رواية مغامرات عائلية الفصل الخامس 5 - بقلم همس كاتبة

وضع يداه على خصرها بهدوء مباغت. استدارت له و كانت نظراتها تدل على شوقها له. وضع كفه على وجهها بهدوء. أوس: بحبك. اخفضت رأسها بخجل تحاول كتم ابتسامتها. سحبها إلى حضنه و اعصرها بداخله. أوس: مش بحب أشوفك زعلانة. حبيبة اطلبي اللي انتي عايزاه بس ما تبعديش عني. انتي ما تعرفيش أنا بحبك إزاي. حبيبة بهمس: بس أنت اللي بعدت.

أوس: و أنتِ عارفة ليه بعدت. أنا بحبك و هفضل أحبك لآخر ثانية بعمري. كنت بصبر نفسي طول السنين اللي فاتت عشان أرجعلك و أنا محقق هدفي. أنا حبيتك لدرجة إنك لو طلبتي مني أمو..ت عشانك همو..ت يا حبيبة. حبيبة بسرعة: بعد الشر عليك. ابتسم و ملس على شعرها بحب و هي لازالت في حضنه. تغمض عينيها و مستمتعة بقربه منها. احم احم. خرجت حبيبة من حضن أوس بسرعة و انتبهت إلى مصدر الصوت بصدمة. حبيبة بخضة: أونكل عدنان!

عدنان بابتسامة: ليه صاحيين لغاية دلوقتي؟ حبيبة بخجل: أنا هروح أنام. تصبحوا على خير. عدنان: و أنتِ من أهله يا بنتي. ذهبت بسرعة إلى أوضتها و وجهها محمر من شدة الخجل. عدنان بخبث: إيه؟ بقطع عليك؟ أوس بابتسامة: بس يا بابا. عدنان بضحك: يا ابني دي مراتك و حقك تعمل اللي عايزه بس مش على البلكونة قدام الناس. اتكسف شوية ده أنت بقيت رجل أعمال. و لا هو السفر بيبوظ؟ إحنا صعيدة ما تنساش أصلك ياض. أوس: أديك قلت مراتي يعني أنا حر.

عدنان بنفاذ صبر: الله المستعان. ربنا يهديك يا ابني. ما تروح تنام أنت ما ارتحتش من ساعة ما وصلت. أوس: رايح أهو. تصبح على خير. عدنان: و أنت من أهله يا حنين. *** دلفت حبيبة أوضتها و هي تحاول إخفاء خجلها. دينا بفزع: مالك يا بت وشك أحمر كده ليه؟ حبيبة بغيظ: انتي كنتي فين يا واطية؟ أونكل عدنان شافني و أنا بحضن أوس. هفف اتكسفت أوي. شكلي بقى زبالة قدامه.

دينا بضحك: ليه يا هبلة ما أوس جوزك يا غبية. كويس إنها جت ع الحضن. ده لو شاف البوسة كان هيطين عيشتكم. حبيبة: حتى لو جوزي. لازم نحترم اللي حوالينا. بس أعمل إيه ماهو قليل الأدب. دينا بخبث: اممم و أنتِ ما بتصدقي يقل أدبه عشان تدوبي فيه. حبيبة بخجل: اخرسي يا واطية. أنا والله بنسى نفسي و أنا معاه. مش بفكر بحاجة غيره. دينا: يا ساتر ع المحن. بقولك إيه ما تقرفينيش معاكي. عايزة أخلص قراية الرواية قبل ما أنام.

حبيبة بغيظ: اتلمي و اطلعي اقريها برا عايزة أطفي النور. دينا بنفخ: أمري لله. عيشة تقصر العمر. خرجت دينا و استلقت حبيبة على سريرها لتنام. لكنها تذكرت أحداث اليوم و ابتسمت بخجل. أمسكت هاتفها و صورت شاشة سوداء و كتبت عليها عبارة "الحياة تزدهر حين يمتلئ القلب بالحب والسلام". و أرسلتها ستريك. *** خرجت دينا إلى حديقة البيت و جلست تقرأ بإستمتاع. بعد دقائق. أتت حلا و جلست معها. دينا: كنتي فين يا حلا؟

قلتي هتنامي و ما شوفتكيش بالأوضة. حلا بضيق: مخنوقة. روحت أتمشى شوية. دينا باستغراب: ليه في إيه؟ ما أنتِ كنتي مبسوطة من شوية و إحنا قاعدين. حلا: أنا اتخنقت من البيت ده. و بدأت أحس إن كل اللي فيه توكسيك. حتى فارس. مش مهتم بيا زي عوايده. دينا: ليه حصل حاجة بينكم؟

