رواية مامورية الحب والانتقام الفصل السابع 7 - بقلم سلمى ايمن

مازن: عمر انت خلصت؟ عمر: آه، واديني طالع من الفيلا. مازن: عمر خليك مستخبي في الفيلا. الشبح في خطر. عمر بسخرية: بتقول إيه؟ الشبح في خطر؟ مازن: عمر، الله يخليك، أفضل في الفيلا ومترجعش غير والشبح معاك. عمر: هو الشبح هنا؟ مازن: لأ، بس هو وديميتري في طريقهم للفيلا. عمر: مش فاهم حاجة. مازن: هفهمك بعدين، بس أفضل في الفيلا. ومجرد ما تحس إن الشبح هيتكشف، اتدخل على طول. *** أميرة: يخرب بيتك. مازن: الله، وأنا مالي؟

أنا اتصرفت بحسن نية. وبعدين كنت بشم على ضهر إيدي عشان أعرف إن الشبح هو نفسه ندى مرات عمر. أميرة: في بيت هيتخرب بسببك. أنت خربت بيت صاحب عمرك ووقعت بينه وبين مراته. ندى: ما خلاص يا أميرة، اللي حصل حصل. كده كده عمر كان هيعرف. مازن: والله كان قصدي خير. خوفت إن ديميتري يعمل حاجة، فقلت لعمر عشان لو حصل حاجة يلحقك. والله ما كنت أعرف. ندى: خلاص يا مازن، أنا عارفة. روح بس الحق عمر، عشان هو تكة وهيقوم علينا زعابيب.

مازن: امشِ. (يتركهم مازن ويرحل) أميرة: احكيلي، عمل معاكي إيه؟ ندى: برود وهدوء غريب. متعصبش، مفتاحش بؤه معايا بنص كلمة حتى. مجرد ما خرجني من فيلا ديميتري وركبنا العربية، طول الطريق ساكت. هدوئه بيقلقني أكتر من عصبيته. (يقاطعهم عمر) عمر: سيادة الرائد ندى عبد العزيز. ندى: أيوه. عمر ببرود: سيادة اللواء عايزك. (ويعطي لها الهاتف) ندى: أيوه يا فندم. اللواء: الفرقة بعد كده هتبقى تحت قيادة عمر يا ندى. ندى بصدمة: إزاي يا فندم؟

اللواء: غلطتي كتير يا ندى. أولاً معرفتيش تاخدي أي معلومات من ماجي ومقدرتيش تحميها. ثانياً أخذتي خطوة خطيرة جداً وروّحتي مع ديميتري فيلته وعرضتي حياتك للخطر. والمهمة كانت هتتكشف لولا تدخل عمر في آخر لحظة. ندى: بس يا فندم... اللواء يقاطعها: قراري غير قابل للنقاش يا ندى. (ويغلق في وجهها الهاتف) (يمد عمر يده ليأخذ هاتفاً منها. تنظر له ندى برجاء، ثم تعطيه الهاتف فيأخذه ويرحل في هدوء) ندى: شوفتي يا أميرة؟

شوفتيه بيعاملني إزاي؟ *** مازن: أنا مكنتش أعرف يا صاحبي. عمر: عارف يا مازن. مازن: هو أنا ممكن أسألك سؤال؟ عمر: رد فعلي لما عرفت إن ندى هي الشبح؟ مازن: الصراحة، هموت وأعرف. عمر: لإني أنا نفسي مش عارف إيه اللي مضايقني. هل متضايق عشان الشبح اللي كل الناس تتكلم عنه وعن بطولاته يطلع ندى مراتي؟ هل متضايق عشان هي خبّت عليا وكذبت؟ ولا متضايق عشان ندى، اللي كانت على طول بالنسبالي كتاب مفتوح، أطلع في الآخر معرفش عنها أي حاجة؟

