رواية مغامرات عائلية الجزء الثاني الفصل الرابع عشر 14 - بقلم همس كاتبة

صعد زياد للأعلى بسرعة. وجد لارا تركض وراء كارما وتضربها بحذائها بقوة. زياد وهو يدفع لارا: ابعدي عنها يا لارا. في إيه؟ لارا بغضب: اختك مش متربية. كارما ببكاء: دي بنت مش طبيعية أقسم بالله. ملحقتش أتكلم معاها قامت ضربتني. فريدة بغضب: ليه بتضربيها؟ عملت لك إيه؟ لارا: شتمتني. كارما: كدابة والله ما شتمتها. سحر بحزم: كفاية. امشوا عند جدكم هو اللي يفهم الحكاية. كارما: أنا والله ما عملت حاجة.

لارا: دي مواضيع بنات مش هنقولها لجدو يعني يا طنط. سحر: يبقى أنا هقول لمامتك وتحلها مع فريدة بقى. لارا بغضب: أنا مش صغيرة عشان تقولي لماما عليا. غادة: لارا احترمي نفسك وأنتي بتكلمي طنط سحر. امشي قدامي عند ماما. لارا لكارما: والله لأنزل أقول لجدو وأخليه يعاقبك. نزلت لارا بسرعة لمكتب جدها. زياد: إيه اللي حصل يا حبيبتي؟ ليه اتخانقتوا؟ كارما: كنا بنكلم عادي ولما حاولت أنصحها جريت ورايا وقعدت تضربني.

فريدة: طب أنتي كويسة دلوقتي؟ كارما ببكاء: والله لو جدو زعل مني هضربها زي ما ضربتني. بعد دقائق، أتى مصطفى وقال: كارما جدو عايزك تحت. كارما: متعصب؟ مصطفى: أوي. ده بهدل لارا ودلوقتي هيبهدلك أنتِ كمان. انزليله يلا. زياد بحدة: اتلم يالا. ما تخافيش يا حبيبتي مش هيحصل حاجة. امشي أنا جاي معاكي. غادة: استني هاجي معاكم. نزلت ثلاثتهم إلى أوضة المكتب. عبد الله: زياد خد خطيبتك واطلع برا.

زياد: أنا عايز أفهم ليه لارا ضربتها. عايز سبب مقنع. مش على أساس الضرب ممنوع هنا؟ عبد الله: زي ما أنت أخوها أنا جدهم هما الاتنين. اطلع برا وسيبني أشوف حكايتهم. زياد بعدم رضا: حاضر. امشي يا غادة. غادة: لارا، كرملة. افتكروا إن الكذب حرام وهتدخلوا النار لو كذبتوا على جدو. عن إذنكم. خرج زياد وغادة. عبد الله: إيه الحكاية يا كارما؟ كارما ببكاء: والله يا جدو أنا كنت بكلمها عادي. لارا بمقاطعة: كدابة. أنتي كنتي بتعايريني.

عبد الله: لارا مش عايز أسمع صوتك. ما تقاطعيهاش وخليها تقول اللي عندها. لارا بدموع: دلوقتي هتقول معاها الحق. أنا اتعودت على كده. عبد الله: لا يا لارا. أنتو الاتنين بالنسبالي زي بعض. هحكم بينكم بالعدل وهتتعاقبوا على أغلاطكم. احكيلي يا كارما إيه اللي قولتي؟ كارما بتوتر: جدو أنا مقولتش حاجة غلط. أنا بس كنت بنصحها. لارا بغضب: لا قولتي عليا بتاعة رجالة وبلف عليهم. عبد الله بصدمة: معقولة يا كارما؟

كارما ببكاء: والله ما قولت كده. أنا بس كنت بتكلم معاها وأفهمها إنها بتفكر غلط. جدو، لارا أول ما بتشوف راجل بتتكلم عليه على طول حتى لو كان كبير. حتى جوز تيتة زيزي ما سلمش من لسانها و... عبد الله بمقاطعة: بس. عيب الكلام ده يا كارما. وأنتي يا لارا عيب تفكري بالطريقة دي. واضح إننا قصرنا بتربيتكم. الحاجات دي أكبر من سنكم.

