رواية لمة العيلة الفصل التاسع عشر 19 - بقلم هدير عبد العليم

تسنيم بخوف: عريس؟ وعملتوا إيه؟ ماما: العريس معاذ. إسراء بعصبية وصوت عالي: طب هي ذنبها إيه؟ نفس أعرف إيه الجهل بتاع زمان ده. ماما رفعت حجابها وبصت لإسراء: أنا قولت اللي عندي. تسنيم باستغراب: أفهم طيب فيه إيه؟ إسراء بعصبية: أنا السبب يا ستي. تسنيم بتوتر: إيه أنتِ السبب؟ طب إزاي وليه؟

ماما: أنا معنديش موضوع إن الصغيرة تتجوز قبل الكبيرة، لو هتفهموا إن ده جهل فهو كده. وبعدين أنا واثقة إن اللي بيحب حد بيحارب علشانه، وهو لو بيحبك هيستنى. إسراء بصت لماما بنظرة كلها زعل: وهو ذنبه إيه يستنى؟ ذنبه إن أختها الكبيرة لسه نصيبها ما جاش ولا يستنى لما اللي بيحبها تكبر؟ يستنى إيه ردي عليا! تسنيم تنهدت كده ما هو فعلاً عندهم حق، اللي هو أنا إزاي فكرت في نفسي بس وإزاي نسيت إسراء؟

هو مش جهل زي ما إسراء بتقول، بس إحنا اللي في مجتمع غريب، ما هو فعلاً لو أنا اتخطبت إسراء هيطلع عليها كلام كتير. طب فكنا من هنا، وأننا حالياً عايشين في مجتمع راقي شوية. لو جه وقت ونزلنا الريف كم الضغوطات اللي إسراء هتمر بيها مش سهل. فضلت أفكر كتير لحد ما قولت. تسنيم بضحك: والله ضحكتوني، ومين قال إني عايزة أتجوز دلوقتي؟ دا أنا لسه طفلة في العشرينات. إسراء بضحك: كلنا نفس العشرينات. فرح بضحك: أنا لسه عشرين إلا.

ماما بابتسامة ما بين الخوف والسعادة: يعني أنتِ مش زعلانة يا تسنيم؟ تسنيم بضحك: اللي عايزنا يحاول علشانا ألف مرة. ماما: بصراحة أنا زعلانة إني رفضت وكمان لأن معاذ كويس، لكن... تسنيم بعصبية: ماما أنتِ عملتي الصح، وعالفكرة بقى لو أنتِ وافقتي أنا كنت هرفض عشان موضوع إسراء. ماما: ربنا يفرح قلوبكم ويرزقكم بالأزواج الصالحين. فرح: ياااارب. تسنيم بضحك: فرح أنتِ عايزة عود كبريت وبس كده. إسراء: حصل.

تسنيم: هو إزاي نتيجة الثانوية العامة بانت؟ فرح بخوف: دا اللي هو بجد؟ تسنيم: رقم جلوسك كام؟ فرح: ٩٩٢٩٨٢. تسنيم بضحك: مبروك يا أم حقوق. فرح بضحك: بجد؟ أم حقوق دا على أساس إنك في طب يا تسنيم هانم. ماما بضحك: لا تعايرني ولا أعايرك الهم طايلني وطايلك. تسنيم بضحك: هم إيه يا ماما دا إحنا هنبقى معانا فلوس بالكوم. ماما بضحك: اتوكسوا انتوا الاتنين. تسنيم: الأهم هتدخلي حقوق فين؟ فرح: معاكِ. تسنيم: العب، يبقى كده كملت.

فرح بضحك: أفندم، عندك مانع ولا خايفة أشوف بتعملي إيه هناك وأجي أقول لماما ها؟ تسنيم بضحك: إحنا هنبدأ كده، سكوت سكوت بقى كده مجموعك مش هيجيب هنا، انزلي الصعيد بقى، ولا تسكتي ونكلم ماما في حقوق انتساب. إسراء ضحكت بصوت عالي: ماما طالعة بره. تسنيم: تعالوا نرخم عليها. إسراء: يلا. طلعنا عند ماما وفضلنا نضحك للصبح ونرغي كتير، وكنا مفتقدين يمنى أوي، لكن هي كلمتنا عشان تشوف فرح عملت إيه. بعد أسبوع.

خالي: عمر كلمني تاني امبارح على فكرة. ماما: ليه تاني؟ خالي: بصي يا أختي، حتى لو مش موافقة على الفرح دلوقتي، يعمل خطوبة. تسنيم: أنا مش موافقة يا خالي، حتى لو ماما وافقت. خالي: عشان برضه نفس الموضوع ولا عشان حاجة تانية؟ تسنيم: آه يا خالي، إزاي أتجوز وإسراء الكبيرة؟ وبعدين هو نصيب. خالي: أنتِ نصيبك جه دلوقتي، إسراء لسه نصيبها مجاش.

تسنيم: يا خالي مش عايزة الموضوع ده يتفتح تاني، خاصة عشان إسراء متزعلش. وعالفكرة لو هو بيحبني هيستنى. خالي: أنا تعبت معاكِ أنتِ وأمك فعلاً، "إقلب القدرة على فمها تطلع البنت لأمها". تسنيم بضحك: أيوه هو ده، وهو أنا أطول أكون زي القمر ده. خالي بضحك: سلام عليكم، أنا طالع بره. تسنيم: تيجي بالسلامة.

