رواية و للنصيب رأي أخر الجزء الثاني الفصل الحادي والعشرون 21 - بقلم لوليتا محمد

فضلت تبص يمين وشمال وهي بتقوله بغيظ: سيادتك فين بقا؟؟؟ يوسف بإبتسامه هاديه وهو بيقفل فونه: هنا. ندي ابتسمت أوي وبصت وراها بسرعة بفرحة وسعادة مقدرتش ولا عرفت تداريها ولا تخبيها في نظرة عيونها ليه وهي بتبص في عيونه بشوق وشغف من غير ما تتكلم كلمة واحدة. ويوسف بشوق ظهر في نبرة صوته ونظرة عيونه وهو بيجيبها من فوق لتحت بإعجاب: تعرفي إن أول مرة يعجبني اللون ده. ندي بصتله بغيظ بس بإبتسامة كأنها عايزة تضربه. ويوسف بغلاسة

وهو بيقعد على درجات سلم: دايماً كنت بشوفه لون غريب واللي بيلبسه ناس أغرب. مش عارف أنا عاجبهم على إيه بصراحة. ندي بغرور مصطنع وهي بتقعد جنبه: إحم إحم. إحنا مش زي أي حد يابا. نحن نختلف عن الآخرون كومبليتلي. يوسف ضحك جامد أوي على طريقتها وغلاستها. وندي بسعادة لما شافت ضحكته: يآآآ. أخيرًا ضحكت. يوسف بمشاكسة وهو بيبص في عينها بإبتسامة ملت عيونه السود: تعرفي إني مش بعرف أضحك من قلبي غير لما بنغلس على بعض.

ندي بإبتسامة ملت وشها كله: طب أقولك على حاجة بس تخليها توب سيكرت. يوسف وهو بيبص في كل حتة في وشها بإبتسامة: قولي يا مجنونة. ندي بإبتسامة هادية وعيونها في عيونه: أول مرة بعيش حياتي بجد. يوسف بصالها بإستغراب. وندي بجدية شوية: ده بجد على فكرة. يوسف لسه مستغرب: إزاي يعني. ندي بهدوء وهي بتبص قدامها: أول مرة بحس إني مش خايفة أتجنن. مش خايفة أعمل أي حاجة. يوسف بهدوء: ده مش صح على فكرة. ندي

بصتله بسرعة بتكشيرة وبحدة: يا يوسف افهمني صح. يوسف بإبتسامة هادية وهو بيفرد وشها من تكشيرتها بإيده: طب ممكن من غير تكشيرة. ندي ابتسمت على تصرفه وبدأت تفرد وشها وبهدوء: عارف لما تبقى عايز تتجنن فتتجنن وأنت عارف ومتأكد إن في حد وراك حامي ظهرك. يوسف ابتسم أوي. وندي بدأت تتكلم بأريحية وهي مبتسمة: عارف لما تحس إن في حد ساندك وبيداري عليك وعلى غلطك وبيحميك من نفسك ومن اللي حواليك من غير ما يوجعك ولا يهينك ولا يجرح فيك.

يوسف بصلها بإستغراب على كلامها. وندي بصتله وهي مبتسمة أوي: هو ده إحساسي اللي بقيت أحس بيه. يوسف ابتسم بهدوء. وندي بإبتسامة هادية: ما بقتش خايفة. ما بقتش حاسة إني لوحدي. ندي وهي بتبص في عينيه بإبتسامة ملت عيونها: أول مرة بجد فعلًا أحس الإحساس ده. ندي بهدوء: أول مرة أبقى مطمئنة إن في حد واقف جنبي ومعايا مش ضدي. ندي بإبتسامة هادية: سايبني ومش سايبني. فاهمني يا يوسف.

