رواية ملاك الجاسر الفصل الثالث عشر 13 - بقلم جنى محمد

ملاك بصدمة وهي ترى أمامها: جاسر!!! جاسر كان واقف يتنفس بغضب من سرعة سياقته وهو يبصلها ومبتسم ليها بفرحة إنه شافها بعد الوقت ده كله. مكنش مصدق عينه، عينه كانت بتلمع بالدموع وهو شايفها. ملاك مصدقتش نفسها ودموعها نزلت بفرحة. مقولتش أمنيتها والدعوة اللي دعتها من ثواني تكون اتحققت وهي شايفه قدامها.

ملاك طلعت من البلكونة وهي بتجري من الفرحة وراحت نزلت جري على تحت. وأول ما طلعت من باب بيتها جاسر جري عليها بفرحة وملاك كمان جريت بفرحة ودموع. وهما الاتنين اتقابلوا في النص. جاسر مصدقش إنها قدامه. مسك إيدها بسرعة وقالها. جاسر بدموع وفرحة: وحشتيني أوي.. وحشتيني يا ملاك. ملاك وهي بتعيط بفرحة: وأنت كمان.. أنا مش مصدقة إنك قدامي.. أنا آسفة يا جاسر.. آسفة بجد.

جاسر بمقاطعة وفرحة: أنا مش عاوزك تتأسفي.. أنا اللي آسف مش أنتِ. أهم حاجة إني شوفتك مش فارقلي أي حاجة تانية. ملاك: مش محتاج أنت كمان تتأسف.. أنا عرفت الحقيقة.. وعرفت إنك معملتش حاجة.. وإني ظلمتك.. أنا آسفة والله.. متزعلش مني. جاسر: أنا عمري ما أزعلك منك.. وبلاش الكلام اللي هيخليني أحضنك ده.. أنا ماسك نفسي بالعافية أصلاً. ملاك ضحكت من وسط دموعها.

جاسر وهو سرحان في ضحكتها: أهو أنا مستني اليوم ده.. اللي أشوف فيه ضحكتك من تاني. ملاك ضربته في كتفه بخفة وقالت بابتسامة: على فكرة شكلك أحلى بالدقن. جاسر بضحك وابتسامة: مش هحلقها طول حياتي. ملاك ضحكت وبصتله بحب. جاسر: آه صح.. إنتي إزاي عرفتي الحقيقة؟ ملاك: بصراحة كده من لينا.. هي جتلي هنا وقالتلي كل حاجة وإنها هي اللي عملت كده.. شكلها اتغيرت للأحسن. جاسر بغضب خفيف: هي ليها عين تيجي لك.. متبعد عننا بقى.. يا رب تولع.

ملاك بخبث: بس على فكرة هي قالتلي كمان لما هي جت وباباها طلب منك تتجوزها وانت رفضت وقلت إنك بتحبني أنا وعمرك ما هتحب بعدي. جاسر ملامح وشه اتغيرت وقال بخبث زيها هزار: مم بس هي متولعش أوي يعني ممكن تتحمر عادي. ملاك ضحكت ضحكة عالية وبعد كده قالت باستغراب: هو أنت كمان عرفت منين.. هي لينا راحت لك هي كمان؟

جاسر: لا بس صاحبتها كانت عارفة الحوار وضميرها شكله حس بحالتي ف جت عشان تقولي الحقيقة.. لسه كانت بتحكيلي من ساعة ونص قبل ما أجيلك.. وأول ما قالتلي الحقيقة أنا مستنتش لحظة ولاقيت نفسي بركب عربيتي وبأجي على هنا.. عشان بس أشوفك يا ملاكي. ملاك ضحكت بخجل وفضلت تهرب بعينيها منه وانتبهت له تاني لما قال. جاسر بضحك: أنا عاوز أقولك إني جريت العيلة كلها ورايا.

جاسر مكملش جملته ولاقى عربية عمر وقفت قدام بيت ملاك وعربية عز بعدت عليها وطبقت جنب عربية عمر. عمر نزل بسرعة وهو وجني وجريوا على ملاك وجاسر. وأول ما جني شافت ملاك جريت عليها وحضنتها جامد وملاك كمان حضنتها. عمر بخبث وضحك وهو بيقول لجاسر: آه يا نمسس.. بقي مجرينا وراك وفي الآخر تيجي عند ملاك.. مش سهل أنت برضه يا صاحبي. جاسر بضحك: ما أنا أعمل إيه أنت اللي عبيط وجريت ورايا. عمر بصدمة هزار: عبيط؟!!