حلا: لا. بس مدايقة من كارما و لارا. كارما دايقت حبيبة النهاردة. و لارا بتخطط تلف ع أوس. و أصلا كل اللي في البيت عارفين إن أوس و حبيبة متخانقين. لما اتكلمت مع فارس عشان لارا اتضايق و قالي إن أنا مزودة الموضوع. قال دول عيال و لازم أكبر دماغي. دينا: على فكرة فارس عنده بعد نظر. يمكن حس إنك عايزة تقلبيها على أخته. مهما كان مفيش راجل بيحب إن مراته تشتكيله من أهله. و أنتِ هتبقي مراته يعني هو بيفكر بالمستقبل.

حلا: لا كده تو ماتش. ما هي فعلاً لارا دايقتني كتير. أنا الغبية اللي قلتلها على حكاية فسخ الخطوبة. دي طارت من الفرح لما سمعت كده و بدأت تتصرف بطريقة مستفزة قدام أوس. و الكل واخد باله إنها عايزة تلفت نظره. دينا: حلا. أنتِ غلطتي أنك اتكلمتي بموضوع يخص حبيبة. أنا فاهمة إنها أختك و مصلحتها بتهمك. بس أنتِ سخنتيها كتير على أوس. و زعلها ده من الأساس بسبب زنك. هتبقي مبسوطة لو اتطلقت منه؟ حلا: لا طبعاً انتي بتقولي إيه؟

دينا: ما ده اللي هيحصل لو ركبت دماغها. الناس مش هتقول أختها و خايفة عليها. لا دول هيقولوا غيرانة منها. حلا بابتسامة سخرية: هه. يتفلقوا. أنا اللي يهمني إن حبيبة تحافظ على كرامتها. خايفة لما يتجوزو يستعبدها. هتنزل بنظره لو سامحته بسهولة على كل السنين اللي فاتت دي. مش هستحمل أشوفها مكسورة. و أنتِ عارفة حبيبة عاطفية بتزعل بسرعة و بترضى بكلمتين.

دينا بابتسامة: و الله أنا فاهماكي يا حبيبتي. أنتِ بنت فاهمة حقوقك صح و حاطة حدود للكل و أولهم فارس. بس حاولي ما تتدخليش بعلاقة أوس و حبيبة عشان أوس بيعشقها و بيتمنالها الرضا ترضى. ده من ساعة ما وصل لا فكر يرتاح و لا ينام بالعكس فضل وراها لغاية ما تصالحوا. ما تخافيش عليها معاه. طب أقولك على سر؟ حلا باستغراب: قولي.

دينا بخبث: أوس كان كل يوم بيكلمني على الواتساب و بيطمن عليها و بيسألني على كل حاجة بتعملها. حتى إني كنت بصورها فيديو من غير ما تاخد بالها و ابعتله. حلا بشهقة: يا انهار أسود. دينا بضحك: و الله العظيم. كان دايماً بيوصيني عليها و أي مشكلة بتحصل على طول بيبعت تميم يساعدنا. حلا بصدمة: إزاي. انتي يطلع منك كل ده؟ ده إحنا ما حسيناش عليكي يا بت. دينا بغرور: طبعاً ده شغل مخابرات انتي إيش فهمك.

حلا: اممم طالما كده هسامحه و مش هتدخل تاني. ترجعله بقى. بس على الله يزعلها كده و لا كده و الله همسح بكرامته الأرض هو و اللي يتشددله. دينا: طيب خليكي بفارس انتي. علاقتكم ماشية إزاي؟ حلا بابتسامة: علاقتنا حلوة. إحنا متفاهمين و بنحب بعض. أكتر حاجة مريحاني ناحيته إنه بيفهم تفكيري و بياخدني على قد عقلي. بس بصراحة بدايق أوي لما يهزروا على حسابه و هو يضحك. يعني مهما كان بحس إنه لازم يحط حدود ليهم.

دينا: بس دي طبيعته يا حلا. هو متنمر نمبر ون. ده إن ملقيش حد يتنمر عليه بيتنمر على نفسه. و أنتِ عارفة إن دي أكتر صفة بارزة بشخصيته. حلا بابتسامة حب: أنا بحب كل حاجة فيه. حتى لما يتريق على نفسه بيضحكني. بس مش بحب حد يقلل منه قدامي. بيكون نفسي أقوم أفرمهم.

