رواية مفيش رحمه الفصل الثاني عشر 12 - بقلم لولو محمد

رحيم: انتي مانتي لو بتسمعي الكلام مكنش فيه حاجة حصلت. كان زماني قاعد في محاضرة الإنتاج بسمع كلام نظري ملوش تلاتين لازمة، و أخدت حضور و روحت هادي. لكن إزاي؟ لازم الهانم تعند و تنشف دماغها. أصل النصيحة لما تيجي من رحيم تبقى وحشة. رحمه: خلصت؟ ما تتحججش بيا. انت أصلاً بتكرهه من زمان و ما صدقت لقيته قاعد معانا في منتهى الاحترام، تقوم تضربه و تعمل مشكلة من غير سبب. رحيم: انتي متخيلة إني ضربته عشان البيه قاعد معاكي؟

لا يا ماما، أنا ضربته عشان البيه بيقول لأصحابه إنك سبتيني عشانه. و طبعاً لما محدش صدقه، اتراهن إنه هيثبتلهم. رحمه: إيه الفيلم العربي الفاشل ده؟ لا طبعاً، أي كلام و السلام. رحيم يفرمل العربية. رحمه: وقفت ليه؟ رحيم: إنتي مبتتعبّيش بجد؟ طول عمرك كده؟ من إمتى بقيتي كده؟ عمرك ما كنتي كده... رحمه: بتعب من إيه؟ هو أي حد يقولك أي حاجة تروح تضرب في الناس كده وخلاص؟ مش على الأقل يكون عندك دليل؟ "يا أيها الذين آمنوا...

رحيم: حافظ الآية! بس أنا مش هستنى أما يبقى معايا دليل. مش هسيب كلب زي ده يقرب منك. رحمه: على فكرة انت مش ملزم تحميني. أنا كبيرة كفاية. رحيم: ضربتيه ليه؟ دخلتي وسط الرجالة و ضربتيه ليه؟ رحمه: معرفش. اعتبره أدرينالين. لما شوفت الخناقة عندي ميول عدوانية مثلاً. معرفش. رحيم: إنتي هتصيعي عليا يا بت؟ إنتي عارفة إنك مستحملتيش تشوفيني بنضرب؟ رحمه: تنضرب إيه ده؟ اللي ضربك عيل أهبل. ضربك ببطن المسطرة كسرها. حد يعمل كده؟

مهي طبعاً هتتكسر. اللي عاوز يضرب يضرب بسيف المسطرة. توجه أكتر و متتكسرش. رحيم: يا واد انت يا خبير خناقات يا جامد. رحمه: أنا عورته جامد. رحيم: أحسن. خليه يموت و نخلص. بلا قرف. والله الكلية تنضف. رحمه: و أتحبس أنا؟ مش كده؟ رحيم: إنتي مكنتيش في الخناقة أصلاً. هو انتي حضرتي أصلاً؟ رحمه: يا سلام. رحيم: أيوه. أنا اللي ضاربه. إنتي روحتي بعد السيكشن. رحمه: ماشي. فكرة برضه. انت تستحمل السجن عني. رحيم يسوق العربية.

رحيم: واطية. ههههههههههههه. *** في البيت بالليل. رحمه نازلة عالسلم تلاقي رامي طالع شايل حاجة. رحمه: أساعدك؟ رامي: مش مشكلة. خفيفة. البيه تليفونه مقفول ليه؟ رحمه: معرفش. مشوفتوش من ساعة ما روحنا من الكلية. تعال، هو الدور اللي جاي. الشقة اللي عالشمال. رحيم ينزل. رحيم: هو إنت؟ إزيك يا معلم؟ رامي: هو إيه اللي انت؟ رحيم: مفيش يا عم. كنت نايم. و أمي صحيتني بتقولي رحمة واقفة مع واحد غريب عالسلم. قولت أنزل أشوف مين.

رحمه: عن إذنكم. رحمه تطلع شقتها. رامي: خد ياعم أدواتك اهي. احتست بيها في المواصلات. انت تروح في العربية بيه، و أنا اتبهدل بحاجتك و حاجتي. رحيم: هههههههه. معلش. تعال اشرب حاجة. رامي: ماشي. يلا. *** في أوضة رحيم. رامي: مشوفتش انت اللي حصل بعد ما مشيت؟ رحيم: احكي. رامي: الواد ممدوح مسك ماجد تالت لما قال يا بس. رحيم: هو أخبار دماغه إيه؟ رامي: دي تعويرة صغيرة يا عم. مفيش ثواني و الدم وقف. رحيم: هو كان عنده دم أصلاً؟