.. أنت أخدت عليا أوي يا أخويا. جاسر ضحك وأخد عمر بالحضن وعمر كمان حضنه وضحك. جاسر: وحشني ياض. عمر: وأنت كمان يا صاحبي.. بقي دلوقتي وحشتك عشان شفت ملاك بس إنما قبل كده مش عاوز أشوف حد. (قال آخر جملة وهو بيقلد جاسر) جاسر بضحك: على فكرة أنا مبتكلمش كده. فجأة لاقوا عز وسليم ونرمين بينزلوا من العربية وفي نفس اللحظة كانت نبيلة بتنزل من البيت بخوف لما ملاقيتش ملاك في البلكونة. نرمين وعز جريوا على ملاك وجاسر وعز قال.

عز: في إيه يا ولاد.. وأنت يا جاسر جريت ليه ولاقيناك جيت على هنا.. أنا مش فاهم حاجة. نبيلة وهي بتجري عليهم: في إيه إيه اللي حصل.. في إيه يا عز. عز: أنا كمان معرفش. جاسر راح وقف جنب ملاك بابتسامة ومسك إيدها عشان يطمنها وقال بثقة وحب نبع من جواه: اللي حصل يا بابا إني وملاك فهمنا غلطنا.. إحنا الاتنين كنا غلطانين. (وبعد كده بص لملاك بحب وقال بابتسامة)

أنا وملاك بنحب بعض.. ومستحيل نبعد عن بعض.. أنتوا جربتوا تعملوا كده.. افتكرتوا إننا هنرتاح.. بس الحقيقة إننا عمرنا ما هنرتاح إلا لو مع بعض. ملاك كان قلبها طاير كانت فرحانة أوي.. عينيها لمعت بالدموع وهي بصاله بحب. جني كانت واقفة بتبص لهم بابتسامة وحب. وعمر كان واقف جنبها ولاحظ رأكشنها وضحك بصمت. وهي لاحظت ضحكته راحت ضربته في كتفه بخفة وغيظ. بعد كده جاسر كمل كلامه وقال وهو بيبص لهم كلهم وقال بثقة

وهو لسه ماسك إيد ملاك: عشان كده أنا وملاك هنرجع لبعض.. لأني بحبها بجد.. وهي بتحبني.. وعلى فكرة يا بابا أنت وماما.. أنا معملتش حاجة.. والحقيقة بانت.. واللي عمل كده هي لينا منها لله.. وراحت قالت لملاك اللي اللي هي عملته.. وأنا كمان عرفت من صاحبتها.. ف إحنا عمرنا ما هنقدر نبعد عن بعض.

كلهم مقدروش يقولوا كلمة لأن باين أوي إنهم بيحبوا بعض. نبيلة ابتسمت لملاك وجاسر كأنها يعني موافقة على كلام جاسر ومعندهاش مانع يرجعوا لبعض. وكذلك عملت نرمين. أما عز حب يلطف الموضوع وقال بهزار وضحك وابتسامة: أنا قولت من زمان إن جاسر لـ ملاك وملاك لـ جاسر محدش صدقني.

كلهم ضحكوا من قلبهم على اللي قاله عز. وجاسر من وسط ما هو بيضحك شدد على كف ملاك أكتر بمعنى خليكي جمبي.. لأن ملاك كان هتروح تقف مع جني بس جاسر كان عاوزها جنبه. وملاك لاحظت ففضلت جنبه. سليم كان باصص عليهم من بعيد بابتسامة ورضا. وسط ما هما بيتكلموا ويهزروا كلهم.. ملاك لمحت سليم واقف من بعيد. ملاك بفرحة وابتسامة: جدو سليم.

ملاك جريت عليه بفرحة وابتسامة وسليم ضمها بحب وفرحة.. لأنه بيحب ملاك أوي وبذات هي من ريحة أدهم ابنه أبو ملاك. جاسر لاحظ اللي ملاك جريت عليه ولاقى سليم.. وهو كمان راح ناحيتهم وحضن سليم بابتسامة وسليم كمان.. وبقى سليم حاضن الاتنين.

