على هل كلام. صدك، هاجر، شصار علمود الدوام؟ شلون جان؟ هاجر: زين والله، يوم حلو لو ما اجوا بعض ناس وخربوا الوناسة. زهراء: قصدج إلياس؟

جنت أريد أجاوب، تميم كال: تميم: منو إلياس؟ هاجر: ابن عمتي. تميم: ها، هذا عود صاحبج كلش. هاجر: لا، أيع، شجاب تيم على إلياس؟ ياريت يشبه تيم. تميم: اها، بس بشنو مضوجج؟ هاجر بمتمتة: ها، لا، مو شسمه، مو مضوجني. تميم: أحاول أصدك. هاجر: تصدك أو لا، عمرينك. تميم: استغفر الله، بابا، شبيك؟ مو صار كم يوم ما متعاركين؟ لو بيج دودة، اله تعاركيني. هاجر: احترم نفسك، وعدل ألفاظك. أمير: تميم، بلا أكلان نعل، كافي. زهراء: طب كيم، تميم.

طبينة كيم، وهم كيم حماسي، كله جلد، وبش واحد يكتل الثاني. بقينة بس إحنا وأربعة، وندور عليهم، ماكو. جنت أمشي وما أشوف غير أكع نوك (أموت) كلت: هاجر: انتبهوا، مكمبر بالحشيش، خرب راسه، فنش. تميم: حطي علامة، مو مبين. هاجر: أي، لأن لابس بدلة حشيشية (لابس لبس نفس الحشيش وداخل بالحشيش) تميم: هسه أكتله، شنو يكتل من تيمنه. صارت مواجهات، وتميم ضربه بالأوم براسه ومات. كال أمير: أمير: هيد شوت. زهراء: كفو أمير، يلا باقي ثلاثة.

بعدها أجه واحد وكتل أمير، وكال تميم: تميم: أمير، مشاهدة ممتعة، عود شاهد تاج راسك. أمير: تاج راس ***. زهراء: أي، كافي، شبيكم؟ عيب ويانه بنية. تميم، لمعيدي، اكعد. تميم: لج، حتى أنتِ لفيتي علي؟ روحي شوفي زوجج أبو صماخ. هاجر: شلون ماخذين راحتكم، وعلاوي نايم؟ أمير: مو نايم، يباوع بالتلفون. تميم: كافي، أريد أركز. أمير: أخ، إذا تموت، أله أشهرك. تميم: أكلك، أحمد شبي هل كم يوم؟ أمير: متعارك ويا مريم، وكايلتلها ننفصل.

تميم: علمود نفس السبب مو؟ أمير: بذاته. صدك، ليش ضارب عباس؟ تميم: كل عادة، يتجاوز وينسحل. أنت وين جنت؟ بس شنو، كرار ضربه بكتفه، غير متت فرح. أمير: إيمتى تحل الخلاف بينك وبين كرار؟ ترا والله سالفة وصارت، وهو مو قاصد. تميم: دمشي، خلي يولي، لو يموت ابن الزربة. أمير: هيو، عمو إدريس، شغلت؟ تميم: شعرفني؟ كل ولده حيوانات. أمير: وليش تحجي على حمزة؟ تميم: مهليك، البارحة ضارب مرته كدام الكل، بس شنو، بيبي ميتة فرح.

زهراء: بيبي، هيا تموت على المشاكل، عاد كل ما يتعارك واحد من والولد ويا زوجته، هيا تسوي عرس. عدا سجاد، إذا تعارك ويا رشا، لا، هنا يختلف، لأن الثنين حفادها. أما نحنا، خره علينه. أمير: اسكتي، لا تحجين على بيبي. زهراء: اوف، إيمتى نخلص؟ ما أعرف، حتى مم تضربني، هيا تكيف. تضل كم يوم تعيرني. انصدمت، شنو أمير يضرب زهراء؟ وشلون تسكت؟ عصبت وكلت: هاجر: أمير، شلون تضربها؟ مو حبيبتك. أمير: هيا السبب، ليش تعلي صوتها.