رامي: هههههههههههههههه. بس إيه؟ خلاص كده عمره مهيفتح بقه عنها تاني. أصلها مش هتبقى بتحبه و تضربه بالشكل ده. رحيم: يلا. مكتوبالها. كان نفسي أكون أنا اللي ببطحه. رامي: ملحوقة. المرة الجاية. هههههههههههه. *** في الكلية بعد فترة. ريهام: إحنا لو في معتقل هنتعامل أحسن من كده. إيه الهم ده؟ رحمه: هانت. كلها كام شهر و خلاص. المهم، اوعي تنسي الأسبوع الجاي عيد ميلادي و كلكم معزومين. رنا: في البيت زي كل مرة؟ رحمه: أكيد يعني.

روقيه: أنا آسفة أوي يا رحمة. أصل إحنا ناوين نعمل لرحيم حفلة في كافيه بره. رحمه: فلوسكم هتقع عالأرض عشان رحيم مش هيحضر. روقيه: غريبة. مع إننا ماكدين عليه. رحمه: هنشوف. *** في البيت. في أوضة رحيم. هو قاعد عالنت. رحمه: إنت هتعمل إيه في عيد ميلادك؟ رحيم: صحابي عازميني على حفلة بره. رحمه: والله بجد؟ رحيم: عزموني. قولت لبابا، قالي اللي يريحك. قولت لهم ماشي. رحمه: سيب الزفت اللي في إيدك و كلمني زي ما بكلمك. رحيم يقفل اللاب.

رحيم: أفندم. رحمه: إيه؟ و أنا؟ و عيد ميلادي؟ رحيم: عادي. هيكون زي كل سنة. ماله؟ رحمه: هو إيه اللي ماله؟ مش هتحضر عيد ميلادي ولا إيه؟ رحيم: لا طبعاً. هحضر عيد ميلادك. الساعة 8 هنطفي الشمع و أستأذن. أروح لهم الكافيه على 9 كدا ولا تسعة و ربع. رحمه: اعتذرلهم أحسن. رحيم: ليه يعني؟ الناس دي دفعت فلوس و حجزت الكافيه. و أنا معنديش استعداد أطلع عيل عشان حضرتك مزاجك كده.

رحمه تدمع: ماشي. اعمل اللي يعجبك. مكنتش أعرف إن رأيهم فيك أهم من رأيي أنا. رحمه تمشي. و رحيم يمسكها. رحمه: أفندم؟ عاوز إيه؟ انت مش بقيتهم عليا؟ هتطفي الشمع و تخلع خلاص؟ أنا بعفيك خالص من إنك تبقى موجود أصلاً. روح لأصحابك لحسن يقولوا عليك عيل ولا حاجة. رحيم: إيه رأيك تيجي معايا؟ رحمه: بجد؟

لا يا بابا. أنا مبفرضش نفسي على حد. وبعدين أنا مش قليلة الذوق عشان أسيب ضيوفي و ضيوف أهلي اللي جايين و مكلفين نفسهم هدايا عشان أروح حفلة اللي فيها مش طايقيني أساساً. رحيم: هتقعدي تعملي إيه؟ هتقعدي تبصي لهم و كل واحد بيمصمص شفايفه إننا سبنا بعض؟ تفتكري هننبسط في أول عيد ميلاد لينا مش مع بعض؟ رحمه: عندك حق. هتنبسط أكتر مع روقيه. رحيم: الله يحرق روقيه على اليوم اللي شفتها فيه يا شيخة!

هو انتي مبتشوفيش في الشلة كلها غيرها؟ رحمه: أنا ماشية. اعمل اللي يريحك. *** يوم عيد الميلاد. الكل يطفي الشمع و يدوا الهدايا لرحيم و رحمة. رحمه تجيب علبة من جوه و تديها لرحيم. و يفتحها يلاقي فيها ساعة. رحمه: ساعتك اتكسرت في الخناقة. رحيم: شكراً. دي هديتك. رحيم يطلع سلسلة مكتوب عليها رحمة و محفور على ضهرها رحيم بخط صغير تحت. رحمه: شكراً. حلوة قوي. رحيم: أنا همشي بقى عشان متأخرش.

