رواية معلمة من الصعيد الفصل الحادي عشر 11 - بقلم مريم شعبان

في وقت الشروق، كان حاتم نازل القسم بسبب مكالمة تفيد بوجود مشكلة كبيرة ويجب أن يذهب فورًا. حاتم، باستغراب، سمع صوتًا من المطبخ. حاتم: الساعة ٦، مين صاحي دلوقتي؟ وذهبت هيام. حاتم: إنتِ بتعملي إيه على الصبح؟ هيام: يا بني خضتني. حاتم: واقفة في المطبخ بدري كده ليه؟ هيام: بعمل كيكة. حاتم، باستغراب: دلوقتي؟ هيام: آه، عشان عز. حاتم: عشان عز؟ قلت لي. هيام: احم، هو جاي فـ حبيت أعمله حاجة حلوة. حاتم، بابتسامة: ربنا يحفظكم لبعض.

هيام: يارب. المهم رايح فين؟ حاتم: القسم، لازم أروح دلوقتي. هيام: ليه، فيه حاجة؟ حاتم: مش عارف، لسه هروح أشوف. أنا بقالي يومين قاعد، أخدت إجازة عشان خطوبة الهانم. هيام: حبيبي، ربنا يحفظك، خلي بالك من نفسك، ربنا يستر طريقك. حاتم: يارب. يلا، سيبي قطعة من الكيك ليا تمام؟ هيام: من عيوني. حاتم: يلا، السلام عليكم. وخرج. هيام: وعليكم السلام، في رعاية الله. وأكملت الكيك. ***

في فيلا سليم، الكل كان صاحي على الفطار ما عدا جاد طبعًا. سليم: فين جاد؟ سهام: نايم يا بابا. سليم: أنا قلت كذا مرة، الفطار بيكون الساعة ٨. نبيل: معلش يا بابا، عشان بيكون عنده مذاكرة بس. سليم: ماشي، لما نشوف آخرتها معاك انت وعيالك. كاظم: يا حاج، هما شباب بيحبوا السهر، خليهم براحتهم. سليم: ده نظام، والكل لازم يمشي عليه. عز: آه، أنا هبدأ في الجناح بتاعي بعد أسبوعين بإذن الله. سليم: جناح؟ عز: اللي هتجوز فيه.

سليم: هي أوضتك مالها؟ مش فاهم جناح إزاي؟ يعني تعمل مطبخ وحمام وصالة صغيرة؟ عز: بالظبط كده، هعمل كده في الدور التالت. سليم: ليه تعمل كده؟ عز: عشان مودة تكون براحتها، تعمل اللي نفسها فيه في الجناح بتاعها براحتها. سليم: إزاي يعني؟ هي غريبة، دي حفيدتي، يعني إحنا أهلها، تعمل اللي عايزاه في المطبخ اللي تحت، وأوضتك تكون زي ما هي.

عز: لا يا جدو، مودة أه من العيلة، بس أكيد هتكون مكسوفة، وكمان البيت فيه شباب كتير، ومودة عايزة تكون براحتها، فـ أحسن أعمل كده فوق، بقى لها مطبخها وحياتها فوق، تنزل وقت ما هي عايزة. سليم: قصدك إنكم تقعدوا فوق على طول؟ مش هتنزلوا وقت الأكل؟ عز: لا، ليه؟ هنزل، بس لو مودة عايزة. سليم: افتكر يا عز، إني ده كله عشان مودة تقعد معايا.

عز: هتقعد معاك يا جدو أكيد، بس هي مراتي، وأكيد لينا حياتنا الخاصة. مودة محجبة، أكيد لما تكون عايزة تقف تعمل أكل، مش هتقف بالخمار والفستان، لازم تكون براحتها. سليم: وإنت بتاخد قرارات من دماغك كده؟ عز: حضرتك عارف من الأول إننا هنعمل كده. سليم: أنا قلت هتكبر الأوضة، مش هتعمل ده كله. عز: أهو بقى، دي طلبات مودة. سليم: وأنا مش موافق عليها. عز: تمام، بس دي حياتي أنا ومراتي. لو مش موافق، هروح آخد شقة بره وأقعد فيها أنا وهي.