عارف يا مازن، أنا يمكن محبتش ندى زي ما هي بتحبني، بس ندى بالنسبالي حاجة كبيرة. ندى مش مراتي، ندى بنتي الصغيرة، اللي على طول كنت أنا وإيهاب نوصلها المدرسة كل يوم الصبح. لما عرفت إنها الشبح حسيت إني فاتني كتير، كأني كنت عايز أكون معاها في كل خطوة في حياتها. أنا مش متضايق إنها الشبح، أنا متضايق إني مكنتش موجود وسط كل ده. مازن: عمر، ندى بتحبك. عمر بضيق: اللي بيحب حد مش بيخدعه يا مازن.

مازن: ندى استقالت من شغلها ومن المخابرات عشان تكمل حياتها معاك. استغنت عن كونها الشبح عشان تبقى ندى مراتك. عمر بسخرية: فعلاً. أمال هي هنا بتعمل إيه بقى؟ مازن: جاتلها الفرصة على طبق من دهب إنها تجيب حق أخوها. تفتكر كانت هتسيب فرصة زي دي؟ عمر بإنفعال: وأنا بعمل إيه؟ مش بجيب حق إيهاب؟ مش واثقة فيا مثلاً إن هعرف أجيب حقه؟ مازن: بلاش تظلم ندى يا عمر.

عمر: أنا مش ظالم يا مازن، هي اللي ظلمتني. ولو سمحت كفاية عشان مش عايز أتكلم. (يتركه مازن) *** أميرة: ندى، إلحقيني. ندى: إيه يا أميرة؟ أميرة: عمر جاب لورين عشان تبقى معانا في المأمورية. ندى: لورين مين؟ أميرة: يعني مش عارفة لورين مين؟ ندى بغضب: لورين؟ وجابها ليه دي؟ أميرة: معرفش. ندى بصدمة: معقولة بيعاقبني بلورين؟ أميرة: لا يا ندى، عمر مبيدخلش حياته الشخصية في شغله. وبعدين عمر دماغه أكبر من كده. بس المشكلة في لورين.

ندى بغضب: ملقاش غيرها تبقى معانا. بس ملحوقة. هو مشافش مني غير ندى اللي بتحبه، بس من هنا ورايح هوريهم هما الاتنين مين هو الشبح. (وتقوم بغضب) تلحقها أميرة: ندى، استهدي بالله. (تذهب ندى لتجد لورين تقف مع عمر، فتاة بملامح أجنبية وملابس رسمية) مازن: أميرة تعالي، دي هتبقى مدعكة دلوقتي. أميرة: اسكت أنت. (تنظر لورين إليها بتفحص) لورين: أووه، إذن أنتِ الشبح. ندى بابتسامة وثقة: تؤتؤتؤ، قبل ما أكون الشبح، أنا ندى مرات عمر.

لورين بخبث: حقاً؟ لكنك لم تخبريني أنك تزوجت يا عمر. ندى: معلش، محبيناش نتعبك. ماهو أكيد مش هتيجي مشوار رايح جاي من روسيا مخصوص عشان تحضري كتب كتابنا، ولا إيه؟ (تأتي مكالمة لعمر ليرحل ويرد) مازن بهمس: المعركة الحقيقية هتبتدي دلوقتي. هتشوفي صراع الجبابرة. أميرة بهمس: ربنا يستر وندى متهورش. لورين: إذا، كيف حالك؟ ندى: بخير جداً. كفاية إني متجوزة البني آدم اللي بحبه. لورين بمغزى: وهو يحبك؟

ندى: يمكن مش بنفس طريقتي، بس بيحبني. وبيخاف عليا. لورين: لا يوجد طرق للحب. للحب طريقة واحدة. أيحبك أم لا؟ (تسكت ندى) مازن بهمس: أوبا، ضربة سخنة من لورين. ندى: حبي ليه كفاية. لورين بارتياح: إذن، فهو لا يحبك. (تشعر ندى بغصة في حلقها) ندى: عمر بيحبني. يمكن حالياً هو مش فاهم ده، بس أنا عارفة. أنا حاسة بيه، لإني ببساطة أنا اللي عارفاه أكتر من نفسه.

