رواية مغامرات عائلية الجزء الثاني الفصل السابع والعشرون 27 - بقلم همس كاتبة

بدأت كارما بالبكاء ويدها ترتجف. زياد بفزع: في إيه؟ كارما ببكاء: زياد.. أنا اللي قلت لجدو. زياد: انتي يا كارما!!! كارما بخوف: والله هو كان عارف إننا خرجنا. سألني الصبح وأنا ما.. ما قدرتش أكذب. نظرت لوجوه الجميع، كانوا يحدقون بها بصدمة وعدم تصديق. ألقت حلا المكنسة جانباً واندفعت نحو كارما بهمجية، ولكن حبيبة باغتتها ووقفت في وجهها. حلا بغضب: ابعدي من وشي.. أنا هوريكي يا خاينة. حبيبة: اهربي يا كارما.. اهربي.

فارس: وديني لادبحك يا عميلة. أمسكه زياد وقال بغضب: إيه! هتضرب أختي!! دينا: هي عميلة وتستاهل اللي هيجرالها. مصطفى: صحيح.. ومحدش أحسن من حد. حبيبة: اهربي يا كارما.. هينفخوكي يا بت. كانت كارما تقف متجمدة أمامها. لم تمر ثوانٍ حتى فقدت توازنها ووقعت مغمى عليها. ليلة بفزع: كارمااا. اتجه لها زياد بسرعة وحاول إيقاظها، وكذلك تميم. زياد بغضب: أنا هوريكم يا كلاب.. البت اتخضت بسببكم.

حلا بسخرية: ما كنتش عارفة إن كارما عندها موهبة التمثيل.. دي بتشتغلنا عشان تهرب. زياد بحدة: اخرسي يا حلا. فتحت كارما عيناها ببطء. نظرت حولها وعادت لرجفتها وخوفها. كارما: زي.. زياد.. والله.. زياد بحنية: بعدين يا حبيبتي، المهم نطمن عليكي دلوقتي. فارس بسخرية: حنين أوي. تميم بخيبة: ما توقعتهاش منك يا كارما.. ده إحنا بنقول عليكي ملاك بجناحات. كارما ببكاء: والله.. جدو..

حبيبة: مش وقت الكلام ده.. تعالي هاخدك ترتاحي بأوضتك.. انتوا كملوا شغل. حلا بصدمة: شوفوا البت بتأمرنا إزاي.. فاكرة نفسك كبرتي يختي! ده انتي لسه بتشبطي بكيس شيبسي. حبيبة بحدة: حلا اخرسي. دينا بحزم: الليلة هنعملها محاكمة ونعاقبها على الخيانة. يزن: قلبك ميت يا بت. دينا: العدل وعد السما للأرض.. زي ما مصطفى ولارا اتعاقبوا هي هتتعاقب برضو. مصطفى بغيظ: طبعًا لارا وكارما يتعاقبوا بالصمت بس أنا اتعاقب بعلقة تلات أرباعها موت.

فارس: أنت جحش بس هما بنات.. أكيد مش هنضرب بنات. مصطفى: لو أنا جحش يبقى أنت حمار كبير.. أصلك شملت جنس الذكور كلهم. يزن: بطلو سخافة بقى. ذهبت حبيبة مع كارما. زياد بهدوء: انتوا عارفين كارما طيبة ومش بتعرف تكذب. حلا: يبقى ياكل انت العلقة ويدفع تمن خيانة أختك. زياد بسخرية: ما أنتي لو فكرتي تعمليها هعتبرك راجل وأوريكي الضرب على أصوله. فارس: ما تحترم نفسك يا زياد. زياد: لم خطيبتك الأول وقولها تتأنث شوية.

حلا بغمزة: أعتقد إن أنوثتك كفاية يا زيزو. زياد بغضب: اخرسي مش عايز أضرب واحدة بيقولوا عليها بنت. كانت حلا سترد، ولكنها ما إن نظرت للأرض حتى صرخت بصوت عالٍ جداً. حلا: آآآآآه فار.. فار. ليلة بفزع: آآآآآآآآه لا.. ابعدوه عني. دينا: هو فين؟ حلا وهي تشير لزاوية: أهو أهو هناك.. بيبصليييي أقسم بالله. خلع مصطفى حذاءه وكان سيقذفه عليه، لولا دينا التي أمسكت يده. دينا: أوعى.. حرام عليك.