يوسف كان مركز أوي في كل كلمة وكل وصف وكل نبرة صوت خارجة منها. وفهم ما وراء الكلمة. فهم اللي هي عايزة توصلهوله بطريقة غير مباشرة. فهم وعرف إنها بتحس بالأمان في وجوده هو وبس. آه بتغلط سواء بقصد أو بدون قصد بس في نفس الوقت هو موجود معاها بيوقفها قبل ما تزيد في غلطها أو تقع بسببه. آه بتتجنن بس مش لوحدها. بتتجنن في وجوده وهي واثقة فيه إنه هيوقفها لو الجنان ده هيضرها أكتر ما هينفعها. هيسيبها تتجنن بس في وجوده ومعاه هو وبس.

يوسف ابتسم بهدوء. لحظات وقالها بهزار وضحك: ههههه. هو سيادتك كنتي مستنية تيجي أمريكا عشان تتجنني. ده إنتي بتوقعينا في كل مصيبة والتانية. وربنا وحده هو اللي بيسترها معانا. ندي بصتله بغيظ وغضب وفضلت تضرب في دراعه بغل: آه يا رخم. يا غلس. يا غتيت. يا أبو دم تقيل. قوم يا يوسف مش طايقة أشوف وشك. امشي. يوسف وهو عمال يضحك وهو بيحاول يصد ضربتها بالراحة: ههههه. أنا قاعد في ملك الحكومة. ندي بغيظ

منه وهي بتقوم من مكانها: طب أنا اللي هقوم من وشك. سلام. يدوب قامت وقفت من هنا كان هو بسرعة مسك إيديها وقعدها غصب عنها وهو بيحاول يوقف ضحك: هههه. خلاص يا نودي. اقعدي بقى. مش هغلس عليكي تاني. ندي بصتله بتتنيحة وهي مبتسمة أوي: نودي. يوسف بإبتسامة هادية: هو مش دلع ندي يبقى نودي. ندي نسيت كل حاجة ونسيت رخامته وغلاسته واللي حصل من شوية وهي بتقوله بإبتسامة غلاسة: أها. دلع ندي نودي. يوسف ابتسم أوي.

وندي بإبتسامة عريضة: أو كوكا. يوسف بإستغراب: كوكا. ندي وهي بتهز راسها بآه. لحظات وبتقوله بإبتسامة: أنا بحب الاسم ده أوي. ومش أي حد بيقولهولي. يوسف بجدية وغيره وهو مكشر وندي ما أخدتش بالها خالص من غيرته دي: إمممم. ومين بقى اللي بيقولك كوكا. ندي بإبتسامة هادية وتلقائية: مامي بس. مفيش حد تاني. يوسف ابتسم أوي بالراحة وهو بتلقائية ومن غير ما يشعر بيدخل خصلة من شعرها جوه حجابها كانت خارجة بره من غير

ما تاخد بالها إنها خرجت: ماشي يا كوكا. ندي مركزتش في أي حاجة بتحصل حواليها وفضلت متنحة وسرحت في عينيه أول ما عمل كده وهو كمان كان زيها. مكنش داري بالدنيا واللي فيها. وهو بيبص في عينها بشوق حتى محسش بنفسه لما عمل كده. لحظات وندي غمضت عينيها بهدوء وابتسامة لما يوسف بدأ يلمس خدها بحنان وهو مش حاسس بنفسه نهائي لما عينه بدأت تروح وتيجي ما بين خدها وشفايفها. وقلبه بيدق جامد أوي ومش قادر يقاوم قربها منه ولا مشاعره ناحيتها.

ويدوب بدأ يقرب أكتر سمع حد بيقول: ندي. ندي فتحت عينيها بخضة. ويوسف اتبرجل وارتبك وبعد شوية وهو متوتر وبيحمحم. ندي بصت وراها بارتباك لقت صحابها البنات واقفين مربعين إيديهم وهما مبتسمين ومنشكحين أوي والولاد بيبصولهم بغيظ وغضب وخصوصًا أندرو. ندي بإبتسامة مرتبكة: هاي. خلصتوا المحاضرة. سام ولينا هزوا راسهم بآه من غير ما يتكلموا وهما في قمة الانشكاح. وندي بصت لأندرو لقته بدأ يمشي وسابلهم المكان. فندي بسرعة

