رواية لم يكن فتى احلامي الفصل الثالث 3 - بقلم ايات الرحمن

لقيت بابا خرج من الأوضة وقال: "هي مين دي اللي هتكون عبده مش زوجة يا زهراء؟ غمضت عيوني بإرتباك ولسه هتكلم لقيت أخويا الوسط بيصرخ، طلعنا نجري لقيناه واقع من على السرير على الأرض. كان بيلعب ووقع واتكسرت رجليه. ظهر عجز بابا أوي لما قالوا إن مش هيدخل العمليات من غير ما يدفع 2000 جنيه.

رجع بابا استلف المبلغ من الجيران بعد ما صاحب المكان اللي هو بيشتغل فيه رفض يسلفه وناس كتير رفضت. ودبر الـ 2000 جنيه بعد معاناة وجه المستشفى دفعهم. مر وقت كدا ورجعنا البيت وكلمت بابا في موضوعي لكنه رفض نهائي. "حضرتك يا بابا عاجبك اللي احنا فيه دا؟ عاجبك مدت إيديك للناس ودا يسلفك ودا يسمعك كلام مالوش أي لازمة؟ "اسمعي يا زهراء أنا قولت اللي عندي وكلام كتير مش عايز فهماني؟ وعشان أريح نفسي مفيش شغل ليكي تاني فهماني؟

وسابني وخرج. مر أسبوع والناس بدأت تيجي على بيتنا تطلب فلوسها. "طب لسه الشهر ما خلصش؟ بابا هيجيب الفلوس منين؟ وكان رد الناس: "ملناش دعوة، إحنا جينا في الموعد اللي والدك حدده." ومشاكل وكلام اتقال وكان يوم ما يعلم بيه غير ربنا وبابا تعب. "خلاص أنا أخدت قرار، مفيش قدامي اختيار." روحت الشركة وكنت مضطرة أوافق على الجوازة دي. ولما رجعت بيتنا وبابا عرف قال: "انتي أخدتي قرارك من دماغك يبقى ما يلزمناش وجودك معانا هنا."

"بس يابابا أنا كان لازم أوافق عشان أساعدك." "عارفة طريق الباب ولا تحبي أعرفه ليكي؟ وبقيت أنا في الوقت دا برا البيت. مفيش حد من أهلي أعرفه عشان أروح له ولا أصدقاء. روحت الشركة وأخدت عنوان صاحبها. وروحت عليه. "كنت عارف ومتأكد إن مش هتضيعي الفرصة دي من إيديكي." "ماكنتش عارفة أرد وأقول إيه." "مش عارفة هتردي وتقولي إيه؟ ما علينا تعالي معايا أعرفك بزوجك المستقبلي وبعدها أدخلك الجناح الخاص لحد ما ييجي المأذون."

أخدني وروحنا عند أخوه. القصر كبير أوي وفي غاية الجمال والروعة. وصلنا جناح أخوه الخاص. خبط على الباب ودخل وأنا معاه. "دا أخويا اللي هتتزوجيه." كان قاعد على كرسي متحرك وبييبص ليا وهو على وجهه ابتسامة هادية جداً. وفجأة اتحولت ملامحه لحاجة تشبه الزهول وبدأ جسمه ينتفض على الآخر وعيونه بقى لونهم أحمر. وف لحظة وقع على الأرض.