التفتت دينا للفأر ولمعت عيناها. لم تمر ثوانٍ حتى أمسكته بيدها ورفعته. فارس باشمئزاز: بتعملي إيه! جاتك القرف. حلا: خرجيه برا.. شكله مرعب. تميم: ليه قافشاه كده؟ ممكن ينقلك أمراض. ليلة بقرف: انتي مقززة والله.. إزاي قدرتي تلمسيه! أنا هرجع. دينا ببرود: خلصتوا؟ ده الحكيم يا أغبياء. يزن باستغراب: حكيم؟ فارس: يعني إيه؟ هيغنيلنا نار نار نار أنا قلبي قايد نار؟ انتي أكيد اتجننتي.

دينا: يا ابني ده مش حكيم بتاعنا.. ده الحكيم صاحب عاصف.. حولته تاجا لفأر وماتت قبل ما تقول التعويذة اللي هترجعه بني آدم. ليلة باستغراب: انتي بتقولي إيه؟ دينا: عمرك شفتي فار بيفضل باصص للبني آدمين وهما حواليه عادي؟ المفروض يهرب بسرعة.. بس هو ما هربش يبقى الحكيم. يزن بإدراك: آآآه.. الكلام ده من رواياتك مش كده؟ دينا ببلاهة: آه.. أبابيل. يزن: انتي محتاجة تروحي مستشفى يا حبيبتي. دينا: انت كمان مش مصدقني؟

طب اتفضل اسأله ولو ما ردش عليك تف عليا. أخذ يزن نفسًا عميقًا يحاول أن يهدأ وقال: أنا لازم أعيد النظر في موضوع جوازنا.. مش هنتجوز قبل ما تتعالجي. دينا: ليه كده.. ده بيقول أفيهات تضحك والله. فارس بقرف: ابعديه من هنا.. جاتك القرف. دينا وهي تقربه من فارس: ليه بتخافي من الفيران يا بيضة؟ فارس بفزع: آآآه ابعديه عني يا مقرفة. تميم: أقسم بالله يا دينا لو لمستي الأكل بتاعنا بإيدك هقطعهالك.. ده كائن مقزز وممكن ينقلنا فيروسات.

دينا: طبعًا لازم تقول كده.. يا ابني كتر خيره هو ونسله كلهم اللي عملوا منك دكتور.. مش دول الكائنات الرقيقة اللي حضرتك كنت بتعمل عليهم تجارب؟ تميم: كائنات رقيقة؟ يزن طلقها واخلص والله هتجيبلك شلل أطفال. دينا للفأر: رد عليا يا حكيم.. أنت اسمك الحقيقي إيه؟ مرت لحظات من الصمت. حلا بصدمة: دي بتكلمه بجد يا جماعة! ليلة: مريضة. صرخت دينا بفزع عندما باغتها الفأر ودخل من كم بلوزتها.

دينا بصراخ: آآآآآه خرجوه من هدوميييييي.. آآآآآه. فارس بضحك: الحكيم بتاعك سافل أوي. اقترب منها يزن وحاول إخراج الفأر وتعب. فارس بصدمة: ده بيتلكك عشان يحسس. وكزته حلا في بطنه وقالت: مش وقت سفالتك انت التاني. فارس بضحك: مين الأولاني الفار ولا يزن؟ حلا: كلكم شلة سافلة أقسم بالله. خرج الفأر من كمها الآخر وهرب بسرعة، بينما دينا جلست على الأرض وهي تلهث. دينا: هيا هيا سفالته هنا وبالرواية كمان أقسم بالله.

يزن بصدمة: يخربيتك.. ده كان ممكن يعضك يا هبلة. فارس بغمزة: وأنت استغليت الموقف مش كده؟ بس حركة بطولية بصراحة. تميم بقرف: روحي استحمي وعقمي نفسك كويس.. وإياكي ثم إياكي تقربي من أسر. دينا: انتوا ليه مش مصدقين إنه الحكيم؟ زياد بنرفزة: حكيييم إيه يا متخلفة.. أنا هروح أشوف كارما أحسن ما أتعدى من غبائك ده. تلفتت دينا حولها وقالت بضيق: أهو راح عجبكم كده؟

حلا بخوف: يعني لسه ما خرجش.. بقولكم إيه أنا مش هشتغل هنا.. ما اتفقناش يكون فيه فار معانا. فارس: هو هياكلك؟ ديتها تديله بالشبشب وهيخرج. حلا بسخرية: إيه الرجولة اللي دبت فيك دلوقتي.. ما أنت كنت خايف أكتر مني. فارس برفعة حاجب: حلا اتلمي. مصطفى: اتفضلوا ارغوا لحد ما يجيلنا جدو ويزود العقوبة. دينا: أنا هروح آخد شاور بعد المعركة دي. يزن: ما تقريش روايات تاني أبوس إيدك.