رحمه تدخل أوضتها تحط الهدايا و متردش عليه. و تطلع متلاقيهوش. تقعد شوية و تقوم تطلع تقف في البلكونة. و مصطفى يدخلها. مصطفى: ممكن أقف معاكي شوية؟ رحمه: أوي أوي. اتفضل. مصطفى: مالك؟ حاسك مش مبسوطة. رحمه: لا أبداً. أنا بس منمتش كويس. انت عارف الكلية مرهقة و... مصطفى: هو صحيح انتي و رحيم خلاص؟ رحمه: يااااه. ده إحنا بقالنا شهور على كده. يابني إنت لسه فاكر؟ مصطفى: بصراحة عندي شعور فظيع بالذنب ناحيتكم. رحمه: ذنب ليه؟

مصطفى: بقول إن أكيد أنا اللي حسدتكوا. أصلي كنت بحسده قوي على النعمة اللي هو فيها. رحمه: كله نصيب. و إحنا ملناش نصيب مع بعض. مصطفى: و عاملة إيه في الكلية؟ النتيجة أخبارها إيه؟ رحمه: في ناس بتقول إنها هتبان الشهر ده. بس معرفش. مصطفى: خير إن شاء الله. رحمه: و انت عامل إيه في شغلك في البنك؟ مصطفى: بدأت آخد على الوضع. في الأول كان صعب شوية. بس أهو شغال. رحمه: بالتوفيق بإذن الله.

مصطفى: عمو محمود قالي إن رحيم خرج مع صحابه يحتفلوا. رحمه: أه. عاملينله حفلة. مصطفى: أنا معرفش طلبي ده هيبقى غريب و لا لا. بس إيه رأيك يعني لو عزمتك بكرة عالغدى بعد الكلية؟ رحمه: معرفش يا مصطفى. بكره يوم طويل أوي. و هخلص الساعة ستة. معرفش هبقى قادرة أخرج و لا لا. أكيد هروح أنام زي القتيلة. مصطفى: طب على العموم. دي هدية صغيرة مني. يارب تعجبك. رحمه: كلفت نفسك. رحمه تفتحها تلاقي جواها ساعة بناتى قلوب رقيقة أوي.

رحمه: حلوة. عجبتني. مصطفى: بصي. دا الكارت بتاعي. رحمه: هههههههههههه. ماشي يا عم. مصطفى: لا لا لا. مش قصدي والله. أنا يعني بديكى رقمي عشان لو حبيتي تغيري رأيك بكرة تكلميني. رحمه: حلو الكارت. هخليه معايا. مصطفى: طب إيه؟ مش هتدخلي جوه شوية؟ رحمه: حد يسيب الجو التحفة ده و يدخل في الزحمة؟ حياة تدخل. حياة: أخيراً لقيتك. تعالي. عمو إبراهيم بيسأل عليك. رحمه: حالا جاية. يا مصطفى. مصطفى: أكيد.

رحمه تروح تقعد جنب إبراهيم. و منه جنبها. إبراهيم: إيه يا رحمة؟ سبتينا و غطستي فين؟ حياة: كانت في البلكونة. زينب: مع مصطفى. إبراهيم: و أنا أقول الجو هنا كان حر ليه؟ أداري الهوا كله كان في البلكونة. محمود: متقومي تجيبي ساقع لعمك إبراهيم يا رحمة. رحمه: حالا. رحمه تقوم و هي راجعة شايلة صينية عليها ساقع. تلاقي رحيم داخل. تبتسم أوي. يبتسم لها. رحمه: رجعت. رحيم: أه. طفينا الشمع و مشيت علاطول. الجو هنا أحلى كتير.

رحمه: قولتلك تعال. رحيم يدخل الصالون مع رحمة. محمود: إيه المفاجأة الحلوة دي؟ إنت رجعت؟ رحيم: والله كان على عيني أسيب اللمة الحلوة دي و أنزل. بس أعمل إيه؟ أصحابي كانوا حاجزين كافيه و صمموا يعملولي يوم. مصطفى: أيوه. بس ده يوم في السنة بنتجمع فيه. رحيم: مانت غلطان برضه يا مصطفى. المفروض نشوفك طول السنة. ولا البدلة غيرتكم؟ منه: من يوم ما اتعين في البنك و لبسه كله بقى بدل. رحمه: البدلة بتظبط الشكل جامد. ده رأيي يعني.

رحيم يبص لرحمه و لإيدها. يلاقي ساعة. مصطفى: بغض النظر عن موضوع البدلة. إيه رأيكوا نخرج نتغدى يوم شباب بس؟ إبراهيم: قصدك إيه ياض انت بشباب بس؟ محمود: دا فاكرنا عجزنا. الواد ده باين. عفاف: هو أكيد أكيد يقصدني أنا طبعاً. محمد: أكيد يا ست الكل. مصطفى: ههههههههه. حقكم عليا. أنا غلطان. منه: أنا موافقة. إيه رأيك يا عماد؟ عماد: معنديش مانع. شوفوا تحبوا تخرجوا إمتى.