دينا: فارس بيحبك بجد يا حلا. هو أصلاً اتغير عشانك. ده كان فاشل و حمار. بس من ساعة ما ارتبطوا بدأ يشتغل بجد عشان تتجوزوا. ما تخليش مشاكل بسيطة تأثر على علاقتكم عشان انتو لايقين على بعض. حلا: ياااه أول مرة تبلي ريقي بكلمتين حلوين يا بت. ما تيجي بوسة. دينا بضحك: موااااه. *** في اليوم التالي. على مائدة الفطور. عبد الله باستغراب: فين الباقي يا ولاد؟ غادة: حلا و دينا و حبيبة لسه نايمين. و فريدة و تميم خرجوا من بدري.

فارس: و أوس و زياد بيشتغلوا على اللابتوب في أوضتهم. سحر: اطلعي يا غادة صحي البنات و نادّي على الشباب يفطروا. بعدين يبقوا يكملوا شغل. غادة: حاضر يا طنط. و صعدت للأعلى لإيقاظهم. إيهاب: طلبية الدرة جاهزة يابا بكرا الصبح هنشحنها كاملة. عبد الله: ممتاز. عشان لازم ندي العمال إجازة و إحنا نتفرغ لتجهيزات الفرح. عايزة فرح قد المقام. ده أول حفيد ليا. عدنان: ما تقلقش يابا أنا ههتم بالموضوع ده بنفسي.

وصلت غادة أوضة الشباب و طرقت الباب. فتح زياد الباب. زياد باستغراب: في إيه؟ غادة بتوتر: جدو بيقولكم انزلوا افطروا. و بعدين كملوا شغل. زياد بهدوء: ماشي نازلين وراك. بعد وقت قصير اجتمع كل الأفراد على مائدة الفطور و قد عادت فريدة من الخارج. حبيبة بهدوء: كنتي فين يا فريدة؟ فريدة: رحت أجيب فستان الفرح. حبيبة: تأكدتي إنه على مقاسك؟ فريدة بهمس: هطلع أقيسه بعد الفطار. المهم انتي حصل إيه بينك و بين أوس امبارح؟ صالحتيه؟

حبيبة: يعني تقدري تقولي كده. فريدة بخبث: اممم. شوفت الستريك بتاعك واضح إنك صفيتيله. حبيبة بحب: عمره قلبي ما شال منه. بس برضه مش هسامحه بسهولة. فريدة: شكلك هتحصليني قريب يا بت. حبيبة بخجل: بس بقى. بعد وقت صعدت فريدة مع حبيبة و دينا لتقوم بقياس فستانها. حبيبة بتعب: هفف. مش راضي يقفل. روحي للست اللي فصلته خليها توسعه شوية.

فريدة بدموع: لا أنا اللي تخنت. ده كان على مقاسي الأسبوع اللي فات لما قسته. أعمل إيه بس. لازم أخس بسرعة. دينا: استني. اطلعي على الميزان و نشوف. لسه فاضل وقت للفرح تقدري توسعي الفستان و هتلحقي تخسي لو عايزة. وقفت فريدة على الميزان بتوتر. فريدة: 66. أهو زايدة 2 كيلو. يا انهار أسود. أعمل إيه يا ربيييي.

حبيبة: عادي هتقدري تنزليهم بإسبوع واحد. لو عايزة إحنا ممكن نعملك نظام غذائي و كلنا نلتزم معاكي هتنزلي بسرعة. بس مش لازم تتوتري قبل الفرح بشرتك هتتعب و هيبان عليكي. فريدة بقلق: خلاص إحنا نعمل دايت مع بعض عشان تشجعوني و لو ما نزلتش هروح للست و أخليها توسع شوية. بس مش عايزة أبين تخينة بالفرح. دينا: تمام كده. هعمل جدول مكثف و كلنا هنمشي عليه. دلفت حلا و قالت: مالكم في إيه؟ الله الفستان تحفة يا فريدة.

فريدة: بس مش راضي يقفل عليا. دينا: هنعمل دايت كلنا مع بعض عشان تخسي بسرعة. إيه رأيك يا حلا؟ حلا: يا انهار أسود. أنا لو خسيت هختفي انتي مش شايفة شكلي. دينا بهمس: ابقي اطفحي أي حاجة من وراها بس قدامها لازم كلنا نساعدها. حلا: آه إن كان كده ماشي. *** مصطفى: و بس كده. كل واحد كان بيتغزل بالحتة بتاعته من تحت لتحت. حتى زياد كان كل كلامه موجه لغادة. بس هي إيه؟ مطنشاه خالص. عبد الله: يعني هي مش عايزاه؟

