رواية نزاع ولاد الاكابر الفصل الحادي والعشرون 21 - بقلم رودي

في الاسطبل. تقف ليلة وبرفقتها حسن ينظرون للخيل ويقوم حسن بتجهيز أحد الخيول الخاص بعبد القادر. ليلة: وحشك الخيل يا حسني. يترك حسن ما بيده ويلتفت لها ويضمها بصدرة قائلا: حسن: كل حاجة معاكي وحشتيني. ليلة: تعرف أوقات كتير كان نفسي أصرخ وأقول إنك عايش، وبالذات في مشاكل الولاد. حسن: بس إنتي كنتي قد المسئولية واتحملتي عشاني كتير أوي، أنا مش عارف من غيرك كان ممكن أعمل إيه. إنتي كل حياتي يالولي، أنا بحبك أوي.

ليلة: وأنا عمري ما حبيت ولا هحب غيرك، إنت الأمان يا حسن، إنت حضني، إنت. أنا من غيرك مسواش حاجة. أنا لولا قابلتك زمان كان زماني مت. يقبل حسن جبينها قائلا: حسن: بعد الشر عليكي يا روحي. أنا اللي بشكر الظروف والوقت والزمن إنه خلاني قابلتك يا قلبي. ليلة: بحبك. حسن: ربنا يخليكي ليا. حسن بمشاكسة: طب تعالي عايزك في موضوع مهم بس فوق في الأوضة. وأنهى جملته وهو يغمز بعينيه. ليلة: ههههههههه طب والخيل. حسن: مش وقته، تعالي بس.

في غرفة يوسف. يجلس يوسف على الفراش وينظر لتلك الناعسة بهدوء، ليقترب منها ويضع يديه على بطنها المنتفخة قليلا أثر الحمل ويقول بهمس في أذنها. يوسف: بحبك. اصحي بقى عيونك وحشتني. قومي يا سارة بقى. تتململ سارة بالفراش وتقول بنعاس: سارة: امممم سبيني شوية يا يوسف والنبي. يوسف: بقالك كتير نايمة وإنتي وحشتيني، قومي بقى. سارة: والله مش قادرة يا حبيبي وعايزة أنام. يوسف: بقيتي بتنامي كتير أوي، قومي يا سارة بقى.

سارة بتعب: حاضر هقوم. يوسف: أقولك قومي خدي شاور واجهزي عشان هننزل نشتري شوية حاجات وكمان إنتي عاوزة فستان عشان الفرح. سارة: يالهوي دا أنا كنت ناسيه موضوع الفستان ده. يوسف: أنا فاكر يا قلبي، يلا قومي. سارة: حاضر يا حبيبي. غرفة يونس. يجلس يونس على أحد الكراسي الموجودين بالغرفة وأمامه علبة الإسعافات الأولية يبحث عن شئ ما ويقول بصوت عالٍ نسبيًا.

يونس: يا جوري أنا مش لاقي أي مسكن أو أي إبرة توقف الترجيع، هروح أشوف أي صيدلية وأجيب لك أي مسكن وجاي. لتخرج جويرية من المرحاض وهي تمسك ببطنها وتتألم وتقول بتعب. جويرية: لا يا حبيبي دلوقت أبقى زينة. يونس: لا إنتي شكلك تعبانة أوي. ويلتفت يونس لكي يغادر الغرفة ولكنه توقف فجأة وقال. يونس: يا جوري هي متأخرة. جويرية بعدم فهم: هي مين دي. يونس: يا جوري ركزي معايا. جويرية: آآآآآه فهمت. أيوا متأخرة، بس دا إيه علاقته بتعبي.

يونس بحب: علاقة إنه ممكن تكوني حامل. جويرية بصدمة: أنا. يونس: لا. لا، لازم أتأكد بنفسي. بعد يوم حافل من شراء الطلبات الخاصة بحفل الحناء والزفاف وتأكد الجميع من حمل جويرية وسط الفرحة والسعادة من قبل الجميع. وقد أشرف الجد عبد القادر على تجهيزات الزفاف بمساعدة مصطفى الذي أصبح جزء من عائلة الهواري، ومر يوم الحنة بسلام، أتى يوم الزفاف. يوم الزفاف صباحًا.

انقسم الدور الأول في ثريا الهواري إلى قسمين، قسم يضم الشباب والقسم الآخر للفتيات. غرفة الشباب. يجتمع بها كل من يوسف ويونس وأسر وأسامة وإقدام ومصفف الشعر الخاص بالرجال يتسامرون ويضحكون. يوسف: إنت بتعمل إيه يا زفت. أسر: اسمع مني بس وخليه يعملك خط في الجنب كده هيبقى تحفة. يوسف: خط في عينك يا حيوان. اتلم بدل ما أنكد عليك النهاردة. أسر: إيه يا عم براحة، مش كفاية سايبك تحلق قبلي وأنا العريس مش إنت.

يونس: الواد دا عايز يتعلق النهاردة. يوسف: أنا مراعي إن النهاردة فرحك لولا كده كنت ربيتك من تاني. أسر: هههههههههه الله يبارك فيك. يوسف: وربنا متخلف. أسر: أعمل لكم إيه، مفيش حد خد باله إن النهاردة فرحي وأنا عريس وقالي مبروك. إقدام: ما هو دا اللي مصبرنا على رزالتك ومخلينا ساكتين. أسر: أنا رزيل، دا أنا قمر. أسامة بمزاح: قمر بالستر يا خوي. يوسف: امال بابا فين. يونس: من ساعة الفطار مشفتهوش. أسر: تلاقيه بيلبس وجاي.

