رواية ملتزمه تزوجت من رجل اعمال الفصل الثاني عشر 12 - بقلم رضا الله غايتي

الو. الو. أنتِ فين؟ مع خديجة. فرح من جواه لما سمع اسمها. احم. مقولتيش ليه. أنت كنت مشيت. وأنا استأذنت من بابا وماما. في حاجة اسمها موبيل. آسفة. بس النهارده مكنش عندي محاضرات، قلت أجي أقعد مع خديجة. هي جنبك؟ بضيق. لا. هي بتكلم البنات. وأنا قلت أكلمك. وخايفة تخلص القصة وأنا لسه بكلمك. قصة إيه؟ قصة كعب بن مالك. مين ده؟

ده صحابي. من أصحاب النبي صلى الله عليه وسلم. يلا بقى عشان عايزة أشوف إيه العقاب أو الاختبار اللي ربنا عاقبه بيه في الدنيا، وهل هو نجح في الاختبار ولا لأ. احم. طب سيبي الخط مفتوح وروحي اسمعي. بجد؟ أخلصي يلا. أوكي. ابتسم وعنده فضول يسمع خديجة وهي بتتكلم. وبرضه عايز يعرف مين كعب بن مالك. نروح عند خديجة بقى. قبل شوية.

بصي بقى يا حبيبتي. كعب بن مالك الأنصاري أسلم في بيعة العقبة. طبعاً كلنا عارفين إن النبي صلى الله عليه وسلم كان مابيصدق موسم الحج ييجي عشان يكلم الناس عن الإسلام. وطبعاً هما كانوا للأسف بيعبدوا الأصنام. والنبي اتكلم مع مجموعة جاية من يثرب اللي هي المدينة المنورة دلوقتي. والحمد لله دخلوا في الإسلام. اهو كعب ده من الناس اللي سمعت النبي صلى الله عليه وسلم وصدقته وآمنت بيه. ولما النبي صلى الله عليه وسلم هاجر المدينة كان كعب بيقعد يسمع النبي ويعمل كل حاجة ربنا أمره بيها. ولما النبي طلع يحارب الكفار سيدنا كعب خرج معاه كل الغزوات.

بس للأسف غزوة تبوك الوحيدة اللي تخلف عنها. والمصيبة الأكبر إنها كانت آخر غزوة في حياة النبي. والغزوة اللي ربنا أنزل فيها "لقد تاب الله على النبي" يعني ربنا بشرهم بالتوبة في الغزوة دي. تعالوا بقى نشوف كعب بن مالك تخلف عن الغزوة دي ليه. النبي أمر المسلمين إنهم يجهزوا للجهاد. وطبعاً كل الصحابة ابتدوا يجهزوا نفسهم ماعدا سيدنا كعب ومرارة بن الربيعة وهلال. وطبعاً المنافقين اللي بيظهروا الإسلام وهما بيكرهوه.

سيدنا كعب كل يوم يقول: أنا لو عايز أجهز هجهز بس مش دلوقتي. وكل يوم يقول بكرة بكرة. لحد ما النبي أخذ الجيش وراح للأرض المعركة. ساعتها كعب ابتدى يندم إنه ساب النبي ومرحش الغزوة. بس الندم بعد فوات الأوان مينفعش. ورجع النبي صلى الله عليه وسلم والصحابة وانتصروا في المعركة. سيدنا كعب رايح للنبي صلى الله عليه وسلم. سمع المنافقين بيخترعوا أعذار كذب في كذب. والنبي ساكت.

سيدنا كعب دخل على الرسول وهو حزين ومكثوف. مش عارف هيقول له إيه. هيكذب وينجي نفسه؟ طب ربنا أكيد عالم إني كذاب. طب أصدق والرسول يزعل مني؟ وقرر كعب إنه هيقول الحقيقة واللي يحصل يحصل. النبي بيبتسم لكعب بعتاب. ماخلفك عن الغزوة يا كعب؟ والله يا رسول الله أنا تخلفت عن الغزوة من غير عذر ولابسبب مرض ولا قلة صحة. والفرس بتاعي شديد. ولكن غلبتني نفسي.

كعب عمل زي ناس كتير. كل يوم هنتوب بكرة بكرة. وأكبر غلط عمله إنه مفكر لما يقرر إنه يتوب هيتوب. لأ. لو ملحقتش دلوقتي تتوب يمكن تندم بعدين. بس بعد فوات الأوان. النبي بص لكعب وقال له: انتظر حتى يحكم الله فيك. مشي كعب مش عارف يقول إيه. سأل واحد من الصحابة: حد قال زي؟ رد عليه: أيوه هلال بن أمية ومرارة بن الربيع. وطبعاً بعد ما قالوا راحوا بيوتهم يبكوا من شدة الندم واعتزلوا الناس.