لارا: جدو إحنا كبرنا وبقينا فاهمين الدنيا ماشية إزاي. بس العيب هو إن صاحبتي اللي بقولها كل حاجة تروح تفضحني وكمان تغلط بيا. عبد الله: كرملة. سيبني مع لارا شوية. كارما: حاضر يا جدو. خرجت كارما وبقيت لارا. قام عبد الله وجلس مقابلها.

عبد الله: لارا يا بنتي. أنتي شايفة نفسك كبرتي عشان خلصتي الثانوية بس الحقيقة إن لسه قدامك طريق طويل تغلطي وتتعلمي فيه. بكرة لما تكبري شوية هتقعدي تتريقي على الأيام دي. لازم تفهمي يا لارا إن البنت ملهاش غير سمعتها. يعني الكلام ده اللي بتقوليه لأصحابك تأكدي إنه مش هيفضل سر بينكم. ربنا خلق لينا قلب عشان نحب ونتحب. بس بنفس الوقت خلق لينا عقل عشان نميز بين الصح والغلط.

لارا: يا جدو أنا مش بفكر كده أقسم بالله. أنا بس قولت رأيي لبنت عمي اللي كنت فاكراها صاحبتي. كنا بنتخانق عادي قامت هي عايرتني وبقت تغلط بيا.

عبد الله: أنا عارف كارما كويس. لو كانت بتعايرك بجد كانت راحت قالت للبنات. بس كارما خايفة على مصلحتك ويمكن خانها التعبير وأنتم بتتكلموا. في حاجات كتير تفكري فيها أهم من المواضيع التافهة دي. أنتي بنت شاطرة وشخصيتك قوية. استغلي ده عشان تبقي بشمهندسة نفتخر بيها. فكري بطموحك ونجاحك يا لارا.

لارا بانفعال: أقسم بالله ما بفكر غير بمذاكرتي. الكل واخد عني فكرة سيئة ومع أول خناقة كله بيصف ضدي. بابا وماما شايفين غادة البنت المثالية ودائماً هي الصح. وهنا كلهم شايفيني عدوانية. حتى كارما أول ما اتصاحبت على حبيبة بعدت عني. عبد الله: طب فكري معايا كده بتصرفاتك. أنتي شايفة إنك كويسة مع الكل؟ لارا: أوك أنا بتخنق بسرعة وبقول اللي في قلبي على طول. بس ده مش معناه إني ما اتعاشرش. لو هما بيحبوني كان استحملوني زي ما أنا.

عبد الله: ولو أنتي بتحبيهم مش هتجرحي حد. لو أنتي بتحبي كارما كنت قبلتي على الأقل تسمعي نصيحتها. بس أنتي ما بتحبيش حد يكون فاهم أكتر منك مش كده؟ لارا بتفكير: أوك يعني. بس ده مش معناه إني بنت مش كويسة. عبد الله: ومين قال كده؟

أنتي بنت عندك مميزات كتير بس أنتي مش شايفاها. لو قعدتي مع نفسك شوية هتفهمي كلامي. البنت اللي اتخانقتي معاها من شوية دي كانت تقعد تعيط وتكلمني على مميزاتك وطيبتك يا لارا. كانت أول مرة أحس بيها إن كارما قلبها عليكي وبتحبك بجد. دي كانت بتعد الأيام لفرح زياد عشان تجتمعوا عندي وتشوفك. لارا: منا كمان بحبها وبقولها على كل حاجة بتحصل معايا يا جدو.

عبد الله: بس بتجرحيها. وبتتريقي على أي حاجة هي بتقولهالك. رغم إنها الوحيدة اللي بتسمعك وبتفهم مشاكلك. لارا: أهي بتقولك على كل حاجة. يعني خانتني. عبد الله: وفيها إيه لما تحكيلي على مشاكلك؟ دي كده بتحاول تساعدك تفوقي. أنا جدكم وأنتي عارفة طبعي. لا أنا باباكي عشان أضربك ولا أمك عشان أزعلك. لارا بابتسامة: بس حضرتك جدو اللي بتعاقب. يعني مش سالكين. عبد الله: اممم. طب قومي اندهيلي كارما. لارا: مخاصماها.