سهام: لا لا، إنت بتقول إيه يا عز؟ عز: يا أعمل الجناح، يا من بكرة هشوف شقة لينا. إنت قلت الأول نتجوز، والكل وافق، بس دلوقتي مش هوافق على حاجة تزعل مودة تاني. وقام. سهام: عز عز. سليم: اقعدي مكانك. شوفتوا ابنكم بيرد عليا إزاي؟ دي التربية يا نبيل! حتى مسمعتش صوتك وهو بيكلمني كده. نبيل: عشان هو الصح يا بابا، هما ليهم حياتهم الخاصة. سليم: إنت كمان؟

طيب، مفيش جناح هتعمل. أنا عارف ابنك عايز يعمل الجناح ده ليه، عشان يقعد على طول فوق، وياكلوا فوق، ويعيشوا فوق، ويحرمني من حفيدتي. كاظم: أكيد لا يا بابا، هو هيكون عريس وعايز يكون لوحده ويفرح مع عروسته. بلاش تخليه ياخد شقة بره، خليه وسطنا هنا. الدور التالت فاضي وكبير، خليه ياخد جزء ويعمل جناح لوحده. سليم: كلكم موافقين يعني؟ سهام: بالله يا بابا، أنا مش عايزة ابني يبعد عني. سليم: ابنك مش بيسمع الكلام.

سهام: ده كله مش بيسمع الكلام. أنا شبعت الحمد لله. وقامت، وقامت وراها زهراء وبيري، اللي أسماء حاولت تخليها تقعد، بس بيري راحت وراهم، والكل قام ما عدا أسماء ونبيل وكاظم. أسماء: يا بابا، أحسن تخليه يجيب جناح هنا عشان مودة تكون جنبك، حضرتك عملت ده كله عشان تكون جنبك. سليم: أها. أسماء: خلاص وافق بقى. سليم: أنا مش عايز كلام في الموضوع ده. وقام. نبيل: أنا تعبت بجد. كاظم: معلش يا أخويا، خير بإذن الله. ***

عند عز، كان في العربية بتاعته وموبايله بيرن، وكانت مودة. عز: السلام عليكم ورحمة الله وبركاته. مودة: وعليكم السلام ورحمة الله وبركاته. الحمد لله بخير، وإنت؟ عز: تمام، الحمد لله. مودة: صوتك ماله؟ عز: مفيش عادي. مودة: مالك بجد؟ عز: خناقة مع جدك. مودة: ياربي، ليه تاني؟ عز: بعدين أقولك. المهم بقى، أنا هاجي شوية. مودة: منتظراك يا زوجي العزيز. عز: تمام يا وصية الرسول. مودة: وصية الرسول؟

عز: آه، أنا مسجل على الفون كده، عشان لو في يوم أكون متعصب وإنتي كلمتيني، أفتكر إنك وصية الرسول وأهدى من العصبية وأكلمك براحة. مودة: يا سيدي يا سيدي، إيه الجمال ده. عز: شوفتي؟ ربنا يحفظك ليا يا رب. مودة: يارب. يلا بقى عشان أقوم ألبس لحد ما تيجي. سلام. عز: سلام. وأغلق. آه يا مودة، إنتِ كنز، وأنا مستحيل أسيبك. هتفضلي مراتي طول عمري، وفي الجنة بإذن الله. يارب احفظها ليا، وخليني صالح عشانها يا رب. ***

في القسم عند حاتم، كان قاعد في مكتبه ومعه زميله مصطفى، ومتهم واقف قدامهم. حاتم: ما تتكلم يا بني. المتهم: ما أنا قلت كل حاجة يا باشا. حاتم: اتكلم يا عوض. المتهم: يا باشا. مصطفى: صدقني الواد ده مش هيجي بالطريقة المحترمة دي. حاتم: اصبر يا مصطفى. اتكلم يا بني، هسيب الباشا عليك. مين الكبير بتاعك يا بني؟ انطق. فيه شباب صغيرة بتروح في داهية بسبب الزفت المخدرات.

المتهم: أقسم بالله ما أعرف الكبير. إحنا حد بييجي البضاعة في عربية ويسيب العربية ويمشي، وإحنا ناخد البضاعة نوزعها، وبعد كده بنحول الفلوس وكده، بس عمرنا ما شوفنا أي حد منهم يا باشا، واللهم. مصطفى: طيب عرفتهم إزاي؟ المتهم: من واحد صاحبي قالي، تعال فيه مصلحة حلوة، وقالي إننا هنوزع مخدرات. قولتله عرفتهم منين؟ قالي ملكش دعوة، إنت ليك تأخد فلوسك وبس. مصطفى: آه، اسمه إيه صاحبك ده؟ المتهم: إبراهيم. إبراهيم يا باشا.

