رواية نبضة صامته الفصل الثالث 3 - بقلم ندى رأفت

أتغيرت ملامح وشه وقال بحده وزعيق وهو بيبص لها بقرف: "هو انتي لسه هنا؟ هو أنا مش قولتلك يا نهى تدوريلها على عريس وتغوريها من هنا بقى؟ اتخضت نور واستخبت ورا محمود وشدت على الجاكيت بتاعه جامد. بصلها محمود وخد نفس بغضب وكور إيده وضغط على صوابعه جامد. نهى بصت على محمود وراحت لسليمان بسرعه وقالت: "إهدى يا سليمان، الجواز دا نصيب وهي لسه نصيبها مجاش. سهى يا بنتي أطلعي استنينا في الجنينه يا حبيبتي وأنا جايه دلوقتي."

سهى بهدوء: "حاضر يا ماما نهى." وخرجت. نهى: "إهدى يا سليمان، كفايه فضايح بقى، مينفعش كدا." سليمان بغضب: "اتصرفي، أنا مش طايق أشوف خلقتها دي قاعده معانا ٢١ سنه، أكله وشاربه ومعيشينها أحسن عيشه وصارفين على تعليمها، كفايه كدا، إيديناها كتير." نهى بتوتر: "سليمان.... محمود بهدوء ممزوج بالحده قال: "بفلوسي." راح بصله سليمان وقال: "إيه؟! محمود بهدوء: "بقولك بفلوسي، وأكله شاربه مصروف على تعليمها بفلوسي." سليمان بسخريه:

"لا وانت صارف وشغال وطافح الدم من وانت عشر سنين يا واد." محمود بغضب وهو سامع شهقات ورعشات نور وراه وهي بتشد على الجاكيت بتاعه جامد، مقدرش يتحكم في نفسه أكتر من كدا وقال بزعيق: "كل فلوسك اللي صرفتهم عليها أرجعهم لك على داير مليم، ولو عايز أكتر قول لي." نهى بغضب: "محمود متتكلمش مع أبوك بالشكل دا تاني، أكيد أبوك مش قاصده اللي انت فاهمه." سليمان بغضب: "أزاي والموضوع متعلق بالبت دي؟

دا يكلمني ويزعقلي وممكن يوصل إنه يضربني كمان عشانها. صح يا محمود؟ بس بص بقى، يا أنا يا هي في البيت دا." خد محمود نفس وحاول يتكلم بصوت هادي وقال: "أكيد انت يا بابا، ولا تضايق نفسك."