رواية ماريا الفصل السادس 6 - بقلم احمد سمير حسين

-أنتي مقبوض عليكي بتهمة النصب والاحتيال. بعد أن قالها الرجل صاحب الصوت المجهول، ظلت ماريا تصرخ وتقول: -أنا معملتش حاجة. اقترب الرجل منها أكثر حتى أصبح أمامه مباشرة وقال: -يا قارئة الفنجان، قوليلي فنجانك مقالكيش إنك هتبقي هنا دلوقتي؟ لم ترد ماريا، فقط ظلت تبكي. صرخ الرجل وقال: -انطقي. = لأ. -بتعرفي المعلومات دي منين؟ = بقرأ الفنجان. -يا بنت الكلب! ما تردي عدل. = من الواي فاي. -واي فاي إيه!

= بتاع كافية ونس، كافية ونس بتاعي، وكل اللي بيتصل بالواي فاي بتاع المكان بقدر أوصل لجهازه، باخد كل البيانات اللي عليه، وبستغلها، لكن أنا مش بنصب على حد، أنا كل اللي عملته إني بستخدمهم في كتابة مقالاتي. -يا بنت المتن.. استغفر الله العظيم، بتقتلي في الناس عشان تكتبي عنهم! = مقتلتش حد، كل دي تجارب، بنلعب بس ع الناس، ومش أي حد، الضعفاء اللي بيشتروا الوهم وبس. نزع الرجل ما يغطي وجه ماريا وقال لها:

-اديني سبب واحد ميخلينيش أقتلك دلوقتي. فتحت عينيها ونظرت لصاحب الصوت والخوف تملكها عندما عرفت من هو: -نادر! *** بعد يوم. جلست ماريا تشرب قهوتها وفي يدها سيجارة في منزلها وهي تكتب مقالة بعنوان "التدوينة الأخيرة".

"اللي يشتري الوهم إلا الضعفاء، وكل منا ضعيف بطريقته، فأنا أشعر بقوتي عندما أقنع الآخرين بأنني أقوى منهم، أعرف ما لا يعرفون، أبيع لهم الوهم مقابل الانبهار بقواي، ولكن لكل شخص يبيع الوهم للآخرين يوم، سيندم فيه، ولكن أحياناً تعطيك الحياة فرصة أخرى، فرصة للتوبة، فرصة للتغيير، فرصة للبحث عن حياة جديدة تستحقها، دون أن تبحث عن شيء خارق للطبيعة لتميز به نفسك، فقد كرم الله الإنسان ووجودي وحده في الحياة شيء يميزني، أما الآن، فقد قررت أن أنهي هذه الحياة المبنية على التلاعب وبيع الأوهام نهايتها، وأقتل معها شخصية ماريا

(قارئة الفنجان) وأعود إلى طبيعتي، سارة التي تحب الكتابة والقراءة، ربما هذه هي ميزتي التي لم أشعر بها قط." أغلقت سارة (ماريا) اللاب توب الخاص بها وعادت بظهرها إلى الخلف لتسند رأسها على الكرسي وهي تقول: -وداعاً ماريا، بيلا تشاو.. وفي هذه اللحظة جاء اتصال من نادر. -أيوه يا نادر، زبون جديد؟ عنده مشاكل مع مراته؟ جبت بياناته من الكافيه؟ شايف كده؟

خلاص ماريا هتكون موجودة في الكافيه الساعة واحدة بليل، والفلوس اللي هطلعها منه ليك منها ٩٠%، حسب الاتفاق، باي. تمت.