رواية ليست ذنبي الفصل الحادي عشر 11 - بقلم عائشة الكيلاني

الدكتورة:ـ البقاء لله. عن إذنك. حمزة بص لها بصدمة وضياع:ـ لا، مش حقيقي. أكيد أنا بحلم، أكيد كل ده كابوس وهيختفي. حمزة وقع على الأرض بضعف:ـ ااااااااااااااااه... اااااااااااااه. حمزة قعد يبكي بانهيار وعدم تصديق على أخته. في نفس الوقت، نور كانت في أسعد لحظات حياتها. عمرها ما كانت تتخيل إنها تحب حد غير حمزة، مش بس تحبه، لأ، وتتعلق بيه. كل أمانيها إنها تعيش عمرها كله معاه. صحيح الإنسان الصح جاه متأخر وفي وقت غلط، بس جاه.

نور ماسكة الصنارة. ريان واقف وراها وحاضن إيديها. بصتله بنفذ صبر:ـ لا، أنا زهقت. أنا مش عايزة، والله ما عايزة أتعلم، لا الصيد ولا العوم. أنا مبسوطة كدا.

ريان بص لها بحب وقال بهمس:ـ اصبري. أهم حاجة في الحياة دي الصبر علشان تاخدي حقك. اصبري علشان تنجحي. اصبري. حتى الصيد لازم نصبر عليه. كله بالصبر بيتحل. عمر التسرع ما كان حلو. اصبري وربنا هيرزقك أحلى من اللي كنتي بتحلمي بيه. حتى الرد لازم نصبر علشان نرد على اللي قدامنا بفن. ممكن يكون الحق معاكي، لكن بسبب العصبية تضيع كل حاجة. ممكن الكل يكون ضدك، لكن بالصبر تخليهم في صفك. الصبر هو مفتاح الحياة. صحيح قاسية، بس محتاجة صبر.

نور بفرح:ـ اتعلمت، أخيراً عملتها. ياس! ريان بص لها بحب وفرح على فرحتها. ساعدها وطلعوا الصنارة والسمكة. نور رمت الصنارة من إيديها، رفعت حالها له وحاوطت رقبته بفرح. وخلص اليوم وريان بيعلم نور الصيد والعوم. بصوا بقى، ريان عكس الناس، يعني مش فرق معاه صيف أو شتاء. في عز ما نور فرحانة وطايرة من الفرح، كان حمزة غرقان في حزنه وقهرته على أخته وحالهم. وعدى اليوم بحزن حمزة ونور اللي بتفوق تدريجياً لحالها. تاني يوم في القصر.

نغم:ـ لا حول ولا قوة إلا بالله العلي العظيم. الله يرحمها. فرح:ـ اللي عمل فيها كدا معندوش رحمة ولا ضمير. هيروح من ربنا فين؟ نور، نور، انتي هتنامي ولا إيه؟ نور:ـ هاا، لا معاكم. ربنا يرحمها. نغم:ـ أنا مش رايحة مكان. فرح:ـ حمزة مش هياخد العزاء غير لما يجيب حق أخته. بس إزاي أخوات وإحنا إزاي منعرفش؟ إزاي ميقولش ليكي إنه عنده أخت؟ إحنا اتغفلنا منهم.

نور بهدوء:ـ قلبي كان حاسس إن في رابط بينهم. مش مش لدرجة أخوات. وبعدين كفاية كلام عنهم. لو بتحبوني اقفلوا على الموضوع. ربنا يرحمها ويسامحها. نغم. نغم:ـ يا نعم. نور:ـ حاسة إني مصدعة. ممكن وصفة من وصفاتك. نغم:ـ مم، وأرجع أتشتم. نور، بلاش، لأننا هنزعل من بعض. بقولك، هو جوزك معندوش أخوات؟ فرح:ـ خليهم أخين. اسألي يا نور. نور بصت لهم بدهشة مضحكة:ـ أهو فوق أهو. اسألوا انتوا. روحتوا لماما؟ عاملة إيه؟ كويسة؟

نغم:ـ مانا أعرف. هي مش طايقة تسمع اسمك، ليه دي؟ طردتنا بمجرد ما نطقنا اسمك. هو في إيه يا نور؟ فرح:ـ صح، فيه إيه؟ وكل ما نجيب سيرة حمزة تتعفرتي، ومامتك نفس الكلام. كل ما تسمع اسمك وتقول موتت أبوها. هو حصل إيه وإزاي طلقتي؟ نور غمضت عينيها وهي بتحاول تهدي نفسها وتنسى اللي حصل:ـ محصلش نصيب. أنا وهوطلقنا علشان محصلش نصيب، تمام؟ مش عايزة أتكلم في الموضوع ده تاني، سامعين؟ نور قعدت تتكلم مع أصحابها. ريان راح شغله.

نور كانت بتقرا كتاب. ردت على الفون بملل:ـ الو. نور وقع منها الفون. غيرت هدومها وجريت بلهفة على بره. وقفت تاكسي بلهفة وسرعة:ـ اطلع لو سمحت بسرعة. بعد وقت طويل نزلت من التاكس. حسبته وجريت على بيتها اللي هو بيت أمجد. خبطت جامد على الباب وهي بتقول بصوت عالي:ـ مامااا! يا ماما افتحي! اتفتح الباب:ـ نور، انتي اتأخرتي ليه؟ نور وهي بتنهج:ـ ماما فين؟ في ماما يا طنط.

الجارة:ـ اهدي يا حبيبتي. هي نايمة جوه. الدكتور علق ليها محاليل. وشوية والمعمل هييجي يسحبوا منها عينة دم. نور جريت على أوضة أمها وهي مش سامعة حاجة:ـ ماما. منى بصت لها بتعب. فتحت ليها حضنها:ـ تعالي يا نور، تعالي يا حبيبتي. نور اتملت الدموع في عيونها وجريت على حضن منى وقعدوا يبكوا هما الاتنين. بالليل في القصر. ريان بغضب وزعيق:ـ يعني إيه مش موجودة؟ أومال انتوا شغلتكم إيه؟ هاا! نرمين بخوف:ـ هتكون راحت فين؟

اتصل بيها يا ريان. أكيد جرالها حاجة. أنا خايفة عليها أوي. الشغالة خرجت ومعاها فون نور:ـ ريان بيه، نور هانم نسيت التليفون بتاعها. ريان مسح على وشه:ـ هتكون راحت فين؟ لو مش عند أصحابها، الوقت اتأخر. أنا رايح أدور عليها. أكيد فيها حاجة. ريان اتجه للخارج. فتح الباب:ـ نور. نور دخلت والحزن على وشها:ـ أنا كنت عند ماما. و. نرمين وقفت قدامها ونزلت بإيديها على وش نور. ضربتها كف و... يتبع.