رواية لعالم تاني الفصل الخامس 5 - بقلم سلسبيل أحمد

ايوا بس انت هتسبها؟ اكيد مش هسيبها انا بقول كدا عشان اتأكد ان مفيش خطر عليها ومش عايزها تعرف كل ده عاوزها تعرف بس مين أمها بلاش خالص تعرف ان مرات أبوها كانت عايزها تقتلها ولا كل الحوارات دي جميلة مش هتستحملها. موبايلي رن وكانت الداده قولت اكيد جميلة حصلها حاجة! انا لازم أمشي دلوقتي سبلي عنوانك ورقم تليفونك ومتقلقش عليها. نزلت ركبت العربية وفي خلال دقايق كنت في الفيلا. هي فين حصل حاجة؟

لا يا حبيبي دي هادية خالص وطلبت تشوفك. طيب أنا هدخلها. جميلة؟ حببتي انتي كويسة؟ هزتلي راسها وبعدين اتحركت من مكانها وفضت ليا مكان، فا طلعت على السرير جنبها واخدتها في حضني وطبطبت عليها ولقتها بتستخبي في حضني. متزعليش أنا معاكي ومش هسيبك مهما حصل. زين أنا خايفة… أنا عندي إحساس إنهم… وإني خلاص كده مش هلحق أشوفهم أبداً!

لا يا جميلة إحنا لسه هنعمل التحاليل ونتأكد وايا كانت النتيجة مش عاوزك تزعلي ربنا مش بيعمل حاجة وحشة أبداً. فضلت في حضني لحد ما نامت واطمنت عليها بعدين اتحركت وفضلت أعمل اتصالات كتير بحاول أوصل بيها لمعلومات عن كل اللي بيحصل مؤخراً. منمتش طول الليل وبفكر في ردة فعلها لما تعرف إنها ليلي. مش جميلة!

صحيت بدري وروحنا فعلاً نعمل تحليل الـDNA واستعجلنا النتيجة وخلاص بقت عارفة إنها ليلي مش جميلة. فضلت هادية ومش بتتكلم وأنا محبتش أضغط عليها. طلعنا العربية وفضلت ساكتة فا حطيت إيدي على الدركسيون عشان أتحرك لكن هي مسكتها وبصتلي. أنا عايزة أزورهم.. عايزة أروح عند ماما وبابا. دلوقتي؟ أيوا. بس دلوقتي الدنيا قربت تليل وأنا خايف قلقان عليكي مكنتش متوقع ردة فعلك دي. متقلقش وأنت هتكون معايا أنا عايزة أروح لهم دلوقتي.. ممكن؟

حاضر بس إحنا منفهمش المكان. هنسأل عمو اللي جالك ده. طيب حاضر ثواني. اتحركنا فعلاً أنا وهي بعد ما كلمته وعرفت مدفونين فين. كانت طول الطريق سرحانة كنت واخدها في حضني لآني عاوزها تحس إني جنبها. جميلة قبل ما نروح كنت عايز أقولك حاجة. مامتك ماتت أول ما والدتك واللي قصيت معاها خمس سنين وأنتي صغيرة تبقي مرات بابكي واحنا دلوقتي هنروح لمامتك ماشي؟ هزت راسها بتفهم غريب وسكتت.

وصلنا فا مسكت إيديها ودخلنا واحدة واحدة. فضلت واقفة لثواني وأنا مش عايز أتكلم عشان مترتبكش. ماما ازيك؟ وحشتيني أوي.. أنا آسفة بقى إني مجيتش بدري كل ده معرفش إنتي سبتيني بسرعة ليه بس أنا بحبك جداً وكان نفسي أشوفك أوي أنتي وبابا. أنا عارفة إني هشوفك في الجنة. زين قالي إنك هناك. أيوا صح نسيت أقولك يا ماما إن زين اللي ساعدني أنا كنت خايفة ولوحدي في الشارع وهو خدني معاه. ودلوقتي اتجوزنا عشان أنا حبيته أوي.