دينا: مش هتصدقني لو قولتلك إني توقعت منه الحركة دي.. بس يا ريت قبل ما يمشي قالي نهاية الرواية كنت هنام وأنا مطمنة. يزن بنفاذ صبر: دينا.. امشي من وشي. *** دَلفت غادة أوضتها وبدأت تجمع احتياجاتها. التفتت إلى لارا التي تلاعب الكلب. غادة: جدو يعرف حاجة عن الكلب ده؟ لارا: لا. غادة: يبقى تخرجيه من البيت.. أصله من ساعة ما جه وأنتي بقيتي شيطانة على هيئة بني آدم. لارا بانكسار: ليه بتقولي كده؟ وليه ما نمتيش بالأوضة امبارح؟

غادة: عشان أنتي ما تستحقيش يكون ليكي أخت.. أنا بقيت أتكسف إنك أختي.. كل تصرفاتك مش طبيعية.. عمري ما تخيلت إنك تكوني مريضة نفسيًا.. بس دلوقتي اتأكدت من ده. لارا: حتى أنا يا غادة؟

غادة: آه حتى أنا.. عشان الحركة اللي عملتيها دي ذنب كبير.. ياما قولتك نضفي قلبك وما تحقديش عالناس.. بس السواد اللي جواكي عمل منك شيطانة.. مفيش إنسانة كويسة تعمل كده في بنت غيرها.. وأنتي عارفة إن دينا بنت محترمة وما كانش قصدها تهينك.. وعشان شوية هزار قلبتي الموضوع بجد واتهمتيها ظلم.. امتى هتفوقي من الجنان ده؟ لارا: هي اللي بدأت.. هي اللي اتكلمت عليا.. أنا ما عملتش حاجة غير إني جبت حقي بطريقتي. غادة: حبيبة اتكلمت عليكي؟

مش أنتي اللي من يوم ما وعيتي ع الدنيا وأنتي بتتكلمي عليها؟ لارا: إيه اللي حشر حبيبة بالحكاية دي؟ المشكلة بيني وبين دينا. غادة: وحلا لما ضربتك كان ليه؟ عشان اتكلمتي على أختها.. رحتي بوظتي خطوبتها وعملتي حرب بالبيت ده وبسببك الستات اتخانقوا.. وأهي لتاني مرة تعملي كده.. ولولا ستر ربنا كانت قامت خناقة بين ماما وطنط خولة. لارا: ليه؟ ليه بتحمليني ذنب كل حاجة حصلت؟ ماما اللي اتخانقت معاهم أنا مالي؟

غادة: أنتي كنتي الشرارة.. لولا كلامك ما كانتش ماما هتتخانق معاها.. عمتا دي آخر مرة هكلمك فيها يا لارا من النهاردة اعتبريني قطعتك. لارا بغصة: قطعتيني؟ عشان مين؟ كله ده عشان دينا اللي كانت هتخطف خطيبك منك؟ غادة بغضب: مش قولتلك أنتي مريضة نفسيًا.. حتى وأنتي غلطانة بتفتري على البنت؟ بجد أنا مش قادرة أصدق إن اللي واقفة قدامي دي أختي.. ربنا يهديكي يا لارا.. ربنا يهديكي. *** في أوضة كارما.

حبيبة: برضو أنتي الغلطانة.. حتى لو قولتي له المفروض اعترفتي قدامنا من أولها. كارما ببكاء: مقدرتش.. خوفت منهم وجدو قالي ما أتكلمش عن الموضوع ده. حبيبة: بس كده ممكن يأذوكي.. هما مش هيسكتوا قبل ما يجيبوا حقهم.. خصوصًا حلا ممكن تطب عليكي وتضربك. كارما بخوف: أنا هنزل أقول لجدو.. والله لو ضربوني ما هسكتلهم.. هكلم البوليس يلمهم كلهم. دلف زياد في هذه الأثناء.. جلس بجانب كارما وسحبها لحضنه. زياد: طمنيني عليكي يا حبيبتي.

