رواية نور الجاسم الجزء الثالث الفصل الأول 1 - بقلم نيللي ياسر

في بيت شادي وملك.. شادي نازل على السلم بسرعة وباين إنه زعلان، وملك نازلة وراه بتجري. روح بنتهم قاعدة قدام التلفزيون، ولما شافتهم كده سابت الريموت وانتبهت ليهم. ملك: شادي بقولك استني هنا. شادي: عايزه إيه بقى مني؟ أنا قرفت. ملك: بقيت أنا اللي بنكد دلوقتي؟ شادي: أيوه بتنكدي. تسمي إيه إني أدخل آخد شاور وحضرتك تفتشي في هدومي وتلاقي علبة فيها خاتم، ولما أخرج وأقولك إني جايبه ليكي تعملي تحقيق؟

هو الخاتم ده ليا ولا لواحدة تانية؟ جايبهولي بمناسبة إيه؟ إنتِ أكيد بتكذبي. خد اديه للزبالة اللي تعرفها. قلتلك معرفش حد غيرك والخاتم ليكي، أعمل إيه تاني! ملك بزعيق: انت كداب يا شادي! وأكيد تعرف واحدة عليا. شادي مسكها من إيديها جامد وهو بيجز على سنانه، بس تمالك نفسه وخد مفاتيحه وخرج. ملك: براحتك يا شادي.. براحتك أوي! روح: أنا ماشية. ملك: رايحة فين بقى إن شاء الله؟ هو كله هيمشي بسببي؟

روح بصراخ: هو أنا قولت إني ماشية بسببك؟ أنا ماشية عشان تتخانقوا براحتكم. كل يوم خناق.. خناق.. أنا تعبت! ملك: روح اقصري الشر، انتي لسه مخلصة امتحانات، متخلنيش أنكد عليكي. روح: انت.. هغور أوضتي. يا ريت متطلعش ورايا. روح طلعت أوضتها. ملك: البت بتزعق.. انتي يا أستاذة روح.. (طلعت برضو وراها) في أوضة كنز اللي في فيلا آدم، كنز لابسة بيجامة وقاعدة على السرير. جمبها ليلي. كنز: يوووه.. يا بنتي ارحمي نفسك هتعنسي.

ليلي بحزن: أعمل إيه بس يا كنز؟ أبوكي مش بيحس. كنز: قوليله.. عرفيه إنك بتحبيه! ليلي: يا كنز أنا بقالي سنين بلمحله، وهو مش حاسس. كنز: مش كفاية تلميح.. انتي لازم تواجهيه! ليلي بتوهان: أواجهه إزاي؟ كنز: بصي يا ليلي، أنا بحب بابا جداً وعارفة إنك بتحبيه وهو بيصعب عليا. بابا صغير مش كبير وقمور جداً وصاحبي بيعاكسوه، بس هو قافل باب الجواز والحب نهائي، وإنتي اللي هتفتحي الباب ده. وأنا بقى اللي هديكي المفتاح.

ليلي: يعني أعمل إيه؟ مفيش حاجة بتأثر فيه. كنز بلمعة عين: خليه يغير. في بيت جاسم، كلهم قاعدين فوق الفيلا على السطح، ومشغلين التلفزيون على ماتش كورة وقاعدين بيضحكوا كلهم. جاسم حاضن نور وبيتفرج. تاليا بنتهم بتتكلم في الفون. نوح ويزيد قاعدين على الأرض بيشجعوا. حور قاعدة على رجل عمر وعمالة تضحك وعمر عمال يقول نكت. عمر: طب اسمع دي. جاسم: اخرس يا اض كفاية. كتك داهية في خفة دمك. عمر بصوت أنوثي: مبقناش نعجب يعني!

نور: ههههه.. فاكر يا جاسم أول لما اتجوزنا وكان في ماتش برضو وكنا قاعدين في نفس المكان وانت حاضني كده؟ ولما الماتش خلص.. هههههه. حور: أيوه لما ضرب الظابط. ههههه. جاسم بضحك: يا جماعة عندي حق. واحد بيقولي جاي آخد مراتك.. هقوله إيه؟ عمر: وهو يعني هياخدها يفسحها؟ ده كان عايزها في محضر. نوح: جوووووول.. طب والله العظيم حلوة. يزيد بخنقة: يا عم الحكم ده قابض. نوح: ششش.. اسكت يا زملكاوي.

جاسم: هاتي الفون يا تاليا، هكلم ملك الزملكاوية دي كمان. تاليا بعدت الفون شوية: حاضر يا بابي. إيه يا بنتي بقولك مش معبرني خالص. تاليا واقفة بعيد عنهم. البنت: يا بنتي ده أخوكي بتغيري عليه. تاليا: انتي مش فاهمة، إحنا كنا بنحب بعض إزاي، بس من ساعة ما بدأ يحب ست روح وهو مش مهتم بيا. البنت: انتي بتغيري من روح بنت عمتك؟ تاليا: لا طبعاً دي أختي، بس بحس إنها بتاخده مني. جاسم: الفون يا توتي.

