رواية من قلب الظلام الفصل الثالث عشر 13 - بقلم منة الله محمد

وبعد ما حنين حكت كل حاجة، قالتها نور: انهرت أنا من العياط وكنت حاسة نفسي غبية قوي ومشيت ورا واحدة غبية دمرت حياتي. نور: حنين أنا آسفة جداً على كل الغباء اللي أنا عملته معاكي. لو كنت سمعت كلامك ما كانش كل ده حصل. حنين: ده مش وقت الكلام ده يا نور. إحنا لازم نلاقي طريقة تتعالجي بيها ومن غير ما أهلك يعرفوا. زياد: ودي المفروض نعملها إزاي؟

حنين: أنا عارفة إزاي. فاكرة يا نور الدكتور اللي كان على طول بيقول لعمو ولخالتي إنك محتاجة علاج نفسي وهما كانوا بيرفضوا؟ أنا اتكلمت معاه من فترة وشرحتله وضعك كله على أساس إنه يساعدنا إنك تتعالجي عند دكتور نفسي من غير ما حد يعرف، لإنه أصلاً عارف موقف أهلك وكان عايز يساعدك بأي طريقة. نور: تمام يا حنين، كلميه وخليه يجي بسرعة. وفعلاً كلمت حنين الدكتور محمد علشان ييجي يساعدني.

الدكتور محمد: إزيك يا نور. حنين حكت لي على كل حاجة وإنه دلوقتي إحنا محتاجين علاج للإدمان. نور: يا دكتور لو سمحت أنا عايزة أخلص من الوجع اللي أنا فيه ده.

الدكتور محمد: إن شاء الله هتتعالجي يا نور، بس لازم تعرفي إن العلاج صعب ومحتاج منك صبر وإصرار. دلوقتي أنا عارف ظروف البيت عندك، إنتي هتدخلي مصحة أسبوع بس وبعد كده أنا هعرف أطلعك وتكملي العلاج في البيت. بس لازم يكون فيه دكتور متخصص يشوف حالتك ويقيم درجة الإدمان وأنواع المخدرات اللي إنتي كنتي بتاخديها، لإن اللي أنا فهمته من حنين إنك ما كنتيش تعرفي إنتي بتشربي إيه. نور: تمام يا دكتور، هروح المصحة إمتى؟

الدكتور محمد: حالا يا نور. آه بس في حاجة مهمة، لإن أهلك لو عرفوا ممكن يخلّوكي تبطلي العلاج. إحنا عملنا الورق في المصحة باسم حنين. نور: شكراً يا دكتور. حنين، شكراً ليكي جداً. إنتي فعلاً أغلى حد في حياتي كلها. حنين: إنتي أختي يا نور وصاحبتي من يوم ما اتولدت، يعني غلط إنك تشكريني.

وبعد كده رحنا على المصحة. والدكتور محمد كان متابع معايا كل حاجة خطوة بخطوة، لإن بعد ما أطلع من المصحة هو هيكون المسؤول عن علاجي في البيت. أما بالنسبة لأهلي، فبابا للأسف طلع عنده نزيف داخلي وأعضاء متضررة، فكان لازم يفضل في المستشفى فترة أطول. وماما كانت هناك معاه وبتطمن عليا في التليفون. بعد أسبوع في المصحة، خرجت بمساعدة الدكتور محمد. وفضل زياد وحنين بيساعدوني وهما كمان اللي كانوا مغطيين على غيابي لمدة أسبوع من البيت.

لما رجعت البيت، كان الدكتور محمد بييجي لما عمي وخالتي يخرجوا من البيت علشان يتابع حالتي. وبعد شهر، كانت حالتي اتحسنت كتير وكان فاضل مدة بسيطة في العلاج. وكمان بابا خرج من المستشفى ورجع هو وماما البيت. وبطل الدكتور ييجي وكنت أنا بأخد علاجي في البيت وبابل الدكتور لما أخرج. الدكتور محمد: مبروك يا نور، ده آخر قرص علاج ليكِ. حافظي عليه وخذي الدواء في وقته. نور: شكراً جداً يا دكتور، أنا مش عارفة المفروض أشكرك إزاي.

الدكتور محمد: نور، إنتي زي أختي الصغيرة وكان لازم أساعدك. ده ملفك اللي كان في المصحة، خبّيه كويس علشان أهلك ولإن الملف باسم حنين. يلا سلام دلوقتي. وبعدها كانت امتحانات آخر السنة قربت وأنا الحمد لله مش عارفة أي حاجة في المنهج. بس الحمد لله حنين ساعدتني شوية ونجحت في السنة دي.

وبعد كده مرت باقي سنين حياتي عادية، مفيش أي حاجة حصلت غير إني دخلت ثانوي عام. ممكن نقول إن أكبر كَرسة في حياتي حصلت بعد امتحانات الثانوية العامة ليا أنا وحنين. حنين: نور أنا خايفة قوي من الدرجات. نور: خايفة ليه يا حنين؟ إنتي ما شاء الله عليكي شاطرة قوي وإن شاء الله تجيبي مجموع كبير. حنين: إن شاء الله يا نور.

وفي نفس اليوم بالليل، حصلت حاجة غريبة قوي. جه شاب غريب باين عليه إنه مش طبيعي. والأغرب إنه جاي يتقدم لحنين. بس عمي طبعاً رفضه لإن كان شخص مش كويس وكمان حنين عايزة تكمل تعليم. نور: هههههههههههه عريس الغفلة ده كان قمر يا حنين. تحفة. حنين: والنبي بطلي ضحك وتريقة يا نور. ده بجد كان تحفة، تحفة من التحف. اوف.

حنين: نور أنا نازلة أجيب الدوا بتاعك. إنتي محتاجة دلوقتي وبسبب غبائك نسيتي تقولي إن الدوا خلص، واديكي محتاجاه دلوقتي. نور: خلاص يا حنين بقى، والله نسيت إن الدوا خلص. وكمان أنا طول الوقت همي أخبي الدوا عن أهلي. وبعدين خلاص، استني لبكرة الوقت اتأخر.

حنين: لا لازم أجيبه وتاخدي دواكي في وقته أحسن ما يحصل تأخير في حالتك. وكمان لازم نشوف حل للفلوس اللي معانا قربت تخلص. وعمي وخالتي لو أخدوا بالهم إن معظم الدهب اللي كانوا بيجيبوه ليكي مش موجود، هتحصل مصيبة. نور: خلاص يا حنين، تمام. روحي دلوقتي هاتِ الدوا. راحت حنين تجيب الدوا. ودي كانت آخر مرة هتكلم مع حنين في حياتي كلها. يا ترى إيه اللي هيحصل مع حنين؟