مصطفى: حددي المكان و الزمان يا رحمة. النهاردة عيد ميلادك. بكرة بتقولي مش هتقدري عشان هتتأخري في الكلية. طب بعده؟ رحمه: لا. رحيم عنده تدريب. خليها الاتنين. إيه رأيك يا رحيم؟ رحيم: لو عاوزين الحد متشغلوش بالكم بيا. عادي اخرجوا. مصطفى: إيه يا عم؟ مش عاوز تخرج معانا ولا إيه؟ رحيم: أصل الميدتيرم الأسبوع الجاي. و أنا يادوب ألم.

عماد: معلش يا مصطفى. أصل اللي قدامك دول نسوا طعم الحياة. من البيت للكلية. و من الكلية للبيت. مفيش أي حاجة غير المذاكرة عندهم. إبراهيم: والله عيال جدعان. خلاص أجلوا الخروجة لبعد الميت ترم ده. منه: ميدتيرم يا بابا. يعني امتحانات في نص الترم. إبراهيم: ماشي يا فزلوكة. طب مش نقوم إحنا بقى؟ محمد: الوقت لسه بدري. خليكم شوية. إبراهيم: العيال عندهم كلية بكرة. و مينفعش نسهرهم. محمد: والله نورتونا.

محمد و محمود يوصلوا إبراهيم و أسرته. و رحمة تدخل أوضتها. و رحيم وراها. رحيم: حلوة الساعة. رحمه تقلعها و ترميها عالتسريحة. رحمه: مصطفى جابها. و لبستها شوية مجاملة يعني. رحيم: أه. كنت فاكرك مبتحبيش الساعات. رحمه: مكنش ينفع أكسفه. وبعدين شكلها حلو. إيه أخبار الحفلة إيه؟ رحيم: مقولتلك. روحت و رجعت علاطول. يادوب طفينا الشمع. رحمه: و مزعلوش؟ رحيم: قولت لهم إني عندي ضيوف. و إني استأذنت شوية و راجع. محدش اعترض.

رحمه: أوك. روح ارتاح بقى عشان الكلية بكرة. رحيم: كل سنة و إنتي طيبة. رحمه: و إنت طيب. يلا بقى عاوزة أغير هدومي. رحيم يطلع مالأوضة. و رحمة تقفل الباب. رحيم يتنهد و يمشي. *** بعد فترة. رحمه بتنشر الغسيل في البلكونة. و رحيم واقف في البلكونة اللي جنبها بيشرب شاي. رحيم: يا صباح الأشغال الشاقة. رحمه: ههههههههههههه. صباح الخير. إيه اللي مصحيك بدري كده يوم الإجازة؟ رحيم: أمي قررت إنها لازم حالا تاخد ملاية السرير تغسلها.

رحمه: ههههههههههههه. يا حرام. رحيم: أهو على الأقل شوفتك بتنشرى. رحمه: ياااااه. على العموم. خلصت. رحيم: إيه رأيك أعزمك بره. أهو نفصل عن المذاكرة شوية. رحمه: ام لاء. مفتكرش. أصل ماما يوم إجازتي بتخليني أنا اللي أطبخ. و كنت ناوية أعمل كشري و كبدة. عارف بابا بيحبهم. رحيم: إنتي بنت عم؟ إنتي مكنتش مستني منك كده أبداً. رحمه: إيه؟ رحيم: تبقي ناوية تعمليلي كشري بالكبده و متعزمينيش.

رحمه: ههههههههههههه. خلاص. هستناك. و أقولك كمان هعملك الحلو شعرية بلبن. رحيم: يا مزاجوا الرايق. رحمه: ههههههههه. متقلش في الفطار بقى عشان تعرف تاكل بزمة. رحيم: قشطة. رحمه تدخل مالبلكونة. و رحيم مبسوط. *** بعد الصلاة. عفاف: إزيك يا رحيم. شكلك مبسوط. إيه احكيلي. رحيم: رحمة عزمتني عندكوا عالغدى. تفتكري دي علامة؟ عفاف: ههههههههههههه. بتسألني أنا؟

أتاريها في المطبخ من الصبح. خش لها. بس لو لقيتها بتحمر شعرية خدها من قصيرها و اخرج. مصدقنا. رحيم: هههههههههههه. ماشي. عن إذنك. حياة: إيه يا ماما؟ إنتي لسه بتشجعيه؟ مصدقنا بدأوا يكملوا حياتهم و يعدوا المرحلة دي.