النبي أصدر قرار إني محدش يكلم كعب أبداً ولا الاثنين اللي معاه. متخيلين يا بنات إنك تعيشي في الدنيا من غير ما حد يكلمك. صحابك يخاصموك وأهلك وعيالك وكل الناس. وهما مش أي ناس. دول أصحابه حبايبه إخواته في الله. سيدنا كعب يكلم أي حد منهم محدش يرد عليه.

وفي يوم سيدنا كعب كان بيصلي وراح صلى جنب النبي صلى الله عليه وسلم وأفشى عليه السلام. والنبي ما ردش عليه. سيدنا كعب نفسه يشوف النبي بيبتسم له زي ما كان بيعمل. وقعد يذكر الله. شاف النبي بيبص له وأول ما سيدنا كعب ينظر للنبي. النبي ينظر للأرض أو أي مكان تاني. زعلان من كعب. تخيلوا يا بنات حبيبي وحبيبك النبي صلى الله عليه وسلم زعلان منك. هتعملي إيه؟

كعب تعب من شدة الندم. وكمان محدش بيكلمه. كفاية العذاب اللي في قلبه لأنه فعل هذا الذنب وتخلف عن نصرة الدين. مرة كعب كان بيخبط على ابن عمه. صحابي برضه. شافه مرضيش يفتح له. قام سيدنا كعب نط من على السور ودخل ليه. استحلفك بالله يا سعد أنت تعلم أني أحب الله ورسوله. مش راضي يرد عليه. استحلفك بالله رد عليا أنت تعلم أني أحب الله ورسوله. الله ورسوله أعلم. سيدنا كعب خرج وهو ماشي. لقي واحد من جنود ملك الروم بيسأل عليه.

رسول ملك الروم. خد الرسالة. ملك الروم بعتها لسيدنا كعب. فتح الرسالة لقي ملك الروم كاتب فيها إنه عرف إن محمد استغنى عنه ومش عايزه. تعالي عندي واحنا نواسيك. سيدنا كعب أخذ الرسالة وولع فيها قدام الجندي اللي ملك الروم بعته.

ملك الروم بعت الرسالة لكعب بالذات لأنه كان قوي وشجاع. وبعدين عايز يهدم الإسلام ويحرق قلب محمد على أصحابه. النبي بيحزن حزن شديد لما يهودي يموت لأنه نفس ماتت على غير الإسلام. فمابالكم بقى لما مسلم يموت أو يكفر بالله. سيدنا كعب جاء له رسالة من عند النبي صلى الله عليه وسلم إني زوجته تروح عند أهلها. أمرك إني أطلقها ولا أتركها تروح عند أهلها؟ لا تتركها بس.

سيدنا كعب تعب بقى لوحده. فضل فوق السطح وفضل يدعو الله إن يغفر له ذنبه. مفيش ملجأ إلا الله. وفجأة سمع حد بينادي عليه بصوت عالي: يا كعب بن مالك. يا كعب بن مالك. لقد تاب الله عليك. واثنين من الصحابة جريوا يبشروا هلال ومرارة. سيدنا كعب لما سمع نزل يجري وراح عند النبي صلى الله عليه وسلم. لقي النبي بيبصله بفرح وسعادة. وسيدنا طلحة جري عليه يحضنه من شدة فرحته. أبشر يا كعب بخير يوم مر عليك منذ ولدتك أمك. لقد تاب الله عليك.

من شدة الفرحة مش قادر يتلم على أعصابه. يا رسول الله أمن عندك أم من عند الله؟ من عند الله. شفتوا بقى يا بنات سيدنا كعب لما أذنب ذنب حصل معاه إيه. محدش يستعجل يا بنات. اقفوا على باب ربنا وقولوا مش هنسيب بابك يارب. قال تعالى: (وعلى الثلاثة الذين خلفوا حتى إذا ضاقت عليهم الأرض بما رحبت وضاقت عليهم أنفسهم وظنوا أن لا ملجأ من الله إلا إليه ثم تاب عليهم ليتوبوا)

. الثلاثة دول منهم كعب بن مالك. يلا كلنا نتوب من جديد ونرجع لربنا. وصدقوني هيقبلك. وبكده خلصنا قصة كعب بن مالك. إن شاء الله بكرة هنشوف القصة دي أثرت في باسم ولا لأ وإيه موقفه. وياترى هيحصل إيه.