رواية مغامرات عائلية الجزء الثاني الفصل الثالث عشر 13 - بقلم همس كاتبة

حلا بخبث: هاتي جهاز كشف الكدب و هقولك. فريدة: الله ازاي فاتتني دي.. هروح اجيبه حالا. ذهبت فريدة، ونظرت حلا للشباب. حلا: اللعبة كالتالي.. كل واحد هيحط ايده على الجهاز و هنسأله أسئلة و هو يجاوب و الجهاز يقولنا لو صادق و لا كداب. تميم: بس الأجهزة دي مش دقيقة يعني. حلا: لا سمعت إنها بتقدر تكشف الكدب بنسبة كويسة.. يعني أغلب إجاباتها بتبقى صحيحة.. مش كدة يا حضابط؟

يزن: تقريباً.. بس الأجهزة العادية دي عادة نسبة صحتها بتبقى أضعف. دينا بحماس: إنت استعملته بالتحقيق قبل كدة؟ يزن: لا.. بس كنت بسمع عنه. أتت فريدة وقالت: الجهاز اهو. حلا: حطيه على الطاولة.. هنبتدي بالشباب إيه رأيكم؟ فارس: أشطا أنا أول واحد. زياد: إيه الثقة دي ياض؟ ده إنت أكدب بني آدم عرفته بحياتي. حلا: حط إيدك يا فارس. فارس وهو يمد يده: اهو. حلا: هسأله أنا.. إنت كنت فين النهاردة الصبح؟ فارس: في الغيط.

حلا: أشطا.. نفدت بجلدك. حبيبة: سؤال واحد بس؟ حلا: أيوا ما إحنا عددنا كبير.. حط إيدك يا أوس. أوس بضحكة: والله؟ حلا: حبيبة جوزك شكله خايف من حاجة. حبيبة: اتلمي يا حلا.. أوس حط إيدك و وريها إنك مستحيل تكدب. أوس: ماشي اهو. حلا بشر: عمرك خونت حبيبة يا أوس؟ أوس: أكيد لا.. ولا عمري هعملها. حبيبة بسعادة: اهو الجهاز ما عملش حاجة. حلا بصدمة: إزاااااي.. إنت متأكد إنه ما لسعكش؟ أوس: ليه إنتي عايزاني أكدب يعني؟

حلا بنفاذ صبر: تميم حط إيدك. يزن باستغراب: مش دي المفروض لعبة؟ أنا ليه حاسس إنك بتحققي معاهم؟ حلا: ملكش دعوة.. لو رفضوا تبقوا خايفين من حاجة لتتعرف اعتبروه تحدي. تميم: و هنخاف من إيه يا هبلة.. اهو اتفضلي اسألي. حلا: تميم.. عمرك حضنت بنت غير فريدة؟ تميم: آه.. أمي و خالاتي كلهم و تيتة كمان. حلا بحدة: قصدي حضنت بنت عادية لا هي اختك و لا قريبتك. تميم: لا محصلش أبداً. فريدة: حلا إنتي شاكة بحاجة؟ حلا: لا.. زياد حط إيدك.

زياد: اهو اتفضلي. حلا: زياد.. إنت عمرك كلمت بنات على غادة؟ يعني خونتها؟ زياد: لا. حلا بغضب: الجهاز ده أكيد بايظ.. مستحيل كلهم يجاوبوا صح. دينا: طب أجرب أنا.. اسأليني يلا. حلا: دينا إنتي عمرك خرجتي مع يزن من غير علم مامتك؟ دينا: لا.. اااعااااااا دي لسعتني. يزن بضحك: تستاهلي يا كدابة. حلا بتفكير: اهو اشتغل.. أكيد في حاجة غلط. أوس: إنتي عايزة توصلي لإيه يا حلا؟ حلا: مفيش.. هروح أنام. لارا: هي دي اللعبة بتاعتك؟

حلا: مهو مش شغال كويس.. خلاص المرة الجاية نبقى نجيب واحد جديد أحسن. حبيبة لأوس: الوقت اتأخر لازم ننام. أوس: يلا يا حبيبتي. زياد: و إنتو كمان يا بنات قوموا ناموا وراكم شغل كتير بكرة. كارما: تصبحوا على خير. ذهب جميعهم للداخل عدا زياد و فارس. زياد: فارس استنا. فارس: في إيه؟ زياد: إنت عرفت ليه متعاقبين مش كدة؟ فارس: لا أبداً. زياد: فارس ما تحورش عليا أنا عارفك.. إنت كنت ورا الباب و سمعت جدو بيكلمنا مش كدة؟