هاجر: وإذا تكون معصبة؟ تميم: مو عدنا معصبة، تلزم أعصابها وتاكل نعل، وما ينرفع صوتها على زوجها، وما تعاند. هاجر: أنت تشاقه مو؟ تميم: لا، طبعاً. هاجر: يعني عادي عدكم رجال يضرب زوجته؟ تميم: إذا غلطانة، ليش لا؟ يربيها. هاجر: فاهمين التربية غلط، وبعدين الزلمة ما يضرب المرة، هاي مو رجولة. صار نقاش بيني وبين تميم، وصار أخذ وعطي بالموضوع. كالت زهراء: زهراء: تميم، طب كيم وعوفو هاي السالفة.

هاجر: شلون أعوفها، وأنتي تنضربين وكلش عادي؟ وبعدين ليش ما تحجين، تعترضين؟ زهراء: هاجر، حبابة، كافي، بعدين نحجي. سكتت، لأن شفتها زعلت، ومبين عليها شكد مكسورة، بس أبد ما توقعت أمير يضربها. لعد والحب الي بينهم؟ تأكدت ماكو حب، وكل الزلم نفس الشي، أنانين، وما يستاهلون الوفاء. كرهت الزلم، فوك ما كنت أكرههم. يعني إذا الي متزوجين على حب هيج يصير بيهم، شخلو للزواج التقليد؟ عجيبببب. كلت: هاجر: أروح أنام، تصبحون على خير.

طلعت وطفيت التلفون ونمت. كعدتني ماما الصبح علمود المدرسة، ما شبعت نوم، وإذا ما شبع نوم، أصير مثل الثولة. سويت نسكافيه علمود أصحصح، وما صحصحت. سويت اثنين وشربتهم. طبعاً، قبل ما أشرب، صورت ونزلت ستوري انستا. عندي كل شي أسوي، أنزله ستوري، حتى العالم تشوف، وأني حسابي عام، وعندي متابعين، ويحبون الي أنشره. وأمي تكلي: على الضرطة والفسوة تنشرين، هههه، شكد يضحك حجيها. سمعت هورن أبو الخط، طلعت بسرعة بدون ما أشد حذائي (تكرمون)

. شفت البنات، سلمت وكعدت، حجينه شوية لحد ما اجت رزان. فاتت وصوتها يعلي بالخط، وأبو الخط يباوعلها ويضحك. كالت: رزان: أول شي، سلام عليكم، شلونجن؟ الكل: زينين. رزان: تدرون، خطوبتي راح تصير أسبوع الجاي، راح أسوي حفلة، وراح أدز كرتات دعوة، عود أريد الكل يمي، وأريد نسوي فعاليات. سارة: وين راح تكون؟ رزان: راح نسويها بالبيت. ريماس: ليش مو قاعة؟ رزان: تعرفين وضع بابا، ما يسمح.

هاجر: أي، صح. التخطيط خلي عليه، خوش، بس أي يوم بالضبط؟ رزان: الجمعة مو هاي، الي تجي البعدها، لأن هما يجون قبل كم يوم علمود نخطط. هاجر: أي، خوش. وصلنا المدرسة، وكل عادة، نزلنا براس الفرع. كالت ريماس: ريماس: خلي نروح نشتري من ابن خالتي. سارة: شنو اسمه؟ ريماس: عمر. هاجر: أنتِ تحبيه؟ ريماس: أي، بصراحة. هاجر: من إيمتى؟ ريماس: جان مسافر علمود الدراسة، فما كنت أعرف بي. من رجع قبل كم شهر، حبيته. سارة: يعني جان مسافر؟

رزان: هو شنو؟ ريماس: شنو؟ رزان: أقصد، تحسي معجب بيج أو لا؟ ريماس: ما أعرف والله. وصلنا المحل ودخلنا نشتري، جان محل كبير، نفس السوبر ماركت، وبي كم شخص. كلت: هاجر: هسه الي معاه كرايب لو غرباء؟ ريماس: أصدقاؤه. فترنا شوية حتى نشوف شنو نشتري. أني اشتريت كولا ونستله وجبس، والبنات هم. رحنا نحاسب. صار يحجي مع ريماس، كال: عمر: أشونج ريماس؟ أشونها خالتي؟ ريماس: زينة الحمد لله، تسلم عليك. عمر: تجون الخميس على بيت جدي؟

