رواية مكتوبه على اسمي الفصل العشرون 20 - بقلم ملك ابراهيم

في نهاية اليوم، رجعت آيات مع بيسان على شقتهم وهما فرحانين. وبعد دخولهم الشقة بحوالي عشر دقايق، الجرس رن. آيات راحت فتحت لقت بنت جميلة واقفة قدامها، ولها بطن بارزة من الحمل، واضح إنها في بداية الشهر الخامس تقريبًا. وسألتها: "انتي آيات؟ ردت آيات بابتسامة: "آه أنا.. مين حضرتك؟ ردت البنت: "أنا مرات عامر الجارحي. اتجوزنا في لندن من 6 شهور." لحظات من الصمت، وآيات بتحاول تستوعب اللي سمعته. وهمست

بصوت مهزوز من شدة الصدمة: "عامر الجارحي مين!!! مراته إزاي؟ البنت ردت بهدوء: "ممكن تسمحيلي أدخل وأنا هفهمك كل حاجة." آيات هزت راسها بالإيجاب، وهي متجمدة مكانها. والبنت دخلت. بيسان بصت لها باستغراب ورحبت بيها وسألت آيات مين دي. وآيات مكانتش قادرة تنطق ولا تتكلم. ودخلت مع البنت وقعدت قدامها، وهي لسه بتبصلها بصدمة.

البنت اتكلمت بهدوء: "أنا دكتورة أروى. كنت المعالجة النفسية لمدام ميسرة طول فترة علاجها في المستشفى بلندن. وهناك اتعرفت على عامر وحبينا بعض." آيات رفعت حاجبها وقالت: "حبيتوا بعض!!! بيسان بصتلهم بصدمة ومنتظرة تسمع البنت دي مين وعايزة إيه. كملت أروى كلامها بهدوء: "عامر حكالي عن اللي حصل بينكم وانفصالكم عن بعض. وفي الحقيقة، هو كان بيمر بحالة نفسية صعبة. وأنا كنت بساعده وقدر يتخطى كل ده وأنا معاه."

بيسان بصت على آيات وهي قلقانة عليها من الكلام اللي بتسمعه. وآيات بصت لـ أروى بعمق وقالت: "واتجوزتوا إزاي؟ بيسان شهقت بصدمة: "مين اتجوز مين؟ ردت عليها آيات: "ثواني يا بيسان، نفهم." وبصت لـ أروى وسألتها مرة تانية: "ممكن تحكيلي إزاي عرض عليكي الجواز وإزاي اتجوزتوا؟

ردت أروى بثقة: "كنا سهرانين أنا وعامر في مكان، واتقلنا في الشرب شوية. واخدنا أوضة في الأوتيل لوحدنا. ولما فُقنا الصبح، اكتشفنا اللي حصل بينا. وعامر وقتها قالي إنه مش هيتخلى عني."

آيات بصتلها بغموض، لأنها عارفة إن عامر مش بيشرب ومستحيل يعمل اللي هي بتحكيه ده. عامر بيحبها هي وبس. ولو كان عمل حاجة زي كده، أكيد مكنش هيرجع لـ آيات ويطلب منها تبدأ معاه من جديد. على قد ما كانت مصدومة وخايفة إن كلام الدكتورة دي يطلع حقيقي ويكون عامر وقع في الغلط ده معاها فعلًا، على قد ما كان فيه إحساس جواها بيقولها إن عامر مستحيل يعمل كده، حتى لو هو مش في وعيه زي ما هي بتقول. بصتلها بغموض وحاولت

تتماسك قدامها وقالت: "وبعدين.. اتفضلي كملي." أروى اتكلمت بتوتر، لأنها استغربت قوة آيات وتماسكها قدامها رغم كل اللي سمعته. والطبيعي إن أي واحدة تسمع الكلام ده عن حبيبها تنهار ومتقدرش تسمع أكتر. أروى: "اكتشفت إني حامل. وخوفت أقول لـ عامر عشان ميطلبش مني أنزل البيبي. وقولت أخبي حملي فترة لحد ما تنتهي الشهور الأولى، وبعدها أقوله." بيسان سألتها بصدمة: "يعني انتي حامل من عامر دلوقتي؟