حاتم: تمام. خد يا بني. المتهم: إيه ده يا باشا؟ ما أنا قلت كل حاجة. حاتم: لا، إنت هتشرف عندنا شوية. خدوا يا بني. وأخذه العسكري وخرج. مصطفى: الواد ده بيكذب. حاتم: ظاهر أوي. مصطفى: لو سيبتني عليه، كنت خليته يقول كل حاجة. حاتم: مصطفى، أنا أكتر طريقة بكرهها الضرب، وإنت عارف. مصطفى: طيب يا سيدي، هنعمل إيه؟ حاتم: روح الحارة شوفلي إبراهيم ده. مصطفى: تمام يا كبير. حاتم: مصطفى، من غير ضرب. مصطفى، بضحك: إنت تعرف عني كده؟

حاتم: مصطفى. مصطفى: يا عم، أقسم بالله مش هعمل حاجة. هيجيبه بهدوء وأجي. بس روح إنت شوف اللواء ممدوح كان عايزك. حاتم: تمام. وخرجوا. مصطفى راح الحارة، وحاتم راح عند اللواء ممدوح وخبط ودخل. ممدوح: تعال يا حاتم. حاتم: نعم يا فندم. ممدوح: بقالك يومين مش هنا، ومصطفى شايل كل حاجة في القضية. حاتم: معلش يا فندم، كتب كتاب بنت خالي وكان لازم أقعد. ممدوح: مبارك، عقبالك. حاتم: الله يبارك فيكم. ممدوح: إيه أخبار القضية؟

حاتم: عوض بيكذب علينا وبيقولوا قصص خيالية أساسًا، بس مصطفى دلوقتي راح يجيب إبراهيم ده، مش هسيبه غير لما أطلع منه كل المعلومات. ممدوح: تمام، القضية دي مهمة أوي، دي حياة شباب بتروح يا حاتم، لازم نواجه الناس دي في أقرب وقت. أنا كمان عرفت إنهم بيشغلوا بنات، معهم بنات صغيرة أوي، ١٠ سنين. حاتم: بإذن الله يا فندم، هنقدر نجيبهم. ممدوح: بإذن الله. حاتم: بعد إذنك يا فندم. ممدوح: اتفضل. *** في فيلا سليم.

في أوضة زهراء، كانت قاعدة هي وصاحبتها هاجر، وسهام كانت قاعدة معاهم. سهام: برضو كده، متجيش كتب كتابها؟ هاجر: غصب عني والله يا سوسو، كنت جاية بس ماما تعبت أوي. سهام: ألف سلامة عليها. هي عاملة إيه دلوقتي؟ هاجر: كويسة الحمد لله، بقيت أحسن. سهام: طيب الحمد لله. هاجر: إيه الخطوبة؟ كانت حلوة. زهراء: آه أوي، كان نفسي تكوني موجودة. هاجر: بإذن الله في الفرح أكون عايزة أشوف العروسة. زهراء: خدي الموبايل شوفيها. هاجر: تمام.

وأخذته. هاجر: ما شاء الله، جميلة. زهراء: عقبالك. هاجر: يارب. عشان عايزة أخلص بقى. زهراء، بضحك: ربنا يرزقك. هاجر: يارب. *** عند مودة، كانت مجهزة. رحاب: إيه الجمال ده؟ مودة: شكلي حلو. رحاب: آه جدًا، ما شاء الله. مودة: إنتوا رايحين فين؟ رحاب: نازلين إحنا وماما نجيب كام حاجة كده. مودة: وأنا هقعد مع عز لوحدي؟ رحاب: عمتو هتنام. مودة: تمام. رحاب: عايزة حاجة؟ مودة: كلميني قبل ما تيجي عشان أفتكر أنا عايزة إيه.

رحاب: خلاص تمام. وخرجت. مودة: بس كده، قمر يا بت يا مودة. والباب يخبط، وراحت تفتح، وكان عز. عز: السلام عليكم. مودة: وعليكم السلام. اتفضل. هيام: تعال يا عز يا بني، اتفضل. عز: ازيك يا طنط؟ هيام: الحمد لله يا بني، اتفضل. وقعد. هيام: إيه عامل إيه؟ عز: الحمد لله بخير. هيام: روحي يا مودة، هاتِ عصير لجوزك. مودة: حاضرة. هيام: وهاتي الكيكة اللي من الصبح واقفة تعملها عشان خاطر عز. مودة بصت لها. عز: الله، بجد؟