وبصتلي ومسكت إيدي وأنا حاولت أمسك دموعي وأهدى. أنا بحبه أوي يا ماما وأكيد أنتي هتحبيه. وأنا بحبك جداً يا جميلة. فضلت دقايق واقفة طبطبت على كتفها ومشينا. حسيت إنها ارتاحت شوية. وصلنا الفيلا وبعدين طلعنا سوا. كل ما تحبي تروحي في أي وقت أنا هوديكي. شكراً يا زين. شكراً إيه؟ أنتي يا جميلة كل حاجة بالنسبالي أقرب حد ليا وصاحبتي ومراتي وبنتي وكل حاجة! ابتسمتلي وحضنتني جامد.

أنا مش معايا أي حد دلوقتي غيرك بس أنت كفاية. أنا مبسوطة إني عرفتك وعايزة أفضل هنا معاك أنت ودادة فاطمة. طلعتها من حضني وبصيت في عيونها اللي كل مرة أشوفهم يغرقوني ومسكت إيديها وبوستها برقة. أنا اللي مبسوط عشان جيتي حياتي. أنا حسيت إني كنت في الضلمة. وحياتي نورت أول ما ظهرتي يا جميلة ومش هسمح لحد ياخدك مني.

اليوم عدى من غير أحداث تانية عشان الأحداث كلها كانت تاني يوم الصبح لما المحامي جاللنا مرة تانية اللي كان مصمم ياخدها أول مرة! وروحنا معاه الفيلا بتاعة أبوها واللي مفروض فيها أخوها. إزيك يا ليلي؟ أنا اسمي جميلة! زي ما تحبي دلوقتي هيجي أخوكي. كنت مستني أشوفه واتفاجئت بيه وبشكله هو أصغر منها بسبع سنين عنده 11 سنة وكان باين إنه مكسور جداً ووحيد! أنت بقي كريم؟ أيوا وأنتي مين؟ جميلة أختك. بجد؟؟ أيوا.

شوية ولقيتها قربت حضنته وهوا بادلها الحضن ده وحسيت ساعتها إن جميلة هيكون ليها حد بيحبها بجد. ازيك يا أستاذ كريم أنا زين. بص لجميلة وسلم عليا. دا يبقى جوزي. يعني هتمشي معاه؟ أيوه.. هو أنت هنا لوحدك؟ تؤتؤ معايا تيته وساعات عمتو بتيجي. طيب أنا كمان هفضل أجي ونلعب سوا ونخرج كمان. هو أنت بتحبيني؟ أكيد ليه بتسأل حاجة زي كده؟! أنا كنت فاكر إنك ميتة!

بابا وراني صورتك مرة. بس أنا مبسوط أوي إنك رجعتي وهيكون ليا أخت. أنا ممكن أجيلك كمان. صحنا رديت عليه وأنا بقربه مني. بيت جميلة يبقى بيتك يعني تيجي تبات إن شاء الله تقعد شهر زي ما أنت عايز اتفقنا. ابتسمتلي. اتفقنا. قعد جمب جميلة لحد ما نزلت ست كبيرة وشكلها بقي مكنش مبشر بالخير خالص. يا أهلا بنت أميرة. استوعبت جميلة إن دا اسم مامتها وقامت تسلم عليها بتلقائية. إزيك؟ ردت عليها ومناخيرها في السما.

كويسة، يا ترى كنتي فين كل دا في ملجأ ولا فين؟ كنت. فقاطعتها ورديت عليها. كانت مع ناس ربوها لما تاهت. ضحكت بسخرية. تاهت؟ اها تاهت. امم وأنت تطلع مين؟ جوزها. والله كويس إنك لقيتي حد تتجوزيه. كالعادة جميلة مفهمتش وردت بساذجة. أيوا فعلاً زين كويس أوي. طيب فرصة سعيدة إننا اتعرفنا عليكوا. طبعاً دا بيت جميلة بس هي دلوقتي هتقعد معايا. قومت وجميلة مستغربة تصرفي. مسكت إيديها. باي يا كريم. باي يا زين باي يا جميلة.