ردت بتأكيد: "آه. وفي بداية الشهر الخامس." آيات بصتلها والدموع بتلمع في عينيها وقالت بصوت مبحوح: "واتجوزتوا إزاي وامتى؟ أروى ردت بارتباك: "إحنا كنا هنتجوز، بس عامر اضطر يرجع مصر." آيات وهي بتبصلها بشك: "يعني انتي مش مراته زي ما قولتي؟ أروى: "قولتلك، هو وعدني إنه مش هيتخلى عني." بيسان اتكلمت بانفعال: "إيه الجنان ده؟ أكيد في حاجة غلط. أنا مش قادرة أصدق إن عامر يعمل كده!! وبصت لـ

آيات وقالت: "آيات، أنا أعرف عامر من أيام الجامعة. وصدقيني، عامر مستحيل يكون كده." أروى بصت لـ بيسان وقالت بثقة: "وتفتكري أنا هتبلى عليه مثلًا؟ في بنت تحط نفسها في موقف زي ده! آيات بصتلها وهي مش قادرة تصدق، لأن هي كمان واثقة في أخلاق عامر وعارفة إنه مستحيل يغضب ربنا ويقع في ذنب كبير زي ده. اتكلمت آيات وهي حاسة إنها مش قادرة تتماسك أكتر من كده: "وجاية ليا أنا دلوقتي ليه؟ ليه مروحتيش لـ عامر تتكلمي معاه؟

أظن دي مشكلتكم انتوا وغلطتكم انتوا الاتنين." ردت أروى: "أنا جيتلك لأني عرفت إن في احتمال إنتي وعامر ترجعوا لبعض تاني. ورجوعك لـ عامر هيمنعه يوفي بوعده ليا ومش هيقدر يتجوزني وهيرفض يعترف بـ ابنه." آيات مقدرتش تستحمل كلامها أكتر من كده ودموعها نزلت من عينيها وقامت تجري على أوضتها. بيسان بصت لـ أروى بصدمة وسألتها: "وإنتي عرفتي منين إن عامر وآيات هيرجعوا لبعض؟ ومنتظرة من آيات تعملك إيه؟

ردت أروى: "عرفت من مدام ميسرة، لأني لسه متابعة معاها حالتها وبنتواصل أونلاين. ومنتظرة من آيات تبعد عن عامر وتسيبهولي بعد ما عرفت الحقيقة." بيسان بصتلها بصدمة وبصت على غرفة آيات وهي مش عارفة تعمل إيه. وبعد كام دقيقة، خرجت آيات من غرفتها وهي بتجفف دموعها وقعدت معاها تاني وقالت: "أنا وعامر من اللحظة دي، مفيش بينا حاجة. بينا اطمني." أروى ابتسمت وسألتها: "يعني هتسيبهولي؟ آيات بصتلها والدموع

بتنزل من عينيها وقالت لها: "أكيد مش هحرمه من ابنه." بيسان بصت لـ آيات بصدمة وقالت: "إيه الكلام اللي انتي بتقوليه ده يا آيات!! طب على الأقل واجهي عامر واسأليه؟ آيات بصت لـ بيسان وقالت بإصرار: "هسأله عن إيه؟ تفتكري في راجل ممكن يعترف بغلط زي ده؟ خلاص، الموضوع منتهي بالنسبة ليا." أروى ابتسمت وكانت لسه هتقوم عشان تمشي، لكن آيات وقفتها: "استني لو سمحتي.. كلامنا لسه مخلصش." أروى بصت

لها بدهشة وآيات قالت لها: "انتي عرفتي منين إن أنا وعامر احتمال نرجع لبعض؟ هو اللي قالك؟ عينيها زاغت في المكان بتفكير وتردد وقالت: "آه.. آه هو اللي قالي. وعشان كده جيت على أول طيارة وعرفت عنوانك وجيتلك عشان أمنعه." بيسان ردت عليها بغضب: "انتي مش لسه قايلة قدامي إن مامت عامر اللي قالتلك!! آيات بصت لـ أروى اللي بقى ظاهر عليها التوتر والخوف، وقالت أروى بارتباك: "آه مامته قالتلي. وهو كمان قالي." آيات هزت راسها.