كارما بتوتر: أنا كو.. كويسة.. ز.. زياد.. هو أنت زعلان مني؟ زياد: بصراحة آه.. وجدا كمان.. ما توقعتهاش منك أبدا. كارما: والله غصب عني.. حطيت إيدي ع المصحف قدام جدو وحلفت إني هقول الحقيقة.. ما قدرتش أكذب عليه. زياد: لازم اعترفتي من الأول على الأقل. كارما برجاء: زيااااد.. ما تزعلش مني والنبي.. ما أقدرش على زعلك انت بالذات والله. زياد: عارفة يا كارما أول حاجة بابا علمهالي إيه؟

قالي أهم حاجة بين الأخوات الثقة.. وأنا اديتك كل ثقتي وسافرت وأنا متأكد إني سايب ورايا بنت بمية راجل.. صحيح موقف النهاردة تافه شوية.. بس ما يمنعش إنك جرحتي الثقة دي. كارما ببكاء: أنا غلطت وحاسة بغلطتي.. ومستعدة أنفذ أي عقوبة بس تسامحني. زياد بابتسامة: وبالنسبة لقوم فرعون اللي برا دول هقولهم إيه؟ دول عايزين يقيموا عليكي الحد يا بت. كارما: يعني إيه؟ حبيبة: ما تخافيش محدش هيأذيكي. زياد أنا بقول نكلم جدو، إيه رأيك؟

زياد: هيعتبروها خيانة برضو. اختك بتفكر تعاقبني نيابة عن كارما. كارما بدموع: يبقى خلاص اعملولي محكمة وأنا هاجي وهجيب محامي دفاع. زياد بضحك: والله! تركتهم حبيبة وخرجت تزامناً مع دخول غادة. غادة: بجد انتي اللي قولتي لجدو؟ كارما بتوتر: أيوه. غادة: استغفر الله العظيم، انتي ولارا بقيتوا غريبين جداً. كارما: ما تقارنيش تصرفي بتصرفها. أنا اعترفت بذنبي وندمت.

زياد: حلا مستنية اللحظة اللي هتشوفك فيها عشان تنتقم، فالأفضل تقفلي على نفسك الباب. كارما بخوف: يلهوي! دي متوحشة وضربت رجالة، ما بالك أنا! غادة: لا حول ولا قوة إلا بالله. اهدي يا حبيبتي واقري شوية قرآن. ما تخافيش مش هتأذيكي، ولو قربتلك جدو أكيد هيعاقبها لوحدها. *** دَلَفَت حبيبة أوضتها وجدت أوس يعمل على اللابتوب بتركيز، وبجانبه ينام كنان بهدوء. حبيبة بابتسامة: ليه بتشتغل بالأوضة؟ ممكن كنان يدايقك.

أوس بحب: محتاج وجوده عشان بيفكرني بمامته اللي نسيت جوزها. عانقته من الخلف وقالت: عمري ما هنسالك. بس قلت طالما مشغول أسيبك تشتغل براحتك. أوس: راحتي هتكون مطرح ما حبيبتي تكون. حبيبة بخجل: وبعدين معاك. أوس: قوليلي بقى إيه اللي حصل؟ وشك أصفر كده ليه؟ حبيبة: كارما هيا اللي قالت لجدو على حكاية البيت، وحلا عايزة تضربها. أوس: طبعاً حلا الكلبة المسعورة في البيت ده. حبيبة بتحذير: أوس، هقولها.

أوس: خلاص آسف. تعالي نخرج للبلكونة شوية، أنا زهقت هنا. حبيبة بحماس: يلا. خرجوا سوياً من الأوضة والتقوا بفريدة التي تمشي بسرعة واضطراب. فريدة: الحقونيييي! حبيبة: في إيه مالك؟ فريدة ببكاء: أنا حامل، حامل يا حبيبة. حبيبة: ألف مبروك. فريدة بغضب: ما قلتش كده عشان تباركيلي. أعمل إيه أنا في المصيبة دي؟ إزاي هخس؟ إزاي ههتم بالبيبي الجديد واسر مع بعض؟ هتحرم من الكبدة والسوشي يا حبيبة. أوس بصدمة: ده كل اللي مزعلك؟