هيام: آه يا بني، والله واقفة من الساعة ٦ بتعمل كيكة عشانك. عز: ده أنا محظوظ. هيام: ربنا يحفظكم لبعض يا حبيبي. وجاءت مودة. مودة: اتفضل. عز: شكرًا. هيام: أسيبكم بقى أنا، وأقوم أعمل الغدا. اعمل حسابك مش هتمشي قبل الغدا، تمام؟ عز: تمام يا ست الكل. ومشت هيام. عز: الله، طعمها حلو أوي. مودة: بجد؟ عز: آه جدًا، تسلم إيديك. واقفة بجد من الصبح تعملها عشان. مودة: عشان جوزي، ولازم أهتم بيك. عز: تمام يا وصية الرسول. فين السلسلة؟

مودة: اتفضل. وارتداها. وبعد كده ماسك إيديها. عز: أوعدني إنك عمرك ما هتقعي. مودة: أوعدك. عز: مفيش شكر بيننا. مودة: صح، كنت مالك الصبح؟ عز قالها كل حاجة. مودة: هتعمل إيه دلوقتي؟ عز: هاخد شقة صغيرة بره. مودة: تمام. عز: موافقة يعني؟ مودة: أي مكان عادي، مش مهم يعني، بس بلاش مشاكل.

عز: أنا عملت حاجة، هو اللي عايز كلامه يمشي على طول. هو خليني أتجوزك عشان تفضلي جنبه، محدش ياخده منك، بس أنا مستحيل أسيبك. أنا بحمد ربنا إنه عوضني بيكي. أروح أسيبك. مودة: إيه الكلام الكبير ده؟ عز: أنا مرتاح معاكي يا مودة، مبسوط، مش عايز السعادة دي تروح. مودة: مش هتروح لو إنت حفظت عليها. عز: هحطها في عيوني، بس هي تفضل معايا. مودة: هتفضل، وده غصب عنك. المهم بقى. عز: خير. مودة: أنا عايزة أروح أشوف المدرسة قبل ما تبدأ.

عز: هو كده كده بيكون في يوم قبل المدرسة بيومين عشان نتعرف على الطلاب، وكل طالب يعرف مكانه وكده. مودة: طيب كويس. ثواني، إنت قلت قبلها بيومين، يعني بعد بكرة؟ عز: بالظبط كده. مودة: على خير بإذن الله. عز: بإذن الله. *** ومرت يومين بدون أحداث جديدة. رحاب وأهلها سافروا، وهيجي قبل الفرح. عز وماهر مشغولين في تجهيز المدرسة. في بيت هيام، عند مودة. كانت بتجهز. هيام: يلا يا مودة، الفطار. مودة: حاضر، جاية. وأخذت شنطتها وخرجت.

مودة: السلام عليكم. الكل: وعليكم السلام. صابر: إيه الجمال ده؟ مودة: حبيبي يا بابا. حاتم: ساعة عشان تيجي، عايزين نفطر. مودة: ما تفطر، أنا كلمتك. حاتم: رخمة. اخلص عشان أوصلكم. مودة: عز جاي. حاتم: أحسن. مودة: قصدك إيه؟ صابر: أنا مش عايز خناق، عايزين ناكل في هدوء. مودة: خليه يسكت يا بابا. صابر: بس يا حاتم، إنت الكبير. حاتم: حاضر يا خالي. أنا خلصت أساسًا. وقام يغسل إيده، وبعد كده مسك كوباية الشاي. مودة: الحمد لله.

وقامت تغسل إيديها. هيام: هتجي بدري النهاردة يا حاتم؟ حاتم: مش عارف والله. صابر: ربنا معاك يا بني. حاتم: يارب يا خالي. وموبايل مودة يرن. حاتم: مودة العشق الممنوع بيرن. هيام: اصبر، تغسل إيدها وتيجي. حاتم: أنا هرد. هيام: حاتم، عيب لا. حاتم: يرد. عز: السلام عليكم، خلصتي يا حبيبتي؟ حاتم: وعليكم السلام. لا حبيبتك بتغسل إيدها، معك أخوها. عز: اوف يا بني، إنت بتطلع مننا؟ حاتم: حبيبتك إيه؟ إزاي تقولها حبيبتك؟ عز: زوجتي.