عبد الله: ده بينك وبينها. قومي يا بت اندهالها. لارا بخوف: حاضر حاضر. بعد دقائق دلفت كارما ولارا. كارما: أيوه يا جدو. عبد الله: أنتي ولارا من النهاردة هتخدموا على كل اللي في البيت. عقوبة خفيفة كده على الهبل اللي عملتوه. كارما بفزع: خفيفة؟ عبد الله: عندك اعتراض؟ كارما بتوتر: لو حضرتك هتسامحني معنديش مشكلة أبقى شغالة للقطيع اللي برا ده. عبد الله: هسامحك يا حبيبتي بس بعد ما تتعاقبي.

لارا: جدو ما إحنا كنا كويسين من شوية إيه اللي حصل؟ عبد الله: ده قانون ولازم يسري على الجميع. أنتو مش أحسن من فارس وحلا عشان أعفيكم. لارا برجاء: دلوقتي كلهم هيرخموا علينا ويتعبونا يا جدو. عبد الله: مش عايز أسمع اعتراض. يلا على شغلكم. لارا بتمتمة: فينك يا زيزي الله يرحم أيامك. عبد الله: بتقولي حاجة؟ لارا: طب ينفع نتصالح أنا وكارما وتعفينا من العقوبة؟

عبد الله: لا مينفعش. لو عايزين تتصالحوا اتصالحوا من غير شروط. يلا لارا اعملي الشاي وأنتي يا كارما ظبطي الجنينة عشان هنقعد فيها. *** فارس بملل: الواد ده زنان. خدوه شوية يا تميم. تميم: حبيب بابي يا ناس. ما ينفعش أشيله دي عقوبتك أنت. فارس: أنت بني آدم رخيم. وما شاء الله ابنك واخد كل رخامتك. فريدة من وراه: امسك غيرله هدومه. فارس: ليه؟ ما أهو مستريح بدول. فريدة: أنت مالك؟ أنا مامته وعارفة مصلحته أكتر منك.

فارس: إيه المصيبة دي يا ربي. أم وأب أرخم من بعض. نزلت حبيبة مع دينا. دينا بضحك: إيه الحلاوة دي يمامي فارس. فارس: اتلمي يا رخمة. فين حلا؟ حبيبة: بتحفظ الكتاب اللي اداهالها جدو. فارس: طب واحدة فيكم تجري تطلعلها أكل قبل ما تفضحنا. دينا: يخلاثيي. بقيتي مامي أوي يا فروسة. حبيبة: هات أنا هغيرله. فارس: بجد؟ كتر خيرك ده انتي جدعة. فريدة: لا. ممنوع دي عقوبته. حبيبة: مالك يا بنتي؟

مش هيحصل حاجة لو ساعدناه شوية. ده فارس مش زيزي يا قادرة. فارس: يا أصيلة يا بنت الأصول. خدي اهو. فريدة: طبعاً ما أنتي ضامنة مش هتتعاقبي. تميم: فعلاً حبيبة عمرها ما اتعاقبت. دي عنصرية بحت. حبيبة: لا والله مش عنصرية. أنا بس مليش بجنانكم. دينا: ما كل مرة بنتعاقب بسببك أنتي وجوزك المغرور. حبيبة: دينا اتلمي. أقسم بالله كل حاجة بتحصل من جنانك أنتي وفارس. دينا: طب خلاص مش هنقعد نتعاتب بعد ما العقوبة خلصت.

فريدة: كارما ولارا برضو اتعاقبوا يا بنات. هيبقى شغالين عندنا. دينا: بجد؟ والله لأقرفهم طلبات. زياد: اتلمي وما تزوديهاش. كارما مش ناقصة. غادة: ولا لارا ناقصة يا زياد بلاش حقد. زياد: والله لارا اللي ضربتها. دي لسانها طويل أصلاً وادي إيدها كمان طولت. غادة: وأنت مالك؟ مش جدو قال هيحلها؟ خلاص يبقى ملناش دعوة. حبيبة: هو ليه دايماً كل راجل بيكون مش طايق أخت مراته؟ فارس: مين قالك كده ده أنتي عزيزة عليا جداً بس خدي ده والنبي.