فريدة: طبعاً لازم تتريق. ما أنت لو ست وعشت اللي عشناه أنا ومراتك كنت هتقول حقي برقبتي. حبيبة: طب اهدي اهدي. ريلاكس يا فريدة. احمدي ربك في ناس كتير نفسهم في حتة عيل يشيل اسمهم. فريدة: ربنا يبعت يختي. أنا مال أهلي؟ هو عيل واحد وشال الاسم خلاص، لازومها إيه المرمطة دي. حبيبة بحماس: أنا هنزل أقول لتميم وطنط سحر. أوس: يلا هاجي معاكي. احتضنت حبيبة فريدة وقالت: دي نعمة يا حبيبتي، ألف مبروك.

أمسكت يد أوس ونزلت باتجاه الطابق السفلي. دلَفَا سوياً المطبخ حيث تعمل النساء باجتهاد واضح. حبيبة: طنط، فريدة حامل بجد. سحر بسعادة: بجد! يا ألف نهار أبيض. لولولولوي. سعاد: ألف مبروك يا سحر، عقبال فرحتك بعيال مصطفى. عبدالله من خلفهم: حبيبة. حبيبة بفزع: أيوه يا جدو. عبدالله: العيال فين؟ حبيبة بتوتر: تحت بيشتغلوا، بس زياد وكارما فوق. عبدالله: ليه؟ حبيبة: كارما تعبت فزياد طلعها أوضتها.

عبدالله: أنا مش وكلتك مهمة الإشراف على شغلهم؟ حبيبة: أيوه، بس يعني طلعت أطمن على كنان وأوس، و... عبدالله بمقاطعة: ارجعي لشغلك. أوس عايزك في المكتب. أوس: جاي حالا. التفت إلى حبيبة وقال: امتى هنرجع بيتنا؟ أنا زهقت، لازم حد يفصلني عنك في أي لحظة. حبيبة بابتسامة: معلش. يلا روح شوف جدو. *** بعد منتصف الليل، في حديقة البيت، اجتمع كل شباب العائلة بينما ذهب الكبار للنوم.

دينا: لازم نحاكمها ونعاقبها، ده قرار مش هنرجع فيه أبداً. فارس: مية مية، لازم تتعاقب. تميم: هدوووووء. أنا هنا أكبر حفيد في العيلة، يبقى الكلمة الأخيرة ليا. أنا هنا بمثابة قاضي القضاة. أحضروا المتهمة يلا. ذهبت حبيبة للداخل وعادت مع كارما. كارما بتوتر: ليه طلبتوني؟ تميم: مين محامي الدفاع بتاعها؟ زياد: أنا. تميم: اتفضل وريني المرافعة بتاعتك.

زياد: احم احم. سيادة القاضي، موكلتي كارما لم تكن تحمل أي نوايا سيئة تجاهنا. هيا حلفت على المصحف قدام جدو إنها هتقول الحقيقة، وجدو كان عارف إننا خرجنا من البداية، ممكن عرف من الغفر أو ما شبه، مش عارف بالظبط. تميم: محامي فاشل. زياد: سيدي القاضي، لو كانت كارما تحمل أي نية سيئة ما كانتش قبلت تتعاقب معانا. مصطفى: اعترض. أنا كمان المرة اللي فاتت اتعاقبت معاكم ولما كشفتوني سحلتوني. تميم: اعتراض مقبول.

زياد: بس كارما بنت، ما نقدرش نضربها. وأنا أؤمن بنزاهتها يا سيادة القاضي ومتأكد إنها ما عملتش كده بدوافع مادية زي مصطفى. هيا اعترفت تحت التهديد. تميم: لا كده أوفر يا زياد. تهديد إيه يا أهبل؟ دينا: سيبه ده بيتعلم من أفلام محمد سامي. زياد: بص من الآخر كده، أنا أطالب ببراءة المتهمة. تميم: على أنهي أساس؟ زياد: المتهم بريء حتى تثبت إدانته. تميم: ما هي ثبتت عليها يا حمار. حتى هي اللي اعترفت، والاعتراف سيد الأدلة.

