رواية نور الجاسم الجزء الثالث الفصل السادس 6 - بقلم نيللي ياسر

طب يبقى أنا بقى ماليش لازمة! كنز بصت للصوت وكان نادر ولسه بوسامته واقف بيضحك. كنز وهي بتحضن جاسم: شكرًا شكرًا شكرًا... أنا بحبك أوي. جاسم: أنتِ عارفة إني بكرهه بس عشانك أنتِ جبته مصر. نادر: وبتتكلم في وشي كده. جاسم: آه في وشك. كنز: أنا عايزة أتعلم كل حاجة. نادر: اهدي بس الأول كده... وبعدين أنتِ جسمك ضعيف محتاج تمارين معينة. كنز ضربته بالبوكس: طب وكده؟ نادر: لا بس تنفع تشتغل مدرب يا عمر. عمر: حبيبي.

نور: يلا الغداء جاهز. مالك دخل بيته ورمى المفاتيح وكان داخل أوضته بس صوت أمه اللي قاعدة بتتفرج على فيلم إسماعيل ياسين وقّفه. فاطمة: تصدق أنا مستمتعة وأنا بتفرج على تربيتي اللي بتضيع أكتر من أفلام إسماعيل ياسين. مالك ببرود: طيب كويس. فاطمة بغضب: استنى عندك! مالك: نعم. فاطمة: أنت سحبت ورث أبوك من البنك؟ مالك: أظن دي فلوسي... وكان المفروض أسحبها من زمان بس اتأخرت. فاطمة: وهتعمل إيه بكل الفلوس دي؟

مالك: أظن إن دي حاجة تخصني. فاطمة: خلي بالك لو أذيت البنت دي أنا اللي هقف لك. مالك بسخرية: أنا داخل أنام. تاليا: طب بتعيطي ليه؟ روح: عشان أخوكي زعلان مني جدًا. تاليا بسخرية: أنا عندي مرارة واحدة، اخلصي إيه اللي حصل؟ روح ببكاء: أنا هسافر دبي مع مامي وبابي... وهو زعلان. تاليا: نعم! طب ما ترفضي، وبعدين ما أنتِ عارفة ومتأكدة إن أنكل شادي وملوكة مش هيرفضوا.

روح: يا تاليا اسمعي، أنا عايزة أحقق حلمي وأبقى إعلامية كبيرة، وبعدين أنا من يوم ما اتولدت وأنا بشوف بابي ومامي بيتخانقوا، وأنا حاسة إنهم لو بعدوا هيبقوا كويسين... وأنا نفسي أعيش معاهم بسعادة... أنا دايمًا بشوف طنط نور وجاسم مبسوطين، مش بحسدهم لا طبعًا ربنا يخليهم لبعض بس أنا نفسي نبقى زيهم... أنتِ فهماني؟ تاليا وهي بتقوم: اللي أنا فاهماه إنك لو بتحبي نوح هتقعدي. ملك: يعني يا جاسم خلاص أنت موافق؟

جاسم: لو سعادتك هتبقى هناك يبقى أنا موافق. نور بدموع: هتوحشيني يا ملك. ملك ببكاء: والله هنزل إجازات وأنتوا هتيجوا أكيد. عمر: نعم! هو إحنا نخلص منك هنا ونروح ليكي هناك؟ حور بتضربه وتضحك: بطل برود... هتوحشيني يا كوكو. ملك: وأنتِ كمان والله يا حور. جاسم: طيب محدش يقول للأولاد دلوقتي. نور: ماشي. ليلى خارجة عشان تقابل العريس ولابسة فستان بينك ضيق وقصير من عند الرجل حتة بسيطة وحزام أسود وطرحة سوداء وهاف بوت أسود.

أم العريس: بسم الله ما شاء الله... إيه القمر ده الله أكبر. ليلى بحزن: شكرًا يا طنط. أم ليلى: سلمي على عريسك يا لولي. ليلى: أهلًا. العريس حسام: إزيك يا ليلى؟ ليلى: الحمد لله اتفضل. أم العريس: بصي بقى يا أم ليلى كل طلباتك مجابة وحسام متربي مع ليلى وإحنا جيران يبقى ملوش لازمة الخطوبة ونقرأ دلوقتي الفاتحة والأسبوع الجاي كتب الكتاب. ليلى بسرعة: بس أنا... أم ليلى: موافقين... نقرأ الفاتحة بقى.

بعد ما خلصوا مشيوا وليلى بتغلي. ليلى: ليه عملتي كده؟ أنا مش عايزاه بكرهه. أم ليلى: وطي صوتك يا ليلى. ليلى بصوت أعلى: أنا بكرهه مش هتجوز! أم ليلى ضربتها بالقلم وهي اتصدمت ومشيت وراحت لأكتر حد بتحبه. آدم قاعد زعلان ووحيد، الأكل قدامه بس مش بياكل... زق الأكل وقام يتأمل الڤيلا ويفتكرها. آدم: نفسي ترجعي بقى... ارجعي يا ليلى. الباب خبط وهو جرى على الباب. آدم وهو بيفتح: ليل... ريناد!