رواية منى وعلي الفصل الأول 1 - بقلم احمد محمود

جوزي المحترم الأستاذ علي مدرس الانجليزي بيخوني بعد عشرين سنه جواز .. ومع مين مع عيلة في 3 ثانوي من دور عياله وأمها كمان. أنا وعلي اتجوزنا بعد قصة حب كبيرة. هو ابن خالي واكبر مني بخمس سنين. من يومنا واحنا مكتوبين لبعض. كل الناس أهله والقرايب كانوا شايفين إن منى لـ علي وعلي لـ منى.

أنا كمان كنت شايفاه صاحبي واخويا وسندي في المواقف الصعبه. ياما اتخانق عشاني واحنا عيال. وكان بيضرب أي حد يفكر يزعلني. كان بيوفر من مصروفه عشان يجيلي اللعب اللي بحبها. في عيد ميلادي العاشر جاب لي عروسه هديه حلوه اوي. لسه محتفظه بيها لحد دلوقتي.

كبرنا وكبر حبنا لبعض. خلص جامعه وجيش. وفضل يتنقل من شغلانه لشغلانه. لحد ما ربنا كرمه واشتغل مدرس في مدرسه خاصه. كنت في الوقت دا في الجامعه. كان بياخدني ويروحني كل يوم. وساعات كنا بنخرج نتفسح. وفي يوم حد عاكسني ولسن عليا بالكلام. اتخانق معاه وبهدله. وقالي: "احنا لازم نتخطب عشان كلام الناس." كنت هطير من الفرحه. ياااه اخيرا نطقتها يا علي.

"سامحيني يا منى هي اتأخرت شوية. بس مكنتش هقدر اخد الخطوه دي الا لما اكون واقف على ارض صلبة واقدر اتقدم. وانا مالي ايدي ان جوز عمتي مش هيعترض. وانا مكنتش هاخد حد غيرك. وانا مكنتش هسيبك تضيعي من إيدي." اتخطبنا سنتين وبعد ما خلصت جامعه كان جهز شقته واتجوزنا فيها. كانت في منطقة بعيد شويه عن اهلنا. بس مش مهم المهم اننا مع بعض.

عشنا أجمل سنين عمرنا مع بعض. وربنا رزقنا بولد وبنت زي القمر ملوا علينا حياتنا. انشغلت أنا بيهم وبتربيتهم. وجوزي انشغل بشغله والمدرسه. وأما المصاريف زادت قرر انه يدي دروس خصوصيه. وفاتت الأيام والسنين وولادنا كبروا. البنت دخلت الجامعه واخوها في 3 أعدادي. الحياه كانت هادية وجميلة لغاية ما وصلوا العماره سكان جداد. ست أرملة في أواخر التلاتينات. ومعاها بنتها 3 ثانوي. سكنوا في الشقه الفاضية اللي قصادنا. والدور اصلا شقتين.

في الأول مهتمتش بيهم لاني دايما في حالي. ومش بحب أختلط بالجيران والناس عموما. بس لاقيت في يوم الباب بيخبط بالليل متأخر. كانوا العيال نايمين وأنا وعلي سهرانين قدام التليفزيون. جري بسرعه جوزي وفتح الباب واتصدمت لما لاقيت جارتي واقفه بشعرها و بهدوم بيتي خفيفه ومبينه جسمها. جوزي استغرب وسألها: "خير يا ست هالة في حاجه؟ "ارجوك يا أستاذ علي الحق بنتي سها قاطعة النفس خالص." "يا ساتر يا رب. طب اسبقيني وانا جاي وراكي حالا."

وبعدها حصل اللي كنت خايفه منه.