قامت وراه وهي بتناديه: أندرو. استنى بس. اصبر. يوسف اتضايق أوي من تصرفها لما قامت وسابته وراحت ورا أندرو بس متكلمش ولا ندهالها ولا عمل أي حاجة. فضل قاعد مكانه وهو باصص قدامه بس كان متغاظ وهو بيهز في رجله بضيقه منها وفي نفس الوقت غيران عليها. أندرو وقف. وندي بهدوء: أنت معاك حق تزعل وتضايق منه بس والله هو مكنش يقصد. هو عمل كده خوف عليا من أهلي. عشان خاطري سامحه. وأنا هخليه يعتذرلك. تعالي معايا.

أندرو هز راسه بتمام وراح معاها عند يوسف. ندي برجاء ليوسف بس طبعًا بالعربي عشان محدش يفهم كلامهم: يوسف عشان خاطري أنت غلطت في حق أندرو. يوسف بصالها بغضب جامح. وهي بتحاول تفهمه وتقنعه: هو مش وحش صدقني. كلهم والله مش وحشين. وهو كان فاكر إنه بيدافع عني وبيحميني. هما كمان كانوا فاكرين بابي ومامي عارفين بالحفلة. فالغلط من عندي مش من عندهم. يوسف بصالها بغيظ: صدقتيني لما قولتلك إنك بتوقعينا كل شوية في مصيبة.

ندي بإبتسامة عريضة وهي بتقرصه من خدوده بالراحة زي العيال الصغيرة: حقك عليا يا بطتي. مش هعمل كده تاني. يوسف اتفاجئ باللي هي عملته ومحسش بنفسه غير وهو بيبتسم أوي وبيضحك في نفس الوقت. وأصحابها مش فاهمين إيه اللي بيحصل ولا الحوار اللي ما بينهم. يوسف بضحك: هههه. بطتك. ندي ابتسمت على ضحكته. لحظات وقالتله بهدوء: أنت مديونله بالإعتذار يا يوسف. ندي برجاء: عشان خاطري. يوسف بإبتسامة هادية

وهو بيبص في عينيها بحب: حاضر يا كوكا. هعتذرله. ندي ابتسمت أوي بفرح لما هو نداها بكوكا. ويوسف قام وقف وندي وقفت هي كمان. ويوسف بإبتسامة هادية لأندرو: أنا مديونلك بالإعتذار على اللي حصل امبارح. أندرو بصاله بضيقة. ويوسف بهدوء وجدية: أنا مكنش قصدي إني أضربك. يوسف بص لندي بغيظ: بس مكنش ينفع إنها تروح الحفلة من ورانا. أندرو وهو بيهز راسه بآه: ده حقيقي. وإحنا غلطناها على تصرفها ده.

ندي بلعت ريقها بتوتر: ما خلاص بقى يا جماعة. أنا اعترفت بغلطتي ومش هكررها تاني. اتصالحوا بقى. يوسف مد إيده لأندرو: أنا آسف. أندرو ابتسم بهدوء وهو بيسلم عليه: ولا يهمك. ندي بفرح: يآآآه أخيرًا. أندرو بغتاته: ده مش هيمنع إنك هتعزمينا على سينما. يوسف بصالها أوي بصدمة وقالها بالعربي: نعم ياختي. ندي بإبتسامة كسوف بس طبعًا بالعربي: بص. هشرحلك. يوسف بإبتسامة غيظ وهو بيحط إيد على إيد: اتكلمي يا مصيبة. هببتي إيه تاني من ورايا.