فارس بخبث: بصراحة آه. زياد بصدمة: و قولت لحلا؟!!!! فارس: آه برضو.. هيا اللي زحلقتني بالكلام. زياد بغضب: يخربيتك.. دلوقتي هتفضحنا يا زفت. فارس: لا اطمن.. حلا ما بتخرجش أسرارنا برا الحدود المصرية. زياد: إنت حمار يا ابني؟ بيتي هيتخرب على إيدك يا غبي.. دلوقتي إيه اللي هيقنع غادة إني مظلوم؟ فارس بخبث: عشان تتعلم تلعب بديلك من غيري يا واطي.. لو أخدتني معاك مكنتش هقول حاجة.. باي زيزو.

قام فارس وذهب للداخل، بينما زياد ينظر أمامه ويفكر. ******************** في اليوم التالي. دلفت حلا أوضة حبيبة بعد نزول أوس للأسفل. حلا: حبيبة.. حبيبة قومي. حبيبة بصوت ناعس: في إيه؟ حلا: إني نايمة و مستريحة و المية بتمشي من تحتك يا هبلة. حبيبة باستغراب: إيه الكلام ده ع الصبح؟ في إيه يا حلا ما تصلي على النبي. حلا: عليه الصلاة و السلام.. قومي يختي قومي عايزة أكلمك بحاجة. حبيبة: طب سيبني أفوق شوية و بعدها نتكلم.

حلا: مستنياكي بأوضة غادة.. تعالي بسرعة قبل ما جدو ينده علينا.. ما تتأخريش. حبيبة: حاضر. بعد وقت قصير ذهبت حبيبة إلى أوضة غادة. حبيبة: صباح الخير. فريدة: صباح النور.. اهو التمينا يا حلا في إيه؟ حلا: عندي خبر مش كويس.. بس لازم أقوله عشان تفوقوا. غادة: اللي هو إيه؟ حلا: جوازاتكم بيخونوكم. حبيبة بضحك: إيه الكلام الأهبل ده يا حلا؟ فريدة: ده اللي جمعتينا عشانه؟ فعلاً هبلة.

حلا: والله العظيم ما بكذب.. و معايا الدليل على الفلاشة دي اهو. غادة: إنتي مصوراهم كمان؟ مش حرام عليكي؟ ده تجسس يا حلا و كدة هتأثمي. حلا: مش أنا اللي صورتهم دي وصلتني امبارح.. شوفوا عليها إيه و احكموا. فتحت حلا اللابتوب وعرضت ثلاث صور لزياد و أوس و تميم وهم يحتضنون الراقصة في بيت هشام صديقهم. فريدة بذهول: إيه ده؟ مستحيل أكيد فوتوشوب. حلا: لا حقيقة و أنا ممكن أخلي فارس يكلم الراجل و يأكدلك كلامي.

غادة: مستحيييل.. زياد مش بيروح الأماكن دي أبداً. فريدة: فعلاً زياد ملهوش بالكلام ده و لا تميم و لا حتى أوس. حلا: حبيبة مالك؟ حبيبة بصدمة: أوس أكيد مش هيخوني يا حلا.. مستحيل.. ما تلعبيش بدماغي تاني أرجوكي. حلا: و الصور دي إيه مثلاً؟ الكلام ده حصل يوم ما روحنا للست الدجالة يا حبيبة و أوس يومها ما ردش على مكالماتك عشان كان في حضنها. حبيبة بانهيار: ما تقوليش كده.. مستحيل.

غادة: حبيبة ما ترديش عليها.. أحسني الظن بيهم.. أكيد ده حد عايز يورطهم. حلا: و الله أنا ممكن أجيب البنت اللي بالصورة و أثبتلكم كلامي.. خصوصاً إن هما التلاتة معاقبين.. تفتكروا ليه؟ فريدة بدهشة: يعني جدو عارف و ساكت؟ حلا: أيوه و عشان كده عاقبهم هما التلاتة. غادة: يعني الحكاية بجد؟ حلا: الظاهر كده.. انزلوا اسألوا جدو لو عايزين. حبيبة: أوس مستحيل يخوني.. لا لا.. مش ممكن يحصل أبداً.