ريماس: أي. وأنتوا تجون؟ دار نقاش بينهم، ونحنا حاسبناه يم ولد صديق عمر. سمعت بنية تكول: ... أشقد ما تستحي، أشون تحكي معاه، هيك. ... عادي، عندهم هذولي ما يستحون. ... قح***. من سمعتها تحجي هيجي، فقدت. انداريت عليها وكتلها: هاجر: ألفاظج مو مال بنية محترمة وتستحي، وبعدين أنتِ أش تعرفين حتى تحجين؟

الولد ابن خالتها وجاي يحجون، يعني ما بيها شي وحدة تحجي مع ابن خالتها، وغير هيج، اعرفي السالفة وبعدين احجي. ناس ما تستحي تحجي من يمها، وما تعرف السالفة. ... أسفة، ما كنت أعرف. هاجر: خلاص، خلاص، روحي. راحت، وأشوف الولد الي واكف على الكاشير مبتسم، وأني معصبة. دحكت عليه من فوق لتحت، أكثر من مرة، هاي عادتي، من أضوج أسويها، وإذا مجان عاجبني الوضع، هم أسويها. ضربتني رزان وكالت: رزان بهمس: عوفي الولد، هسه يحسب غير شي.

هاجر: شنو يحسب؟ خلي يحسب. طلعنا من المحل ورحنا للمدرسة، ومر الوقت طبيعي، ورزان خبصتنا بالخطوبة، ونحنا نضحك ونحشش عليها. جان يوم حلو، لابأس به. رجعت للبيت وتغدينا، وغسلت مواعين، وطلعت نمت. كعدت بالـ 5 على صوت ماما، كالت: مروة: الجمعة نروح على بيت جدج. هاجر: أي، خوش. تعرفين، ما هاي الجمعة، الجمعة الي بعدها خطوبة رزان. مروة: رزان بنت... هاجر: أي. مروة: منو خطبها؟ هاجر: ابن عمتي. مروة: الله يقدم لها الي بي الخير ويسعدها.

طلعت ورحت سويت قهوة أصحصح. شربتها. زبلشت أدرس، صار المغرب، أخذت ريست ورحت ساعدت ماما. كملنا تحضير، وأذن العشاء. الكل راح يصلي ورجعنا كعدنا على السفرة. كال جدي: جدو: حسن وحسين، اتصلوا ما؟ حسن: أي، نصلي جدو. جدو: أي، عفيه، والي أشوفه ما يصلي، ياويله. كملنا أكل، وجدي يحجي مع بابا بخصوص الشغل، وبعدها كال: جدو: علي، لازم تغشع المحلات، ما كلو عليه.

علي: يابه، أني ما عندي مجال، العيادة مقلوبة، وغيغ، هشكل الدوام بالمستشفى. خلي ثامر يروح، هل كم يوم ما عنده شغل. جدو: قلتو أنت تروح. انتهى النقاش. سكت بابا احترام لجدي. كل يوم أكرهه أكثر من الي قبله. يجبر بابا يسوي كل شي، وما يخلي ثامر وتامر يتعبون، رغم الاثنين ما عندهم شغل وكاعدين هاي الأيام، بس لا، ما يكدر، لازم بابا.

كملنا أكل، وغسلت المواعين، وماما سوت جاي وصبت للكل. أني خلصت ورحت غرفتي، كعدت أدرس. ما حسيت إلا لما أجه مسج لتلفوني. شلت التلفون وفتحته، جان مسج من زهراء. مكتوب: زهراء: وينج حبي؟ اليوم متأخرة، غير عن العادة. شفت الساعة، جانت بـ 12:50. كتبت الها: هاجر: مراح ألعب وياكم اليوم، عندي درس كثير. خلصت وهسه نعسانة كلش، أروح أنام.