غرفة الفتيات. ارتدت كل من عهد وشهد فستان الزفاف الخاص بها وجلست أمام مصففة الشعر وخبيرة التجميل لكي يقمن بآخر التجهيزات من أجل حفل الزفاف. هنا: أنا مش عارفة هحضر إزاي بشكلي ده. سارة: امال أنا أعمل إيه. جويرية: ههههههه الحمد لله إن لسة في الأول ومش باين عليا. عهد: والله الفساتين تحفة عليكم. شهد: آه والله لايقين عليكم أوي. عهد: امال ليلة مختفية فين. سارة: أنا مشوفتهاش من بدري، تلاقيها بتجهز. غرفة حسن وليلة.

يقف حسن أمام طاولة الزينة يصفف شعره الحريري بعدما ارتدى بدلته التوكسيدو الرائعة، ويطلق صفيرًا هادئًا من بين شفتيه، ويمسك بقنينة العطر الخاصة به ويقول. حسن: يلا يا لولي هنتأخر. ليلة: أنا جاهزة بس لبسني العقد ده. أنا مش عارفة إزاي طاوعتك واشتريت الفستان ده، دا مفتوح أوي. أنهت ليلة حديثها وترفع نظرها إلى حسن وتجده يتفحصها بعينيه بكل جرأة ولا يتحدث. ليلة: مالك يا حسن، إنت كويس. حسن بحب: كويس إيه، الله يسامحك.

ليلة: في إيه. حسن: إيه الجمال ده. إنتي بتكبري ولا بتصغري. لتطلق ليلة ضحكة أنثوية رائعة وتقول: ليلة: هههههههه بزمتك بصغر دا، كلها كام شهر وأبقى تيتة. يقترب حسن منها ويمسك العقد الألماسي من يدها ويلفها ليجعل ظهرها موالي له ويقول بحب وهو يلبسها إياه. حسن: أحلى وأجمل وأرق تيتة. أنا بعشقك يا كل عمري، أنا بحبك أوي يا ليلة. تغمض ليلة عينيها وتشتم رائحة عطره الرائعة وتقول:

ليلة: وأنا بموت فيك يا قلب ليلة. إنت لسة فاكر إني بحب البرفيوم ده. حسن: بعشق. وأنا بموت فيه وفيكي يا قلب حسن. تعالي بقى بصي على المراية كده.

لتخطو ليلة بعض الخطوات وتقف أمام طاولة الزينة وتنظر في المرأة وهي تتفحص فستانها الأسود المرصع باللؤلؤ الفضي ذو الحمالات الرفيعة ومنحدر من الصدر وعاري الظهر تمامًا وبه فتحة من الأمام تصل لركبتيها، وذلك العقد الألماسي الذي أضاف لمسة رائعة على عنقها مصحوبًا بالأقراط التابعة له، وقامت بوضع شعرها على جانبها الأيسر مع بعض مساحيق التجميل، فيا اللهي لقد كانت في أبهى صورتها، ليقاطع نظراتها صوت حسن قائلاً.

حسن: صدقتي إنك أجمل من القمر. ليلة: يالهوي يا حسن دا أنا بقيت أصغر من بنتك، لا لا لا مش هنزل كده. ليقبل حسن كفها قائلاً: حسن: كل مرة بشوفك فيها هتفضلي في نظري البنت اللي عندها 17 سنة بملامحها اللي عمري ما نسيتها ولا هنساها. بحبك. ليلة: بحب. وأنا بموووت فيك.

بدأت مراسم الاحتفال وبدأ حفل الزفاف وسط السعادة التي تعم الأجواء والمكان، لتهبط عهد برفقة أخيها الأكبر يوسف ويقوم بتسليمها لزوجها أسامة، وبعد ذلك لتهبط شهد برفقة عبد القادر ويقوم بتسليمها إلى أسر وسط الطبل والمزمار الصعيدي، ليلتفت عبد القادر ليوسف قائلاً. عبد القادر: خبر إيه يا ولدي، أمك وأبوك فين. يوسف: هروح أشوفهم ما من بد. ليبتَر يوسف كلامه عندما تبدلت الموسيقى إلى أغنية هادئة وهي (أنا كلي ملكك..لشرين عبد الوهاب)

وتنطفئ الإضاءة ويتسلط ضوء أبيض على وسط الحديقة ليظهر حسن وبأحضانة ليلة وهي تتمايل على أنغام الموسيقى، لينطلق فجأة تصفيق حار من الحضور مصحوبًا بالصفير دليلاً على الإعجاب الشديد بهم، وتعود الإضاءة مرة أخرى لينضم لهم أسر وشهد وعهد وأسامة ويوسف وسارة ويونس وجويرية وإقدام وهنا، لتنتهي الأغنية بعد عدة دقائق بحمل حسن ل ليلة ويقوم بالدوران بها، وينطلق التصفيق والصفير مرة أخرى، لينزلها حسن على الأرضية ويهمس أمام شفتيها قائلاً.

حسن: بحبك يا بنت الأكابر.