رواية من قلب الظلام الفصل الثاني 2 - بقلم منة الله محمد

نور: زي أي حكاية لازم أعرفك بالشخصيات. الأستاذ عماد عبد الحق بابا، الأستاذة حنان إبراهيم ماما، أكرم عبد الحق عمي، أمل إبراهيم مرات عمي وخالتي. ماما وبابا أهلهم متوفين. بابا وماما كان عندهم مشكلة في الخلف، فضلوا 12 سنة بعد الجواز من غير أطفال، وفضلوا مكملين مع بعض لأنهم أصلاً كانوا متجوزين عن حب.

عمي أكرم أصغر من بابا بـ 10 سنين، اتجوز بعد بابا بـ 10 سنين وخلف بعد ما اتجوز بسنة ابنه زياد، وده خلى ماما دايماً زعلانة، وخصوصاً إنهم كانوا ساكنين في نفس العمارة. بس بعد ميلاد زياد بسنة، خالتو أمل حملت تاني في بنتها حنين. بس ربنا أراد وماما كمان حملت في نفس الوقت فيا، ومرت شهور الحمل اللي كانت صعبة جداً على ماما. ووقت الولادة؛ ولادة ماما كانت متعسرة وصعبة، واضطر دكاترة يشيلوا لماما الرحم بعد الولادة.

يعني بقيت أنا البنت الوحيدة وللأبد. كنت أنا وحنين قد بعض، وزياد أكبر منا بسنة. بابا وماما كانوا بيخافوا عليا جداً ومن أقل حاجة. وأنا عندي ست سنين كنا رايحين الملاهي وكانت عيلة عمي جاية معانا. عماد (بابا) : يلا يا نور انزلي وخلي بالك وأنت نازلة على السلم. نور: حاضر يا بابا. حنين يا حنين خلصي يلا علشان نروح سوا. حنين: جاية أهو يا نور انزلي أنتِ الأول. نور: أنا نازلة لبابا، باي.

وأنا نازلة على السلم بلعب وفرحانة إننا خارجين مرة واحدة، وقعت على السلم. كانت الوقعة بسيطة، حتى إني ما تعورتش ولا أي حاجة حصلت ليا. بابا جه جري ليا. عماد (بابا) : نور نور أنتِ كويسة؟ حصلك حاجة؟ نور: أنا كويسة يا بابا. وفضل بابا يدور في إيدي ورجلي ممكن أكون اتعورت. أكرم (عمي) جاي من بره من عند العربية: أنتم لسه مخلصتوش؟ يلا العربية جاهزة، إيه ده مالها نور؟! بابا: وقعت ومش عارف حصل لها حاجة ولا لا؟

وكانت ماما وخالتو أمل نازلين تحت ومعاهم زياد وحنين. ماما: إيه اللي حصل لنور؟ بابا: وقعت من على السلم، تعالي نروح للدكتور علشان نطمن عليها. ماما بعد ما شالتني وأخدتني في حضنها: معاك حق، إحنا لازم نروح نطمن عليها. نور: يا بابا أنا كويسة، أنا عايزة أروح الملاهي مع حنين، مش عايزة أروح عند الدكتور. أنا كنت عنده امبارح علشان أنتم عايزين تطمنوا عليه. ماما وبابا في نفس الوقت: اسكتي يا نور، أنتِ صغيرة ومش عارفة حاجة.

عمو أكرم: مش مستاهلة تروحي للدكتور يا عماد، عادي يعني كل الأطفال بتقع كده وأكتر من كده. بابا: لا يا أكرم، أنا خايف يكون حصل لها حاجة وأنا ما عنديش أغلى منها، دي بنتي الوحيدة يا أكرم وجت بعد غلب. أنا هاخد بنتي وأروح أطمن عليها. يلا يا حنان كفاية تأخير. حنين: يا عمو سيب نور تروح معايا الملاهي المرة دي يا عمو. حنان: ما تزعليش يا حنين، هنروح نطمن على نور ونيجي وراكم على الملاهي. نور: بجد يا ماما؟ حنين: بجد يا خالتو.

حنان: أيوة يا حبايبي. يلا يا عماد خلينا نلحق. وبعد ساعة عند الدكتور اللي كان فاضل يحلف لأهلي إني كويسة وإنه مش كل شوية يجيبوني ليه. ماما بعد ما طلعت من عند الدكتور: الدكتور ده مش كويس يا عماد، إحنا بعد كده نروح لدكتور غيره. بابا: معاكي حق، يلا بقى نروح. نور: لا يا بابا، أنت قلت أنت وماما إننا ها نروح الملاهي بعد الدكتور.

ماما: يا حبيبتي افرضي وقعتي ولا حصل لك حاجة، دانتِ وقعتي وأنتِ نازلة السلم بس. وعموماً إحنا كلمنا عمك وخالتك وعرفناهم إننا مش رايحين الملاهي. نور: لا يا ماما، أنا عايزة أروح الملاهي، مليش دعوة. ماما: لا يا نور، إحنا عارفين مصلحتك أكتر منك، لازم تسمعي الكلام. وفضلت أعيط طول الطريق.

وبعدها بأسبوع كان بابا قرر إننا ها ننقل الشقة اللي في الدور الأرضي للعمارة، وإنه كلم صاحب العمارة ووافق، وخصوصاً إن الشقة دي كانت فاضية من زمان وما فيش حد راضي يسكن فيها. وبعد شهر كانت الشقة جهزت وانتقلنا فيها. في الوقت الحاضر: نور: هاي يا أمنية، أكمل ولا القصة دي مش مقنعة؟! كتبت أمنية: لا كملي، إزاي أهلك كانوا بيهتموا بيكي للدرجة الغريبة دي وأنتِ قدرتي تأذي نفسك؟! دول كانوا بيخافوا عليكي قوي، إزاي سابوكي تعملي كده؟

وأنتِ قلتي إنك حاولتِ تنتحري أربع مرات! نور: لو بتقولي على اللي أنتِ سمعتيه ده اهتمام، فانتِ لسه ما سمعتيش حاجة يا أمنية. لو بتدوري على السبب اللي خلاني واحدة من المرضى اللي كانوا هنا في المصحة، فانا هأكمل بعدين، لأني لازم دلوقتي أروح أشوف المرضى اللي عندي وهاجي أقعد معاكي تاني بالليل. بس هو أنا ممكن أسأل سؤال؟ أمنية كتبت: اسألي، بس أنا مش عارفة إذا كنت هأجاوب ولا لأ.

نور: أنتِ بتكتبي عادي ليه مش استعملتي الطريقة دي لو مش عايزة تتكلمي علشان تقولي اللي حصل معاكي؟! أمنية كتبت: حاولت أكتر من مرة، بس كل ما أمشي القلم علشان أكتب عن اللي حصل معايا أنسى كل حاجة وما أعرفش أنا عايزة أكتب إيه. نور: تمام، أنا هامشي دلوقتي وأرجعلك بالليل. بعد ما نور خرجت من عند أمنية:

نور: واحدة واحدة يا أمنية، ها تتكلمي، بس الموضوع عايز صبر، وكمان لازم أكون أنا قوية كفاية علشان أكملك اللي حصل معايا، ممكن ده يفرق معاكي. وبعدها راحت نور لقسم الشرطة. أنتم رأيكم راحت ليه؟!