رواية لم اعلم عنه الكثير الفصل الرابع 4 - بقلم نجلاء عبد الظاهر

انت مستني حد؟ -أه اصحابي جايين. = أصحابك!! طب انت جايبني ليه مش فهمها؟ -عادي يعني بخرجك أكسب فيكي ثواب. = إيه.. تكسب فيّا ثواب ليه يا خويا جايبني من قدام باب جامع؟ -واطي صوتك. كنت لسه هرد عليها، لقيت ولدين وبنت داخلين علينا وبيسلموا عليه. = هما دول أصحابي يا رغد.. ياسين و مايكل و جودي. مبدئياً كده أنا مش طايقة جودي دي. -أهلاً. = دي بقى رغد جارتي. جارتك!!! حاولت أمسك لساني عشان فيه ناس، لقيت ست جودي دي بتكلمني.

-هنبقى أصحاب بقى صح؟ = أكيد. ياسين: -عندك كام سنة؟ = معرفش.. إسلام عايزة أمشي. -مستعجلة ليه؟ = أنا حرة عايزة أمشي. -خلاص هروح أحسب ونمشي كلنا. راح دفع فلوس وأنا قمت من الطربيزة… سبحان الله لسه شايفاهم حالا ومش طايقة ولا واحد فيهم. لقيت مايكل جه ورايا. = أحنا آسفين لو ضيقناكي مكناش نعرف إن فيه حد مع إسلام. ابتسمتله. -حصل خير. ياسين: = مش أنتي بتعرفي تضحكي هو.. يبختك يا مايكل القمر ضحكلك.

وانا كنت جبت أخري ولسه ههزقها لقيت سبع البروموة جاي مع ست جودي.. ركبنا كلنا في العربية كنت قاعدة قدام جنب إسلام. لقيته فجأة باصصني. = دا أنا محضّرلك حاجة مفاجأة هتطلع من نفخك. نسيت كل حاجة عملها ونسيت حتى الناس اللي ورا دي و ضحكتله وكنت فرحانة أوي. ومكنتش مصدقة نفسي إنه يحبني بالسرعة دي، دي ولا أجمدها رواية حصل فيها كده، فضلت متحمسة جداً للمفاجأة.

لحد ما شوفت المكان كان عبارة عن قسم شرطة بس قديم و متبهدل خالص، نزلنا وأنا مستغربة هو جايبني هنا ليه وإيه المفاجأة اللي هتبقى هنا. -انت جايبني هنا ليه؟ -اصبري على رزقك متستعجليش.. يلا. دخلنا وراه وكان المكان فيه ريحة وحشة أوي وكان فيه كام عسكري ومكتب في نهاية الطريقة و زنزانة صغيرة عبارة عن أعمدة من الحديد بس وكرسي متوسخ. إسلام لفّي فجأة. = فكرة لما قولتي إني قليل الذوق و مهزّق ومش محترم كل دا أنا.

كنت ناسية بس لما ردحتي عليّ في المطعم فكّرتني بكل حاجة.

لقيته زقّني جوا الزنزانة دي وقفّل الباب وكل دا وأنا مصدومة وعقلي مش قادر يصدّق للحظة هَدَّم كل حاجة كنت ببنيها جوايا وأنا جاية، للحظة حسيت إن دا شخص غريب أنا وإسلام كنا بنلعب مع بعض وإحنا أطفال وكبرنا مع بعض لحد ما خلص هو الثانوية وكنت أنا لسه في تالتة إعدادي كل دا وأنا بحبه و ساكتة قولت ممكن يكون مجرّد إعجاب عشان لسه صغيرين وكده بس لما بعد عنّي بسبب دخوله كلية الشرطة ونقلوا البيت بتاعهم وأنا عرفت وأيقنت إني بحبه.