حاتم: ماشي، تقول يا حبيبتي ليه يعني؟ عز: براحتي. هي فين؟ حاتم: مش موجودة. عايز إيه؟ عز: أنا تحت، لما تخلص خليها تنزل. حاتم: طيب، ما تطلع. عز: لا، تسلم، عشان مستعجل. حاتم: طيب، ثواني. موده، موده، أبو لهب عايزك. عز، بصدمة: أبو لهب؟ حاتم، بضحك: أسف، مش قصدي. مودة: هات يا رخم. وأخذت منه الموبايل ودخلت البلكونة. مودة: إيه فينك؟ عز: أنا تحت أهو. مودة: مش شايفاك. حاتم: عند بلكونة أم محمد. عز: قولي لضرتي ده يبعد عنك.

حاتم: أختي، ولو مش عاجبك، نفركش كل حاجة. عز: أسف يا أستاذ حاتم. ممكن بقى تنزل عشان هطلع أضرب الحيوان اللي جنبك ده. مودة، بضحك: حاضر، نازلة. سلام يا حاتم. حاتم: خلي بالك من نفسك. في رعاية الله. مودة: حاضر، سلام. *** في فيلا سليم. سهام: يلا يا جاد. جاد: أنا خلصت يا ماما أهو، الباص برة. سهام: تمام، خلي بالك من نفسك وركز بالله عليك. جاد: حاضر، سلام. ومشى. ونزل ماهر ومعه نورسين وسند، اللي أول يوم مدرسة ليه.

سهام: ما شاء الله، حبايب قلبين. نورسين، بفرحة: هروح المدرسة. سهام: خلي بالك من نفسك، واسمعي كلام الميس. نورسين: حاضرة. سند: متخافيش يا سوسو، أنا هخلي بالي منها. سهام: جدع يا سند. ماهر: فين جاد وعز؟ سهام: جاد راح بالباص، وعز راح يجيب مودة. ماهر: تمام. عايزة حاجة يا ست الكل؟ سهام: لا يا حبيبي، تسلم. بيري: صباح الخير. سهام: صباح النور. بيري: فين جدو؟ سهام: مشي هو وكاظم ونبيل من بدري. بيري: إيه ده؟

أنا أول يوم ليا في المدرسة النهارده، وهو قالي هيروح معايا. سهام: خلاص روحي مع ماهر. بيري: لا يا طنط، هروح لوحدي عادي. ماهر: لا، استني، أنا كده كده رايح. تعالي معايا. بيري: ولا تعب ولا حاجة. يلا. بيري: تمام، شكرًا. وذهبت، ومسكت سند ونورسين، ومشوا، وماهر مشى وراهم. أسماء: شوفتي بتحب نورسين وسند إزاي؟ سهام: ربنا يحفظها ويفرحك بيها. أسماء: يارب. *** عند مودة وعز في العربية. عز: إيه يا بني، خلاص قربت؟

غيث: يلا، الكل هنا ما عدا أنت وماهر. عز: تمام، خلاص خمس دقايق وهاكون عندك. غيث: تمام، سلام. وأغلق. عز: مالك قاعدة ساكتة ليه؟ مودة: عادي، بفكر. عز: مالك بجد؟ مودة: توتر شوية عشان أول مرة أروح المدرسة. عز، ماسك إيدها وباسها: متخافيش، طول ما أنا جنبك. مودة، مسكت إيده: ربنا يحفظك ليا. عز: يلا عشان وصلنا. مودة: تمام. ونزلت. عز: يلا. وكان يمسك إيديها. مودة: لا، إحنا داخلين المدرسة. عز: تمام، طيب امشي جنبي. مودة، بضحك: يلا.

ودخلوا. يوسف: جاد، جاد. جاد: إيه؟ في إيه؟ يوسف: مش دي مودة؟ جاد: آه، ما هي هتكون ميس هنا. يوسف: آه، هي مين مودة دي؟ جاد: مرات عز. فيروز: إيه ده؟ إمتى عز خاطب أساسًا عشان يتجوز؟ جاد: لا، ده كتب كتاب لسه، الفرح بعد شهرين. رويدا: شكلها لطيفة. مروان: جدًا والله. تيا: إنتِ عارفها؟ مروان: آه، أخدت مني علبة السجاير لما كنت عند الزفت ده. فيروز: يخربيتك! وإنت من امتى بتدخن عند عز؟

مروان: مكنش فيه حد غير زهراء في أوضتها، ودي جات على حظنا. تيا: شكلها صعبة. يوسف: جدا، دي جاية علينا. مودة: صباح الخير يا شباب. الكل: صباح النور. مودة: عاملين إيه يا شباب؟ يوسف: الحمد لله. مودة: مين البنات دول؟ جاد: تيا، فيروز، رويدا. مودة: تشرفت بيكم. تيا: الشرف لينا. مروان: نورتي المدرسة بجد. مودة: بنورك. يلا أسيبكم دلوقتي، لينا لقاء تاني. سلام. ومشت. مروان: لينا لقاء تاني. جاد: سيبك منها، يلا عشان نروح الفصل.

