رواية من نظرة حب الفصل الحادي والثلاثون 31 - بقلم ندوشة

تاني يوم كان الكل شغال في القصر والكل مشغول عشان الخطوبة، وخصوصاً إنهم ولاد رافعي، فلازم تكون خطوبة محدش شافها قبل كده. كانت نسمة وملك ومكة فوق في أوضة مكة وبيجهزوا نفسهم ومشغولين. مكة: أنا اخترت الفستان ده، شكله حلو. نسمة: حلو قوي يا حبيبتي، وهيطلع عليكي أحلى. مكة: بجد؟ نسمة: أيوه طبعاً، أهم حاجة إنه واسع وطويل، فمش هيبين جسمك، فداه شيء كويس.

مكة: أمير هو اللي اختاره ليا، وأساساً مكنش عاوزني أجيبه، قالي كان عاوز يلبسني عباية سوداء، قال إيه عشان محدش يشوفني، بيغير عليا. ضحكت نسمة هي وملك عليها. ملك: أنا الفستان مخلتش زين يشوفه، أنا اشتريته من غير ما يشوفه، لأني عارفة إنه أكيد مكنش هيرضى بيه. نسمة: بس يعني ده مقفول وواسع عادي. ملك: لا، هو مكنش عاوزني أجيب الفستان ده، كان عاوز يجيبلي فستان واسع قوي، وأنا اخترت ده واتخانقنا، بس أخدته من ورا. ميعرفش إني هلبسه.

نسمة: بس كده هيزعل وممكن تحصل مشكلة. ملك: متقلقيش، أنا عاملة حسابي، هقدر إني أراضيه. مكة: طب أنا هنزل تحت عشان أشوف الترتيبات مع ماما، وهاجي لكم دلوقتي على الميك أب أرتست تيجي. نزلت مكة تحت لقت ثريا مشغولة قوي، كانت في المطبخ ومشغولة قوي. مكة: ها يا ماما بتعملي إيه؟ ثريا: بساعد بدرية والباقي في الطبخ، لازم الأكل يكون مظبوط. مكة: طب مشوفتيش مالك؟ أصل كنت عايزة أشوفه. ثريا: مالك بردوا اللي عايزة تشوفيه؟

مكة: الله يا ماما، أيوه مالك طبعاً، أومال هيكون مين يعني. ثريا: والله ما أنا قايلالك، اعقلي كده واطلعي فوق، لأن زمان حمزة هيجيب جودي دلوقتي. وفعلاً بعدها بلحظات دخل حمزة ومعاه جودي، اللي كانت مكسوفة ومتوترة. أول ما حمزة شافهم راحلهم بسرعة. حمزة: السلام عليكم. ثريا ومكة: وعليكم السلام. ثريا: يلا يا جودي اطلعي مع مكة، البنات فوق، وانت يا حمزة روح لمالك والباقي. مكة

وهي بتاخد جودي من إيدها: تعالي نطلع بسرعة، تلاقيهم مستنيينك. طلعوا البنات فوق للأوضة وقعدوا يتكلموا مع بعض على ما الميك أب أرتست تيجي. على الناحية التانية كان مالك وأمير وزين قاعدين بره في الجنينة لحد ما راحلهم حمزة. أول ما شافوه راحوا له بسرعة. زين: انت شوفت البنات؟ حمزة: لا، معرفتش أدخل لأن خالتي ثريا طردتني، اطلع بره لكم. زين: طب دلوقتي هعمل إيه؟ أمير: استهدى كده، أكيد هنشوف حل، هنحاول بكل الطرق إننا نشوفهم.

حمزة: هو في إيه؟ زين: ملك اختارت الفستان من غير ما أشوفه، ولما جيت أقولها هتوريه لي، قالت لي قال إيه ده نحس، نحس إيه! أنا عايز أشوفه لأني عارف أكيد إنها اختارت فستان أنا مش هوافق عليه، وده اللي خلاها تخبيه. حمزة: ما تسكت ياعم، كلها كذا ساعة وتشوفوا بعض، اهدي كده. أمير: وأنا كمان عايز أشوف مكة، وحشتني. مالك: ما تحترم نفسك يا عم، ده أنا حتى قاعد جنبك يعني. أمير: وأنا أعمل إيه يا عم.

زين: ما انت لا النهارده شبكتك ولا أي حاجة، قاعد بقى. مالك: ما تنقش فيها واسكت. زين: أنا بنق. مالك: أيوه، وكلمة كمان هحلف في الموضوع ده ما هيتم. أمير: خلاص يا عم اهدى كده، اهدى. حمزة: أنا مش عارف انتوا مستعجلين ليه. أمير: ده خالتي ثريا منعتني إني أقابل مكة. زين: مش انت لوحدك، أنا بردوا كده، بتقولي هشوفها في الخطوبة، بس أنا عايز أشوفها الأول. مالك: انتوا بتوتروني ليه معاكم، اسكتوا. زين: وحضرتك متوتر من إيه؟

تكونش حبيبتك موجودة وعايز تشوفها انت كمان. أمير: أكيد لا، مالك وحب في جملة واحدة. حمزة: ومين قالكم بقى إن حبيبته مش موجودة. زين وأمير اتعدلوا وقالوا في صوت واحد: بجد؟ هي مين؟ ها هي مين؟