رواية لعشقه قواعد الفصل الثالث 3 - بقلم رحمة محمد

رزق: انتي مين يا بت وبتعملي إيه هنا؟ أميرة: جاية عايزة سليم بيه. رزق: وه وه سليم بيه مرة واحدة كده، أيوه أيوه فهمت، تعالي ورايا. أميرة: فهمت إيه يا عم انت، بقولك... رزق بزعيق: يا تمشي ورايا يا تروحي من هنا، قولتي إيه؟ أميرة: وراك يا كبير، انت بتقفش ليه، اتفضل. منك لله يا زيد انت وأفكارك. رزق: بتبرطم تقولي إيه يا بت؟

أميرة: اتكلم عدل، وأقول اللي أقوله، ملكش دعوة، انت المفروض إنك هتوصلني بسليم بيه وبس، غير كده ما أظنش إنه شغلك. رزق: لسانك طويل، شكلك مش هطولي فيها، خشي يا ختي، هتقابلي ست هنية جوا، وهي هتفهمك، وبعدها هتوصلك بسليم بيه. أميرة: طيب. احم، السلام عليكم. هنيه: وعليكم السلام، انتي بقى جاية تشتغلي في المطبخ ولا عند البهايم ولا في التنضيف عاد؟ أه واسمعي، طول ما انتي هنا وشك يكون متغطي. أميرة: إيه كل ده، وأغطي وشي ليه؟

أنا مش منتقبة، وبعدين أنا مش جاية اشتغل، أنا عايزة أقابله، انتوا ليه محسسيني إني هقابل وزير ولا سفير خارجية؟ هنيه: انتي شكلك متعلمة ولهجتك مش زينا، انتي من مصر؟ أميرة: تقريبًا، بس جاية لناس قرايبي هنا، لكن معرفش ليهم طريق، وهما قالولي هنا إن سليم بيه يعرف البلد كلها. هنيه: آآآه، طيب أنا هبلغه كلامك ده، ولوقتها هتستني برا، لاما هتغطي وشك، كل اللي هنا طالما صغيرة لازم تتغطى وشها، وخصوصًا لو حلوة زيك كده.

أميرة: مع إني مش فاهمة بس ماشي. عن إذنك هتكلم في الفون بس. هنيه: وه اسمه إيه، التليفون قصدك؟ جلع بنات، صحيح، روحي يا ختي. والله شكلك تستاهلي اللي هعمله فيكي يا مصرواية. أميرة: السلام عليكم. أيوا يا زيد وصلت أهو ودخلت وقابلت واحدة كده اسمها هنيه. زيد: بتقولي قابلتي مين؟ هنيه، طيب وشافت وشك ولا غطتيه؟ أميرة: ياربي، البلد كلها اللي عايزاني أغطي وشي دي، لا يا عم، وبعدين الدنيا حر جداً وأنا مش منتقبة.

زيد: يا حلاوة، وطبعاً اتكلمتي بلهجة مصر مع وشك الحلو، طيب اقفلي وأنا هاجي علطول، وانتي شوفي أوضة واقفلي على نفسك لحد ما أجي، يلا بسرعة. أميرة: في إيه؟ فهمني، وإلا مش هعمل حاجة من كلامك ده. زيد: هنيه هتجيب مقص وتقص شعرك خالص، ده غير البهدلة، وكل ده لأن حضرتك شكلك حلو ومصرواية، فهي هتشوف إن دي تربية. أميرة: انت بتقول إيه ده؟ أنا أسجنهم كلهم.

زيد: ده لو عرفتي تخرجي، أبوس إيدك، شوفي أوضة استخبي فيها على ما أوصل، يلا بسرعة.