وبعد كده كلهم راحوا ناحية ملاك وجاسر وسليم وملاك فضلت واقفة جنب سليم وجاسر بفرحة مفرطة عكس حزن الأيام اللي فاتت وكذالك جاسر. وأخيراً كلهم اتجمعوا تاني وفضلوا واقفين يهزروا مع بعض ويضحكوا كلهم وكأن الأيام اللي فاتت لم تكن. «بعد مرور شهر» (تسريع الأحداث) ملاك: متأكدة يا جني إني شكلي حلو؟ جني: ده عاشر مرة تسأليني فيها السؤال ده يا ملاك وأقولك والله زي القمر. ملاك بقلق وتوتر

وهي بتعدل من فستانها: يعني كل حاجة مظبوطة.. أنا خايفة أوي لا تطلع حاجة مش مظبوطة.. طب الميكب والشعر.. التاج! .. التاج معدول ولا لا والطرحة متثبتة كويس طب. جني وهي بتعدل الفستان لملاك: والله كل حاجة مظبوطة وكل حاجة حلوة أوي وشكلك قمر أوي والله وكل حاجة تحفة. نبيلة وهي واقفة جنب ملاك بابتسامة وفرحة: ما شاء الله يا ملاك شكلك قمر أوي ربنا يسعدكم يا روح قلبي. ملاك وهي بتدير لمبيلة بابتسامة وفرحة: بجد يا ماما؟!

نبيلة وهي بتحضنها: بجد يا روح ماما. ملاك بفرحة: ربنا يخليكي ليا يا أحلى أم في الدنيا. نبيلة بدموع فرحة: ويخليكي ليا يا أحلى ملاك في دنيتي. جني كانت واقفة بتبص عليهم بابتسامة حب وفرحة لصاحبتها. كانوا واقفين في أوضة تجهيز العروسة لفرح ملاك وجاسر. (معلش يا جماعة أنا معرفش المكان اللي بيجهزوا فيه العروسة ده اسمه إيه بس ما علينا 😂👍🏻)

جني كان لابسة فستان سواريه أزرق كت ومفتوح من الرجل شوية من تحت وكانت عاملة شعرها كيرلي وكانت لابسة شنطة زرقاء وكانت لابسة هيلز زرقاء (جزمة بكعب) .. وكانت لابسة عقد رقيق خالص وسيمبل لونه أبيض.. كان شكلها زي الأميرات. وملاك كانت لابسة فستان فرحها الأبيض اللي كان وهم وجماله ميتوصفش ولا جمالها يتوصف.. كانت جميلة ومميزة في كل حاجة في شعرها وفي الميكب والتاج وكل حاجة. ورقتها وفرحتها.. كانت شبه الملكيات حرفياً.

ونبيلة كانت لابسة فستان نبيتي ستان مقفول وهيلز بكعب لونها نبيتي وشنطة سواريه سودا وميكب خفيف خالص. ومازن ومروان كانوا لابسين بدل لونها أزرق. مازن ومروان كانوا قاعدين على الكنبة اللي في أوضة تجهيز ملاك ومستنينها تخلص. مازن: قوم يا مروان تعالي نروح عند جاسر نشوف خلص ولا لسه. مروان: يلا. وكانوا لسه هيقوموا لاقوا ملاك بتجري ناحيتهم بتوتر ولهفة وهي بتقول. ملاك بتوتر: طب لو جاسر خلص قولوله ميجيش دلوقتي. مازن ومروان: ماشي.

وأول ما طلعوا من الباب لاقوا نرمين بتدخل عليهم بابتسامة وفرحة. نرمين وهي بتحضن ملاك بفرحة: ما شاء الله قمر يا ملاك.. ربنا يتمم ليكوا على خير يا روح. نرمين كانت لابسة فستان بني ستان سواريه وهيلز بكعب سواريه لونها أبيض وكانت في إيدها شنطة سواريه أبيض وميكب سيمبل. ملاك: الله يبارك فيكي يا طنط نرمين. بعد كده جني قربت من ملاك عشان تعدل لها الفستان والتاج. "عند جاسر"

جاسر كان في أوضة بيجهز بفرحة وعمل شعره ولبس البدلة لونها أبيض وبيبيونة لونها أسود وكان معاه صحابه وكانوا مشغلين أغاني وبيرقصوا ويغنوا بفرحة وكان من وسط صحابه دول عمر اللي كانت الفرحة عنوانه والابتسامة بتفرقش وشه على فرحة صحبه. عمر كان لابس بدلة رمادي وقميص أسود وساعة سودا ومصفف شعره. فجأة وهما قاعدين فرحانين وبيغنوا لاقى جاسر باب الأوضة بيتفتح وبيدخل منه مازن ومروان جري على جاسر. جاسر: إيه فيه إيه ملاك خلصت؟