حلا: البت دي هتنقطني.. كام مرة قولتلك ما تحطيش ثقتك براجل؟ دول كلهم كده يا هبلة. حبيبة: مش هصدقك.. ما تضحكيش عليا زي كل مرة يا حلا.. أنا مش ناقصة مشاكل ارحميني. حلا بغضب: إنتي اللي لازم ترحمينا يختي.. هو الحمل ده أثر على دماغك ولا إيه؟ بقولك جوزك بيخونك و إنتي زي الهبلة ماشية وراه. فريدة بغضب: و الله لأنفخك يا تميم. خرجت فريدة من الأوضة. حلا: يا بنات ما تتنازلوش عن حقوقكم.. لازم تعاقبوهم عقوبة كبيرة.

غادة بضيق: حلا اتلمي مش ناقصنا تحريض.. حبيبة روحي كلمي أوس و أنا هكلم زياد و نفهم منهم بقى. حلا: غبية.. دلوقتي هيضحكوا عليكي بكلمتين و إنتي هتصدقيهم.. لو ما غلطوش ما كانوش اتعاقبوا يا هبلة إنتي و هي. غادة: بس لازم نديهم فرصة و نسمعهم و لو كدبوا ده بيبقى بينهم و بين ربنا.. بس مش هقبل آخد إثم سوء الظن بالناس. حلا: شوفوا مين بيتكلم.. متأكدة إنك غادة يا بت؟ غادة: الكلام معاكي مفيش منه فايدة.. أنا هروح أكلم زياد.

خرجت غادة وبقيت حبيبة أمام حلا. حلا: لو روحتي كلمتيه هجيبك من شعرك. حبيبة: ما تكبريهاش بدماغي يا حلا.. أوس مستحيل يخوني.. و حتى امبارح لما سألته و جاوب.. الجهاز ما عملش حاجة يعني هو بيقول الحقيقة. دلفت دينا وقالت باندفاع: إيه الكلام اللي سمعته ده؟ حلا: سمعتي إيه؟ دينا: إنتي إيه اللي قولتيه لغادة و فريدة؟ دول الاتنين خرجوا بيعيطوا. حلا: زياد و تميم و أوس كانوا بحضن رقاصة من يومين و اهي الصور شوفي كده.

دينا: و إنتي مالك؟ إيه اللي حشرك بالنص؟ دي حياتهم سيبهم بحالهم بقى. حلا: و الله دي تبقى أختي و دول صحابي مش هقبل إن جوازاتهم يخونوهم و أسكت. دينا: إنتي كده خربتي تلات بيوت يا متخلفة.. و الله جدو لما يعرف هيزقك و يعاقبك لوحدك. خرجت حبيبة من الأوضة. حلا: سيبيهم يتعلموا إن الرجالة ملهمش أمان. دينا: إنتي مالك بيهم؟ زودتي مشاكل البيت و إحنا مش ناقصين.. افرضي اتخانقوا بجد؟ حلا: ليه هما كانوا عايزين يتخانقوا هزار؟

دينا أنا ما اسمحش إن ست تتهان و يتقل منها كده.. مش هقبل لوحدة تتخدع و أنا أعرف الحقيقة و أسكت. دينا: مش وقت حقوق مرأة دلوقتي.. الكلام ده تقوليه للجمعية بتاعتك مش هنا.. كل حاجة ليها حدود يا حلا.. إنتي كده عملتي فتنة بينهم و هتخربي بيوتهم. ***************** في الغيط. فريدة بصراخ: يعني روحت للمكان ده. تميم: أيوه روحت بس ما كنتش عارف إنه هيحصل كده. فريدة بغضب شديد: بس حضنت الرقاصة.

تميم: فريدة اهدي الحكاية مش زي ما إنتي فاهمة.. هشام شربني حاجة كده و بعدها ما حسيتش بنفسي. فريدة بصدمة: يعني إيه؟ حصل بينك و بينها حاجة؟ تميم: يخربيتك لا طبعاً.. أنا بس معرفتش أروح لوحدي و زياد سندني لغاية البيت.. اسأليه لو مش مصدقاني. فريدة: و رحمة أمي يا تميم لو طلع الكلام ده كدب لادفنك هنا.. زيااااااد. أتى زياد بسرعة و قال: في إيه؟ فريدة: تميم عمل إيه مع الرقاصة؟ زياد: إيه ده هيا حلا قالتلك؟ غادة عندها علم؟

فريدة: رد على قد السؤال.. تميم كان بيعمل إيه هناك. زياد: و المصحف ما لحق يعمل حاجة.. إحنا خرجنا على طول أول ما شفناها. فريدة: و ليه جدو معاقبكم؟ كان زياد سيرد.. لكمح غادة قادمة إليه. زياد: استر يا رب. غادة: زياد ممكن نتكلم على جنب شوية. زياد بتوتر: آه طبعاً.. اتفضلي يا حبيبتي. ذهب معها، وبقيت فريدة تضع يداها على خصرها و تنظر إلى تميم. تميم: اهو أخوكي ذات نفسه قالك إني بريء.. ما تكبريش الحكاية بقى.