ندي بضحك حكتله حوارها مع صحابها وموضوع العزومة سواء الغداء أو السينما. يوسف بإبتسامة غيظ: شفتي نتيجة عمايلك وجنانك. ندي بغتاته: الله. ما قولنا آسفين يا صلاح. خلاص بقى. اهدي يا عمنا. يوسف بضحكة خفيفة: ماشي يا كوكا. سينما سينما. ندي بإبتسامة هادية: حيث كدا بقى. أحب أعرفكم ببعض بشكل رسمي. بعد ما ندي عرفتهم ببعض مايكل قالهم بحماس: مش يلا نروح ناكل بقى. أنا بحاول أتخيل الأكل المصري بس مش عارف أوصل لحاجة. كلهم ضحكوا.

ويوسف بضحك: هههه. مهما حد هيوصفلك مش هيعرف غير لما تدوقه بنفسك. ندي بإبتسامة: طب يلا بينا على البيت. بيري بإبتسامة خبث: چو. متهيألي معاك عربيتك صح. ندي بصتلها بغضب. ويوسف بإبتسامة هادية: آه. عربيتي معايا. بيري بإبتسامة مكر: طيب إحنا كده نقسم نفسنا. ولا إيه. يوسف ابتسم بهدوء. وندي بإبتسامة غيظ بالعربي: وماله ياختي. نقسم نفسنا. يوسف بحمحمة: إحمم. يلا. ندي بصتله بغضب: يلا يا خويا.

يوسف كان ماشي جنبها وهو بيحاول يداري ضحكته على قد ما يقدر. وأول ما وصلوا لعربيته. بيري فتحت الباب اللي جنبه. فندي حطت إيديها على الباب بعد ما بيري فتحته وهي بتجز على سنانها بغيظ بس بالعربي: رايحة فين يا ماما. ورا. مكانك ورا مش هنا. بيري بعدم فهم: إيه. بتقولي إيه. يوسف مقدرش يمسك نفسه وضحك أوي لدرجة إن وشه أحمر من كتر ما هو بيكتم ضحكته ومش عارف. وندي بإبتسامة عريضة بس بغلاسة بالإنجليزي: ده مكاني. اقعدي ورا.

يوسف قعد وهو مغمض عينه من كتر ماهو كاتب ضحكته. وندي بغضب بالعربي أول ما قعدت: عاجبك ولا مش عاجبك. يوسف وهو وشه أحمر وبيمسح دموع من كتر الضحك: هههه. هو أنا أقدر أعترض. ندي بغضب: آه. بحسب. ندي وهي باصة قدامها بنرفزة: قال جايه تشقطك قال. لأ وكمان قدامي. بنت ال. يوسف مقدرش يسيطر على نفسه أكتر من كده وانفجر من الضحك.

ومحدش من البنات قادر يفهم إيه اللي بيحصل ما بينهم لأنهم بيتكلموا بالعربي. بيري كانت قاعدة ورا مع ليان وسام وهي هتفرقع وتطق من الغيظ بسبب ندي وإنها قعدتها ورا مش جنب يوسف. ندي بحده وغضب من يوسف لما ضحك: اتلم يا يوسف وعدي يومك على خير بدل ما والله هنكد عليك عيشتك النهارده وهطلع جناني كله عليك. سامع. يوسف وهو بيدور عربيته وهو بيحاول يسيطر على ضحكه: ههههه. أبوس إيدك أهدي شوية وبلاش جنانك ده. ها. بلاش يا كوكا.

ندي غصب عنها ابتسمت أوي وهي بتحاول تكتم ابتسامتها بس معرفتش ف قالتله بإبتسامة عريضة: بص قدامك وسوق. يوسف ابتسم وطلع بهدوء. والأولاد كانوا في عربية مايكل وطلعوا وراه.

ندي بفرح وسعادة شغلت أغاني عربي بصوت عالي جدًا. وطبعًا بدون أدنى اعتراض من يوسف اللي كان مبسوط جدًا وسعيد وهو بيعيش حياة جديدة ومختلفة جدًا عن اللي عاشها قبل وجود ندي في حياته. ساب نفسه لندي تعيشه الجو المصري بكل ما فيه كأنه يوم مفتوح بالنسبة لها تتجنن وتعمل فيه مابدالها. المهم والأهم إنه يكون شريكها وجزء لا يتجزأ منها.