مروان: آه بس هي بتقولك لو خلصت متروحلهش دلوقتي. جاسر باستغراب: يعني إيه.. الفرح قرب يبتدي أصلاً. مازن: معرفش هي شكلها متوترة أصلاً ومش عاوزاك تشوفها دلوقتي باين. جاسر بفهم وهو بيبص لعمر: متوترة. عمر بضحك: حركات بنات بقى. جاسر وعمر ضحكوا وبعد كده جاسر طلع تليفونه يكلم ملاك.. فضل يرن عليها كتير لحد ما في الآخر رد. ملاك بتردد وتوتر: آآآلو يا جاسر. جاسر: الو يا ملاكي في إيه مال صوتك أنتِ مش مبسوطة؟

ملاك بتسرع وتوضيح: لا لا مبسوطة أوي بس أنا متوترة وحاسة في حاجة ناقصة أو شكلي مش مظبوط. جاسر كان لسه هيرد لاقى صوت جني جاي من عند ملاك وبتقول. جني: يا بنتي والله شكلك زي القمر ومنظم جداً ومفيش حاجة ناقصة. جاسر وهو بيطمنها: ملاك متتوتريش ولا تحطي حاجة في دماغك أنتِ من غير حاجة قمر أصلاً وكل حاجة دلوقتي منظمة متخافيش كل حاجة هتمشي كويس.. يلا يا حبيبتي عشان الفرح هيبدأ كمان شوية.. لو خلصتي هاجيلك دلوقتي. ملاك اتطمنت

شوية وقالت بابتسامة وحب: آه خلصت. جاسر بابتسامة حب: طيب أنا جايلك دلوقتي.. ملاك. ملاك بابتسامة: نعم. جاسر بابتسامة: بحبك يا ملاكي. ملاك ضربات قلبها زادت وبصت حواليها بخجل وقالت بصوت واطي خالص هو بس اللي سمعه وقالت بابتسامة: بحبك. وراحت قفلت السكة بسرعة وضربات قلبها في تسارع وخجل ملي وشها وجني لاحظت ده وبصتلها بابتسامة.

أما عن جاسر ابتسم بحب على خجلها وفجأة لاقى حد بيخبط على الباب ودخل ولاقى عز بيدخل عليه بابتسامة وفرحة. جاسر بابتسامة: بابا. جاسر راح ناحيته وحضنه وعز هو كمان ضمه لي بحب وابتسامة. عز: كبرت يا جاسر.. وجه اليوم اللي أشوفك فيه عريس. جاسر بابتسامة وهزار وهو لسه ضامم أبوه: على فكرة يا بابا أنت شفتني عريس قبل كده. عز وعمر وصحاب جاسر ضحكوا.. وراح عز قال بابتسامة وهو بيبص لابنه بحب.

عز: صحيح شفتك قبل كده عريس بس كنت أنت مش عاوز ده ومكنتش مبسوط.. لاكن دلوقتي اللي يشوف فرحتك ميقولش إني كنت بجلدك في البيت. جاسر ضحك هو وعمر بصحابهم بشدة وراح جاسر حضن أبوه تاني وعز قاله وهو ضامه. عز: بس فرحتك دي عندي بالدنيا. جاسر: ربنا يخليك ليا يا بابا. عز: ويخليك ليا يا حبيبي. عمر بهزار: مخلاص يا جماعة أنا اللي هعيط كده.

كلهم ضحكوا وجاسر طلع من حضن أبوه.. وعز كان بيمسح دموع الفرحة من على عينه بإيده.. وعز كان لابس بدل زرقاء وكرافته سودا. وفجأة سليم دخل عليهم وبارك لجاسر وسلم عليه وحضنوه وبعد كده قال. سليم: يلا يا جماعة الفرح قرب يبدأ يلا روح يا جاسر هات ملاك. عمر وقف قدام جاسر بسرعة وعدله البدلة وقاله وهو بيعدلها. عمر بابتسامة وهو بيعدل البدلة لجاسر: مبروك يا صاحبي.. مبروك يا أخويا. جاسر خده بالحضن وعمر كمان. جاسر وهو بيبص

لعمر وبيقوله بابتسامة: أنا كان نفسي يكون لي أخ بس دلوقتي فهمت إن ربنا هداني بيك وأداني أحسن أخ وصاحب في الدنيا. عمر بهزار وهو بيِدمع: يا عم بلاش الكلام اللي يخلي عيني تدمع ده بقى. جاسر ضحك وابتسم له وبعد كده عز قال بابتسامة. عز: يلا عشان ملاك مستنيانا.