بعثتها وطفيت الجهاز، رحت نمت. حسيت الصبح ماما تكعدني. كمت وياها، أكلت وسويت نسكافيه، شربتها وطلعت أبدل. كملت ونزلت، لبست الحذاء (تكرمون) ، وانتظر شوية، واجه الخط. طلعت ومشيت الأيام هيج. يوم أدخل بوبجي وألعب، وعشرة لا. بعدها اجت امتحانات نص السنة، وخلصت، واجت العطلة، واليوم أول يوم عطلة.

وكل هاي الأيام، جان تيم يجي عدنا ويساعدني بكل شي. وبفضله، درجاتي توب. واليوم الكل يجي عدنا. مانسى قلق الامتحانات، لو مو تيم، جان هيه وكعت بكم درس، جانت صعبة كلش، بس من جان يشجعني وينطيني تحفيز. أتشجع، وخاصة من يكول: تيم: خلي إلياس يتندم على الساعة الي عافج بيها. صيري أحسن من أسيل، انجحي وروحي كلية، أحركي كلبه وكلب أسيل، وهيا تكره تشوفج ناجحة. أنتِ على عنادها، سوي العكس. رحت سلمت، جان الكل موجود، بس تيم وعمر ماكو.

كلت: هاجر: عجل، تيم وعمر ماكو، ليش؟ مريم: شوية ويجي عمر. إلياس: ليش ما تتحملين فراق حبيب الكلب؟ هاجر ببرود: أي، ما أتحمل. دار وجهه عني، يحجي ويا أسيل. صايرة تلعب نفسي منهم. أكدر أقول، صرت أكرهه، وأكره الكاع الي يمشي عليها، بس بعد اكو حقد بقلبي. رحت أشوف تلفوني بالـ غرفة، بين ما يجي تيم.

شفت رسائل من تميم، أكثر من 20 رسالة. خفت، وتوقعت زهراء بيها شي، بس من شفت الرسائل، انصدمت. بقيت فاكة حلكي وأقره، أعيد وأرجع أقره بالكلام، أحس ما أستوعب. عدت قراءة الكلام أكثر من عشر مرات، وكل ما أعيد، أرجف، والصدمة تزيد. قريتها مرة ثانية، وجان مكتوب: تميم: أني ما أعرفج من زمان، بس أني كلش حابج، وخاصة من تعاركتي وياي بمجمع السدير، انهوست بيج. ولما عرفت أنتي نفسج الي وكعت بحبها، تهت. مجاي أعرف ليلي من نهاري.

تميم: شكد ما أكولج أحبج، ما أكدر أوصف ربع حبي الج. تجي الأيام، وأثبتلج شكد أحبج، وأريدج. نيتي وياج أبد مو على غاية، أو لأن حلوة، أريد أتنّسس بيج. وهاي زهراء تدري شكد أحبج. أني ما أحجي بي، وأوفي، وأني مستعد أخطبج، بس أسمع موافقتج. أني أعرف بشنو مريتي، لا تبالي، زهراء تحجي أسرار الناس، لا، بس أني جبرتها تحجي.

تميم: من يوم الي شفتج، ما طلعتي من راسي. ويوم الي سألتي زهراء عني، وإذا رحتي للموصل أو لا. هنا عرفت أنتي نفسج. ما أعرف شنو من صدفه، بس الي أعرفه، أحبج وأريدج. ما أدري، كلش مصدومة، وأني ما عندي مشاعر تجاهه. أكيد أرفض. كلت: هاجر: أني طالبة سادس، مثل ما تعرف، وما عندي استعداد أدخل علاقة وزواج. أني مو كد المسؤولية. أني أهلي ما يزوجوني غريب من غير محافظة. وأنت ما بيك عيب، بس أني وأنت أبد مانرهم.