لورين: لنفترض أن كلامك صحيح. لكن لا أعلم لماذا حدسي يقول لي إن الوضع اختلف. (تقترب لورين من ندى) لورين: الآن، أنتِ بالنسبة له الشبح، ليست ندى زوجته. (تنصدم ندى من لورين) مازن: أوبا، وضربة كمان من لورين. والشبح شكله هيقع. أميرة: مين ده اللي يقع؟ هتشوف ندى هترد عليها إزاي. ندى: واضح إنك متابعة أخبار عمر أول بأول. لورين: بالفعل كذلك.

ندى: بس أنا شايفة إن كوني الشبح، هكبر في نظره وحبه ليا هيزيد. اللي تعرض حياتها للخطر كل دقيقة عشان الواجب، فما بالك باللي تقدر تعمله عشان الحب. (تنظر لورين لهاندى) ندى بثقة: وبعدين، حتى لو محبنيش، مش هيحب غيري. لإنه مش هيلاقي واحدة تحبه زيي. هيحبك إنتِ مثلاً؟ طب ما الحال من بعضه يا لورين. وبعدين لو كان في أمل إنه يحبك في يوم من الأيام... (تقترب ندى من أذنها وتهمس لها)

ندى: كان عملها من خمس سنين لما كنتوا مع بعض في مهمة ميونخ. مازن: ويعود الشبح بقوة ليلقي ضربته على وجه لورين. (تنظر لورين لها بدهشة وإعجاب) لورين: يبدو أنني لست وحدي من تتابع أخبار عمر. ندى: بس فيه فرق كبير بيني وبينك يا لورين. أنا مرات عمر. لورين: ظننتك غريمة سهلة. هذا قبل أن أعرف أنك الشبح. لكن في الواقع، يبدو أن اللعبة أصبحت مسلية أكثر الآن.

ندى بحزم: وعمر مش لعبة عشان نلعب أنا وإنتي بيها. عمر حب حياتي. مش هسمح لحد إنه يتدخل ما بينا. بلاش تلعبي معايا يا لورين. زي ما إنتِ قلتي، أنا الشبح، واللعب مع الشبح وحش. لورين: لأي مدى تستطيعين أن تصلي لكي تحافظي على حبك؟ ندى بابتسامة: كل شيء مباح في الحب والحرب. لورين: وعمر حب أم حرب؟ (تنظر ندى لعمر الذي يتحدث في الهاتف غير منتبه لهما وتقول)

ندى: عمر بالنسبالي هو الحب والحرب. أو بمعنى أصح، الحرب اللي هدافع فيها عن حبي. مازن بحماس: والضربة القاضية من ندى لتنتهي المباراة بفوز الشبح. *** ندى: عمر. عمر: نعم يا سيادة الرائد. (تضايقت ندى من معاملته الرسمية لكنها اختارت تجاهله) ندى: ممكن أعرف على أي أساس لورين هتبقى معانا في العملية؟ عمر: لورين عندها خبرات كتير. وجودها مكسب ليا. ندى بغضب: بالعكس، وجودها خطر.

عمر: شيء زي ده المفروض أنا أحدده، لإن أنا قائد الفرقة دلوقتي. ندى: مش معنى إنك قائد الفرقة تتجاهل رأينا وتنفذ قرارك بدون ما تشورنا. ثانياً، سيادة اللواء المفروض يكون عارف. عمر: سيادة اللواء بالفعل عارف قراري وموافق عليه. ثانياً، يا سيادة الرائد، أتمنى متنسيش نفسك أو إحنا هنا ليه. إحنا في مهمة وإنتي المفروض تكوني ملتزمة أكتر من كده. ومتدخليش الحياة الشخصية في شغلك.

