رواية مكتوبه على اسمي الفصل الحادي والثمانون 81 - بقلم ملك ابراهيم

بعد مرور 3 سنوات. في فيلا عامر وآيات. اتجمعوا كلهم في الجنينة بتاعة الفيلا بعد انتهاء عيد ميلاد التوأم أولاد عامر وآيات (ريان وريما) قربت منهم آيات وهي شايلة صينية فيها حلويات ومقرمشات وقالت: الأولاد ناموا وأنا جبتلكم حاجات نتسلى بيها في السهرة. بيسان قربت منهم ورا آيات وهي بتضحك وقالت: أنا نيمت عائشة بنتي جنب إيلين بنتك يا هاجر، بس يا رب ما توقعهاش من جنبها، أنا عارفة بنتك شرانية. اتكلم شريف وهو بيضحك:

إيلين دي روح قلب أبوها. رد أمجد عليه: خليك أفضل دلعها كده لحد ما في يوم هتلاقيني معلقها من شعرها لو ضربت عائشة بنتي تاني. آيات ضحكت وقالت: ما تزعلش يا أمجد، ريما بنتي قايمة معاها بالواجب وبتعرف توقفها عند حدها. اتكلم عامر بفخر: ريان ابني بقى طالع نسخة مني ومش شاغل باله بالحوارات بتاعة البنات دي خالص. آيات بصت لعامر وقالت بغيظ: أنت هتقول لنا؟ حتى البرفان الحريمي اللي كان على لبسك إمبارح يشهد. شريف ضحك وقال:

برفان حريمي منين؟ هو أنت مش كنت معايا في الموقع إمبارح؟ ليكون البرفان بتاع المهندسة الجديدة اللي... كلهم بصوا لشريف، وآيات قالت بغيظ: اللي إيه يا شريف ما تكمل كلامك؟ شريف بص لعامر وأمجد وقال: اللي طردها من الشغل إمبارح... وبص لآيات وقالها: ما شوفتيش أنتِ بقى يا آيات، البنت دي حاجة كده صاروخ... هاجر شهقت وصرخت فيه: شريف!!! اتكلم شريف بسرعة: قصدي بنت غريبة كده...

وشغالة في الموقع كله رجالة ولبسها ما ينفعش أبدًا ولا برفانها... يا سلام... أنا وعامر دوبنا من ريحة البرفان بتاعها... وسرح وهو بيتكلم، وعامر رمى عليه مخدة صغيرة كانت جنبه وقاله: اتكلم عن نفسك يا متخلف. وبص لآيات وقالها: أكيد مش هتصدقي كلام المتخلف ده. آيات رفعت حاجبها وهي بتبص له، وشريف كمل كلامه وهو بيقول لآيات: طيب اشهدي أنتِ يا آيات مش أنتِ شميتي ريحة برفانها إمبارح... إيه رأيك فيه؟ هاجر كانت بتبص لشريف بتوعد وغضب،

وردت آيات بغيظ: حلو جدًا... كمل يا شريف كمل. كمل شريف بزعل: الباشا جوزك بقى قالها إن اللبس ده ما ينفعش في الموقع عشان العمال كلهم رجالة وهي قالت إنها مش بتعرف تلبس غير كده ولو مش عجبنا هتسيب الشغل... يقوم الباشا جوزك طردها ويبعت مهندس مكانها... يرضيكي كده يا آيات. هاجر بصت لشريف وقالت بغيظ: يا روحي أنا بجد زعلت عليها... ده أنا هسود أيامك يا شريف لما نرجع بيتنا. شريف همس لهاجر:

يا حبيبتي أنا بقول أي كلام عشان آيات ما تتخانقش مع عامر. آيات بصت لعامر وابتسمت، وبيسان سألت بفضول: ماشي وبعد القصة دي إيه علاقة برفانها بعامر... ليه آيات لقت ريحة برفانها على لبس عامر؟! اتكلم شريف مع أمجد بغيظ: ما تسكت مراتك يا عم أمجد، إحنا لما صدقنا أقنعنا آيات. آيات بصت له بغموض وقالت:

أصلًا أنا عارفة كل اللي حصل، وجوزي حبيبي حكالي عشان ما بيخبيش عني حاجة، وقالي إنها لما مشيت نسيت البرفان بتاعها وحضرتك أخدته ورشيت منه على عامر وقولت له عشان آيات تقفشك. شريف بص لعامر وقاله: ولما أنت حاكي كل حاجة ومأمن نفسك عمال تبصلي بنظرتك اللي تخوف دي ليه؟! اتكلمت بيسان بحماس: بقولكم إيه سيبكم من كل ده وتعالوا نلعب لعبة الصراحة. اتكلم عامر مع أمجد:

صراحة إيه بس دلوقتي، ما تسيطر يا أمجد شوية عايزين الليلة دي تعدي على خير! واتكلم شريف: يا ريت يا أمجد تفهم مراتك إن لو لعبة الصراحة دي اتلعبت معانا دلوقتي يبقى هي وصحباتها الحلوين دول هيخلونا ننام في الجنينة دي النهاردة وناكل من أعشاب الطبيعة. آيات وهاجر بصوا لهم بتحدي وقالوا: يعني أنتُما في حاجات مخبينها علينا... يبقى هنلعب لعبة الصراحة يعني هنلعب لعبة الصراحة، وكل واحدة هتسأل جوزها. اتكلمت بيسان بثقة:

برافو يا بنات. عامر وشريف وأمجد بصوا لبعض، والبنات اتحمسوا جدًا وبدأت اللعبة. الدور الأول كان لبيسان. بيسان بصت لأمجد وسألته: أمجد قولي بصراحة... أنا لو كنت لسه مسافرة لحد دلوقتي ومرجعتش... كنت هتحب واحدة غيري وتتجوزها ولا كنت هتفضل أعزب عايش على ذكرى حبي؟ رد أمجد: كنت هفضل عمري كله مستنيكي ترجعي لأن ما فيش بنت في الكون تقدر تاخد مكانك في قلبي.

البنات شجعوهم بحماس وهما فرحانين برد أمجد الرومانسي، وبيسان اتكسفت وحطت أيديها على وشها بخجل، وشريف وعامر بصوا لأمجد بغيظ وهما بيهمسوا: آه يا كداب. أمجد غمز لهم وضحكوا ولعبوا تاني والدور جه على آيات وسألت عامر. آيات: عامر... أنا لو كنت صدقت الدكتورة أروى اللي قالت إنها حامل منك وكنت سيبتك وبعدت عنك من غير ما أقول أسباب... كنت هتعمل إيه؟ رد عامر: كنت هدور بقى على واحدة تحبني بجد وتثق فيا. اتكلمت آيات بصدمة:

يعني ما كنتش هتدور عليا وتثبت براءتك قدامي؟ رد عامر: هو أنتِ واجهتيني بحاجة قبل ما تمشي عشان أثبت براءتي قدامك؟! أنتِ بتقولي لو كنتِ مشيتي وما قولتيش أسباب! كلهم اتكلموا وقالوا: عامر عنده حق يا آيات. آيات بصت لعامر بغيظ وعامر ضحك ومسك أيديها وقبّلها وقالها: بس أنا مراتي حبيبتي عاقلة وبتثق فيا وأنا مش بخبي عليها أي حاجة. آيات ابتسمت وهاجر بصت لشريف بغموض وقالت: دوري أنا بقى. شريف قال وهو بيحاول يهرب:

أنا هستأذن أنا يا جماعة وأتمنالكم سهرة سعيدة. كلهم ضحكوا وهاجر قالت له: اقعد يا شريف دي فرصتي جتلي لحد عندي... حطت أيديها على خدها وهي بتفكر وسألته: لو اكتشفت إني بعرف أقرأ أفكارك إيه أول حاجة هتحاول تخفيها عني؟ شريف بص لها بصدمة وقال: إيه الأسئلة الصعبة دي ما تسألي زي أصحابك!! الاتنين سألوا أسئلة سهلة. ردت هاجر: جاوب يا شريف وبصراحة. شريف بص لها بتوتر وقال: بصراحة أوي يعني؟ هاجر: آه. اتكلم شريف:

بصراحة يعني اليوم اللي بتطبخي فيه ببقى مش عايز أرجع البيت لأنك بتعملي أكل ما فيش بني آدمين ياكلوه وأنا بأكل غصب عني عشان ما تزعليش. هاجر بصت له بصدمة وقالت: يعني أنا مش بعرف أطبخ وأنت بتاكل غصب عنك كمان. وقامت زعلانة وقالت له: شكرًا أوي يا شريف روح شوفلك واحدة بقى غيري بتعرف تطبخ... وجريت هاجر وخرجت من الفيلا وراحت على فِيلتها اللي جنب فيلا عامر وآيات. شريف بص لهم بغيظ وقال: مش قولت لكم بلاش لعبة الصراحة دي...