وأروى قالت بتأكيد: "أتمنى الكلام اللي قولته يفضل بينا، لأن عامر لو عرف إني جيتلك ممكن يعاند معايا ويرفض يتجوزني رسمي." آيات هزت راسها بالإيجاب وقالت: "طبعًا متقلقيش." بيسان بصت لـ آيات بصدمة وقالت لها: "إللي إنتي بتعمليه ده غلط كبير يا آيات.. عامر مستحيل يعمل حاجة زي كده." آيات بصتلها وقالت: "هنعرف كل حاجة دلوقتي يا بيسان." سمعوا صوت الجرس. وآيات بصت لـ أروى وقالت: "دا أكيد عامر."

أروى انتفضت من مكانها بصدمة. وبيسان بصت لـ آيات بدهشة. وآيات قامت فتحت الباب وهي بتبص لـ عامر. وافتكرت إللي حصل أول لما دخلت أوضتها وهي بتبكي ومصدومة من اللي سمعته من أروى. *** **فلاش باك** دخلت أوضتها وهي مصدومة وبتبكي ومش قادرة تصدق إن عامر يعمل فيها كده. وكان جواها إحساس قوي إن عامر برئ. واتصلت عليه وهي بتبكي. وعامر اتصدم لما سمع صوتها الباكي. عامر: "آيات، انتي بتعيطي؟

ردت ببكاء: "عامر، انت تعرف دكتورة اسمها أروى كانت بتعالج مامتك؟ رد عامر بدهشة: "آه أعرفها. مالها؟ آيات ببكاء: "انت وهي حصل بينكم حاجة؟ عامر باستغراب: "حاجة زي إيه؟ مش فاهم؟ هو انتي فين يا آيات وشوفتي دكتورة أروى فين؟ ردت آيات ببكاء: "هي هنا عندي في الشقة وبتقولي إنها حامل منك." عامر بصدمة وذهول: "نعم!!!! إيه الكلام الفاضي ده؟ حامل مني إزاي؟ دي مجنونة ولا إيه؟

آيات، خليها عندك متتحركش وأنا جاي حالا. 10 دقايق وهكون عندك." آيات وهي بتبكي: "يعني انت وهي محصلش بينكم حاجة؟ عامر بصدمة: "استغفر الله العظيم.. آيات، انتي عايزة تجننيني انتي كمان!! أنا هيكون بيني وبينها إيه ده كمان! هي المصايب بتجري ورايا في كل مكان ومبقتش عارف ألاقيها منين ولا منين.. اقفلي، أنا جايلك حالا ومتخليهاش تمشي قبل ما أوصل." *** **باااااك**

عامر دخل. وآيات بتبص له وجسمها بيرتجف، وخايفة يكون كلام أروى حقيقي. وب تطمن قلبها إن عامر مستحيل يعمل كده. أروى جسمها اتجمد لما شافت عامر، وبقت واقفة خايفة ومرعوبة. وبيسان ابتسمت لما شافت عامر، وكانت متأكدة إنه هيكشف كذب البنت دي قدام آيات. آيات قربت من عامر ووقفت جنبه. وعامر بص لـ أروى واتكلم معاها بنبرة حادة: "إيه الكلام اللي قولتي لـ مراتي ده يا دكتورة؟ أنا وانتي كان في بينا علاقة إمتى؟

أروى وقفت مصدومة ومعرفتش ترد، وقالت بارتباك: "أنا.. أنا مقولتش حاجة.. هي بتكدب." بيسان بصتلها بصدمة وقالت: "انتي مجنونة ولا إيه.. أنا كنت موجودة وسمعت كل الكلام اللي قولتي." وبصت لـ عامر وقالت: "أنا كنت موجودة يا عامر، وهي بتقول لـ آيات إن انت وهي حصل بينكم علاقة وكنتوا سكرانين، وانت وعدتها بالجواز، والطفل اللي في بطنها ده يبقى ابنك." عامر بص لـ أروى بصدمة وقال: "وكمان كنت سكران؟ وأنا أصلًا مبشربش!! وحامل مني كمان!

اتكلمت أروى بصوت مهزوز: "دول كدابين.. أنا مقولتِش كده.. هما اللي قالوا كده عشان هي تسيبك."

وشارت على آيات وقالت: "هي دي السبب.. هي اللي كانت شاغلة تفكيرك طول الوقت، وبسببها مشوفتش أنا حبيتك قد إيه.. كل كلمة كانت مامتك بتحكيهالي عنك كانت بتخليني أتشد ليك أكتر.. كنت بتخيل لو أنا اللي في حياتك مكانها وكنت بتحبني كل الحب ده، أكيد مكنتش هزعلك زيها أبدًا.. هي متستحقش تكون في حياتك يا عامر ومتستهلش تعيش.. هي لازم تموت عشان انت تحبني أنا...