حبيبة: ده استغلال مش محبة. زياد: معرفش ليه دايماً أخت الزوجة بيكون دمها تقيل وبتلزق كده. تميم: بس أنا عمري ما قولت كده على كارما. بالعكس دي غلبانة. زياد: أه إخواتي أنا حاجة تانية. أنا بتكلم على إخوات الناس التانيين. وكزته غادة وقالت: اتلمي. تميم: إخواتك حاجة تانية؟ والمفترية دي عادي تبهدلني معاها؟ زياد: دي حاجة خاصة بينكم أنا مالي. فريدة بحدة: زياد. قول لابن عمك يتلم. زياد: فارس اتلم. فريدة بغضب: مش ده. التاني.

زياد بضحك: ااه. تميم اتلم. تميم: زياااد. قول لأختك لينا بيت يلمنا. زياد: فريدة تميم بيقولك لينا بيت يلمنا. فريدة: قوله مش قاعداله فيه. أنا هنام الليلة عند أختي حبيبتي. زياد: هو أنا ببغاء عندك أنتي وهو؟ ما أهو قاعد قدامك كلميه. فريدة: ما بكلمش كدابين. تميم بغضب: زياد قول لأختك تقصر لسانها. فريدة: زياد قوله. حبيبة بانفعال: كفايةةةة. ما تتلموا أنتو الاتنين وتبطلوا هبل العيال ده. تميم بصدمة: إيه ده حبيبة بتشخط فيا؟

فريدة باستغراب: مالك يا بت؟ حد داسلك على طرف؟ حبيبة بغضب: أنا أعصابي مش مستحملة. أقسم بالله لو ما اتلمتوش هروح لجدو وأقوله يعاقبكم أنتو الاتنين. تميم: يا حلاوة. دي حبيبة!!! دينا: لا دي هرموناتها.. اتعودنا. حبيبة: اتلمي انتي كمان.. فين البسبوسة اللي طلبتها؟ دينا: انتي طلبتي موس شوكولاتة يا بت. حبيبة: ودلوقتي عايزة بسبوسة.. روحي اعمليها. دينا: منا الشغالة الفليبينية اللي جابهالك جوزك مش كدة؟

اتلمي يا حبيبة انتي حامل مش عايزة أجيبك من شعرك. حبيبة ببكاء: كمان عايزة تضربيني؟ دينا: دخلنا مرحلة الصعبنيات.. هروح أعملهالك حالك بس اكتمي تانك المية ده. *** بعد وقت اجتمعوا في الحديقة. كان فارس يضع وسادة على قدميه ويضع فوقها أسر ويهزه.. وحلا تقرأ بصوت عالٍ وتحفظ الكتاب. عبدالله: فين أوس؟ حبيبة: قالي هيروح يقابل صاحبه.. بس اتأخر أوي.

سحر: معلش يا حبيبتي.. هيا الحياة كدة أول ما الراجل يبقى متجوز بيخرج بالساعات وما بتبقيش عارفاله مواعيد. حبيبة: بس أوس ما كانش بيتأخر على البيت. سعاد: قعدة الصحاب غير.. خدي يا حبيبتي. مدت لها طبق من البلح. حبيبة: لا مش عايزة. سعاد: لازم تاكلي منه ده مفيد جدًا للولادة هيساعدك تولدي بسرعة. حبيبة: بجد؟ سعاد: طبعًا مهو مذكور في القرآن في سورة مريم اللي بتقريها كل يوم.

