رواية ليس ذنبي الفصل السادس عشر 16 - بقلم ريم يوسف

سيليا: سند ممكن تتجوزني؟ سند بهدوء: بس دا برضه مش حل يا سيليا. سيليا سكتت وبصتله بزعل. سند بسرعة: أنا مش برفضك، بس لا دا حل ولا أنا حتى جاهز اتجوزك دلوقتي. سيليا: خلاص يا سند، أنا كنت عاوزة أشوف أي حل أبعد بيه عن البيت. سند: متزعليش بس... سيليا بمقاطعة: خلاص، أنا اتسرعت ومتشكرة أوي ليك. سند: مفيش الكلام دا، بس أنا لو حتى اتجوزتك مش هتعرفي تعيشي في المستوى دا.

سيليا: أنا مببصش لمستوى يا سند، أنا عاوزة بس أعيش في هدوء مع ناس بتحبني. سند: أكيد هنلاقي حل يا سيليا. سيليا بأمل: إن شاء الله. عند محمد. دخل ثروت المكتب بعصبية. ثروت: إيه اللي قولته دا؟ أنت اتجننت؟ محمد: لا، بس طلبك مرفوض. ثروت: مش أنت اللي تقول، أنا قولت كلامي ولو متنفذش أنا هنهيك يا محمد. وسابه ومشي. عند داليا. بتكلم زياد في التليفون. داليا: زي ما بقولك كدا، خلصني منه بقا.

زياد: مفيش فايدة فيكي يا داليا، 19 سنة ولسه متغيرتيش برضو؟ داليا: متعصبنيش، أنا أعيش مع واحد مش عاوزاه ليه يعني؟ زياد: اتكسفي بقا وحسي شوية، أنتي كبرتي، شوفي بنتك اللي بقت في الجامعة. داليا: بكرة بنتي أهي، دي اللي مبيناني كبيرة، أنا لسه صغيرة ومكنش ليا اتجوز بدري كدا. زياد بسخرية: بدري إيه يا داليا، أنتي كنتي... داليا بمقاطعة: أيوه بدري يا زياد، ومتدخلش لو سمحت، خلصني من محمد بس. زياد: دا بعينك يا داليا. وقفل.

عند سند وسيليا. سيليا: سند، أنا مقولتش حاجة، وإحنا صحاب زي ما كنا. سند بابتسامة: طبعًا يا سيليا. تليفون سند رن. سند ابتسم ورد: عاملة إيه يا روحي؟ ..... حاضر يا ياسمين. ....... ساعة وجاي، وحشتك ولا إيه يا ياسمين؟ ..... سيليا سمعته بيتكلم وزعلت وقامت مشيت. سند خلص المكالمة وانتبه ملاقاش سيليا، رن عليها. سيليا مردتش. فضل يرن، وفي الآخر ردت. سيليا بعياط: نعم. سند: إيه يا بنتي، مشيتي ليه؟ وليه بتعيطي؟

سيليا: سيبتك تتكلم براحتك. سند: هو انتي غيرانة؟ سيليا: أغير ليه يعني؟ سند بابتسامة: ياسمين دي يا ستي تبقى مامتي. سيليا بفرحة: وبتقول لمامتك يا ياسمين؟ سند بحب: أيوه، عشان بعتبرها صاحبتي. سيليا بابتسامة وحب: ربنا يخليهالك، أنا مشيت باي بقا، ونتقابل بكرة. سند: تمام، وأنا كمان هروح باي. عند داليا. بتكلم ثروت في التليفون. داليا: يا ثروت باشا، ولا يهمك، سيبك من محمد خالص. ثروت: خلصي الموضوع دا أنتي ي داليا وبسرعة.

داليا: أوامرك يا باشا، اعتبره خلص، ونتشرف بيك بكرة عشان نقرا الفاتحة. ثروت: تمام، يا داليا، كدا أنتي فاهمة؟ داليا: أكيد يا باشا، العقود هتبقى مع حضرتك بكرة عشان نمضيها؟ ثروت: أها طبعًا، أنا كلمتي واحدة زي ما قولتلك. داليا: تمام يا باشا. سند رجع البيت وشاف ياسمين قاعدة مستنياه. ياسمين: سند، عاوزاك في موضوع. سند: نعم. ياسمين: أنت دلوقتي كبرت ومفروض تتجوز. سند بتكشيرة: وعرفتي الموضوع دا لوحدك كدا؟

ياسمين: لا، بس طنط مها بنتها سما كبرت، دول كانوا قاعدين معايا من شوية، أنا شايفاها مناسبة أوي ليك وهتوافق تعيش معايا هنا. سند: لا يا ياسمين، أنا مش عاوز اتجوز دلوقتي. ياسمين: وده ليه يعني؟ سند: ريحي نفسك يا ياسمين، وطنط مها دي كمان مبطقهاش ولا سما بنتها حتى، ولو هتجوز فـ أنا بحب واحدة معايا في الكلية. ياسمين: قول كدا بقا، طب سيبك من مها وبنتها، قولي مين دي؟

سند بضحك: لا خليكي بفضولك كدا، أنا هغير وأنزل الشغل، سلام يا ياسمين. ياسمين قعدت تفكر بفضول. عند سيليا. وصلت الفيلا ودخلت، شافت داليا قاعدة. داليا: تعالي يا سيليا. سيليا: نعم يا ماما. داليا: جهزي نفسك بكرة، ومفيش طلوع مكان، جايالك عريس وهنقرا الفاتحة بكرة. سيليا بصدمة: لا طبعًا، أنا لسه صغيرة. ومعاوزة اتجوز. داليا: لا م صغيرة، وأنا اتفقت خلاص. دا ابن ثروت باشا، عارفة هتعيشي معاه إزاي.

سيليا بعياط: لا مش موافقة، وهقول لبابا. داليا: محمد موافق. سيليا بصدمة: بابي موافق.