رواية ملاكي الفصل التاسع 9 - بقلم رنا شريف

فى المستشفى ملاك بتعيط وماسكه الموبايل بتحاول تتصل بحد وفضلت ترن على مها واميره بس الموبايلات مقفوله وفضلت كدا لحد ما الدكتور خرج من اوضة فهد ملاك: خير يا دكتور هو كويس؟ الدكتور: كويس الحمد لله، هو كان ارتجاج بسيط في المخ ودراعه الشمال مكسور. ملاك: الحمدلله، طيب ادخله عادي؟ الدكتور: أيوه اتفضلي. دخلت ملاك ملاك: حمدالله على السلامه. فهد: الله يسلمك، انتي كويسه؟ ملاك: أيوه الحمد لله. فهد: كلمي سيف.

ملاك: حاولت ومش بيرد ومها وعمتي موبايلاتهم مقفوله، بس هجرب تاني. رنت تاني على سيف وشويه ورد عليها ملاك: أيوه يا أبيه، كلمتك كتير. سيف: مكنتش سامع الموبايل، المهم انتوا فين؟ ملاك: في المستشفى. سيف بفزع: ليه، حصل ايه؟ مستشفى ايه؟ ملاك: مستشفى ******. سيف: ماشي، أنا مسافة الطريق وجاي، سلام. ملاك: سلام. فهد: قالك ايه؟ ملاك: أكيد جاي يعني مش محتاجه سؤال. فهد: هو ايه اللي حصل؟

ملاك: عربيه خبطتنا وانت اغمى عليك وناس اتلمت وساعدوني وجابوك هنا. فهد: الحمد لله. ملاك: الغريب إن العربيه اللي خبطتنا مشيت بسرعه. فهد: تقصدي إن حد قاصد كده؟ ملاك: ملهاش حل غير كده. فهد: أو يمكن خاف إن يكون حصل حاجه ومشي. ملاك: مش عارفه، الحمدلله إنها عدت على خير. فهد: الحمدلله. عند مالك سلمى: هتعمل ايه يا مالك؟ مالك: مش عارف، الموضوع غريب قوي. سلمى: طيب ما تقول لآدم يمكن يكون عنده حل.

مالك: بس لو طلعت فعلاً اختنا وكلام ماما صح، تفتكري هتفضل مع ابوها؟ سلمى: أكيد لأ، ده حرمها من امها كل السنين دي. مالك: الكلام اللي ماما قالته عن أمينة دي يدل إنها مش كويسه، معقوله كانت بتعاملها حلو لدرجة الأم؟ سلمى: مش عارفه، المهم شوف هتعمل ايه وعرفني، أنا هقوم أذاكر. مالك: ماشي يا حبيبتي. في باريس أمجد بيتكلم في الفون أمجد: يعني ايه؟ انت اتجننت يا سامح؟ سامح: انت شايف إنه مات قوي؟

أمجد بغضب: متتصرفش من دماغك تاني يا زفت، فهد لو عرف إنك حاولت تقتله هيقتلك بدم بارد. سامح: مش هيعرف. أمجد: أما نشوف، أقفل. سامح: ماشي سلام. بعد ما قفل سيرا دخلت سيرا: بتزعق ليه كده؟ أمجد: الغبي اللي اسمه سامح كان هيقتل فهد. سيرا: بجد؟ طيب وانت زعلان عليه قوي كده ليه؟ أمجد: عشان هو مماتش، ولو عرف حاجة نار جهنم هتتفتح علينا. سيرا: انت خايف منه كده ليه؟

أمجد: عشان هو مش لوحده، هو معاه آدم ومالك والتلاته دول طالما مع بعض ممكن يحرقوا العالم كله. سيرا: يعني دول قوته مش كده؟ أمجد: أيوه طبعًا. سيرا: حلو، يعني ليه نقط ضعف أهو. أمجد: بس نقط الضعف دول ناس قويه جدًا ومش سهل توقعيهم أو تخلصي منهم. سيرا: أكيد كل واحد فيهم ليه نقطه ضعف. أمجد: مش فاهمك. سيرا: بعدين هفهمك، الباشا عايزك تروحله. أمجد: طيب أنا ماشي سلام. سيرا: سلام. في المستشفى اميره ومها وحازم وسيف

وملاك في أوضة فهد اميره: انت كويس دلوقتي؟ فهد: يا أمي والله أنا كويس. حازم: ايه اللي حصل يا ملاك؟ ملاك: عادي كنا بنتكلم وعربية ظهرت مره واحده خبطتنا واختفت وبعدها ناس اتجمعت وجابونا على هنا، بس فهد كان فاقد الوعي. سيف: يعني مَوقفش خالص ولا وقف ولما الناس اتجمعت مشي؟ ملاك: مش عارفه، بس العربيه دي مشوفتهاش. سيف: ماشي، المهم إنكم بخير. ملاك: الحمد لله. اميره: ممكن تفهمني ايه اللي هببته ده يا فهد؟

مها: ماما مش وقته ولا مكانه. أميره: سيف روح شوف ينفع يخرج ولا إيه؟ سيف: حاضر. موبايل مها رن مها: الو، أيوه يا آدم. آدم: ايه يا مها، فين أخوكي؟ وكمان سيف مش بيرد. مها: إحنا في المستشفى، فهد عمل حادثه. آدم بفزع: إيه؟ أنا جاي، بس قوليلى مستشفى إيه؟ مها: مستشفى ******. آدم: تمام، أنا مسافة الطريق. قفل آدم واتصل على مالك مالك بنوم: نعم، ده وقت تتصل فيه. آدم: مالك فوق عشان فهد عمل حادثه. مالك: إيه؟ حادثه إزاي؟

آدم: مش عارف، أنا رايحلهم مستشفى ******. مالك: ماشي، هلبس وأجيلك. آدم وصل وبعد شويه مالك آدم: إيه اللي حصل يا فهد؟ فهد: مفيش حاجه، بسيطة. مالك: يعني انت كويس؟ فهد: اها، الحمد لله. مالك فضل باصص لملاك وفهد لاحظ فهد: مالك. مالك: أنا عايز أقولكم حاجة. فهد: خير، في إيه؟ مالك: ملاك تبقي أختي.