وفجأة فتحت شنطتها وخرجت منها سلاح وصوبت السلاح اتجاه آيات. عامر اتحرك بسرعة ووقف قدام آيات. وآيات كانت خايفة ومسكت فيه وهو بيحميها، وحس إن أروى مش طبيعية. بيسان شهقت بصدمة وهي مرعوبة من اللي بيحصل. وأروى كانت بتبص لـ عامر وهي رافعة السلاح وقالت بصوت مهزوز: "ابعد عنها يا عامر.. هي مش بتحبك صدقني." عامر هز

راسه وهو بيرد عليها بهدوء: "عندك حق يا أروى.. هي فعلًا مش بتحبني.. أنا اتأخرت لما عرفت الحقيقة دي.. بس انتي لو قتلتيها دلوقتي هتدخلي السجن وأنا هتحرم منك." أروى بصتله وهي بتبتسم وقالت: "بجد يا عامر.. يعني انت بتحبني أنا وخايف عليا؟ هز راسه وقال: "طبعًا يا حبيبتي." وبدأ يقرب منها عشان ياخد منها السلاح. وأروى بتبص له وبتقول بصوت مهزوز: "هنِمشي من هنا.. هتاخدني ونروح بعيد عنهم."

عامر: "طبعًا يا حبيبتي، بس هاتي ده من إيديكي عشان أنا خايف عليكي." وقرب منها أكتر ومد إيديه عشان ياخد منها السلاح. وهي سابت السلاح من إيديها وضمته وهي بتقول: "أنا بحبك أوي يا عامر." عامر أخد السلاح من إيديها ورماه بعيد. وكتف إيديها الاتنين وقال لـ بيسان: "بيسان، هاتي أي حبل بسرعة." ردت بيسان بخوف: "معندناش حبل! عامر بصراخ: "طب هاتي طرحة من بتوع آيات."

بيسان جريت على أوضة آيات. وأروى حسّت إن عامر كان بيكدب عليها ومش عارفة تخلص إيديها منه. آيات وقفت تتابع كل اللي بيحصل بصدمة وهي بتبكي. وبيسان رجعت لـ عامر بسرعة وفي إيديها طرح من بتوع آيات. وعامر ربط إيد أروى وهي بتحاول تخلص نفسها منه. وبيسان ساعدته وربطوها في الكرسي. وفجأة أروى غابت عن الوعي. آيات كانت بتتابع كل اللي بيحصل وهي لسه خايفة وبتتبكي ومش قادرة تتحرك من مكانها.

عامر ساب أروى بعد ما ربطها في الكرسي. وأخد السلاح بتاعها من على الأرض. واتصل على الدكتور اللي كان متابع حالة والدته في المستشفى في لندن. وحكاله اللي حصل من أروى. والدكتور قاله إن أروى كانت بتتعالج من فترة كبيرة بسبب إن حبيبها سابها أول لما عرف إنها حامل منه. وبعتلها رجالة اغتصبوها وضربوها لحد ما حصل إجهاض وهي في الشهر الخامس من الحمل. وكانت بتتعالج فترة كبيرة. ولما اتحسنت وبقت كويسة رجعت لشغلها تاني. وقاله إن ممكن لما والدته حكتلها اللي حصل معاكم، حست إن فيه تشابه في الأحداث اللي حصلت معاها. لكن الفرق إن انت قدرت تحمي مراتك وتنقذها. ويمكن للسبب ده هي اتعلقت بيك ورجعت حالتها تسوء تاني.

عامر اتصدم من كل اللي عرفه. والدكتور قاله إنه هيبعتله دكتور من مستشفى في القاهرة دلوقتي ياخدوا أروى، لأنها لازم تتحجز في المستشفى عشان متأذيش حد. عامر بص على آيات اللي كانت واقفة بتبكي وهي بتبص لـ أروى وخايفة. قرب منها وضمها لحضنه وهو بيطمنها: "متخافيش يا حبيبتي.. في دكتور هيجي ياخدها دلوقتي." آيات ببكاء: "أنا مش فاهمة هي ليه عملت كده!