زياد: طب تمام كده، لازم عقوبة مخففة جداً طالما اعترفت وسلمت نفسها. حبيبة بدهشة: يخربيتكم. أنا صدقتكم بجد. دينا: عشان هبلة. فريدة: بصفتي المستشار القانوني أعتقد يا سيدي القاضي إننا لازم نسمع أقوال المتهمة. تميم: اتفضلي يا كارما. اشرحي أسبابك. كارما بخوف: أنا... أنا غلطت، واعترف بغلطي، بس والله غصب عني. بدأت تبكي بشهقات مسموعة. ليلة بصدمة: بجد قلوبكم ما فيهاش رحمة، حرام عليكم. أمسكت

حبيبة يد كارما وقالت: كفاية هزار بقى. كارما مش هتتعاقب. نيتها كانت سليمة، حرام تتعاقب على حاجة خارج إرادتها. دينا بحدة: اترزعي مكانك وإلا هسيب عليكي البت دي. حبيبة بخوف: طب آسفة، في إيه؟ دينا: سيادة القاضي، انطق بالحكم. تميم: الحكم هيكون بناءً على الاقتراحات والتصويت. فارس: ليه هيا انتخابات؟ يزن بهمس: قاضي فاشل ومتخلف. أوس: كلهم متخلفين. يزن: بجد إزاي تميم بيعمل الحركات دي بعد ما وصل للسن ده؟

أوس: الهطل ملهوش سن يا صاحبي. يزن بغموض: مراتك مبسوطة. إنت لسه ما قلتلهاش؟ أوس: لما نروح أوضتنا. مش عايزها تعمل قلق ويلاحظوا عليها. يزن: تمام. فارس: أقترح إنها لازم تتعلق على النخلة تلات أيام. غادة: إيه الجنان ده، حرام عليك. دينا: تنضف أوضنا كلنا لوحدها. حلا: تبقى شغالة لينا كلنا زي المرة اللي فاتت. مصطفى: تشيل كل عقوبات جدو لوحدها. زياد: كفاية بقى حرام. دي لسه عيلة، هتشيلوها كل ده؟ نطقت لارا أخيراً

وقالت: دي مش عيلة، بقى عندها 18 سنة. تجاهلها الجميع. نظرت حولها ثم غادرت المكان. فريدة: بصوا عشان نكون منصفين، زي ما عاقبنا لارا عقوبة خفيفة رغم الذنب الكبير اللي عملته، لازم نعاقب كارما عقوبة أخف من كده. مصطفى بغيظ: طبعاً ما هي كوسة. أنا بقى عندي تسلخات من ضربكم عادي، بس البنات ما يتعاقبوش حرام. دينا: إنت أول البخت وكنا متحمسين. كلام فريدة صح يا جماعة. بصو البت بتترعش إزاي. نظرت فريدة إلى تميم بترجٍّ.

تميم بحزم: النطق بالحكم. كارما ناجي بريئة، وذلك بسبب حسن النية والإحساس بالذنب. فارس: آه يا ظالم. ماشي يا دكتور الحمير، لينا لقاء آخر. دينا: مش لدرجة بريئة يا تميم. كده أوفر. حلا بغضب: لو ما حكمتش حكم عادل أنا هقوم أجيبها من شعرها. فريدة بحدة: جربي كده وشوفي شعرك هيحصله إيه. حلا: ما تخافيش على العيل اللي في بطنك يا ولية. تميم: حلااااا. اتلمي وإلا هسيب الكل عليكي وأنتي ونصيبك بقى.

أخرجت موس صغير من أذنها مخفي على شكل حلق. حلا: حد يقرب يلا. تميم: قولت اتلمي. إيه شايلة معدات الدفاع في البيت كمان؟ حلا: طبعاً عشان أي لحظة غدر أشرحكم كلكم. يزن: بقولكو إيه. تحبوا أحكيلكم إيه اللي حصل بعد ما مشيتوا من البيت اللي رحناله؟ فارس: آه صحيح، إزاي نسينا نقولكم؟ أنا سجلت فيديو عشان تصدقونا. بعد وقت طويل من الحكايات والقصص الخيالية التي أبدع فارس في زيادتها على القصة، ذهبوا للنوم أخيراً.

دَلَفَت حبيبة أوضتها ووضعت كنان في سريره. حبيبة باستغراب: أوس. أوس: قلبه. حبيبة بابتسامة: مالك؟ حاسة إنك عايز تقولي حاجة. أوس بشرود: صحيح. حبيبة: في إيه ما تقولي طيب. أوس: أوعديني إنك مش هتزعلي. حبيبة: مش بزعل منك. أوس: ......