كلهم طلعوا بره الأوضة وتوجهوا ناحية أوضة ملاك.. ملاك أول ما سمعت صوتهم بره وإنهم جايين عندها اتوترة أكتر وقامت من على الكرسي بسرعة فضلت تعدل التاج وشعرها والطرحة والفستان وجني كانت بتطمنها إن كل حاجة مظبوطة لحد ما ملاك لقت جاسر على الباب وهو ماسك بوكيه الورد. ملاك وهي بتكلم جني: آآآآآآآه والنبي خليهم يستنوا شوية. جني: مينفعش يا ملاك خلاص الفرح هيبدأ يلا. نبيلة: يلا يا ملاك بطلي توتر خلاص.

ملاك: طب والنبي خليهم يقفوا بره في الجنينة وأنا هطلع. جاسر كان لسه هيخش بس لاقى جني بتجري وبتقفل الباب بعد ما طلعت. جاسر باستغراب: إيه ده فيه إيه يا جني.. ما تفتحي الباب. جني: لا ملاك بتقول خليكم بره وهي هتطلع. جاسر: طب ليه. جني: خلاص بقى يا جاسر هي متوترة أي بنت في فرحها كده بتكون موسوسة على شكلها.. اقف أنت بس بعيد شوية وأنا هطلها. جاسر: طيب ماشي ادخلي بس هاتيها وأنا هقف بعيد اهو. جني: ماشي.

جني دخلت جوا تاني وقفت الباب وراها. جاسر وهو بيمشي هو وصحابه وأبوه وسليم ومروان ومازن بعيد عن الأوضة اللي ملاك فيها وجاسر بيقف بظهره يستنى ملاك بفارغ الصبر وكلهم واقفين حواليه من بعيد. أما عند ملاك كانت فرحانة أوي وأخدت نفس عميق قبل ما تطلع.

وأخيراً فتحت الباب لاقت جاسر واقف بعيد بظهره وكلهم واقفين حواليه مبتسمين ليها.. ملاك طلعت وهي ضربات قلبها بتدق بفرحة ونرمين ونبيلة وجني وراها والمصور واقف جنب جاسر عشان يصور رأكشنها. ملاك قربت شوية منهم ووقفت ورا جاسر بالظبط وهي قلبها بيدق بفرحة وخجل والابتسامة مش مفارقة وشها.

وفجأة المصور قال لجاسر يلف وجاسر لف فعلاً بابتسامة وأول ما شاف ملاك اتفاجأ بجمالها وشكلها المنظم ورقتها وضحكتها وكل حاجة فيها خطفته.. بقى واقف منبهر على جمالها والمصور أخد الصورة على غفلة برأكشن جاسر. ملاك كانت تايهة في عينه بابتسامة وفجأة جاسر اتكلم بإنبهار واضح على وشه. جاسر بإنبهار وابتسامة: أنتِ بتهزري يا ملاك. ملاك وتعابير وشها اتغيرت وبقت متوترة: إيه شكلي وحش.

جاسر بتسرع وابتسامة: زي القمر.. يمكن أحلى منه كمان.. أنا مستغرب إنك قولتي إنك متوترة وخايفة من شكلك.. أنتِ أحلى واحدة شوفتها. ملاك رجعت ابتسمت بخجل وهي بتحاول تهرب من عينه.. وراحت نبيلة زغرطت بفرح وابتسامة وكلهم سقفوا ليهم وجني كانت واقفة بتصور بابتسامة. جني لقت عمر بيقف جنبها وهمس ليها بابتسامة. عمر: شكلك زي القمر. جني بصتله بابتسامة وتوتر وقالت بابتسامة وخجل: ميرسي يا عمر وأنت كمان شكلك حلو.

فجأة هما الاتنين انتبهوا إن ملاك وجاسر بيمشوا رايحين يعملوا السيشن. جني وعمر راحوا وقوا جنب صحابهم. ملاك وجاسر راحوا المكان اللي هيعملوا فيه السيشن قبل الفرح وعمر وجني راحوا معاهم.. أما نبيلة ومازن ومروان وعز ونرمين وسليم راحوا يقعدوا مع المعازيم. ملاك وجاسر خلصوا السيشن وكان تحفة وعجبهم جداً وعجب صحابهم وبعد كده توجهوا على الفرح. "في الفرح"

كان الفرح مليان بهجة وسعادة وفرحة والأغاني شغالة وكان مليان بالناس المهمة وقرايب جاسر وملاك وصحابهم.. وكان الفرح فيه ناس كتير أوي.. وكلهم كانوا مستنيين ملاك وجاسر ييجوا.. وفجأة لاقوا الأغاني كلها اتطفت واشتغلت أغنية "الباشا جالكو"😂🤍.. ولاقوا باب القاعة بيتفتح على آخره وبيخرج منه جاسر وملاك وهما ماسكين إيد بعض وبيتنططوا بفرحة وهما بيغنوا ولابسين نظارات شمس وكان جنب جاسر عمر صاحبه بيغني هو كمان وبيتنطط.. وكانت جنب ملاك جني واقفة جنبها بتتنطط بفرحة وبتغني مع الأغنية بحماس.. وباقي صحابهم كانوا وراهم بيغنوا برضو معاهم.

