رواية مهمة اوقعتني في حبه ( ا الفصل السادس 6 - بقلم نشوة عادل

وبعدين معاكي ي بنت الناس هتعلقينى بيكي اكتر من كده فين وانا عارف ف الآخر إنك مش هتكوني ليا أنا فين وإنتي فين؟! أفاق من شروده على طرقعة أصابعها وهي تقول ممازحة: إيه اللي واخد عقلك ي استاذ؟! عمار بدون تفكير: إنتي تاج بصدمة ممزوجة بفرحة: إيه! انت بتقول إيه؟! عمار وقد انتبه وبدا عليه التوتر الشديد: أقصد يعني حضرتك ناوية تعملي إيه دلوقتي أو رايحة فين يعني؟! تاج: امممم لابسة ترينج رياضي هكون رايحة فين بذمتك! عمار:

الجيم مش بيفتح دلوقتي تاج: فيه حاجة اسمها رياضة الجري ي كابتن ولا معدتش عليك عمار بابتسامة: أنا آسف معرفش إن حضرتك رياضية أوي كده تاج: تاني حضرتك! طب ادخل بسرعة غير هدومك قبل ما أغير رأيي عمار: احم اخاف تكوني بتضحكي عليا أدخل عشان أغير ألاقيقيش تاج وهي تنظر لعيونه العسلية لأول مرة مباشرة: أوعدك من النهاردة مش هزوغ منك ولا هضايقك بتصرفاتي تاني عمار لنفسه: اثبت ولا أطلع أجري قبل ما أتهور وأحضنها

وبسرعة رهيبة جرى عمار واختفى وحين دخل لغرفته وضع يده على قلبه ما هذا إنه يدق بشكل مثير لم يحدث ذلك له من قبل أبداً، أبدل ملابسه وخرج لها وجروا سوياً حتى خرت قوى تاج وقالت: بس كفاية بقى لحد كده أنا تعبت عمار: أوامرك تحبي نروح؟! تاج: أحب أوي بالفعل ذهبوا للمنزل وداخل الحديقة وقفت تاج وقالت: عاوزة أطلب منك طلب ممكن! عمار: طبعاً اتفضلي تاج:

من زمان كنت بتمنى أتعلم أي رياضة فيها دفاع عن النفس بس مامي كانت دايماً بترفض وتقول الألعاب دي للشباب فممكن تعلمني كام حركة دفاع عن النفس عمار: تمام مفيش مشكلة بس اااا..... تاج: فيه إيه مالك بتهته كده ليه؟! عمار: عشان أعلمك وأدربك لازم أقرب منك يعني ومعتقدش إنك هترحبى بكده تاج: ومرحبش ليه! هو إحنا رايحين نرقص وأنا معرفش ولا إيه! يلا ي كابتن

ضحك عمار على كلماتها وحركاتها الطفولية وكانت أول مرة تراه تاج يضحك وتلاحظ أن عيناه تغلق حين يضحك فسرحت فيه كم هو وسيم كيف لم تلاحظ هذا من قبل كانت أميرة محقة في نظرتها اتجاهه...

بدأ عمار يعلمها بعض الحركات الخفيفة ويقف خلفها ممسكاً يدها بوضعيات أذى أو خطف خفيفة كي يعلمها الحركات، وأثناء ذلك كانت عيناهما تلتقيان وتقول الكثير مما يخفيه القلب ولم ينتبهوا لذاك الشخص الذي يلتقط لهما الصور، وبعدها انتهى التدريب ودخلوا إلى المنزل كل منهما إلى غرفته. في مكان آخر عند جاسر الذي كان يجلس يتناول فطوره مع أخيه جلال، دق هاتفه وكان أحد رجاله الذي قال: بعتلك صور ي باشا افتحها كده أغلق جاسر الهاتف وفتح الصور

ليدهش مما رأى وقال بتصفير: حلو أوي الكلام ده جلال: هو إيه ده اللي حلو؟! رفع جاسر هاتفه أمام جلال الذي رأى صور لتاج برفقة عمار. جاسر: شكل الباشا وقع في حب بنت سلطان ي كبير جلال بشر: ودي فرصتنا وجات لحد عندنا البت دي هتكون الحجر اللي هنضرب بيه العصفورين أبوها والحارس جاسر: ولا تتعب نفسك كده كده هتسمع خبر يفرحك عن صاحبك ده بكرة بالكتير جلال: خبر... خبر إيه؟! جاسر: اتقل واحتمال كبير تسمع خبره جلال:

ياريت ده هيكون أسعد خبر في حياتي بس كنت أتمنى يكون على إيدي أنا جاسر: مش مهم على إيد مين المهم نكون أخذنا بتارنا وعاصم حبيبي يكون مرتاح في قبره جلال: أيوه بس مين اللي يقدر يعمل كده؟! جاسر: العين اللي ليا عندهم جلال بفضول: أموت وأعرف مين العين دي جاسر بضحك: متخليش الفضول يقتلك عشان في الآخر مش هقولك برضه جلال بضحك: تربيتي ي واد جاسر: هو أنا اتربيت أصلاً

عدت الساعات وحل المساء ونزلت تاج لتجد عمار جالس بالحديقة يقرأ بالمصحف وقد انتهى لتوه من التلاوة. تاج بإعجاب: إيه ده انت بتقرأ قرآن! عمار: كل ما ألاقي نفسي تايه وتعبان بقرا بالمصحف بحس براحة متتوصفش تاج: تعرف إنك شخصية غريبة عمرها ما عدت عليا قبل كده عمار: إزاي بقى؟! تاج: يعني مثقف ومعاك كذا لغة وحارس ورياضي وكمان بتصلي حاسة إنك غامض كده وبكتشف فيك كل يوم حاجة جديدة عمار: طب دي حاجة حلوة ولا وحشة تاج بابتسامة:

حلوة أوي..... احم بقولك عاوزة أطلب دليفري أطلب ليك معانا؟! عمار: طب وليه الدليفري أعملك أنا اللي انتي عاوزاه وأحسن من المطاعم كمان تاج: لا انت بتعرف تطبخ؟! عمار: تدوقي وتحكمي بس تحبي تاكلي إيه؟! تاج: عاوزة بيتزا ميكس جبن عمار: غالي والطلب رخيص تاج: استنى خدني معاك أتفرج وبالمرة أساعدك ولا عندك مانع عمار: مانع إيه بس هو أنا أطول اتفضلي

ذهب عمار برفقة تاج إلى المطبخ وطلب منها تقطيع بعض الخضروات كالطماطم والفلفل الأخضر والبصل على شكل حلقات وبدأ هو في تجهيز العجين. تاج: فين فونك عاوزة أشغل أغاني أصلي نسيت فوني فوق عمار: اتفضلي اهو

فتحت تاج هاتف عمار ودخلت على قائمة خاصة بالأغاني ولاحظت من ضمنهم أغنية لتامر عاشور الوحيدة المكررة والمفضلة بقلب ولفت انتباهها اسم الأغنية وقررت تشغيلها وعندما سمع عمار الموسيقى عرفها فهي أغنيته المفضلة وكلماتها تعبر كثيراً عن وضعه مع محبوبته وبدأت الأغنية وكانت كلماتها: بحبك وخايف نقرب نضيع بحبك وعارف بإنه استحالة بحبك واسف خدتني الجلالة أنا وأنت حالة رفضها الجميع بحبك بقولها وجوايا حرب بقولها فضميري آجي أنطقها صعب

ده موقف مصيري بيعملي رُعب شوفها فعنيا في رعشة ايديا تلاقيها حية في قلبي الخجول طب اقرا الرسايل، هتلاقيني قايل بإني بحبك ما بين السطور دي واضحة فكلامي وباينه فسلامي يا كل اهتمامي وأكبر همومي بخاف يوم ما أقولها متلعبش دورها تموت من جذورها وأموت من ظنوني بحبك وخايف مبجيبش سيرة بحبك وعارف دي كلمة تقيلة ولو حتى هي تبانلك عادية شوفها بعنيا تبان مستحيلة

انتهت الأغنية ومع مرور بعض الوقت انتهى عمار من عمل البيتزا وبعدها نزلت أميرة وقد بان عليها آثار التعب الشديد. تاج: نزلت ليه ي بنتي؟! أميرة: جعانة عاوزة أكل ... إيه ده هو المطبخ مقلوب كده ليه؟! تاج: أصل عمار هو اللي طبخ لينا وأنا ساعدته استأذن عمار وكذلك تاج لتبديل ملابسهم المتسخة ووقفت أميرة إلى جانب الطعام وكلام جاسر يدور برأسها حين كان يتحدث معها عن خطته في التخلص من عمار وووو...