باي يا روحي هاجيلك تاني. هستناكي يا جميلة. كنا خارجين لحد ما وقفنا اللي اسمه عاصم واللي يبقى أخو مرات أبوها. حيلك حيلك لسه بدري. أعتقد كلامي كان واضح جميلة مش هتقعد هنا. أنت حر بس أعتقد برضو إن في حسابات لازم نتكلم فيها. حسابات إيه؟ شركة أبوها وأملاكه. هتقدم تنازل عنهم. إيه! زي ما سمعت. افتكر إنها مش هتقدر تدير أي حاجة تبع الشغل وأنت طبعاً فاهم ليه؟ زين يعني إيه الكلام دا هو يقصد إيه؟

استني يا جميلة. أنت عايزها تقدم تنازل عن حقها؟ متخافش حقها محفوظ من الأرباح طبعاً بس الإدارة هتفضل لينا. وخلي بالك لو رفعنا دعوة هنكسبها مجرد ما اللجنة تشوفها وتشوف قد إيه هي ساذجة. نهى كلامه بابتسامة خبيثة. أنت بتتكلم ليه كأن ناقصها حاجة؟ دي بتفهم أحسن من اللي أنت مشغلهم ومنك. وأنا مقلتش حاجة هي زي الفل عموماً خد وقتك وفكر ولو عاوز نمشيها محاكم براحتك.

خدتها ومشيت بسرعة لآني مستحملتش حرقة دم أكتر من كدا من الراجل المستفز ده ولا أم مرات أبوها!! زين في إيه شكلك زعلان؟ نتكلم لما نروح. طيب هو عمل إيه زعلك كدا؟ أنتي عرفتي عيلتك خلاص وطلعتي بنتهم. وهو عايزك تتنازلي عن حقك يعني ميراثك من أبوكي. يعني فلوس؟ اها. طيب عاديك. كتمت عصبيتي. يـ جميلة عادي إيه؟ بصي خلاص لما نروح أفهمك. زيييين بص قدامك!!!!! وقفت العربية مرة واحدة واتنفست بصعوبة. مسكت إيدي ورفعت وشي ليها.

أهدى يا زين أنا معاك مش مهم أي حاجة تانية. أنا خايف عليكي الناس دي مش مرتحلهم!! متخافش هيحصل إيه يعني! إزاي وهما عايزينك تتنازلي عن حقك؟ مش فارق معايا أنا موافقة. مش عايزة ميراثك! أنا مش عايزة حاجة.. مش عايزة غيرك أنت ودادة فاطمة وبس كده. قربتها لحضني وأنا بتأكد كل مرة بضايق فيها إن مفيش غيرها بيريحني! طيب أنا قررت قرار حلو. أنت عايزة كريم مش كدا؟ عرفت منين!؟ حسيت بيكي. عيونك كانت بتلمع وإنتي بتكلميه.

بصراحة اها حبيته وحساه وحيد زي هو أكيد ملوش ذنب في أي حاجة. أنا هعرف أخده ونجيبه معانا مدام كدا كدا هنتنازل. بجد!!!!!!!! عيب عليكي. مش هتضايق من وجوده؟ لا طبعاً مش أنتِ هتبقي مبسوطة!؟ اه. يبقى خلاص ييجي معانا. وطبعاً عملتها خدمة قصاد خدمة وليلي أخدت كريم يعيش معانا قصاد إنها اتنازلت عن كل حاجة وطبعاً قبلوابكل سهولة ومكنش فارق معاهم الولد..!