فريدة بغضب: ليه جدو عاقبكم؟ تميم: جدو بيتلكك عايز يعاقبنا و خلاص يا فريدة.. إنتي عايزة تعمليها خناقة؟ فريدة بتهديد: أنا هكلم مرات هشام و أعرف منها. تميم بحدة: لا كده إنتي زودتيها أوي.. بقالي ساعة بقولك معملتش حاجة، انتي المفروض تكوني متأكدة إني مستحيل أعمل كده. فريدة: اتعصب اتعصب، غلطان وبتتعصب عليا كمان! ده بدل ما تطمني وتقولي حقك عليا.

تميم: قولت معملتش حاجة غلط يبقى تصدقي من غير أڤورة، لمي الحكاية يا فريدة أنا مش ناقص. فريدة بغضب: ماشي يا تميم. تركته وذهبت. غادة: أنت روحت للمكان ده بجد يا زياد؟ زياد: أيوه روحت، بس اسمعني لو سمحتي، أنا روحت على أساس عزومة عادية قعدة رجالة كدة مكنتش أعرف إن هشام هيزودها كده. غادة: وإزاي قدر يصورك مع الرقاصة؟ زياد: هي قربت مني بسرعة وأنا زقيتها على طول، ولو مش مصدقاني اسألي أوس وتميم.

غادة: مصدقاك، بس لازم كنت قولتلي من الأول. زياد: أقسم بالله كنت عايز أقولك بس جدو حذرنا لو فتحنا بوقنا هيمرمطنا، كان خايف تحصل مشكلة وأهي حصلت. غادة: عشان كده بيعاقبكم؟ زياد: قصدك واخدها حجة عشان يعاقبنا، مش عارف إزاي هشام الكلب قدر يضحك علينا كده ويصورنا ويبعت الصور لجدو. غادة: وإيه مصلحته من اللي عمله ده؟ زياد: هشام بيغير مننا يا غادة، ده بني آدم فاشل معرفش يعمل حاجة، ومن أيام الجامعة همه الوحيد هو الستات وبس.

غادة: طب خلاص ما تتكلمش عليه، بس أوعدني إنك مش هتكررها تاني. زياد: هكون غبي لو كررتها، أبوس إيدك ما تزعليش والله ما أستحمل زعلك. غادة بابتسامة: مش زعلانة منك يا حبيبي. زياد: يلهوي بتقوليلي حبيبي، لا على كده تعالي نكمل كلامنا تحت الشجرة اللي هناك. غادة: اتلم وبطل قلة أدب، ارجع لشغلك يلا. زياد بعبوس: ليه ما أنت كنتي مطريها دلوقتي إيه اللي حصل؟ غادة: بس يا زياد، يلا امشِ. توجهت دينا إلى يزن وجلست بجانبه.

دينا: مولعتش بينهم. يزن: ليه أنتِ عايزاها تولع؟ دينا: لا، بس توقعت البت غادة تعملنا شوية دراما، البت دي كانت دراما كوين قبل كام شهر بس. يزن: وإيه حصل دلوقتي؟ دينا: بقت هادية أوي وعاقلة، الحمد لله إني خلصت من قرفهم. يزن: دينا، ما تيجي نزوغ شوية وسط الدراما دي. دينا بضحك: دلوقتي حبيبة هتعمل مسلسل إنما إيه، مع هرموناتها دي تبقى كملت. يزن: كويس يعني فرصة نهرب. دينا: ولو جدو كشفنا؟ يزن: نقوله كنا بنطمن على زيزي، امشي يلا.

دينا: على فين؟ يزن: نتمشى شوية هناك أهو نغير المود ده. دينا: اشطا يلا بينا. *** دلفت فريدة أوضة حبيبة وجدتها منكمشة على نفسها وتبكي. فريدة بغضب: أنتِ هتفضلي تعيطي كده؟ لازم نعمل حاجة. حبيبة: أعمل إيه؟ مستنية أوس ييجي عشان أكلمه. فريدة: وافرضي كان بيكدب؟ حبيبة: أوس مش بيكدب عليا. فريدة بتفكير: ولا تميم، مش من عوايده يكذب يعني، منك لله يا حلا كبرتي الحكاية بدماغي. حبيبة: أنتِ اتخانقتي معاه؟

فريدة: تقريبًا، بس مش عارفة هتأكد إزاي، لازم أتأكد وأتطمن، لا لا أنا هكلم مرات هشام وأسألها. حبيبة: أنتِ اتجننتي؟ عايزة تباني قدام الكل إنك مش واثقة بجوزك؟ تميم مستحيل يخونك أكيد فيه حاجة غلط. فريدة: لو كان كلامك صح يبقى ليه جدو بيعاقبهم؟ أنا هتجنن. حبيبة: لو هما عملوا كده بجد كان زمانه جدو بهدلهم جامد زي المرة اللي فاتت، دول بصوا علينا من الباب وجدو مرمطهم بالأرض ما بالك لو بيروحوا الأماكن المشبوهة دي.