من ضمن الأغاني اللي ندي شغلتها واللي خلت يوسف وأصحابه غصب عنهم إنهم يرددوها على قد ما يقدروا من كتر ما عجبتهم أغنية سطلانة. وخصوصًا لما بدأ مايكل ويوسف يرخموا على بعض في الطريق ويزنقوا على بعض بالعربيات كأنهم داخلين سباق والبنات والأولاد بيهيصوا وكل واحد فيهم بيشجع اللي راكب معاه.

يوسف مقدرش ينكر من جواه إنه فعلًا كان مبسوط وسعيد وخصوصًا إنه كان بيتعامل مع صحاب ندي كأنهم صحابه أو معرفة قديمة. طبعًا باستثناء إنه هو كمان حس بإعجاب ومحاولة بيري إنها تقرب منه. بس هو كان قافل منها قفلة بنت لذينة. مش عشان وجود ندي معاهم أو هي صاحبة ندي. تؤتؤ. عشان كان قلبه وعقله مشغولين بواحدة صاحبتنا جننته وجننتنا معاه. ومكنش عنده استعداد نهائي إنها تقلب ولا تنكد عليه وعلينا عيشتنا.

وصلوا البيت في جو كله هيصة وفرح كأنها زفة. وهما كلهم دون استثناء بيغنوا سطلانة. ندي بصوت عالي: مامي. مامي. إحنا هنا. نهى خرجت من المطبخ بإبتسامة عريضة وهي بتاخد البنات بالحضن زي عبلة كامل وهي بتكلمهم بالعربي (طبعًا هي قاصدة ومتعمدة إنها تعمل كده كنوع من الهزار والضحك وتخفيف أي نوع من أنواع التوتر) : يا أهلًا يا أهلًا. بالحبايب. يألف نهار أبيض. يا ٣٠٠ مرحب. نورتوا الدنيا بحالها.

ندي ضحكت أوي هي ويوسف. وأصحابها بيبصولها باستغراب. ونهى بهزار: ونبي لو كنت أعرف أزغرط كنت زغرطت. بس أنا مش بعرف. ندي بإبتسامة عريضة: أنا بعرف. يدوب ندي لسه هتزغرط نهى بصت لها بحدة: بت. اتلمي. أنا بهزر مش قصدي بجد. ندي سكتت وهي مبتسمة بغتاته. ويوسف بإستفسار: إيه أزغرط دي. ندي بصت لأمها وبغلاسة: شوفتي. هو مش عارفها. لازم أوريهاله. نهى بغيظ: إنتي بتستهبلي. جاتلك على الطبطاب. صح.

ندي حمحمت. ويوسف بصالها من تحت لتحت. وهي غمزتله برده من تحت لتحت فابتسم أوي وفهم إنها هتوريهاله بعدين. لينا بإبتسامة: مش تعرفينا بمامتك يا ندي. ندي بدأت تعرف أمها بأصحابها اللي اتفاجئوا إنها بتتكلم إنجليزي كويس. أندرو بتعجب: إيه الريحة دي. ده الأكل. نهى بإبتسامة هادية: آه. كشري. نهى بصت لندي ويوسف وبالعربي: يلا اشرحولهم انتوا بقى عقبال ما أخلص.

فعلاً يوسف وندي بيحاولوا يشرحوا الأكلة عبارة عن إيه وإزاي ينطقوها. مرة تطلع صح ومرة غلط ومرة مكسرة. فضلوا يضحكوا ويهزروا لغاية الأكل ما خلص ووائل كان جه وبدأ يتعرف عليهم واحد واحد. وياخد ويدي معاهم ويهزر ويلعب معاهم بلايستيشن. نهى وندي جهزوا السفرة وكلهم قعدوا ياكلوا مع بعض. وسام بإبتسامة هادية وهي بتوجه كلامها لوائل: مكنتش أعرف إنك لذيذ أوي كده.

