رواية مشاعر مشوهه الفصل الخامس 5 - بقلم زهرة الربيع

رفاعي رفع السلاح وقال بغضب: ريم تعالي هنه. ريم شهقت لما طلع السلاح ومسكت في يوسف بخوف. يوسف بص لها وقال: ما تخافيش محدش يقدر ياخدك مني أنا معاكي. ريم قالت بدموع: أنا خايفة عليك يا يوسف. رفاعي قال بغضب: ده خلاص باقي له دقايق معدودة وهيقابل ربه كريم. تعالي هنا بدل ما أبعتك تونسيه. ريم قالت ببكا: ملكش دعوة بيه يا رفاعي، خلاص أبوس إيدك يا عمي والله العظيم هو ما يقصد حاجة وحشة.

راضي قاطعها بغضب وقال: اسكتي يا بت وتعالي هنا بدل ما أقتله قدام عينيكي. ريم قالت بسرعة: حاضر حاضر جاية، بس ملكش دعوة بيه والنبي. ولسه هتتقدم عليهم، يوسف مسك إيدها قبل ما تروح له وقال: انتي رايحة فين؟ ما تسمعيش كلامه. وبص لراضي وهو بيحضنها بقلق وقال: ملكش دعوة بيها، محدش يقدر ياخدها مني على جثتي. رفاعي ضحك وقال: غالي والطلب رخيص، إحنا كده كده هناخدها على جثتك. وشد أجزاء السلاح. ريم وقفت قدام

يوسف بسرعة وخوف وقالت: ملكوش دعوة بيه، يوسف جوزي وأنا مش عايزة غيره. رفاعي اتصدم وراضي قال بغضب شديد: اتجوزتيه يا فاجرة. وضرب رصاصة بغضب أصابت يوسف في رجله. يوسف وقع على الأرض. ريم صرخت بقوة وقعدت جنبه وقالت ببكا وصراخ: يوسف.. أنت إيه اللي عملته ده.. رد عليا يا حبيبي. يوسف كان بيتألم بشدة ومش قادر ينطق، بس لما لقاها خايفة قال بتعب شديد: متخافيش يا حبيبتي مش هيحصلي حاجة، أنا معاكي.. مش هسيبهم ياخدوكي.

ريم قاطعته وقالت بدموع: أنا اللي همشي معاهم يا يوسف، مش هسيبك يجرا لك حاجة بسببي، أنا هروح معاهم. يوسف مسك إيدها وقال: انتي اتجننتي؟ تروحي معاهم فين؟ لا مش هيحصل. ريم بصت له بدموع وابتسمت وقالت: عجبني الحب في عيونك يا يوسف واتمنيت أعيشه وأستمتع بيه لآخر لحظة في حياتي.. اتمنيت أعيش الحياة اللي أنت رسمتها بس.. ونزلت دموعها بغزارة وقالت: بس ملناش نصيب يا يوسف. وفلتت إيده ومشيت. يوسف مكانش قادر يقف عشان رجله،

بقى بيقول بزعيق ودموع: لا يا ريم.. لااا.. سيبوها يا كلاب.. ما تروحيش معاهم يا ريم.. ريم استني... رييييييم. بس ريم راحت وقفت جنب راضي وقالت: أنا أهو يا عمي، بس سيبه والنبي. راضي ابتسم وشد أجزاء سلاحه وقال: يا أهلاً بيكي يا روح عمك.. بس مش هنسيبه برضو، البادي أظلم. وأمسكها من إيدها ووجه المسدس على يوسف. ريم اترعبت بشدة. بس في الوقت ده عربيات البوليس حاوطت المكان. ونزلت جيهان والدتها وشاورت

على راضي ورفاعي وقالت: هم دول يا باشا. وضربوا أخويا بالرصاص كمان. راضي قال بغضب: أخوكي يا فاجرة. ولسه هيتهجم عليها البوليس أخدوه وطلعوا بيه على البوكس. جيهان جريت على يوسف وريم وحضنت بنتها والتفتت ليوسف بسرعة وقالت: يوسف عملوا فيك إيه المجرمين دول؟ يوسف ابتسم لها بدموعه وقال: معقولة انتي تساعديني يا جيهان بعد اللي عملته؟

جيهان قالت: أنت ساعدتني الأول ووقفت جنبي وجمب بنتي وحميتني وحميت فلوسي من الكلاب دول من غير مقابل يا يوسف.. أنا آسفة، كان المفروض أحكي لريم الحقيقة وأفاتحها في موضوعك من يوم ما قولتلي إنك بتحبها وعايز تتجوزها.. ما كانش يصح أغامر بمستقبلها وأسلمها بإيدي للمجرمين دول.. أنت أجدع شاب شفته ووقفت معايا للآخر.. عمري ما كنت هلاقيلها أحسن منك.. سامحوني.