واتجمعوا كلهم على الاستيدج في النص.. ملاك وجاسر في النص وصحابهم وأهلهم حواليهم. ملاك وجاسر بفرحة وصوت عالي وهما بيتنططوا وهما ماسكين إيد بعض: الباشا جالكوو ايديكو فوق. كلهم رفعوا إيديهم بحماس وفرحة وهما بيرقصوا معاهم. وبعد كده جاسر فضل يرقص مع ملاك شوية بفرحة وملاك كمان.. وبعد كده دخل معاهم عيلتهم وصحابهم ورقصوا معاهم.. وبعد كده جه وقت كتب الكتاب.

المأذون كان قاعد في النص وملاك كانت قاعدة جنب سليم على الناحية اليمين من المأذون.. وجاسر كان قاعد جنب عز على الناحية الشمال جنب المأذون. ملاك كانت بتبص لجاسر بابتسامة وهي بتسمع كلام المأذون وجاسر بيردد وراه وبيصلها بابتسامة.. ونختصر كلمات كتير بجملة واحدة بس شهيرة. «بارك الله لكمَ وبارك عليكمَ وجمع بينكم في خير».

جاسر مقدرش يستحمل أكتر من كده من فرحته وقام بسرعة حضن ملاك وملاك هي كمان تشبثت فيه وفضلت ضماه ليها.. وكل الناس حواليهم بتسقف وبتزغرط.. وملاك عينيها دمعت من الفرحة لما سمعت جاسر بيهمس لها. جاسر بهمس وابتسامة: بحبك يا ملاكي. ملاك دفنت وشها في بخجل وهي بتهرب من عيون الناس اللي حواليها. وبعد كده جني شدت ملاك وحضنتها بحب وبركت لها.. وكذالك عمر عمل كده مع جاسر.

وبعد كده سليم حضن ملاك وجاسر هما الاتنين في نفس الوقت.. وبعد سليم كان عز وبعد عز نبيلة وبعد نبيلة نرمين.. وبقى كل اللي في الفرح فرحانين ليهم.. وملك فضلت متمسكة بإيد جاسر بفرحة مفرطة. وفجأة وهما واقفين لاقوا لينا جاية ناحيتهم بابتسامة وكانت لابسة فستان بيج سواريه كت وحاطة ميكب سيمبل. جاسر بص لها بغضب وقال بصوت سمعته ملاك اللي واقفة جنبه. جاسر: إيه اللي جابها هنا دي.

ملاك: اهدي يا جاسر.. أنا اللي عزمتها.. خلاص هي عرفت غلطها. جاسر بص لملاك شوية وبعد كده بص لها بابتسامة وقال: ماشي عشان خاطرك بس. ومكملش الجملة ولاقى لينا جت ناحيتهم وقالت: ألف مبروك.. ربنا يتمم ليكوا على خير. ملاك بابتسامة ولطف: الله يبارك فيكي يا لينا. جاسر بحدة وهو ماسك إيد ملاك: الله يبارك فيكي. فجأة عمر قال بدهشة وسخرية: إيه ده لينا هانم. لينا: إزيك يا عمر. عمر بحدة: الحمد لله. جني وهي

بتهمس لملاك بصوت مسموع: هي دي بقى لينا. ملاك بهمس: آه هي. لينا وهي بتشاور على جني: هي مين دي. جني كانت لسه هترد بس كلهم اتصدموا من رد عمر المفاجئ. عمر بحدة وغضب: ملكيش دعوة. لينا بتوتر وإحراج: عن إذنكم هروح أسلم على أونكل عز وطنط نرمين. ومشيت من قدامهم بسرعة وهي بتتوجه ناحية عز ونرمين.

بعد كده جه البوفيه وجاسر وملاك كانوا بيتصوروا مع صحابهم وياكلوا.. وبعد البوفيه اشتغلت تاني الأغاني وفضلوا يرقصوا مع صحابهم وأهلهم ولينا كانت واقفة من بعيد بتسقف بابتسامة. وبعد كده جه الرقص السلو وكل كابل كانوا مع بعض وملاك وجاسر في النص.. وجني كانت واقفة بتصورهم من بعيد بابتسامة وعمر كان واقف جنبها بيصور هو كمان.