عامر حكالها اللي الدكتور قاله عن حالة أروى. وبعد وقت قليل وصل الدكتور ومعاه عربية إسعاف. واخدوا أروى وهي غايبة عن الوعي. وهما بياخدوها اكتشفوا إنها مش حامل، وكانت لابسة بطانة على بطنها عشان تظهر إنها حامل. خرجوا من الشقة. وآيات وبيسان لسه مصدومين. وعامر اتنهد بتعب وقال: "أنا كنت ناقص مريضة نفسية تحبني كمان.. والمفروض إن هي اللي عالجت أمي.. ربنا يستر بقى."

بيسان ضحكت وقالت: "والله أنا مش عارفة انتوا المصايب بتجري وراكم ولا إيه." عامر بص لـ آيات وبيسان. اتكلمت وهي عايزة تسيبهم لوحدهم: "أنا هروح أعمل حاجة نشربها بعد الرعب اللي عشناه ده." وراحت بيسان على المطبخ. وعامر قرب من آيات وضم وشها بـ إيديه واتكلم معاها بحنان: "حبيبتي، متخافيش خلاص الموضوع انتهى." آيات بصتله وقالت بخوف: "هو إحنا ليه بيحصل معانا كده يا عامر!! ليه كل شوية يظهر حد عايز يفرقنا!

اتكلم عامر معاها بحنان: "محدش هيقدر يفرقنا طول ما إحنا بنثق في بعض يا آيات وبنحكي لبعض كل حاجة بصراحة.. يعني لو مكنتيش وثقتي فيا المرادي وصدقتي كلامها، شوفي كنا ممكن نوصل لفين." آيات

هزت راسها بالإيجاب وقالت: "صح يا عامر.. أنا للحظة كنت هصدقها من غيرتي عليك، بس قررت أثق فيك المرادي والحمد لله أنت مخيبتش ثقتي فيك. وصدقيني أنا ندمانة على كل مرة مصدقتش فيها إنك بتعمل كل ده عشاني وكنت بتحاول تحميني من ناس مفيش في قلوبهم رحمة. وأنا مكنتش مقدرة خوفك عليا وسمحتلهم يفرقونا عن بعض." عامر ضمها لحضنه بحنان وقال: "مفيش حد هيقدر يفرقنا تاني طول ما إنتي بتثقي فيا وبتصدقيني."

آيات ابتسمت جوه حضنه وهي حاسة بالأمان. وعامر ضمها بحنان وهو بيطمنها إنه مش هيسمح لأي حد يفرقهم تاني. اتكلم وهي في حضنه: "عايزين نفرش الفيلا بسرعة بقى عشان نروح بيتنا وتبقي معايا على طول." آيات بعدت عن حضنه وقالت بتوتر: "وبي سان يا عامر، معقول هنسيبها تعيش هنا لوحدها."

رد عامر: "متقلقيش على بيسان. أنا اتكلمت مع أمجد في موضوعهم. وهو قالي إنه كلم خاله عشان يقنع والدته. وكمان هاجر وشريف هيرجعوا من شهر العسل بتاعهم عشان يتكلموا معاها ويقنعوها. وفي أقرب وقت هييجوا يخطبوا بيسان لـ أمجد وهيتجوزوا على طول." آيات ابتسمت بسعادة. وعامر قالها بتأكيد: "متقلقيش يا حبيبتي، كل إللي جاي هيكون أحسن إن شاء الله." بعد مرور أسبوع.

هاجر وشريف رجعوا وقعدوا مع مامت أمجد. وقدروا يقنعوها إنها توافق على بيسان. وفهمت إنها مش هتقدر تمنع ابنها عن حبه لـ بيسان. وخافت تخسر ابنها وقررت توافق. وراحت معاه وهو بيتقدم لخطبة بيسان. واتفقوا إن الفرح هيكون بعد شهر من الخطوبة. وامجد اختار فيلا قريبة من فيلا عامر وفيلا شريف عشان يكونوا قريبين من بعض. وبدأت بيسان تجهز في الفيلا بتاعها مع الفيلا بتاع آيات. وكانوا البنات فرحانين لأنهم هيكونوا جيران ومع بعض على طول.