تاليا: طب باي دلوقتي.. الفون أهو يا بابي. يزيد: تعالي اتفرجي معانا يا تاليا. تاليا: مش بحب الكورة يا يزيد. تعالي انت نتفرج على فيلم. يزيد: يلا. نوح: اقعد يا اض. روحي اتفرجي لوحدك، إحنا متابعين الماتش. جاسم: ملك مش بترد. تاليا: بابي خلي يزيد يجي معايا. هو دايماً بيسمع كلام نوح. جاسم: هو ولد يا روح بابي ومتابع الماتش، مينفعش تيجي تقوليله فجأة تعالي نشوف فيلم. تاليا: طب أعمل إيه بقى؟ أنا عايزة بنت.

جاسم بيغمز لنور: غالي والطلب رخيص. نور بكسوف: احم... روح بنت عمتك زمانها جاية. تاليا: أنا هروح أكلمها. نوح بسرعة: لا خليكي، أنا هروح. نوح جري على تحت عشان موبايله تحت ونزل وقف قدام باب الفيلا، ولسه هيتصل الباب خبط. نوح فتح: روح.. انتي بتعيطي ليه؟ روح حضنته وهي بتعيط. نوح: أهدي.. طب فيه إيه؟ انتي كويسة؟ عمتو وشادي كويسين؟ روح ببكاء: كل يوم خناق وأنا تعبت أوي.. أنا عايزة أبعد عنهم.

نوح: أهدي يا روح أهدي.. تعالي نطلع دلوقتي ونشوف حل. روح بوش أحمر: ح.. حاضر. نوح بضحك: إيه الطاعة دي كلها! روح ضحكت وطلعت على فوق، ونوح وراها. كنز واقفة في الأوضة وخلصت لبسها وبتلم حاجتها عشان النهاردة هتبات عند جاسم. وليلي قاعدة بتكلمها. كنز: يا لولي أنا كبرت، خلاص خلصت ثانوي وهدخل جامعة، يبقى تأجلي إنك تقولي له إيه؟ ليلي: بس أنا هقوله بكرة. كنز: أوك.

كنز وقفت قدام المرايا تراقب نفسها، وكانت لابسة جيب جلد وتيشيرت بكم أحمر وكوتشي أحمر وشنطة على ضهرها بيضاء. كنز: يلا ابقي قولي لبابي إني مشيت بسرعة عشان متأخرش وسلميلي عليه. باي يا لولي. ليلي: باي يا حياتي.

كنز نزلت وركبت الاسكوتر بتاعها، أيوه ما هي الدلوعة بتاعت العيلة وطلباتها مجابة، والاسكوتر ده كان من جاسم بمناسبة إنها خلصت ثانوي بمجموع كبير جداً. ركبت الاسكوتر ونزلت في بنزينة عشان البنزين بتاع الاسكوتر بيخلص. ودخلت تشتري قهوة من جوه. قعدت على كرسي قدام الراجل. كنز: واحد آيس كوفي لو سمحت. الراجل: حاضر يا فندم.

كنز طلعت الموبايل وبتقلب فيه، وقاعد على الكرسي اللي جمبها مالك اللي اتخانقت معاه قبل كده. بص لها وضحك ودور وشه الناحية التانية، وهي بصت للي بيضحك واتكلمت. كنز: مش شايف حاجة تضحك يعني. مالك من غير ما يبصلها: المتدلعة! كنز بتضييق عين: انت ال... مالك بص لها: هههه.. شوفي الصدف! اتخانقت معاكي من كام شهر وأقابلك تاني. ده ربنا كاتبي إني أبوظ وشك الجميل ده. كنز: هه.. أظن أنا اللي حظي حلو إني هضربك تاني ولا نسيت.

مالك باستفزاز ونظراته وحشة ليها: طب ما تيجي نجرب في بيتي وشوفي مين هيخلي التاني يمشي مكسور.. go! الراجل: الآيس كوفي يا فندم. كنز بابتسامة مستفزة: ميرسي.. بس أظن هو اللي هيشرب. كنز في لحظة كانت خدت الآيس كوفي رمته على مالك، بس لأن الآيس كوفي بارد طبعاً محرقوش، بس هو خلع النضارة اللي لابسها وبيمسح عينه. كنز وهي ماشية: المرة الجاية انت اللي هتستخبى مني، أظن كده بقى نبدأ... go؟!

كنز كانت هتمشي بس سمعت صوته من وراها، لفت ولقته واقف قدامها والناس بتتفرج. مالك: go!