وأول ما الأغنية خلصت جاسر شال ملاك ولف بيها وكل الناس سقفوا ليهم وزغاريط في كل حتة وملاك كانت دافنة وشها في جاسر.. وجاسر كان حضنها بقوة كأنه عاوز يدخلها جوه من العالم وعيون الناس حواليهم وبعد كده أخيراً جاسر نزلها بعد ما لف بيها.. ملاك كان قلبها طاير من الفرحة.. كانت سامعة تسقيف الناس ليهم وشايفاهم.. كأن ربنا عودها على زعلها الأيام اللي فاتت.. دمعة نزلت من عينيها فجأة بفرحة راح جاسر مد إيده بابتسامة مسحلها دموعها وهي تشبثت في إيده وهي بتبصله بفرحة وحب.. وبعد كده بدأ التسقيف ينتهي بالتدريج وكانت نبيلة ونرمين واقفين من بعيد عنيهم بدمع بفرحة.

وفجأة الناس كلها تتفاجئ بعمر اللي وقف قدام جني بالظبط ونزل على ركبته بابتسامة وطلع خاتم من ورا ظهره وقدمه قدام جني وقال بابتسامة وحب. عمر بابتسامة وحب: تتجوزيني.

ملاك صرخت بفرحة وهي بتطنطت بحماس وفرحة ليهم وجاسر كان مندهش بفرحة ليهم والابتسامة مش مفارقة وشهم.. وفجأة جني وعمر لاقوا الناس كلهم بيسقفوا ليهم.. جني كانت مصدومة وفرحانة في نفس الوقت.. حطت إيدها على بوقها بخجل ودهشة وهي بتبص للناس حواليها والابتسامة على وشها.. وبعد كده بصت لعمر بابتسامة وحب وقالت. جني: طبعاً موافقة.

عمر ابتسامته بقت أضعاف وطلع الخاتم من علبته ولابسه لجني وباس إيديها وبعد كده قام من على الأرض وهو ماسك إيد جني وبص للناس اللي حواليه بابتسامة عريضة هو وجني.. والناس كانت بتسقف بفرحة ليهم والزغاريط اشتغلت تاني.. وملاك وجاسر كانوا بيسقفوا ليهم بفرحة. جاسر بهزار وفرحة وابتسامة: مبروك يا سنجول. عمر بابتسامة وهزار: خلاص مبقتش سنجول.. طلعنا أنا وانت من قائمة السناجيل خلاص. جاسر ضحك وبعد كده

قرب من عمر وحضنه بفرحة: ألف مبروك يا صاحبي. عمر بابتسامة: الله يبارك فيك يا أخويا. ملاك جريت ناحية جني بفرحة مفرطة وابتسامة عريضة وحضنتها بقوة وحب وجني كمان بادلتها الحضن. ملاك بابتسامة وفرحة: مبروك يا روحي مبروك يا جوجو. جني بابتسامة وفرحة: الله يبارك فيكي يا ملوكة الله يبارك فيكي يا قلبي. جاسر بابتسامة: مبروك يا جني. جني بابتسامة: الله يبارك فيك يا جاسر. ملاك بابتسامة: مبروك يا عمر.

عمر بابتسامة: الله يبارك فيكي يا ملاك. بعد كده عز ونرمين ونبيلة وسليم جم باركوا لجني وعمر. عمر بفرحة وابتسامة وحماس: تعالوا نتصور كلنا. كلهم في نفس الصوت: يلا.

عمر ندهه للمصور عشان يصورهم.. كل واحد خد موضعه في التصوير.. ملاك وقفت هي وجاسر في النص وجاسر كان محاوطها وملاك كانت ماسكة إيده.. وبعد كده عمر وقف جنب جاسر وكان عمر جنبه جني وكانوا ماسكين إيد بعض.. وبعد كده نرمين وقفت جنب جني.. وعز كان واقف جنبها.. وبعد كده نبيلة كانت واقفة جنب ملاك وبعديها سليم وبعديه مازن ومروان.. وكلهم ابتسموا للكاميرا من قلبهم بفرحة.. والتقطت الصورة.. التقطت الصورة مع أهلهم وحبايبهم.. صورة عائلة الخطاب🤍.