عند مودة، كانت ماشية وشافت ماهر ونورسين وسند وبيري داخلين. سند ونورسين يجروا عندها. مودة: حبايبي، عاملين إيه؟ سند: الحمد لله. نورسين: أنا كبرت وجات المدرسة. مودة: حبيبتي، ربنا يحفظك. بيري: إحنا هنا. مودة، بضحك: معلش بقى، عاملة إيه؟ بيري، بابتسامة: الحمد لله بخير. مودة: إيه جاين مع بعض؟ بيري: آه، جدك سابني ومشي، ماهر ربنا يوفقه، خليني آجي معاهم. ماهر: تسلمي. يلا، بعد إذنكم. يلا يا نورسين وسند عشان نروح الفصل. يلا.

ومشوا. مودة: جدك بيلعب لعبة جديدة؟ بيري: شوفتي، سابني ومشي عشان آجي مع ماهر. مودة: آه، هو إنتي إيه رأيك في ماهر؟ بيري: مش عارفة، يعني من زمان بيقولوا ماهر لـ بيري، بس أنا سافرت، فـ ماهر اتجوز واحدة تانية. أنا مش عارفة بجد أنا بحبه ولا ده عشان من وأنا صغيرة وبيقولوا نفس الكلام، وغير كده ماما على طول، خلي بالك من ماهر، لازم تاخدي ماهر، والكلام ده.

مودة: بصي، لو إنتي عايزة ماهر، ادعي ربنا. أما أنا ملاحظة إنه إعجاب عشان وإنتوا صغيرين. بيري: أنا بقول كده برضه، بس ماما. مودة: إنتي عايزة إيه؟ بيري: أنا عايزة حد بيحبني ويحافظ عليا. مودة: هيجي بإذن الله. بيري: إنتي طيبة أوي يا مودة. مودة: حبيبتي، مفيش أطيب منك. عز: أنا بقالي ساعة بدور عليكي، إنتي فين؟ مودة: بتكلم مع بيري. عز: واقفين كده ليه؟ يلا على شغلكم. مودة: فيه إيه يا بني، لسه بدري.

عز: يلا يا بت إنت وهي، يلا واقفين بتقولوا إيه؟ بيري: بنتكلم عادي. عز: طيب يلا، كل واحدة على الحصص بتاعتها. غيث: عز، عز، عز. عز: نعم. غيث: تعال عايزك. عز: تمام، يلا كل واحدة على الحصص بتاعتها. ومشوا. عز: عايز إيه؟ غيث: دي بنت عمك صح؟ عز: آه. غيث: هي هتبقى معانا هنا؟ عز: آه، ليه؟ غيث: لا عادي، بيسأل. عز: تمام، يلا ورايا. مودة: مين ده؟ بيري: ده صاحب عز. مودة: عرفتي إزاي؟ بيري: شوفته يوم خطوبتك، كان جاي معانا.

مودة: آه، طيب يلا، كل واحدة تروح تشوف شغلها. أشوفك شوية. بيري: تمام، سلام. *** في فصل جاد، كانوا قاعدين هما ٦ فقط في الفصل. تيا: أول حصة علم نفس. جاد: أكيد تامر اللي علينا. فيروز: اوف، تامر تاني. رويدا: ماله تامر يعني؟ تيا: طبعًا، إنتِ مش بتحبي حد يغلط فيه. رويدا: آه، ومحدش يتكلم عنه وحش. مروان: ليه إن شاء الله؟ رويدا: عادي يعني. جاد: إيه الزهق ده؟ تيا: أنا عايزة أمشي. فيروز: آه، ياريت.

جاد: خلاص، بعد المدرسة نرغي شوية. الكل: تمام. ودخلت مودة. مودة: السلام عليكم، ياريت كل واحد يقعد مكانه. جاد: إنتي جاية هنا ليه؟ مودة: مودة صابر، معلمة علم النفس والفلسفة الجديدة بتاعتكم. الكل بصدمة: إيه؟