وجه كريم يعيش معانا وكنا عايشين فترة سعيدة جداً وحتى الناس اللي ربوا جميلة روحنا ورجعت تسلم عليهم وتشكرهم.. واستمرت حياتنا في حب وهدوء.. بعد مرور سنتين. إيه؟ إيه! أنا عايز بوسة! زين ابعد عني كفاية ابنك. مانتي شيلاه وعمالة تدلعي فيه وسايبة أبوه! أبوه مش محتاج دلع دا كبير. جميلة بصي كدا على الصورة دي. مالها؟ صورة جوزنا دي المتعلقة. اها. هكسرها على دماغ الواد ده لو مهتمتيش بيا أنا كمان. أنت بتغير من ابنك؟ اها بقي.!!

إيه ده كيمو حبيب قلبي تعالي. كيمو اها دا كان يوم أسود يوم ما جبتلك كيمو كمان. مش جبته عشاني؟ للأسف! يبقى فدايا. أكيد طبعاً يا داداااااااااا. بتزعق كدا ليه يا واد؟ خدي ابني مش دا ابني؟ خديه تاويه في أي حتة. شلت الواد من إيد جميلة. زين الواد!!! جرى إيه يا زين ما تسبيه مع جميلة. لأ يا دادة جميلة هتقعد معايا نقول كلام سر. خليتها تاخده هوا وكريم فعلاً وطلعوا بره. أنت مجنون يا زين؟ اه. عايزة ياسين وكريم! عيالي رجالتي. لأ.

زين بطل رخامة. أنا رجالتك برضو. عايزهم معاك مليش دعوة. قررت ألعب على مشاعرها بقي ومثلت حبتين. أنا مخنوق. إيه ده يا زين مالك. حطيت راسي ما بين إيديا فا تلقائي منها رفعت راسي ليها وهي بتبص في عيني. مالك يا زين؟ مالك كمان ونهار. زعلان عشان مبقتيش معايا خلاص. ماهو لسه ياسين مكملش سنة وعايز اهتمام كتير. مانتي معاكي دادة فاطمة مفيش ليا ساعة في اليوم حتى تسأليني عملت إيه أي حاجة. خلاص حقك عليا متزعلش. حضنتها.

نفسي أعرف أزعل منك. كشرت. هتقدر؟ مبقدرش بضعف يجدعان حد يشوف العيون دي ويزعل؟ طب خلاص أوعدك هنقعد سوا. سندت راسي على رجلها فا إيدها سرحت في شعري. تعرفي أول يوم شوفتك حبيتك من أول جملة قولتيها زي الأطفال. وفجأة بقيت مفروض آخدك معايا البيت وأنا عمري ما دخلت فيه أي حد. كلامك كان زي الأطفال ومسكت إيدك للجاكيت بتاعي كأنك بتستخبي. كل ده في أول مرة بس؟

وقعتيني من أول جملة يا جميلة والله وبالذات لما قولتلك هاتي إيدك. طلعت صغننة وكتكوتة خالص مقارنة بإيدي كأني ماسك قطة. أنا أول مرة عرفت الحب كانت معاك. كنت مرتاحة ومطمنة وأنا جنبك وده عمره ما حصلي مع أي حد. وأنا مش عايز حاجة من الدنيا غير إنك تبقي مطمنة. تعرفي كانت صدفة غريبة إنك توقفيني أنا بالذات. بحمد ربنا عليها كل يوم. أنا بجد بحبك أوي يا زين. بوست خدودها. وأنا بموت فيكي يا حبي الغريب اللي خدى لعالم تاني معاه.

حبك الغريب وعالم تاني؟ ماهو لما أقع في واحدة غريبة أول مرة أشوفها يبقى ده أغرب حب. ولما أكتشف معاكي حياة أجمل بكتير يبقى ده عالم تاني. ضحكت. معاك حق. غريبة فعلاً بس أوعي تقع مرة تانية في حد غيري. اياك! تؤتؤ مش هقع أبداً عشان مفيش زيك. ولو في مش عايز غيرك. أنتِ الحب الأول والأخير.