ريم حضنت أمها وقالت بدموع: أنتي جيتي في الوقت المناسب يا ماما، خلينا ناخده على المستشفى ده بينز.. جيهان قالت بدموع: مش هيحصاله حاجة يا قلب ماما، هيقوم بالسلامة وهتعيشوا سوا ومعايا محدش هيفرقنا وهجوزكم وأعملكم أجمل فرح. ريم قالت بحرج: احم.. كل اللي قولتي حلو وكل حاجة، بس إحنا كتبنا الكتاب يعني هو يا دوب كتب كتاب حاجة بسيطة. جيهان بصت لهم بذهول وقالت: اتجوزتيها من ورايا يا يوسف؟

يوسف ضحك بألم وقال: يا ستي مش جواز أصلاً، ده إحنا لسه في مرحلة البوس.. لو فضلت عايش نعمل الفرح عندك ونغير العتبة يمكن ربنا يفرجها علينا. جيهان ضربته وقالت: بطل سفالة وقوم معايا خلينا نلحقك.. ومتقلقش عمر الشقي بقى. وصلت الإسعاف وأخدوه على المستشفى. وجيهان كانت معاه هي وريم اللي كانت جنبه وماسكة إيده ومش راضية تسيبه. يوسف قال بتعب: اااه شكلي هموت يا بت.. قبل ما آكل الفطير.. وأكسر السرير.

ريم بصت حواليها لبتوع الإسعاف اللي كانوا قاعدين بيبصوا لهم وقالت بارتباك: بيهلوس من الخضة، مش عارف بيقول إيه. وميلت عليه وقالت بغيظ: إيه اللي بتقوله ده؟ اكتم بقى هتفضحنا. يوسف ضحك على كسوفها وطلعوا على المستشفى. هناك طلعوا له الرصاصة وعقموا الجرح وكل شيئ كان تمام. بالليل كان يوسف في أوضة المستشفى وجيهان وريم جنبه. وابتسموا بسعادة رهيبة لما فتح عيونه بتعب. ريم قالت بفرح: يوسف حمد الله على السلامة يا حبيبي.

يوسف ابتسم وقال: الله يسلمك يا قلب يوسف.. بس هو ينفع بعد كل ده حمد الله على السلامة حاف كده؟ طب غمسها لي ببوسة حتى. ريم اتسعت عينيها لأن أمها موجودة. جيهان حمحمت وقالت: حمد الله على السلامة يا خفيف.. ابقى غمسها انت لما تخف. يوسف بص لها بدهشة مكانش واخد بالو إنها موجودة. ابتسم بارتباك وقال: إيه ده حماتي.. كنت لسه هسأل عليكي. جيهان

ابتسمت بعدم تصديق وقالت: والله ما كنت هتسأل عليا لو أخدت 10 سنين هنا.. على العموم حمد الله على السلامة. أنا هطلع أستنى بره.. بس مش عايز فضايح في المستشفى، سامع. يوسف ضحك. وجيهان خرجت. يوسف بص لريم وقال: أمك صايعة قديمة فاهمة الدنيا ماشية إزاي، مش زي بنتها خيبة. ريم ضحكت وقعدت على السرير جنبه وقالت: أنا فعلاً خيبة.. بس بتعلم بسرعة، لو حابب تديني دروس بعني. يوسف قعد بحماس وقال: ده أنا قاموس.. جربيني.

وشدها لحضنه وقرب منها. بس بعدت شوية وقالت: ماما قالت إيه؟ يوسف قال: قالت مش عايزة فضايح في المستشفى. عشان كده أنا شايف تروحي تقفلي الباب ده ونبدأ الدروس من غير فضايح. ريم ضحكت وقالت: لا، لما نروح. يوسف بص لها وقال: بجد؟ يعني لما نروح هتخليني أنزل الملعب ولا هفضل في الاحتياطي كتير؟ ريم ابتسمت وقربت منه وقالت بجراءة: هتلعب وتجيب جوان كمان. يوسف ضحك بقوة وقال: أيوه كده بقى، ده أنا كنت هفقد الأمل في الدوري السنة دي.

ريم ضحكت وحضنته وقالت: الحمد لله على سلامتك.. الحمد لله ربنا استجاب دعايا وقومك ليا بالسلامة. يوسف باس على دماغها وقال: الحمد لله على كل حال.. كنتي حلم مستحيل بالنسبالي، بس فعلاً مفيش مستحيل على ربنا. ريم بصت لعيونه وقالت: هتفضل تحبني كده على طول؟ يوسف ابتسم وهو بيبص

لعيونها بعشق واضح وقال: لآخر دقة في قلبي.. صحيح مشاعري ليكي كانت مشاعر مشوهة بالنسبة للكل، لاكن مكنش فيه أنضف منها جوايا.. والعشق اللي في قلبي ما تخلقش غير ليكي ولعيونك الحلوين عيون الريم اللي قتلوني.