رواية كيان الفصل الأول 1 - بقلم اسماعيل موسى

قبل عشر سنين لقيت عملة معدنية مدفونة في التراب وأنا بلعب في الشارع قدام البيت. كنت فاكرها عملة معدنية، لكن لما مسكتها لقيت شكلها غريب. خدتها على البيت وركنتها على الرف وعدت الأيام والسنين ونسيتها.

لما عمري وصل 19 سنة توفى جدي وكنا بننقل الأغراض من غرفته. بالصدفة العملة المعدنية سقطت على الأرض. مسكتها وبصيت عليها وافتكرت أيام زمان لما لقيتها في الشارع. فيه حاجة غريبة شدتني لشكلها ونقوشها، عشان كده نضفتها وغسلت الصدأ اللي فيها بالغاز لحد ما لمعت. كان مرسوم عليها حاجات غريبة وجميلة، زهرة، وبنت صغيرة جداً، وأشكال تانية معرفتهاش. كانت منقوشة بدقة مذهلة تخليك تسرح في جمالها.

وخدتها معايا غرفة نومي وركنتها على الطاولة جنبي. أنا بصحى متأخر عشان كده دايماً أختي الصغيرة بتدخل غرفتي عشان تصحيني وكمان تلعب معايا شوية. أختي بتعمل ضجة كبيرة لما بتدخل، لكن اليوم ده أنا فقت من النوم لوحدي. أختي الصغيرة كانت واقفة جنب سريري بتبص على العملة المعدنية بتركيز وشرود. بهزر معاها بقولها: "إيه يا كوكى، أول مرة تدخلي غرفتي من غير ما تعملي زيطة أو أحس بيكي؟ طبعاً لسه داخلة؟

كوكى قالت: "أنا هنا من وقت طويل، من أكتر من ساعة." فتحت عيني باستنكار. "بطل هزار يا كوكى، انتي واقفة جنب سريري من ساعة من غير ما تعملي أي صوت؟ مستحيل." كوكى قالت: "كنت ببص على البنت الصغيرة." "بنت مين؟ " سألتها وأنا بتلفت جنبي. كوكى قالت: "البنت اللي في العملة المعدنية، كانت بترقص رقص حلو أوي. مش عارفة بتعمل كده إزاي." "بتعمل إيه يا كوكى؟

"بتطير في الجو يا سمسم وبعد كده ترجع مكانها. والزهرة دي كانت خضرة كأنها حقيقية." همممم. خدت كوكى في حضني. "انتي بقيتي مؤلفة قصص بارعة يا كوكى، أنا بفكر أعملك رواية لقصص الأطفال." كوكى زعلت وحسيت إنها هتدمع. كوكى مش بتعرف تكدب وكمان ملامح وشها ما كانتش بتهزر. تعدلت كده وبصيت على العملة النحاسية. "بس يا كوكى، زي ما أنتي شايفة مفيش حاجة بتتحرك في العملة." كوكى: "أصل هي وقفت لما انت صحيت وبطلت ترقص."

سمعت صراخ والدتي بره الغرفة. "مش كفاية ساعة لعب؟ أنا حضرت الفطار أكتر من مرة." كلمة "ساعة" رنت في ودني وخلتني أنهض وأطلع أقعد على الطبلية. وكوكى اتأخرت شوية. سألت أمي: "هو كوكى كانت في غرفتي ساعة كاملة؟ والدتي بصتلي وقالت: "ما انت مش بتبطل لعب معاها، هعمل إيه يعني؟