بعد أسبوع. آيات وبيسان كانوا في المول بيشتروا لبس جديد مع بعض عشان حياتهم الجديدة. بيسان شافت محل وعجبها اللبس اللي فيه ودخلت. وآيات معاها وكانت واقفة بتتفرج. وفجأة لقوا اللي ظهر قدامهم وقال بصوته الناعم: "أهلاً بيكم في ميرو وكوكو ستور." آيات بصت له بصدمة. وكوكو صرخ أول لما شافها: "آيااااات.. مش معقووووول... تعالي يا ميرو شوفي مين هناااا." ميرنا جت بسرعة وصرخت أول لما

شافت آيات وضمتها وقالت: "آياااات.. إيه المفاجأة الحلوة دي." آيات كانت واقفة مصدومة. وبصت حواليها. ولقت مكتوب في كل ركن من المحل "ميرو وكوكو ستور". وحاطين صورة لـ ميرنا وكوكو وهما واقفين جنب بعض. وكاتبين اسم المحل تحتهم. بيسان همست لـ آيات وهي بتضحك: "هما تيمون وبومبا أصحاب المحل ده ولا إيه؟ ردت آيات وهي بتبص لهم بصدمة: "شكلهم كده!! وبصت لـ ميرنا وقالت: "انتوا أصحاب المحل؟

رد كوكو: "أيوا. إيه رأيك في ذوقنا.. المحل بتاعنا مش بيدخله غير الأغنياء وبس." واتكلمت ميرنا: "كل أصحابنا بياخدوا لبسهم من عندنا، عشان كوكو بيفضل يقولهم إن لبسهم وحش وشكله فقير. وهما بيشتروا من عندنا عشان يبقى شكلهم أغنياء." اتكلم كوكو مع آيات: "آيات، هو انتي لسه فقيرة بعد ما عامر سابك؟ بيسان بصت له بصدمة. وآيات ردت وهي بتضحك لأنها عارفة كوكو ومتعودة على كلامه وقالت: "لا يا كوكو، أنا وعامر رجعنا لبعض تاني."

كوكو عيونه لمعت وقال: "يبقى تشتري كل اللبس اللي في المحل بتاعنا. وأنا هروح آخد الفلوس من عامر، هو عنده فلوس كتير." ردت آيات: "والله كان نفسي أخدمك، بس انتوا عارفين أنا محجبة واللبس ده مش مناسب ليا. بس عجب بيسان وهي هتشتري." بيسان بصت لـ آيات بصدمة. وآيات ضحكت. وكوكو سألها: "وبي سان فقيرة ولا غنية؟ ردت آيات وهي بتضحك: "غنية طبعًا وهتتجوز أمجد شريك عامر.. وامجد عنده فلوس كتير هو كمان." كوكو بص لـ

بيسان وقالها: "انتي لسه واقفة ليه؟ تعالي اقعدي هنا وأنا هجبلك كل اللبس اللي في المحل." بيسان بصت لـ آيات بصدمة. وآيات كانت بتضحك. وكوكو قالها: "اختاري اللبس اللي يعجبك، وأنا هروح الشركة عند عامر عشان يعرف إننا بقينا رجال أعمال زي بعض." آيات كتمت ضحكتها وهي بتقول: "رجال وزي بعض انت وعامر!! تمام، روح له وعامر هيفرح أوي إنكم بقيتو رجال زي بعض! كوكو بص لـ

ميرنا: "إيه رأيك يا ميرو تيجي معايا ونعرفه كمان إننا اتجوزنا عشان ناخد منه حلاوة جوازنا." آيات بصتلهم بصدمة: "انتوا اتجوزتوا بجد!! إزاي!! ميرنا ردت على آيات: "اتچوزنا عشان نبقى شركا في كل حاجة.. صح يا كوكي." رد عليها كوكو: "صح يا ميرو."

بيسان كانت مذهولة من كل اللي بيحصل وحاسة إنها بتتفرج على فيلم كارتون. وميرنا وكوكو مسبوهاش تخرج من المحل غير لما اشترت منهم لبس كتير جدًا. وخرجت من المحل بتاعهم وهي ندمانة على اللحظة اللي فكرت تدخل فيها المحل بتاعهم. وآيات كانت ماشية معاها وهي بتضحك وبتتخيل شكل عامر لما ميرنا وكوكو يروحوا الشركة عنده ويقولوا له إنهم اتجوزوا.