وائل تنح هو ونهي وندي. ويوسف بص في الأرض وهو بيكتم ضحكته. لحظات ووائل بلع ريقه بالعافية ونهي بصتلها بغضب وهي بتضيق عينيها. وسام بتكمل كلامها بإبتسامة عريضة: حقيقي طلعت شوجر دادي. وائل بلع ريقه بتوتر أكتر من الأول وهو بيكتم ابتسامته بالعافية. ويوسف وشه أحمر وهو بيكتم ضحكته. وندي بصت لها بغيظ إنها إزاي تعاكس أبوها أصلًا. سواء قدام أمها أو من وراها. ونهى

بحده وغيظ منها بس بالعربي: نعم يا حيلتها. إنتي جايه تشقطي جوزي ولا إيه. يوسف مقدرش يتحمل أكتر من كده وانفجر من الضحك. ووائل بيحاول يهديها وهو بيبلع ريقه بالعافية: أهدي يا نهي. هي بتهزر. نهى بصتله بغضب من غير ما تتكلم. لحظات وبصت لبنتها بحدة: ما تلمي صاحبتك ولا تحبي ألمها أنا. ندي بغيظ منها وهي بتبص لبيري بحدة وغيظ وهي مش واخده بالها هي بتقول إيه: ماهي مش لوحدها يا مامي اللي عايزة تتلم.

وائل تنح واتصدم من كلام بنته ويوسف مكنش أقل منه في صدمته. لحظات وبلع ريقه هو كمان بالعافية. ونهى بغيظ وحدة: نعم ياختي. هما صحابك جايين يشقطوا رجالتنا ولا إيه. وائل شرق جامد لما نهى قالت كده. ويوسف بسرعة قام من مكانه وهو بيضربه على ظهره وهو بيحاول يكتم ضحكته. ونهى بصت لوائل بغيظ ف حين إن ندي كانت بتبص ليوسف بنفس الغيظ وهو بيبصلها بإبتسامة مكتومة. وائل

وهو بيبعد إيده وهو بيكح: كح. كح. يا عم اتنيل. جايبلنا الكلام. روح اقعد مكانك. روح. يوسف كان بيبتسم أوي وهو بيبص لندي نظرة توعد. وندي كانت بتبادله نفس النظرة بس الشرار بيطلع من عينيها. نهى بغيظ من جوزها: ماشي يا وائل اصبر عليا. سام بإستغراب لنهى: سوري. بس ما فهمتش كنتي بتقولي إيه. سام بإبتسامة: إحنا مش بنفهم عربي. نهى بإبتسامة غتاته بالإنجليزي: كنت بتمنى إن الأكل المصري يكون عجبكوا.

ندي ووائل ويوسف غصب عنهم ضحكوا جامد وهم بيحاولوا يسيطروا على نفسهم. بعد ما خلصوا أكل في جو ظريف وخفيف نهى وندي بدأوا يلموا السفرة بمساعدة وائل ويوسف. شوية وندي حطت لهم الحلوى. وبعد ما خلصوا يوسف خد الولاد ومعاهم وائل على الجنينة يلعبوا باسكت بول. كان وائل ويوسف وأندرو مع بعض ضد مايكل وتوماس وويلي.

سيلينا كانت باصة من الشباك وبتراقب وائل وهو بيلعب ويهزر مع الشباب. كانت واقفة وبتبص عليه وهي ماسكة كوباية وبتشرب وهي مش طايقة نفسها ولا حد. كان كل تركيزها على وائل وهي بتفتكر اللي حصل من فترة. 《فلاش بااااااك》