حبيبة: بس حسب ما أعرف إنه لبعد الولادة مش بيسرع الولادة نفسها. تميم: مفيش دراسات بتأكد إنه بيساعد على الولادة.. بس برضه فيه عناصر غذائية مهمة بتدي طاقة للجسم. فارس: انت بقيت دكتور نسا ياض؟ حبيبة: معلش يماما خليه لبعدين مش قادرة آكل. حلا بغضب: ما تاكلي منه وانتي ساكتة.. ولا أقولك هاتي هاكله أنا. سعاد: اتلمي انتي. حلا: منا قاعدة بحفظ لازمني طاقة. سعاد: طب خدي يا طفسة. أحضرت لارا الشاي وقالت: أي أوامر تانية؟

حبيبة بخبث: إيه ده شاي عادي؟ لا أنا عايزة شاي كرك. حلا: وأنا شاي بلبن. فارس: خليهم اتنين. دينا: أنا اعمليلي سبانيش لاتيه. لارا: والله؟ امتى هلحق أعملهم دول؟ وبعدين الشاي اللي انتي عايزاه يختي معرفش أعمله. حبيبة: في يوتيوب اتعلمي منه. لارا بسخرية: كنتي اتعلمي انتي يكش تفلحي بحاجة. حبيبة: جدو دي بتلقح عليا. عبدالله: لارا احنا قولنا إيه؟ يلا شوفي شغلك. لارا: اشمعنى كارما قاعدة وأنا بس اللي أشتغل؟

حبيبة: إحنا بنحب الشاي من إيديكي.. كارما ما بتعرفش تعمله زيك. دينا: آه دي مش فاهمة حاجة.. من إيديكي هيكون تحفة. لارا بابتسامة: أوك هروح أعملهم حالا. ذهبت لارا بسرعة للمطبخ. خديجة بضحك: حرام عليكي انتي وهي ضحكتوا عليها. دينا: ادينا بنعلمها حاجة مفيدة. فارس: ده بيعيط ليه دلوقتي؟ فريدة: عايز لبن.. قوم اعمله. فارس بملل: أهي العلبة لسا فيها شوية. فريدة: اوعى.. ارميه حالا واعمل واحد جديد. فارس: ليه هو تعب وخلاص؟

تميم: انت حمار يبني؟ ده خلاص باظ اعمله تاني. فارس وهو يحضر اللبن: آه يا شبابي اللي ضاع آه. عبدالله: دول لسا ساعتين ما لحقش يضيع شبابك بيهم. فارس: امتى هخلص من العقوبة دي وأرجع لحياتييي يا جدو. إيهاب بحدة: اتعدل ياض ده انت قد الشحط وبتندب؟ فارس: اتعدلت أهو.. هاتي من إيدك العيل أرضعه. بعد دقائق. أتت لارا وقالت: أهو عملت كل حاجة طلبتوها. بدأت بتوزيع الأكواب عليهم. زياد بخبث: لارا أنا عايز سينابون.

لارا: مش بعرف أعمله وبياخد وقت كتير. زياد: معلش روحي جربي أصلي نفسي فيه. غادة: أنا ممكن أعمله. زياد: لا عايز لارا تعمله. فارس وهو يرفع أسر: والله؟ طب كارما قومي اعمليلي براونيز. كارما: إيه ده معرفش أعمله. فارس: افتحي يوتيوب واتعلمي. زياد بحدة: لارا اعمليلي تشيز كيك. فارس: كارما اعمليلي ريد فيلفت. زياد: لارا اعمليلي... حبيبة بغضب: بس انت وهو.. فاكرين نفسكم في محل حلويات؟ ما شاء الله كل واحد بيطلب حاجة أصعب من التانية.

زياد: إيه ده انتي بتتعصبي عليا؟ سحر: بطلو معيلة منكم ليه.. اقعدي انتي وهي مفيش حاجة هتتعملهم. فارس بقرف: أعاا الواد رجع عليا. فريدة: ده مش ترجيع ده قشط يا أهبل.. بقالك ساعة بتخضه. فارس: خوديه طيب هروح أغير هدومي. عبدالله: اقعد مكانك وبلاش دلع.. اديه منديل يا غادة. *** بعد منتصف الليل. دلف أوس أوضته وجد حبيبة تنتظره. أوس: إيه ده حبيبتي انتي لسا صاحية؟ حبيبة: كنت فين؟ ... يتبع.