رواية مجنون فرح الفصل السابع 7 - بقلم رنا اشرف

فرح: كنت في.... زين قاطعها بإنه جري عليها وحضنها جامد بكل الحزن اللي جواه عليها. فرح اتصدمت لما حضنها مش عارفة تعمل إيه: هو إزاي يقرب مني كده... ماجد مسك إيد نيللي وشدها برا الأوضة. نيللي لما خرجو: إيه بتشدني كده ليه؟ ماجد: يعني يكون في دم شوية.. واحد ومراته!! نيللي عوجت بوقها بتريقه ووقفت جمبه ساكتة. فرح بصدمة: زين!! زين حضنها أكتر مكنش عايز يبعد عنها بس هي بعدته بإيدها. فرح بتوتر: بتعمل إيه!! انت.. انت إزاي ت....

زين: سوري... عاملة إيه دلوقتي؟ فرح بتوتر وهي بترجع شعرها: أنا كويسة... ممكن نخرج من هنا بتخنق من المستشفيات؟ زين: هروح أشوف الدكتور واجيلك. فرح هزت راسها بموافقة وكانت بتكلم نفسها لما خرج: إزاي يعمل كده!! هو مش عشان ساعدني يعمل كده.. لازم يعرف حدوده.. إيوه لازم نتكلم واعرفه حدوده كويس. زين دخل هو والدكتور سمحلهم بخروج وزين وصلوها وطلب من ماجد يوصل نيللي. ماجد: عنوانك إيه؟ نيللي وهي بتتكلم في التلفون: علي طول كده.

ماجد بصلها بعصبية وساق بسرعة. نيللي قفلت وبصتله: في إيه براحة انت مش هتوصلني البيت.. كده هتوصلني فوق. بتشاور بإيدها للسما. ماجد ابتسم غصب عنه وهدي السرعة: كده كويس!! نيللي وهي بتسند ضهرها بارتياح: كويس. بصلها وابتسم وبص قدامه تاني وكمل طريقه. زين وصل بيته: يلا. فرح بزهق: هنا تاني!! أنا عايزة أروح بيتي. زين وهو بينزل: ماهو ده بيتك. فرح: لا مش بيتي.. أنا احنا لازم نتكلم واعرف هنتطلق إمتى. زين وهو بيفتحلها الباب:

انزلي يا فرح مش فايق لكلامك الفاضي ده. فرح بإصرار: مش كلام فاضي... أنا عايزة أعرف هنطلق إمتى. زين بعصبية: ماشي يا فرح هنطلق أكيد بس ممكن تنزلي دلوقتي؟ فرح نزلت وكانت ماشية بس حست إنها دايخة ف سندت علي العربية. زين قرب منها: انتي كويسة؟ فرح: إيوه دايخة شوية بس. زين شالها بسرعة. فرح بصدمة: انت بتعمل إيهيييه!! نزلني. زين كان ماشي وهو ساكت: ...... فرح وهي بتحاول تنزل: بقولك نزلني يا زين... انت إزاي تشيلني كده...

نزلني.. نزلني. زين بعصبية: اخرسي بقى. فرح وهي بتضربه علي كتفه: مش هخرس نزلني بقولك. زين بصلها بعصبية: فرررح.. خلاص. فرح سكتت وهي بتبص الناحية التانية بغضب طفولي. زين بصلها ولقاها عوجت بوقها بعصبية ف ضحك عليها.. لحد ما وصلو الأوضة ونزلها براحة علي السرير وكان بيقرب منها عشان يبوسها علي جبينها بس هي بعدت بسرعة. فرح وهي رافعة صباعها في وشه: أقف عندك أنا سيبتك تحضني في المستشفى وسيبتك تشيلني تحت بس إنك.. إنك لااا.

زين وهو بيقرب منها ببرود: إني إيه!! فرح: إلزم حدودك معايا.. مفيش حاجة بينا ولا هيكون انت عارف سبب جوازنا كويس. زين: طيب أنا متجوزك عشان انتقم من أبوكي واعلمك الأدب... انتي بقى متجوزاني ليه؟ فرح حطت إيدها في وسطها: زيك بالظبط... اعلمك الأدب. زين بصلها ورفع حاجبه: بجد!! طيب يلا علميني الأدب!! قرب منها يلا علميني. فرح بتوتر: هعلمك بس مش دلوقتي... وبعدين احنا لازم نتكلم. زين وقف بزهق: نتكلم في إيه؟ فرح:

عايزة أعرف هنطلق إمتى ولحد ما نطلق أقعد في أوضة لوحدي. زين اضايق إنك كل شوية تطلب الطلاق بس اتكلم ببرود: مفيش طلاق دلوقتي هو عشان أبوكي خد شركته يبقى انتي كمان تطلقي... مش هطلقك غير بمزاجي. فرح بزهق: ومزاجك ده هيطلقني إمتى؟ زين: معرفش... أنا داخل أخد شاور. نيللي: انتي كنتي فين إمبارح رنيت عليكي كتير مكنتيش بتردي. ندي ببرود: مكنتش فاضية في حاجة!! لقيت بردو فرح رنت. نيللي: فرح كانت في المستشفى. ندي بصتلها: إيه!! نيللي:

جالها انهيار ومكنش معاها مهدئ أو حاجة. ندي بتوتر: وهي عاملة إيه دلوقتي؟ نيللي شكت فيها: كويسة... بس مش غريبة يعني المهدئ يختفي أول ما نمشي علي طول من عندها. ندي: تلاقيها ضيعته هنا ولا هنا. نيللي: ممكن بردو.. أنا رايحة الجمعية باي. ندي كانت قاعدة لوحدها بس لقت حد وراها. ندي بابتسامة: حازم عاش من شافك. حازم قعد ببرود وقلع نضارته ورماها علي الترابيزة: كنت مسافر في شغل. ندي حطت إيدها علي خدها وهي بتتأملة:

أممم.. شغل إيه ده باين عليك مكنتش بتنام. حازم: متشغليش بالك.. أه صح أنا شوفت نيللي ماشية أومال فين فرح مش قاعدة معاكو؟ ندي ضحكت: إيه ده!! انت متعرفش؟ حازم بقلق: مالها هي كويسة!! ندي ضحكت بخبث: طبعا كويسة.. واتجوزت كمان. حازم بإنفعال: إيييه!! اتجوزت مين وإمتى! ندي: اتجوزت من يومين معملوش فرح ولا حاجة واحد شريك وابوها بس أيه رجل أعمال كبير جدا غني وحلو وابن ناس يعني ممكن يكون عمو عاصم ماصدقك إن واحد زي ده يطلب إيد فرح.

حازم بعصبية: وهي وافقت كده!! ندي: باباها غصب عليها وهي وافقت. حازم: بس من إمتى يعني وفرح بتمشي ورا كلام حد... كان ممكن ترفض. ندي: في إيه انت مضايق أوي كده ليه.. انتو كنتوا صحاب بس. حازم بعصبية: لا مش صحاب بس.. أنا بحبها وبحبها جدا بس أنا غبي مقلتلهاش. ندي بصدمة: إيييه!! بتحب فرح؟ حازم: أه بحبها ومش هحب غيرها.. هي إزاي تتجوز. ندي كانت بتكلم نفسها بغضب:

ماشي يا فرح يعني متجوزة واحد زي زين.. وحتى حازم مسبتهوش وخلتيه يحبك بس لأ مش هتكوني متجوزة زين كتير. ندي بخبث: أنا عندي فكرة أجيبهالك تاني.. وأخلي جوزها يطلقها وضميره مرتاح. حازم: فكرة إيه؟ ندي بابتسامة: سيبها عليا.. أسيبك أنا دلوقتي. حازم عارف نوايا ندى وإنها بتغير من أي حد: ندي فرح لو حصلها حاجة مش هسامحك. ندى بزهق: متخافش عليها... باي. فرح بابتسامة: ندوش. ندي بابتسامة مصطنعة: فرح عاملة إيه يا حبيبتي!!

سوري مكنتش أعرف إنك في المستشفى لسه عارفة من نيللي. فرح: ولا يهمك أنا بقيت كويسة. ندي: أممم... هو زين عرف!! فرح: عرف إيه؟ ندي: يعني عرف بموضوع مامتك وإنك دخلتي مستشفى.. مش قصدي حاجة يا حبيبتي انتي عارفة. فرح أخدت نفسها بزعل: لا ميعرفش.. ما قولتلهوش حاجة ومش هقوله. ندي فكرت إنه لو عرف إن فرح كانت في مستشفى أمراض نفسية وعندها مشاكل في انفعالاتها وزي ما سمعتها مجنونة ممكن يسيبها ف قررت إنه لازم يعرف.

ندي وهي بتبصلها بابتسامة: معلش يا فرح أنا بحبك ومش عايزة أاذيكي بس لايق عليا أنا مش انتي.. مش كفاية حازم بيحبك!! فرح: إيييه بتبصيلي كده ليه؟ ندي: لا لا مفيش.. أه صح حازم كان بيسأل عليكي. زين كان لسه راجع من شغله وسمعهم: حازم مين!!