وبص لأمجد اللي كان بيضحك وقاله: منك لله يا أمجد أنت ومراتك... وقام شريف وهو بيقول لعامر: عامر إيلين بنتي هتبات عندكم النهاردة لما أروح أصالح المجنونة دي. وخرج شريف بسرعة وراح فيلته. أمجد قام هو كمان وبيسان قالت لآيات: وعائشة بنتنا نايمة ومش هينفع نصحيها خلي بالك منها يا آيات. وخرجوا الاتنين وراحوا على فيلتهم بسرعة. عامر ضغط على شفايفه بغيظ وهو بيبص لآيات وقالها:

هو أنا ما فكرتش في اللي هيحصل ده إزاي قبل ما نكون جيران المجانين دول!! آيات ضحكت وقالت: بالعكس يا عامر إحنا مبسوطين أوي مع بعض. عامر رفع حاجبه وقالها: يعني عجبك كل واحد ياخد مراته ويهرب وإحنا نقعد بالأولاد. آيات ضحكت وقربت منه أكتر وقعدت جوه حضنه وقالت: يا حبيبي أنا معاك أهو والأولاد ناموا وأنا وأنت هنسهر لوحدنا. عامر ابتسم وضمها وقال: طيب تعالي ندخل جوه من البرد.

دخلوا هما الاتنين وأول لما دخلوا غرفتهم آيات سمعت صوت عياط إيلين بنت شريف. آيات جريت وقالت: دي إيلين صحيت هروح أشوفها. عامر بص قدامه بغيظ وهمس بغضب: ماشي يا شريف بقى بتدبسني أنا التدبيسة دي أنت وأمجد! آيات دخلت غرفة الأولاد وأخدت إيلين في حضنها ونيمتها، وبعد وقت قفلت غرفة الأولاد ورجعت غرفتها هي وعامر.

كان عامر واقف وبيبص من الشرفة وهو بيحمد ربنا على الحياة الجميلة اللي عايشها مع مراته اللي بيعشقها وأولاده اللي ربنا عوضه بيهم وأصحابه اللي دايمًا جنبه وزوجاتهم أصحاب آيات اللي وجودهم بيسعدها وأولادهم.

وفكر في أمه وابتسم وهو بيفتكر آخر مكالمة بينه وبين الحاج إسماعيل لما قاله إن ميسرة فتحت مكان في البلد لتعليم البنات اللي اتحرموا من التعليم وبتوجه الناس وتعرفهم ضرورة التعليم وإن البنت من حقها تتعلم زي الولد، والحاج إسماعيل معاها وبيدعمها دايمًا هو وفارس وهدير بتساعدها، وكانت ميسرة سعيدة جدًا في الحياة معاهم.

فكر في خالته ميرفت ومامة أمجد اللي سافروا عند ميسرة في البلد عشان يشوفوا المشروع بتاعها ويقضوا معاها كام يوم في البلد وسط الخضرة والطبيعة. كوكو وميرنا كان لهم نصيب في أفكاره وضحك وهو بيفتكرهم لما راحوا الشركة عنده عشان ياخدوا منه حلاوة افتتاح الفرع التاني للمحل بتاعهم، وكان حقيقي فرحان بيهم لأنهم قدروا ينجحوا ويكبروا شغلهم بطريقة كوكو وميرو في الزن على الناس عشان يشتروا كل اللي في المحل.

آيات دخلت الغرفة وشافت عامر وهو واقف وشارد في أفكاره. قربت منه وضمته من ضهره وقالت: حبيبي بتفكر في إيه؟ لف بجسمه وضمها لحضنه وقال: بفكر في كل النعم اللي ربنا أنعم عليا بيها وأولهم أنتِ يا حبيبتي. آيات ابتسمت جوه حضنه وقالت: يعني عمرك ما اتمنيت أي بنت تانية تكون في مكاني؟ رد عامر وهو بيبص في عيونها بعشق: أنا عمري ما اتمنيت غيرك في حياتي... أنتِ حبيبتي ومراتي وشريكة عمري اللي مكتوبة على اسمي. بقلمي ملك إبراهيم.

تمت بحمد الله 🌹

بتمنى تكون الرواية كانت خفيفة على قلوبكم وتكونوا استمتعتوا معانا بقراءتها. وشكرًا لكل المتابعين اللي كانوا بيقدروني ويشجعوني ويتفاعلوا معايا من أول بارت في الرواية. وشكرًا لكل المتابعين اللي كانوا بينزلوا ريفيوهات على الجروب. وشكرًا لمصممة الغلاف الجزء الأول والثاني اللي دايمًا تخطف قلوبنا بتصميماتها إيمان محمد. وشكرًا لأدمن أميرة مصطفى اللي دايمًا بتجمع فصول الرواية داخل الألبوم بانتظام عشان تلاقوا كل الفصول بالترتيب في الألبوم. وشكرًا لكل أدمن الصفحة وكل الناس المحترمة اللي كانوا بيسعدونا بكلامهم الراقي وهم الجميلة. ولكم مني كل الحب والاحترام والتقدير ✍️ الكاتبة ملك إبراهيم.