رواية من قلب الظلام الفصل العاشر 10 - بقلم منة الله محمد

نور: أمنية انت عرفتي إزاي؟ وعرفتي إيه أصلاً؟ أمنية: نور، بجد أنا خايفة أتكلم. وحياة أغلى حاجة عندك يا نور، سبيني شوية وأنا هتكلم. نور: أمنية، انتي عارفة انتي بتقولي إيه؟ أنا المفروض أتعامل معاكي عادي بعد كده، بعد ما أعرف إنك عرفتي إن والدي مات محروق في نفس اليوم اللي رجع فيه بعد 14 سنة، وكل ده علشان بحاول أساعدك؟ والمفروض إني أكمل وأفضل هادية قدامك؟ حرام عليكي يا أمنية. أمنية: والله غصب عني، والله.

فضلت أمنية تعيط وتحلف لنور إن كل اللي حصل زمان واللي حصل دلوقتي غصب عنها. خرجت نور من أوضة أمنية وهي متعصبة جداً، وراحت على مكتب المشرف. نور: حسام، لو سمحت أنا عايزة أخرج أمنية من المصحة. حسام: إيه! بس أمنية لسه مريضة وحالتها لسه مش مستقرة. نور: أنا المسؤولة عن حالة أمنية وأنا أدرى إيه اللي ينفع ليها. حسام: بس يا نور. نور: لو سمحت يا حسام، الموضوع ده مهم جداً علشان تتحسن حالة أمنية.

حسام: تمام يا نور، أنا عندي ثقة فيكي. تقدري تاخدي أمنية. نور: شكراً جداً. وطلعت نور من عند المشرف وراحت أوضة أمنية. أمنية: نور، كويس إنك جيتي. ممكن نتكلم شوية؟ نور: لا، دا مش وقت الكلام. أنا لازم ألم كل هدومك وحاجتك. أمنية: انتي ليه بتلمي حاجتك؟ نور: ماشيين من هنا. هاخدك تعيشي معايا في بيتي. أمنية: بس ليه؟ نور: تغيير علشان حالتك تتحسن. وأنا الدكتورة المسؤولة عنك وأدرى بمصلحتك. وراحت نور وأمنية على بيت أمنية.

أمنية: ممكن أعرف ليه جينا هنا؟ نور: الأوضة دي بتاعتك. ادخلي رتبي هدومك. دخلت أمنية ترتب حاجتها في الأوضة. نور لنفسها: الغضب مش هيفيد. وانتي يا أمنية، حالتك النفسية مش مستقرة. غلط أوي إني أغضب وأتخلى عنك. وكمان انتي الخيط الوحيد اللي ها يوصلني للمريض اللي قتل عيلتك وقتل بابا. وأنا لازم آخد حقي منه. ودخلت نور خدت شاور وخرجت، راحت تقعد مع أمنية. نور: إيه رأيك يا أمنية؟ أكملك اللي حصل معايا.

أمنية: نور، انتي مش زعلانة مني؟ نور: لا. ليه؟ يلا نكمل اللي حصل معايا. نرجع للماضي. في مرة كنت راجعة من المدرسة لوحدي، وكان فيه بنت ماشية معايا في نفس الطريق. وكنت أول مرة أشوفها. ومرة واحدة كلمتني. والبنت دي هي يمنى. يمنى: انتي راحة فين يا بنوتة؟ بصيت لها وماردتش. يمنى: يعني مش ناوية تردي. بس مش باين عليكي إنك بنت خجولة. كنت مفكراكي شجاعة. أصل اللي تنط قدام عربية لازم تكون بنت شجاعة. نور: مين اللي نط قدام العربية؟

يمنى: أو كمان بتأتأ. أو شكلك اكتشاف مذهل. نور: انتي عرفتي منين إني حاولت؟ يمنى: حر. يمنى: بالصدفة كنت هناك وشوفتك. بس متخافيش، مش ناوية أعرف حد. بس إيه رأيك نكون أصحاب؟ نور: شكراً إنك مش هتقولي لحد. بس نكون أصحاب إزاي؟ وانتي أكبر مني. يمنى: العمر مجرد رقم مش أكتر. والواحد مش هيلاقي حد شجاع زيك كل يوم. نور: انتي شايفة إن اللي أنا عملته شجاعة. يمنى: Of course. على العموم، أنا يمنى. وانتي. نور: وأنا نور.

ومن وقتها ويمنى بقت معايا في كل حتة. كنت بلاقيها في كل مكان أروحه. كانت شخصية غريبة وبتحب كل حاجة غلط. أنا كنت بعاملها، وأكتر حاجة كانت عاجباها إني بحاول أنتحر. وبعد شهرين تقريباً من وقت ما قابلت يمنى. يمنى: نور، إيه رأيك آخدك مكان يفكلك مودك خالص. نور: انتي عارفة يا يمنى، أهلي مش ممكن يوافقوا. يمنى: نور، اكدبي عليهم. يعني عادي. كدبة صغيرة مش هتضر. نور: انتي رأيك كده تمام. خليني أجرب وبعدين أكلمك. يمنى: Okay.

رجعت نور بيتها وراحت لحنين. نور: حنين، أنا عايزة منك مساعدة. حنين: نعم يا نور. نور: أنا عايزة أخرج النهاردة بالليل. ممكن تقولي لأهلي إني هبات عندك، لإن لما انتي بتطلبي هما بيوافقوا. وأوضتك على الطريق على طول وممكن أطلع من الشباك. حنين: ليه كل ده يا نور؟ وبعدين تخرجي بالليل تروحي فين؟ حنين: نور، أنا أصلاً مابحبش يمنى دي وقلتلك أكتر من مرة. نور: حنين، علشان خاطري. يعني عجبك حالي كده؟

علشان خاطري يا حنين، وإلا والله ها أموت نفسي. وطبعاً قدرت أقنع حنين. وراحت كلمت أهلي. وأهلي وافقوا. ودلوقتي أنا خرجت الشارع ويمنى جت بعربيتها علشان تاخدني.