فريدة بتفكير: صح جدو كان بيعامل تميم كويس وده غريب لأنه عادة بالعقوبة بيفضل يهزقه، أنتِ من امتى ذكية كده يا بت؟ حبيبة: فريدة اطلعي برا أنا مش ناقصاكي. فريدة: طب ليه بتعيطي طالما واثقة بأوس كده؟ حبيبة ببكاء: مش عارفة، حاسة إني نفسي أعيط وخلاص. فريدة: اه دي هرمونات بقا، بس خودي بالك ممكن تأثر ع البيبي. حبيبة بخوف: إزاي يعني؟ فريدة: بيقولوا لما الأم تعيط البيبي بيحس بيها وممكن يطلع زنان ويفضل يحزق.

حبيبة: لا لا مش عايزة أعيط، أنا أصلاً متأكدة أوس مستحيل يخوني ولا يبص لغيري. فريدة: ياه ع الحمل وقرفه، آخر شهر بتحسيه سنة مش شهر حمل. دلف أوس الأوضة وقال: فريدة لو سمحتي ممكن تسيبنا لوحدنا. فريدة: أوك عن إذنكم. خرجت فريدة وبقي أوس ينظر لحبيبة. حبيبة: إيه؟ أوس: وبعدين مع اختك دي؟ مش ناوية تسيبنا بحالنا بقا؟ حبيبة: هيا خايفة عليا.

أوس بمقاطعة: حفظتها، الأسطوانة دي حفظتها كويس، بس مش لدرجة إنها تتدخل بحياتنا، دي مش أول مرة تسخنك عليا وطول فترة حملك كان بتستقصد تبعدك عني. حبيبة: كفاية يا أوس مش عايزة أسمع، والله أنا قرفانة من غير تدخلات حلا. جلس بجانبها وقال باستغراب: مالك؟ أنتِ مش على بعضك ليه؟ حبيبة بضيق: مش عارفة، حاسة إني مش طايقة حاجة، ما تيجي نخرج شوية.

أوس بابتسامة: أيوه كده، دلوقتي هخرجك ونغير جو، بس مش غريبة يعني مفتحتش معايا تحقيق على حكاية الصورة؟ حبيبة: هنتكلم بالموضوع ده برا، أنا هقوم ألبس. أوس: طب يلا مستنيكي. حبيبة: اه صحيح إزاي هتخرج وجدو معاقبك؟ أوس: معلش، جدي مش هيقول حاجة طالما الخروجة عشان خاطرك. *** مر بعض الوقت واجتمعوا على طاولة الغداء عدا أوس وحبيبة الذين خرجوا من وقت قصير. توفيق: أخبار زيزي إيه يا يزن؟ يزن: كلمت أبويا وقالي إنها كويسة.

عبد الله: وعملوا اللي اتفقنا عليه ولا لأ؟ يزن: بصراحة لا، أهلي مش موافقين. عبد الله باستغراب: ليه؟ يزن: يعني عشان العادات عندنا حضرتك عارف إنها ضيفة، أبويا قال لو فضلت عندنا أكتر عن تلات أيام يبقى تمام هيمشي على الاتفاق. توفيق: تلات أيام؟ أنا لازم أسافر بكرة يا عبد الله، مش عايز أسافر من غيرها. تميم: يبقى خلاص روح خدها وسافروا عشان خاطري دي أكلت دماغي. توفيق: هو كده، خلاص يا عبد الله كفاية عليها اليومين اللي فاتوا.

فريدة بخبث: والله هتوحشنا زيزي هانم. زمردة بغضب: وحش أما يلهفك يا بتاعة الأعمال. التفت جمعيهم إليها ونظروا بصدمة. توفيق: أنتِ مش قولتي مش هنعرفلك طريق وشوحتِ بإيديكي كده؟ زمردة: توفي كفاية مسخرة أنا عايزة أمشي من هنا وأرجع لبيتي.