رواية قصيرة القامة طويلة اللسان الفصل الثاني 2 - بقلم شيماء صبحي

فضلوا الشباب يبعدوا قمر عن هادي لحد ما هادي زعق فيها وقال: "انتي متخلفة رسمي، انتي مش عارفة أنا مين يابت! قمر حطت إيديها في وسطها وقالت: "أنا مابتتهددش، وبعدين انت بق مش هتسكن معاهم، تتفضل تمشي برا! الشباب بصوا لهادي وخدوه بعيد وهما بيقولوا: "هادي دي فرصة متتعوضش، وبعدين ياصاحبي أنا آسف بس انت دلوقتي مبقتش ابن صاحب الشركة، انت بقيت شاب عادي، يعني معلش في الكلمة بقيت فقير وزيك زينا! هادي بص عليهم بضيق وقال:

"أنا مستحيل أقعد في المكان المقرف دا، وبعدين ملقتوش غير دي اللي هتسكنوا عندها؟! سعيد قرب منه وحط إيده على كتفه وقال: "أهي دي اللي وافقت بق، وبعدين بتقولك المنطقة دي مبتسكنش حد غريب! هادي: "لأ يا سعيد يعني لأ، أنا مستحيل أشوف وش القزمة دي كل يوم، مستحيل!!! خالد: "ياعم وانت مالك بيها، انت هتروح الشركة وبس وإحنا اللي هنشغلها الورشة، ملكش دعوة بحاجة! هادي: "يعني مفيش غير المنطقة دي؟ محمد:

"إحنا لفينا وكانوا مناطق غريبة وكلهم بلطجية، والحمد لله إننا لقينا منطقة نضيفة نوعاً ما، وبعدين يا عم متتبطرش، انت ناسي إننا كلنا بقينا في الشارع ويعتبر دي اللي نجدتنا! هادي قال: "خلاص موافق، بس مش عايز أشوف وشها ولا تتكلم معايا!! الشباب: "خلاص إحنا هنقولها ملهاش دعوة بيك وانت بس ملكش علاقة بيها!!

هز هادي راسه والشباب لفوا علشان يتكلموا مع قمر، ولكنهم ملقوهاش، فضلو يبصوا حواليهم بصدمة لحد ما هادي اللي شافها عند الورشة وقاعدة على كرسي وبتبصله قال: "أهي هناك أهي! الشباب بصوا على مكان ما هوا بيبص لاقوها فعلاً، قربوا عليها وعلى وشهم ابتسامة وقال خالد: "آنستي قمر إحنا آسفين على اللي حصل دا، بس أصل صاحبنا دا كان ابن ناس أغنية وهما حالياً خسروا كل فلوسهم وأول مرة ييجي منطقة زي دي! محمد:

"هو صحيح مغرور شوية بس طيب والله، وبعدين انتي الكبيرة سامحيه عشان خاطرنا! قمر وقفت وقالت: "أنا خلاص مفيش شقق أسكنها، واتفضلوا بق في مناطق كتير أحسن وأرقى من هنا! الشباب بصوا عليها بصدمة وكانوا هيتكلموا، وصل عبدالله واللي قال: "خير يا قمر مين الشباب! قمر: "مفيش يا عبده دول كانوا بيسألوا على حاجة وخلاص ماشيين! عبدالله: "وكانوا بيسألوا على إيه إنشاء الله، أصل باين عليهم كدا مش وش بهدلة! سعيد:

"متشكرين يا آنسة قمر إحنا هنمشي بعد إذنك! قمر: "إذنكم معاكم يا غاليين، نورتوا المنطقة!! الشباب رجعوا لهادي واللي قال: "إيه رجعتوا ليه! محمد: "افرح بق ياعم أهي طردتنا وقالتنا معنديش شقق أجرها، يلا خلينا نلف على أي منطقة تانية على قد فلوسنا! هادي بص له بغيظ وقال: "لأ بقولكو إيه متحسسونيش إننا السبب! سعيد قرب منه وقال: "انت ملاك مبتعملش أي حاجة! خالد: "منك لله ياعم بعدما لقينا حد يعبرنا، أديك بوظت كل حاجة! هادي:

"أنا معملتش حاجة، دي هيا اللي عيلة مجنونة؟ سعيد: "أنا عندي حل وياريت تقبله! هادي بص له باستغراب وقال: "حل إيه دا إنشاء الله! سعيد: "تروح تعتذر منها وتخليها توافق!! هادي بصوت عالي هز أركان المكان: "نعم اعتذر من دي! قالها وهو بيشاور عليها وهيا لاحظت صوته العالي وقفت، ولكن عبدالله قال: "فهمني إيه الحكاية! قمر بضيق: "الولد اللي هناك دا غلط فيا وأنا طبعاً وريته مقامه، بس شكله بيغلط تاني وأنا مستحيل اسكت له! عبدالله مسكها:

"أهدي يا قمر وبعدين هما كانوا عايزين إيه! قمر وهيا بتبص على هادي وأصحابه: "بيدوروا على شقة يقعدوا فيها وأنا قولت لهم على شقة جمال أخويا، ولاكن الواد اللي شايف نفسه دا قليل الأدب! عبدالله: "وفيها إيه يا قمر، ماتخليهم يأجروها، انتي ناسيه إنك محتاجة فلوس! قمر بضيق: "أنا اتجرحت في كرامتي يا عبده وبالذات إن أول مرة واحد يغلط فيا! عبدالله: "استني انتي وأنا هروح أتفاهم معاهم" قمر:

"استني بس أنا كنت اتفقت معاهم هيسكنوا في الشقة ببلاش مقابل إنهم يشغلوا ورشة أبويا! عبدالله: "دا عال أوي، طيب استني انتي وأنا هروح أحل الموضوع؟ عند هادي: خالد: "وطي صوتك يا هادي إحنا مش ناقصين! هادي بص عليه بغيظ: "انتوا السبب، خليتوني أجي هنا ليه! سعيد: "إيه يا هادي انت عارف اللي حصل، محنا اطردنا كلنا من الفيلا والبنك حجز على كل أملاك أبوك! عبدالله: "مساء الخير يا شباب! بصوا عليه وقالوا: "مساء النور! عبدالله:

"أنا عرفت إنكم اتفقتوا مع قمر عشان تسكنوا في الشقة مقابل تشغلوها الورشة" الشباب بموافقة: "أيوة! عبدالله: "بصوا بق دا كلام بيني وبينكم بصراحة، قمر من بعد وفاة أبوها وهيا بتدور على حد يشغل الورشة وكل اللي جم يشغلوها طمعوا فيها، وانتوا بق باين عليكم ولاد حلال. ولو انتو موافقين ترجعوا في قراركم أنا مستعد أتوسطلكم عند قمر! الشباب بصوا عليه بفرحة وكان هادي هيتكلم، محمد حط إيده على بوقه وقال: "موافقين طبعاً!!

عبدالله ابتسم وقال: "طيب أنا هروح أتكلم مع قمر ولما أشاورلكم تيجوا! الشبابا بفرحة: "اتفقنا! عبدالله مشي وهما كانوا واقفين يبصوا عليه وكان محمد لسه حاطت إيده على بوق هادي! عبدالله شاورلهم يجوا وهما راحوا وقالت قمر: "أنا هسامحكم المرة دي، بس أنا مش عايزة أختلط بصاحبكم الرخم دا ولا يكون ليا كلام معاه حتى!! الشباب: "متقلقيش إحنا مستحيل نخليه يقرب منك ولا يضايقك، بس هاتي المفتاح بق لأننا هنموت وننام! قمر طلعت

المفتاح من جيبها وقالت: "هاتوا شنطكم وتعالوا ورايا! الشباب مشوا عند التاكسي وبصوا لهادي عشان يحاسبه! وهوا استغرب نظراتهم وقال: "بتبصولي كدا ليه، أنا معيش فلوس! الشباب بصدمة: "بتقول إيه ياعم! هادي: "انتوا من الصبح عمالين تعايروني أبوك فلس، أبوك فلس وناسين إني مفلس أنا كمان! سواق التاكسي: "خلصوني بق ياشباب أنا واقف بقالي كتير! سعيد قرب من السواق وقال: "حسابك كام يسطا! السواق: "300 جنيه!

الشباب بصوا لبعضهم وبدأ كل واحد يطلع من جيبه مبلغ لحد ما جمعوا 250. محمد: "فاضل خمسين جنيه! هادي: "وأنا هكدب عليكوا ليه، أهو معيش حاجة" سعيد قرب من السواق وقال: "أنا آسف ليك بس اللي معانا كلهم 250" السواق هز راسه وقال: "هات يابني خليني أمشي، دنتو ربنا يكون في عونكم" أخدوا شنطهم والتاكسي مشي وكل واحد أخد شنطته البسيطة ومشي، وفضل هادي يبص على الأربع شنط بتوعه بضيق وقال: "أنا مستحيل أشيلهم!!

طلعوا الشباب ووصلوا لمكان الشقة وكانت شقة متهالكة ولاكن حلوة نوعاً ما. قمر: "هي دي شقة أخويا جمال، أهم حاجة تاخدوا بالكم منها دي أغلى حاجة أخويا سابها! سعيد: "شكراً أوي يا آنسة قمر! قمر بابتسامة: "الشكر لله، أنا هسيبكم ترتاحوا وبكرة تنزلوا تروقوا الورشة؟ الشباب هزوا راسهم بالموافقة ولاكنهم سمعوا صوت دوشة، بيبصوا لاقوا ثلاث رجالة طالعين وكل واحد شايل شنطة وبيقولوا بتعب: "دي شنط الأستاذ هادي" خالد بقلق: "وهوا فين هادي"

الرجالة: "طالع ورانا! وصل هادي وقال: "متشكر ليكوا يا رجالة" بص على الشقة بتقزز وقال: "هي دي الشقة! الشباب هزت راسها، وهوا عدى من جمب قمر من غير ما يبصلها وقعد على كنبة، ولكن فضلت الرجالة واقفة وبصين عليه! هادي بإستغراب: "انتوا واقفين ليه! الرجالة: "مستنين الحساب! هادي باستغراب: "حساب إيه! الرجالة: "حساب الشيالة يا باشا" قمر بصت عليه بسخرية ومشيت، وفضلوا الشباب يبصوا لهادي بصدمة ورجعوا بصوا للرجالة وقالوا:

"وانتوا حسابكم كام" الرجالة: "هناخد 50 جنيه ونقسمها على بعض! عبدالله كان واقف وسعيد قرب منه وقال: "انت باين عليك جدع، ممكن تحاسبهم وأنا والله هديهملك" عبدالله هز راسه وفعلاً حاسب الرجالة، وقبل ما يمشي سمعوا صوت عالي جاي من المطبخ كان هادي اللي كان جوا وبيقول: "إيه دا انتوا منظفتوش من امتى! عبدالله: "من ساعة وفاة المرحوم! الشباب بصدمة: "مرحووووم مين المرحوم؟! عبدالله:

"المعلم جمال أخو الست قمر، أصل بعيد عنكم مات في الشقة دي محروق!!!!