ندى بإنفعال: أنا اللي بدخل الحياة الشخصية في شغلي، مش كده؟ ولا أنت اللي مجرد ما عرفت إني الشبح، قدمت فيا تقرير لسيادة اللواء عشان يخليك القائد مكاني وجبت لورين تكون معانا وهي ملهاش لازمة أصلاً، كأني أنا هامش أو مش موجودة في العملية؟ يقاطعها عمر: الكلام خلص يا سيادة الرائد. تقدري تتفضلي. (تذهب ندى لغرفتها غاضبة) يوقفها عمر بحزم: سيادة الرائد. (تقف ندى وتنظر له غاضبة) عمر: الرسالة.

(تعطي ندى الرسالة له ليأخذها ويعطيها للورين) عمر: لورين، اقري الرسالة. (تنظر لورين لندى بانتصار وتغضب ندى أكتر) لورين: تقول الرسالة إن التسليم سيكون في الميدان الأحمر في الصباح. عمر: والمعاد؟ لورين: لا أعلم. مكتوب شيء غريب. (يأخذ عمر الرسالة ليجد L478PQRS6U) عمر: غريبة قوي. دي شفرة. لورين: يمكنني أن أستدعي أحد خبير بتلك الأمور. أميرة: مش محتاجة يا لورين، لإن الشبح حل الشفرة من زمان.

(تضربها ندى بكتفها بقوة، فهي لم تكن تريد أن تقول لهم حل الشفرة) عمر: طب وساكتة ليه؟ ندى: بيلتزم بمهمتي يا سيادة المقدم. حضرتك وكلت لورين بقراءة الرسالة، وأنا محبتش أتدخل في شغلها. (يقبض عمر يده بحنق من كلامها) عمر: طب لو سمحتي، قولي المعاد. (تضع ندى أرجلها على المنضدة وتتجاهل عمر وتقوم بتبريد أظافرها بالمبرد) عمر بصوت عالي: إنتِ سمعتي أنا بقول إيه؟ (تتجاهله ندى) مازن: إن كان لك عند الشبح حاجة يا عمر، معلش.

عمر بحنق: ممكن يا ندى، لو سمحتي، تقولي المعاد؟ ندى للورين: اجمعي الأرقام اللي عندك. لورين: خمسة وعشرون. ندى ببرود: هو ده المعاد. عمر: المعاد خمسة وعشرين؟ خمسة وعشرين إيه؟ إنتِ كده جبتي التايهة، يعني.

ندى: الأرقام اللي عندك دي مش أرقام، دي بدائل للحروف. لو رجعت للأبجدية هتلاقي إن فيه حروف ناقصة في الترتيب الأبجدي ده وهو MNOT. عشان الترتيب الصحيح يبقى LMNOPQRSTU. هنمسك الأربع حروف الناقصة ونعمل جناس صحفي أو تباديل وتوافيق. هتطلع كلمة MONT. الإسم الديموطيقي لشهر برمهات. فالمعاد ببساطة هيبقى ٢٥ برمهات، اللي هو بكرة. (ينظر عمر لها بإعجاب خفي، فحين تنظر لورين بحنق)

ندى بثقة وغرور: قول لماما خبرات تركن على جنب عشان الشبح شبح. (يضحك مازن وأميرة، وتغضب لورين وترحل، ويذهب عمر أيضاً وهو لم يستطع منع ابتسامته) مازن: آه صح يا أميرة، إنتِ قلتي إنك شفتي حاجة في كاميرات المراقبة. أميرة: تعالوا بصوا. (تفتح أميرة هاتفها وتريهم فيديو مقابلة بين ديميتري ورجل مقنع) مازن: هو حريص للدرجة دي؟ ده مش سايب لنا دليل وراه. (تلاحظ ندى وحمة بيد الرجل المقنع وتقول)

ندى: أنا حاسة إني شفت الوَحمة دي قبل كده.