رواية للقدر راي اخر الفصل الثاني 2 - بقلم سندس محمد

مراد: أنا موافق بس بشرط إنك توافق إن بنت من بناتك تتخطب لأسر ابني بس متكملش تعليم. إياد باستغراب: إيه اللي انت بتقوله ده يا مراد؟ أنا بناتي لسه هتكمل تعليمها طبعًا، وبعدين لسه بدري. مراد بابتسامة: أظن الرد وصل... أنا كمان بنتي صغيرة. ولسه هتكمل تعليمها. عمرو: بس يا عمي أنا بحب أسيل من واحنا صغيرين. وأنا موافق إنها تكمل تعليمها لما نتجوز. مراد

بنبرة لا تسمح بالنقاش: خلص الكلام يا عمرو، ربنا يرزقك ببنت الحلال اللي تسعدك، بس بنتي أنا مبفكرش أجوزها دلوقتي. نظرت أسيل بابتسامة لوالدها ثم نظرت لأسر الذي كان يكتم ضحكاته بصعوبة. نجلاء بارتباك: اتفضلوا يا جماعة، الأكل جاهز. نظرت لها سمية بغيظ: شكرًا، الواحد نفسه اتسدت. ثم نظرت لزوجها: يلا بينا. رحل الجميع، ولكن ظلت مريم. مريم بفرحة: والله يا مراد جدع، أصل الولية دي أنا مش بطيقها، طول عمرها بتكرهنا.

مراد: ممكن عشان إحنا مش أخواتها من نفس الأم. مريم: بس بابا الله يرحمه عمرو مفرقش معاملة بينا. مراد: سمية معاملتها كده ومش هتتغير. هنا نعرف أن مراد ومريم إخوة من الأب والأم. وعلاء وسمية من أم أخرى. تابع مراد قائلًا: وأنا عارف إنهم عايزين أسيل من الأول، بس عمري ما هسمح بده. يوم ما أجوز بنتي أجوزها صغيرة، لا وكمان أديها لعمرو، هما ناسيين إنه بتاع بنات ومفكرني أهبل وهوافق. أسيل بضحك: بس يا مراد، ده كان قصف ثلاثي الأبعاد.

أسر من الناحية الأخرى: والله يا مراد، أنا هاخد عندك كورسات في قصف الجبهة. نجلاء بضحك لمريم وزوجها: بقولكم إيه، تعالوا إحنا ناكل وفكوا منهم. مراد مقاطعًا: لا أنا جاي، وسعوا كده. وقام من على الكرسي وأبعد أسيل وأسر متابعًا: الأكل أهم من أي حاجة. في صباح اليوم التالي اجتمعت العائلة على الإفطار. مراد وهو ينظر لأسيل: بصي يا حبيبتي، أنا إيه رأيك أقدم لك في جامعة أخوكي وتدخلي كلية تجارة.

أسيل: بس أنا مش عارفة هعمل فيها إيه، وبعدين أنا مبفهمش في شغل التجارة أصلًا. أسر: على فكرة بقى يا سوسو، أنا عندي صحابي فيها وبصراحة أنا شايف إن مجالهم حلو أوي، فيه مثلًا إدارة أعمال وشغلها حلو بصراحة. أسيل: يا أسر افهمني، أنا طول عمري وأنا بحلم أدخل هندسة، بس خلاص مش في إيدي حاجة أعملها. ف مش هقدر بصراحة أحب التجارة.

نجلاء: يا حبيبتي بالعكس، في إيدك إنك تحبيها. يعني مثلًا المجال اللي أخوكي بيقولك عليه، تقدري بعد التخرج تبقي مديرة شركة شغال فيها مهندس أصلًا. أسيل بانتباه: لا ثواني، مش فاهمة إزاي يعني. مراد: إنتي بتدرسي إدارة أعمال، يعني تتعلمي إزاي تبقي قائد لفريق، إزاي تفكري في حلول للمشاكل اللي بتواجهها الشركة. دي هتحتاجي إنك تسافري، واعتقد دي حاجة انتي كنتي عايزاها أصلًا إنك تسافري، ولا إيه.

أسيل ببعض الحماس: طب هو أنا ممكن أدخلها بس لو مقدرتش أكمل... مراد بثقة: هتقدري وهتحبيها صدقيني. أسر: أخييييي، بقي هتيجي تقعدي معايا، د إنتي باردة. معلومة (أسر يدرس بجامعة خاصة بالقاهرة ومحل إقامتهم بالإسكندرية) أسيل بغرور: إنت تطول. نجلاء: لا بقى، متبدأوش من دلوقتي. أسر: على فكرة يا أختي يا حبيبتي، أنا عمل لك مفاجأة وهنخرج طول اليوم بره. أسيل بصدمة: وحياة أمك قول والله. مراد: أمك!!! يا خسارة تربيتي فيكي.

أسيل بضحك: سوري يا مراد، بس الشحط ده عمره ما عملها، ف لازم أتصدم. أسر بقرف: الشحط، طب قومي البسي بدل ما أرجع في كلامي. أسيل: خلاص والله أنا قايمة أهو. جه أسر يقوم، مراد شاورله بمعنى يقعد تاني. مراد: هو انت سألتني انت هتخرج ولا لأ. أسر بارتباك: احم احم يا مراد، أنا وانت عارفين إن بنتك حالتها العقلية مش أحسن حاجة، ف لازم نخفف عليها شوية، ف لازم نراعي ده. مراد: أنا بتي مجنونة يا بن الجزمة.

نجلاء من المطبخ بصوت عالٍ: والجزمة عملت إيه يا سي مراد. مراد: أحيه دي سمعت. أسر وهو ينسحب: البس. مراد يتوعد: ماشي والله لأوريك. بعدها أخذ أسر أخته واتجهوا إلى الخارج. بعض فترة كانت تواجه أسيل بعض الصراعات، هل تذهب إلى هذه الكلية أم لا، ولكن قررت أن تنفذ رأي أهلها وأن تحاول. في صباح يوم جديد. نجلاء بدموع وهي تودع أسيل وأسر: خلي بالكو من نفسكم. عشان خاطري.

أسيل: خمسة إيه يا سطا، إنت مش في الشارع اللي جنبك ده، سفر. عيطي يا ماما عيطي. وهنا بكت نجلاء مرة أخرى. أسيل بضحك: إيه ده، والله بهزر يا نوجا، بطلي عياط انبى. وعانقتها هي الأخرى. مراد وهو يعطي لأسر مفتاح السيارة التي نسيها في المنزل. مراد بنظرة شك: نفسي أعرف مستعجلين ليه، خد يا أخويا مفتاح العربية، كنت ناوي تروح جري. أسر: يا باشا وماله، ده حتى الجري رياضة. مراد بقله حيلة: اعتبرني قد أبوك واحترمني شوية.

أسيل: مفيش زيي بيحترمك يا مراد يا حبيبي. مراد: مهو باين يا أختي. ثم عانقوا والدهم وبدأوا الرحلة. الآن تدخل بطلتنا إلى حياة جامعية جديدة، تعيش أشياء جديدة، هي متجهة للمجهول، ماذا ستفعل؟ وما الذي ينتظرها؟