كنت عارفة إن الحكاية مع معاذ منتهتش، لأن اللي بيحب حد بيعرف يستنى، اللي بيحب حد بيعرف يعمل ألف حاجة عشان يكون معاه في الآخر. هو أنا فعلاً مش عارفة هو معاذ بيحبني قد إيه، بس اللي واثقة فيه إني لازم أحافظ على حبي لأختي، ما هو أي حاجة هتتعوض إلا هما. دول أكتر ناس بتقف معايا في كل حاجة، كل حاجة وحشة في حياتي عدت بيهم، من غيرهم مكنتش هعرف أعمل أي حاجة. تسنيم: ماما عمو عمر بيتصل عليا، أرد؟ ماما: آه يا حبيبتي ردي عليه.

**في المكالمة** تسنيم: أزيك يا عمو عمر. عمو عمر: الله يسلمك يا بنتي. تسنيم: حضرتك عامل إيه؟ عمو عمر: الحمد لله، الأهم يعني مش بتيجي المكتب من ساعة ما إحنا جينا عندكوا. تسنيم بدهشة: إيه.. هااا. عمو عمر: أنا فاهمك يا بنتي وفعلاً اللي أنتِ عملتيه ده هو الصح، بس حبيت أقولك إن معاذ نزل شهر الصعيد عشان عنده قضية هناك، تعالي كملي القضية اللي معاكِ. تسنيم بسعادة: بجد؟ ياها بجد فرحت أوي. عمو عمر: هستناكي.

تسنيم: من الصبح هكون عند حضرتك. عمو عمر: تنوريني. كم السعادة إني هكمل حلمي فرحتني أوي وفعلاً كملت القضية ونجحت الحمد لله. **بعد ٣ أسابيع** خالي بسعادة: أمكم فين؟ فرح: نزلت، فيه إيه حاجة حلوة؟ شكلك فرحان! خالي: آه خبر حلو. تسنيم: طب إيه! خالي: لما أمكم تيجي بس. إسراء بضحك: هدخل أكلمها تيجي على طول. خالي بضحك: جات أهي. ماما: فيه إيه؟ خالي بسعادة: احممم، فيه عريس لإسراء. إسراء بدهشة وضحك: اللي هو أنا.

خالي بضحك: مثلاً، إحنا عندنا كام إسراء. ماما: مين. خالي: جارنا اللي في عمارة ٢٢. ماما: شافها فين؟ خالي: وهي نازلة الكلية مع فرح. ماما: ... خالي: محترم وفي كلية هندسة. ماما بخوف: لكن أنا لسه طالعة من جواز يمنى و... خالي: مش مشكلة، الفرح يبقى بعد سنة. فرح: يلا بقى يا ماما عايزة ألبس فستان. تسنيم: لولووووي عند فرح يا جدعان. ماما رفعت حجابها: مش عايزة أسمع صوت حد فيكم، ادخلوا جوه.

كلنا بدأنا نخاف، ليه ماما مش موافقة وإيه السبب؟ وليه مش باين عليها إنها فرحانة؟ دي كانت لسه بتقول عايزة أجوزكم وأطمن عليكم. قطع الصمت ده خالي لما نادى. خالي: تسنيم. تسنيم: إيه يا خال؟ جايه أهو. خالي: تسنيم بكل وضوح عمك عمر عمال يتكلم عشان جوزك من معاذ، وبعدين مفيش فلوس نعمل فرحك أنتِ وإسراء. تسنيم: ... خالي: المهم لو عمك عمر سألك هتقولي إيه؟

تسنيم بضحك: أنا هكلم عمو عمر، وافقي على جواز إسراء يا ماما، وعمو عمر أنا هتكلم معاه. ماما بعصبية: هتقوليلو إيه؟ تسنيم: معرفش، بس أكيد فيه حل. ودخلت أجري على إسراء، لولووووي عندنا عروسة. فرح بسعادة: بجد!!! تسنيم: آه، الجمعة الجاية العريس جاي. وفعلاً إسراء اتخطبت، واللي كنت خايفة منه حصل بعد خطوبة إسراء، وفي مكتب عمو عمر. عمو عمر: تسنيم قولي الحقيقة. تسنيم بدهشة: حقيقة إيه؟ عمو عمر: أنتِ مش عايزة تتجوزي معاذ؟

تسنيم بدهشة: إيه؟ قصد حضرتك قولت كده ليه؟ عمو عمر: عشان خالك بيتهرب كل ما أفتح معاه الموضوع، مرة يقولي عشان إسراء الكبيرة ومرة عشان... تسنيم بحزن: بص يا عمو عمر، أنت عارف ظروفنا المادية، ومن غير أي مقدمات مش هينفع أتجوز مع إسراء. لو معاذ ابن حضرتك هيقدر يستنى لمدة سنتين، فاعتبرني موافقة. لو مش هيقدر ربنا يرزقه بالأحسن مني. عمو عمر: ... تسنيم

بحزن والدموع في عينيها: عمو عمر معلش، هو أنا ممكن أمشي النهاردة لأني مش قادرة أكمل شغل. عمو عمر: أنا برضو هاخد رأي معاذ وهرد عليكم. رجعت البيت بس كان صعبان عليا نفسي أوي، طب هو فين بابا من كله ده؟ دا معاه فلوس قد كده، المفروض إنه يكون جنبنا، ولا يكون جنب مين؟ دا سابنا وإحنا أطفال. **في البيت** فرح: تسنيم فيكي إيه؟ تسنيم: ها، مفيش. فرح: لا فيه! تسنيم بعصبية: قولت مفيش حاجة يا فرح. فرح: أنا كنت ناوية أقولك خبر حلو.

تسنيم بحزن: أيه. تسنيم: بدأت أعيط وأقولها اللي حصل. فرح بضحك: طب لو قولتلك إن ربنا بيحبك وفيه حل. تسنيم بدهشة: مش فاهمة. فرح بسعادة: خالك اتفق مع أمك على...