عفاف: تبقي مش فاهمة حاجة. هما بدأوا يتأقلموا عشان عرفوا يتعاملوا مع بعض تاني. هما الاتنين روح واحدة في جسمين. مينفعش يبعدوا عن بعض. و إن كان يعني عشان فسخوا الخطوبة فدا مجرد مطب. و بكرة تقولي ماما عفاف قالت إنهم هيرجعوا لبعض. *** في المطبخ. رحيم: بتحمري شعرية؟ رحمه: خضيتني! لا. بحمر سمبوسك. رحيم: بتهزري؟ رحمه: أصل جايلنا ضيف مهم. قولت لازم أكرمه. رحيم يطلع يقعد عالرخامة. رحيم: مهم أوي يعني؟ رحمه: طبعاً.

رحيم: بس إنتي صاحية رايقة أوي النهاردة. خير؟ رحمه: أصلي شفت بشرى في المنام. و فضلنا نغني و نلعب. زعلت أوي لما صحيت. تصدق؟ وحشتني. رحيم: إيه رأيك نروح نزورها؟ رحمه: بصراحة. أنا عاملة الأكل ده كله عشان أرشيك و نروح. رحيم: والله من غير ما ترشيني. إنتي بس اؤمريني. رحمه تمسك سمبوسكاية سخنة و تحطها في بق رحيم. رحيم: مجرمة. رحمه: ههههههههههه. *** عالغدى.

محمود: دا الست رحمة راضية عننا خالص. كشري و بطاطس محمرة و سمبوسك بالجبنة و باللحمة المفرومة و كبدة. كل ده مرة واحدة. رحمه: و لسه الحلو يا بابا. عملتلك عشان خاطر عيونك شعرية باللبن و جلاش بالكاستر. محمود: طب الجلاش و ممكن أصدق. لكن الشعرية عشاني أنا برضه؟ حياة: محمود. رحيم: على فكرة يا عمو. أنا بموت في الجلاش بالكاستر. و سموا بقى. لحسن أنا هموت من الجوع و مش هستنى حد. عفاف: شوفوا الواد.

رحيم: على فكرة يا رحمة. أنا كلمت الدار. و مستنينا. رحمه: بجد؟ طب أنا هقوم ألبس. رحيم: تلبسي إيه؟ أنا مأكلتش. رحمه: إنت و سرعتك بقى. ههههههههههههههه. رحمه تقوم تجري. رحيم: عاجبك كده يا تيتا؟ تعزميني تفرجيني عالأكل؟ و لعلمكم اللي هيمد إيده على الشعرية على ما أجي هو عارف. محمود: بقولك يا حياة. سيبك مالأكل ده. و قومي هاتيلي الشعرية. أما أشوف الواد ده هيعمل إيه.

عفاف: هههههههههه. بطل رخامة يا محمود. الله يا حبيبي. دانا هعملك مخصوص. هو أنا عندي أغلى منك. رحمه تطلع مالأوضة بتعدل في هدومها و بتلم شعرها. رحمه: يا سلام بقى كده. رحيم: إنتي لحقتي تلبسي؟ رحمه: أه. يلا. لحسن نتأخر. رحيم: يلا. سلام. رحيم و رحمة خرجوا. عفاف: ربنا يهديكم و يهدي سركم. محمود: تفتكري اللي بنعمله ده صح؟

حياة: في الأول و الآخر هو ابن عمها. و علاقتهم دلوقتي أحسن من إنهم يكونوا أعداء. أهي على الأقل بتروح و تيجي معاه. و بنبقى مطمنين عليها أكتر. رجعوا يذاكروا سوا و يشجعوا بعض. و حياتهم بقت أهدى. على الأقل رحمة بطلت عياط طول الليل. محمود: على الله. كله على الله. *** في الكلية بعد فترة. رحيم قاعد عالسلم و رحمة جنبه و بيشرحلها حاجة. روقية تدخل. روقيه: هاي. رحمه: طب أنا هقوم ثواني و جاية. رحمه تقوم. روقيه: هو في إيه؟

رحيم: متأخديش في بالك. إزيك. روقيه: كنت عاوزة أصور ملخص التاريخ الهندسي منك. رحيم: بس كده؟ حاضر. هصورهالك و أجيبهالك بكرة معايا. روقيه: أوك. شكراً. رحمه ترجع. روقيه: أوك. أشوفك بكرة بقى. متتأخرش. أوعى تنسى. سلام.