«بعد مرور خمس سنوات» "في جنينة قصر عز" _بابي اسر زقني في الأرض. جاسر وهو بيشلها بحنان: معلش يا قلبي بابي أنا هزعقه دلوقتي.. يا اسر يا اسر. اسر وهو جي جري: نعم يا بابا. جاسر شاله عشان يبقى شايل الاتنين وقال وهو بيوجه كلامه لاسر: بتضايق ملاك اختك ليه يا اسر.. مش أنا قولت اللي يمد إيده على بنت ميبقاش راجل.. ينفع كده أزعل منك دلوقتي. اسر بانفعال طفولي: يا بابي هي اللي بتمسك ألعابي وأنا مبحبش حد يمسك ألعابي.

ملاك بانفعال طفولي: لا يا بابي ده كداب أنا كنت بشيل الألعاب من على الأرض عشان مامي قالتلي متسيبوش لعبكم على الأرض ف أنا كنت بشيلها بس. اسر بعصبية طفولية: لا أنتِ اللي كد..... جاسر قاطع نقاشهم: بس مش عاوز كلام تاني.. يلا صالحوا بعض انتوا أخوات حبايب ومش عاوز خناق تاني.. عشان أوديكم دريم لاند. ملك بتسرع: أنا آسفة يا اسر. اسر: أنا آسف يا ملاك.

بعد كده جاسر باسهم هما الاتنين بابتسامة ونزلهم على الأرض وهما فضلوا يجرو ورا بعض بابتسامة ولعب. ملاك وهي بتتوجه ناحية جاسر بصينية الكيكة اللي عملتها. ملاك بابتسامة: عملت ليكم تشيز كيك إنما إيه.. خطيرة. جاسر بابتسامة وهو بيشيل منها الكيكة: تسلم إيدك يا حبيبتي. ملاك بابتسامة: تسلم يا حبيبي. بعد كده نبيلة طلعت وهي بتسند سليم بعصاته براحة وهي باصلهم بابتسامة. جاسر راح يسند سليم مع نبيلة. سليم: صباح الخير يا ولاد.

جاسر وملاك بابتسامة: صباح الخير يا جدو. ملاك راحت حضنت سليم بحب وحضنت نبيلة وكذالك جاسر.. وطلعوا بعديهم عز ونرمين وصبحوا عليهم هما كمان وكلهم قعدوا على الترابيزة في الجنينة وملاك كانت بتقطع الكيكة بفخر وابتسامة. ملاك بابتسامة: ميلاندا روحي اندهي ملك واسر عشان ييجوا ياكلوا. ميلاندا بابتسامة: حاضر مدام.

بعد شوية ميلاندا جابت اسر وملك.. وملك راحت قعدت على رجل جاسر بفرح وحماس طفولي للكيكة اللي ملاك عملتها.. واسر راح قعد على رجلين ملاك بحماس طفولي إنه ياكل الكيكة. فجأة اسر صرخ بفرحة وهو بيشاور ناحية باب القصر اللي خلى كله ينتبه للباب: عمو عمر وطنط جني جم. ملاك نزلت من على رجلين أبوها بابتسامة وصريخ فرحة وهي بتجري على عمر وجني.. وكذالك اسر عمل زيها بالظبط.. وعمر وجني استقبلوهم بابتسامة واسعة وهما بيحضنوهم بحب وفرحة.

ملاك بابتسامة: تعالوا بقى دوقوا من الكيكة بتاعتي. جاسر بابتسامة: ليكوا وحشة والله. عمر وجني سلموا على الكل وجني راحت قعدت جنب ملاك وعمر قعد جنب جاسر. عمر بابتسامة: لاقينا نفسنا قريبين منكم قولنا نيجي نعدي نسلم عليكم. عز بابتسامة: نورتونا يا حبيبي ده بيتكم تعالوا في أي وقت. عمر بابتسامة: حبيبي يا عز باشا ده بنورك. جاسر: واحشني يا صاحبي. عمر: وانت كمان والله يا صاحبي.

ملاك بابتسامة: عاملة إيه يا جني إيه أخبارك وأخبار النونو.. آه صح أنتِ هتولدي امتى يا بنتي. جني: لسه بعد تلات شهور وخايفة أوي ادعيلي يا ملاك بجد. ملاك: إن شاء الله ربنا هيقومك بالسلامة يا روحي. ملاك بابتسامة وهزار وهي بتقول للجميع: يلا ناكل الكيكة بتاعتي الخطيرة بجد. كلهم ضحكوا. وبعد كده ملك واسر قالوا بصوت عالي بحماس: يلا. وبعد كده ملاك قطعت الكيكة وسط هزارهم كلهم وضحكاتهم المتواصلة مع بعضهم والسعادة اللي هما فيها.

وتنتهي قصتنا بصورة سعيدة لعائلة الخطاب♥️.