رواية من انا الفصل السادس 6 - بقلم نعمة احمد

اتكلم بعد سكوت طويل: أنتِ طالق يا أميرة. شوفت دموعه وقام من جنبي، بعد شويه واتكلم وهو مديني ضهره: انتي مش مضطرة تمشي، خليكي هنا على الأقل فترة العدة لحد ما نشوف هنقول لأهلنا إيه. = طيب. تاني يوم روحت لماما، حسيت إني محتاجة أتكلم معاها. = ماما. فتحتلي دراعها وروحت حضنتها، هو أنا كده كل ما الدنيا تضيق عليا أروح لها على طول؟ = مالك يا حبيبتي؟ = مش عارفة يا ماما، حاسة إني متضايقة أوي. = الموضوع له علاقة بأحمد؟

= أيوه، مبقتش عارفة أنا صح ولا غلط، مبقتش عارفة أتعامل معاه. = انتي بتحبيه؟ بصيت لها بتفكير: برضه مش عارفة.

= لا انتي عارفة كل حاجة يا أميرة، كل الموضوع وما فيه إنك مش عايزة تصارحي نفسك بس. كل اللي عايزة أقولهولك متضيعيش الفرصة من إيدك عشان وسوسة شيطان. فكري في حياتك من غيره لو لقيتي نفسك قادرة تعيشي عادي يبقى انتي صح، لكن لو لقيتي نفسك تايهة ومش لاقية نفسك يبقى انتي غلط ولازم تراجعي نفسك قبل ما الوقت يضيع. ربنا يهديكي يا بنتي ويدلك على الطريق الصح. مشيت من عند ماما وأنا شبه مقررة أنا هعمل إيه.

دخلت البيت ولقيته واقف في المطبخ. = وبعدين! بص لي: = وبعدين إيه!؟ = يعني هنفضل كده كتير. = عايزة إيه دلوقتي مش فاهم. مسكت إيده: = عايزة نكمل الحلم للآخر. بصلي بحب وابتسم: = هيا دي أميرة اللي أعرفها. سمعت صوت مش غريب عليا. = إيه الصوت ده؟ = مش عارف. فجأة سمعت صوت ماما وهي بتقول: = يا أميرة يا أميرة قومي يلا عشان تروحي الجامعة والمنبه بيرن. فتحت عيني ولقيت نفسي على سريري في بيتنا. روحت لماما: = أنا إيه اللي جابني هنا؟

فين أحمد؟ = أحمد مين يا بت على الصبح؟ = مش أنا متجوزة أحمد يا ماما، انتي فقدتي الذاكرة ولا إيه؟ = لا ده انتي اللي شكلك منمتيش كويس، هو أنا مش آخر كلامي معاكي لما قولتلك إنه اتقدم لك وانتي مرضيتيش؟ ماما طلعت وأنا قعدت على السرير عشان أستوعب اللي بيحصل: = يعني ده كله كان حلم!!!؟ طب إزاي؟ عدت الأيام وأنا كنت بحاول أستوعب إني كنت في حلم وماما وبابا مستنيين ردي عشان أقابل أحمد وأنا وافقت. = عاملة إيه؟ = الحمد لله، تمام.

= بقالي كام يوم حاسس بحاجات غريبة. انتبهت وبصيت له: = غريبة إزاي يعني؟ = يعني بشوفك في أحلامي كتير وفي مواقف كتير، وآخر حاجة شوفتها إننا.... وسكت. = متجوزين؟ بصلي بصدمة: = عرفتي منين؟ = يا ااه دي قصة طويلة أوي. = المهم آخرها إيه؟ ابتسمت:

= واحد أعرفه قالي قبل كده عيشي الحلم، حسيه بكل تفاصيله كأنه واقع. فيه أحلام كتير بنشوفها بس بتفضل جوانا وجوا قلوبنا مبتتنسيش، وبنكون شايفينها قدام عينينا كأنها حقيقة ونفضل عايشين على أمل إنها ممكن في يوم تتحقق. ابتسم: = يلا نعيش الحلم. ابتسمت: = يلا نعيشه.