رواية متعة الحياة الفصل الرابع والعشرون 24 - بقلم عادل عبدالله

سهام وافقت ترجعلي، لكن بشرط إن الفلوس اللي معايا أكتبها باسم العيال. ضحكت أوي وقولت لأيوب: فلوس إيه اللي أكتبها باسم العيال!! أنا خلاص مش معايا إلا الشقة اللي اشتريتها بتمن العربية. أيوب قالي: لأ، أنت لسه معاك فلوس. هتيجي منين الفلوس يا أيوب، بقولك بقيت مش معايا حاجة.

قالي: ما هي دي المفاجأة، قبل ما تبيع الأرض سهام راحت وراك البلد واتكلمت مع المحامي قريبك واتفقت معاه إنه ما يبيعش 3 فدادين من الأرض الزراعية على أساس تبقى حماية لو الفلوس راحت، كأنها كانت حاسة إن الفلوس هتضيع!!! فرحت أوي ووافقت ورجعت لسهام تاني وكتبت الـ 3 فدادين بأسامي هادي وزياد وميادة.

لكن بالصدفة، أثناء ما روحت البلد أشوف الأرض علشان أكتبها باسم العيال، اكتشفت إن قريبي المحامي كان باع الأرض بفارق سعر حوالي 8 مليون جنيه، أخدهم في جيبه!!! كنت عاوز أروحله أعمل معاه مشكلة علشان أسترد فلوسي، لكن أيوب قالي إن الأوراق كلها قانونية. وفعلاً روحت للمحامي وقولتله إنه ضحك عليا في تمن الأرض. رد وقالي إن كنت مستعجل في بيعها وإنه أخد الفلوس دي سمسرة، وإنه لولاه ما كنتش هورث أي حاجة!!!

وقالي احمد ربنا إني سبتلك 3 فدادين، وإلا كانوا ضاعوا زي اللي ضاع. رجعت أنا وأيوب وأنا بتحسر على اللي حصلي وقولتله: الظاهر يا أيوب إنك كان عندك حق. قالي: كان عندي حق في إيه، مش فاهم قصدك؟ : إن الفلوس فعلاً مش نعمة، وإن قلتها هي اللي نعمة. قالي: لا يا طارق، تبقى أنت مش فهمت كلامي. أنا قولتلك الفلوس ممكن تبقى نعمة لبعض الناس، وممكن قلتها تبقى نعمة لناس تانية. قولتله: أيوه صح، أنت قولت كده.

قالي: الفلوس زيها زي أي نعمة، عبارة عن اختبار من اختبارات ربنا للناس. في ناس ربنا بيختبرهم بكترة الفلوس، وناس تانية ربنا بيختبرهم بقلتها. وفي الآخر ربنا خلقنا درجات في كل حاجة علشان نحتاج كلنا لبعض وتستمر عجلة الحياة. وأنت كإنسان، الواجب عليك إنك ترضى بقسمة ربنا ليك وبرزقك اللي كتبهولك. إذا كان كتير، تحمد وتشكر وتعمل الخير. وإذا كان قليل، ترضى وتصبر وبرضه تعمل الخير.

: كلامك حلو يا أيوب، لكن أعيش من غير ما يكون عندي طموح يعني؟ : لا يا طارق، ما قولتش كده. بالعكس، لازم يكون عندك طموح وأمل تعيش له، لكن أنت اتعب واجتهد، وفي النهاية ارضى باللي قسمه ربنا ليك تعيش مرتاح. : صح يا أيوب، معاك حق. وكمان يا طارق، أنت غلطت في حاجة تانية. : إيه هي؟ : غلطت لما افتكرت إن بفلوسك هتخلي الناس كلها عبيد عندك، وإنك ممكن تشتري أي حاجة، حتى الناس هتشتريهم بالفلوس.

: لكن الحقيقة يا أيوب، إن في ناس كتير فعلاً ممكن تشتريهم بالفلوس. : أيوه يا طارق، بس دول مش كل الناس. الناس الرخيصة بس هي اللي ليها تمن وتشتريها بالفلوس. : كلامك حكم يا صاحبي. : بتتريق على كلامي يا طارق؟!! ولا هتقولي كلام قصص وأفلام قديمة زي ما كنت بتقول قبل كده؟ : لا يا صاحبي، أنا بتكلم جد. أنا اتعلمت كتير، ويا ريتني كنت سمعت وفهمت كلامك من بدري.

طيب بص بقى يا صاحبي، أنا بعد غربة 4 سنين راجع ومعايا قرشين للعيال وعاوز أعمل مشروع وعاوزك معايا. : عاوز تشغلني عندك يا صاحبي؟ : أنت تعرف عني كده؟!! قصدك معايا يا صاحبي، ده أنت أخويا، معقول أشغل أخويا عندي!!! : لا يا أيوب، مينفعش. : مش بمزاجك يا صاحبي، أنت خلاص اشتغلت معايا. انتهت.