مصطفى: بالعكس دي باين عليها بتموت فيه بس مقهورة منه. عبد الله: طيب ما دام لسه عايزاه كويس. هنعرف نرجعهم لبعض. المهم حبيبة و أوس اتصالحوا و لا اتخانقوا تاني؟ مصطفى بخبث: إيه. دول اتمسكوا متلبسين و هما حاضنين بعض على البلكونة. بابا شافهم. و حبيبة واضح إنها حنت لأوس. دي اتقلبت 180 درجة من ساعة ما رجع. عبد الله بسعادة: الحمدلله. كده كل حاجة ماشية صح. خد يا حبيبي. ده الآيباد اللي طلبته. امسك

مصطفى الآيباد و قال بفرح: ربنا يخليك ليا يا أحلى جدو بالدنيا. ************** في المساء كانت الساعة قد تعدت الثانية عشر. و كالعادة بعد اجتماع العائلة ذهب الكبار للنوم و بقي الشباب جميعهم. جلست كارما بجانب حبيبة مما أثار استغراب الجميع. كان جميعهم مشغولين على هواتفهم. حلا باستغراب: هو إيه حكاية المنطقة اللي ورا الغيط بتاع جدو؟ بنت الجيران قالتلي إنها منطقة محظورة. هو ده بجد؟ نظر أوس و تميم لبعض.

تميم: أيوه. أنتِ ما سمعتيش عنها قبل كده؟ حلا: و هسمع منين منا طول عمري عايشة بمصر. فارس: ألا صحيح يا تميم إيه حكايتها؟ أنا برضو من ساعة ما جيت و أنا بسمع عن المكان ده. تميم: دي حتة مهجورة من زمان. حصل فيها مشكلة قديمة و اتقفلت من حوالي 10 سنين. دينا باهتمام: إيه المشكلة اللي حصلت؟

تميم: تار بين عيلتين كانوا عايشين هناك. في عيلة هاجمت على بيت هناك و اشتغل ضرب نار فيها. و ما..ت حوالي 5 أشخاص. و طبعاً العمدة حكم عليهم إنهم يعزلوا من المنطقة. و كده اتقفلت لغاية النهاردة. حبيبة بخوف: يا انهار أسود. 5 أشخاص؟ لارا: هو ليه أنا بحس إن الق..تل بالريف ده حاجة عادية. زي شرب الشاي كده. دينا: عشان هبلة. أكيد مش حاجة عادية. مهو بقولك اتحكم عليهم يعزلوا من الحتة كلها. حلا: يعني دلوقتي بقت حتة مهجورة؟!

تميم: آه طبعاً. محدش بيروح هناك خالص. و حتى كنا بنسمع أصوات من هناك. في ناس بيقولوا إنها أصوات أرواح الم..تى. حبيبة برعب: تميم لو سمحت اقفل ع الباقي. يا انهار أسود. أنا إزاي هنام الليلة. لارا بهمس: بكمي. دينا: اجمدي يا بت. بقولكم إيه. تميم: إيه. دينا بحماس: ما تيجوا نروح هناك. زياد: تروحي فين يا هبلة. بيقولك منطقة محظورة. و جدي محرج علينا ما نروحش هناك من زمان.

فارس: يا ابني سيبك من جدي دلوقتي. تعالوا نغامر شوية. الجدع فيكم اللي يروح. فريدة: أنت أهبل يا ابني. عايزنا نكسر كلام جدو. فارس: مش هيحصل حاجة لو رحنا استكشفنا المكان. بيقولك محدش راح هناك من عشر سنين. حلا: و الله فكرة حلوة. أهو نتسلى شوية. حبيبة: انتي اتجننتي. المكان مرعب و لو بابا عرف إننا خرجنا من غير إذنه هيزعل. كارما: ما تجمدوا شوية. فيها إيه لو رحنا كلنا مع بعض. أكيد مش هيحصل حاجة.

زياد: طب نعمل تصويت. اللي عايز يروح يرفع إيده. رفع الجميع يده عدا حبيبة و فريدة. دينا: آه يا جبانة انتي و هي. ما تنشفوا شوية. زياد: خلاص انتوا مش هتروحوا. خليكم هنا و لو جدو حس ع غيابنا كلمونا. هنرجع بسرعة. نظرت حبيبة لأوس الذي يرفع يده و يبتسم لها. و نظرت إلى لارا و كارما السعيدات جداً بعدم ذهابها. فشعرت بالغيرة. حبيبة: لا أنا عايزة أروح معاكم…………… يتبع