رواية مريض الغرفة الفصل الحادي عشر 11 - بقلم حبيبة ممدوح

مشيت وأنا مش فاهمة هعمل إيه أو هروح فين، بس قررت أعرف مين اللي له يد إنه يحرض إيهاب على عاملة زي كدة. قررت هساعد أحمد وأخرجه من المستشفى دي بأقصى الطرق. أحمد مش مريض، هو بس كان عنده صدمة من وفاة والدته وشوية اكتئاب، بس هما اللي كانوا عاوزين يجننوه بالعافية ويرموه هنا. شوية شوية وبدأت حالته تتحسن فعلاً لما حس إن فعلاً معايا ومش ضده، وإن هعمل وبعمل أي حاجة عشان أخرجه من هنا على خير وحقه يرجع.

"وبكده يا أستاذ أحمد تكون كملت فترة علاجك على خير." كملت بابتسامة. "انت كده قدام الورق الرسمي مية مية." وقف في نص الأوضة، بص للشباك، وبعدين رجع بصلي وقال: "شكراً بجد." "شكر على واجب يا باشمهندس، المهم دلوقتي تبدأ حياتك الجديدة." "حاول تنسى كل اللي حصل هنا." "لا، مينفعش أبدأ من جديد غير لما أخلص القديم." "على اتفاقنا وأنا معاك." قرب وقال بوشوشة: "هحط الخطة وأكلمك." اتكلمت بنفس الوشوشة وقولت بضحك:

"خلي بالك بس لأحسن نروح في داهية." ابتسم وقال: "هنتقابل أكيد." "أكيد." مشي والمستشفى حسيتها بقت فاضية، مبقتش أحب أقعد فيها زي الأول. وهو موجود كنت بقضي الشيفت بتاعي وأكتر بين علاجه وقعدتي معاه. حاولت أخليه يثق فيا بعد ما خسر ثقته في كل الناس. حبيت أحسسه إن الدنيا لسه فيها أمان ومش كلنا مؤذيين، بس للأسف هو دلوقتي مشي وأنا اللي رجعت لوحدي. روحت على الفيلا اللي لقيت إخواتي كلهم متجمعين فيها.

دخلت بعد ما أم محمد اللي كانت بتساعد ماما في تنضيف البيت فتحتلي، رحبت بيا وقالتلي إن إخواتي موجودين. قعدت فترة في المستشفى وحتى مكلفوش خاطرهم يجوا يزوروني، بس معلش. دخلت بهدوء، شافوني الصدمة ظهرت على وشوشهم كلهم. إسلام قام من على الكرسي بسرعة وقال بصدمة: "انت طلعت امتى من المستشفى! "حالاً وجيت على هنا على طول." قال مصطفى: "بس دول قالوا إن خلاص دماغك فوتت." ضحكت وقولت: "فوتت؟ "لا، أنا تمام دلوقتي." سبتهم وطلعت.

"ده إزاي طلع ده؟ هو ده اتفاقك مع إيهاب النصاب ده يا مصطفى! "وأنا أعمل إيه، علمي علمك." ردت مرات إسلام وهي بتقول: "أنا قولتلكم نخلص منه، انتوا اللي مرضتوش…"