رد عليه بسرعة، جان مبين منتظرني، كال: تميم: ليش مانرهم؟ وعادي، أنتظرج لحد ما تخلصين سادس. هاجر: مانرهم، تفكيرك غير تفكيري. شاف الرسالة ومارد. طلعت من الانستا وطفيت الجهاز، وكمت حتى أطلع من الغرفة. أجه اتصال على الانستغرام منه. فتحته، وأجه صوته، بس جان هادئ: تميم: اسمعيني كلش زين، ماكو شي اسمه تفكيري غير تفكيرك. أني أريدج، افهمي يمعودة، أريدج، وأني أنتظرج لحد ما أكملين سادس. أصلاً أني هم كلية عندي. قاطعته وكلت:

هاجر: أني ما أريد أحب أحد، ولا أريد أحد يحبني. يكفي أنو نضل هيج أصدقاء. وإذا راح تضل تجيب سيرة الحب، ف حتى هاي الصداقة ما أريدها. عصب، وصار يعيط بالجهاز. خفت كلش، لأن أخاف من الصوت العالي والعياط. تميم: أنتِ ثولة، لو شنو؟ جاي أكولج أحبج، يعني أريدج. لا تضلين تاكلين خره، أريدج، فاهمه؟ سكت، وأني أباوع على الباب، أخاف أحد يجي. كلت: هاجر: ما كدر، افهمني رجاءً. أجيت أكمل، قاطعني وكال:

تميم: الج منا لأسبوع تفكرين بيها، وأريد جواب. أسبوع الجاي بنفس هذا اليوم. أجيت أحجي، سده بوجهي. كلش تنرفزت، كتبت: هاجر: عيب عليك تسده بوجهي. أشوه أنت ما عندك احترام؟ عبالك تهددني؟ ترا جوابي ما يتغير أبد، ف ما أنصحك تنتظر. دزيتها، وبقيت بالغرفة أنتظر يرد. طول تقريباً ربع ساعة، بعدها رد، وكال: تميم: مجاي أهددج، ومن سديته حتى لا أحجي شي يضوجج، وجوابج يتغير، ماريد أسمع هذا الجواب.

غلست على الرسالة، وما رديت. كمت أطلع، فتحت الباب، صار بوجهي إلياس. كلت: هاجر: خلصت من هذاك، اجيت أنت تكملها. إلياس: منو قصدج؟ هاجر: ما عليك، لا تدخل، شي ما يخصك. إلياس: احجي عدل. هاجر: وإذا ما حجيت عدل؟ إلياس: أعلمج أشون تحجين عدل. هاجر: خاب، ما طير أحسن.

دفعته من الباب وطلعت. رحت ويا البنات، سوالف وضحك، أريد أحجي الي بقلبي، وأريد أكول لـ إيلا عن تميم وشنو يريد، بس أراجع، أخاف تكول لـ تيم، والله يعصب ويزعل مني، وأنزل من عينه. كالت إيلا بهمس: إيلا: شبيج؟ أحد مضوجج؟ هاجر: إذا أكلج شنو مضوجني، ماتكولين لـ تيم؟ إيلا: طبعاً لا، هاي أسرار بيني وبينج.

أخذتها، وأخذت رسل، ورحنا لغرفتي، سديت الباب وقفلته، خوفاً أحد يجي. حجيت لهن على تميم وعلى كل شي، وشلون عرفته، وعلى يوم السفرة، وحتى من اعترفلي. الصبح، كالت رسل: رسل: أشون تحجين مع أولاد؟ هاجر: والله جنت أريد أدخل ويا بنية، وطلعوا هما، وهم موجودة زهراء، وصارلي زمان أعرفهم. إيلا: إذا يحبج ويريدج وصادق، ليش لا؟ هاجر: شهل حجي؟ طبعاً ماريده، شبيج؟

أني وهو أبد مانرهم، حسب ما عرفت، هو عصبي، وأني عصبية، مستحيل تضبط، وغير هيج، لسانه وصخ. إيلا: كل الولد هيج صايرين، محد هسه يحترم، وكلها ولسانها وصخ. رسل: أي صح، حتى شهم هيج. إيلا: مو بس شهم، حتى تيم وعمر ويونس. أكلج، عندج صورته؟ طلعت صورة من الانستا وشفتها لهن. كالت: إيلا... ... انتهى البارت. شنو توقعاتكم لبارت الجاي؟