أول ما وائل عاش هو ومراته وبنته في بيت يوسف لفت نظر سيلينا جدًا. شكله المهندم وملامحه الشرقية. مساعدته لمراته لما بيخرجوا يشتروا حاجات. كانت بتقارن بينه وبين جوزها في كل حاجة شايفاها منه. وفي مرة كانت بتتكلم مع صاحبتها كرستيين في الفون عنه إنه عاجبها شكله وأسلوبه وإن نفسها تلاقي أي فرصة تجمعها بيه. ويادوب بتفتح ستاير شباكها اتفاجئت بيه إنه قاعد في الجنينة وبيشرب حاجة وهو بيتكلم مع مراته. ابتسمت أوي وهي بتحاول تملي عينيها منه بهدوء. وفجأة كشرت أوي والدم غلي في عروقها والغيرة بقت تاكل قلبها لما لقيته بيضحك ويهزر مع مراته وهما بيرشوا على بعض الميه. ساعتها مقدرتش تتحكم في نفسها ولا غيرتها عليه واتفقت مع صاحبتها على حوار الكلب.

《بااااااااك》 سيلينا كانت عمالة تشرب وتشرب وهي هتو^لع من كتر ما هي شايفة قدام عيونها ومش طايلاه. وخصوصًا بعد اللي نهى عملته معاها في السوبر ماركت. نهى كانت في المطبخ بتشطب المواعين والبنات كانوا مع ندي في الصالة مشغلين أغاني عربي وندي بتعلمهم الرقص وطبعًا مش قادرة أقول على الانبهار اللي أصحابها فيه وخصوصًا إنهم بيحاولوا يقلدوها. ندي كانت قايمة بدور الكوتش وبتصلحلهم الحركات.

يوسف وقف فجأة عن اللعب وقالهم إنهم يكملوا من غيره عقبال ما يجيب مياه. يادوب دخل من هنا. وفجأة وقف وتنح أول ما سمع الزغروطة من ندي. صحابها كانوا بيرقصوا وندي طولت المرة دي في الزغروطة ويوسف كان مبتسم ومنشكح أوي. ويادوب ندي بتلف وراها وهي لسه مكملة في الزغروطة لقيته في وشها. ندي سكتت وبصتله بتكشيرة لأنه واقف قدامها والبنات كانوا متحزمين وهاتك يا رقص. ندي بغيظ وغيره: أنت بتعمل إيه هنا.

يوسف وهو منشكح أوي: هي دي بقى الزغروطة. ندي بغتاته: آه يا خويا هي دي. ندي بغيظ: اتفضل اطلع بره. ولا عاجبك الشو أوي. ندي كانت تقصد على البنات وهما بيرقصوا بس يوسف مكنش مركز معاهم أصلًا. كان كل تركيزه في ندي وبس. يدوب لسه هيتكلم لقا الولاد ووائل داخلين بيضحكوا ويهزروا. وفجأة اتصدموا وتنحوا أول ما لقوا البنات بترقص ولابسين كده.

الولاد كانوا بيبتسموا أوي على شكل صحابهم ولبسهم وهما بيرقصوا ووائل يا عيني كان مصدوم من اللي شايفه. وعلي حظه الهباب نهى خرجت من المطبخ لقيته واقف مصدوم متنح وهو باصص عليهم ومخدش باله من مراته. ندي بلعت ريقها بتوتر ويوسف مقدرش يمسك نفسه من الضحك. وخصوصًا لما وائل لف يمينه لقى مراته بتبصله بغضب. نهى بصتله بحده وغضب وهو بلع ريقه بتوتر وهو بيقولها بتوتر: نهي. حبيبتي. أوعي تفهميني غلط. نهى وهي لسه بتبصله نظرة غل وحقد.

مسكت ريموت التسجيل: غلط. أنا بقى هوريك الغلط على أصوله. فجأة. سمعته الآتي في وسط صدمته وتتنيحته هو ويوسف. أما صاحبتنا العسلية سبب كل اللي بيحصل ده كانت مع أمها وهما بيقولوا لوائل ويوسف: أنت لو كنت بتهتم. أنت لو كان عندك دم. أنت لو بتحس ياعم. هتعرف إيه اللي مزعلني. م أنت لو كنت بتهتم. وماليه عنيك كنت هتتلم. ده أنت لو كنت بتفهم. متزعلنييش وتدلعني. وائل ويوسف زادوا في صدمتهم وتتنيحتهم. ونهي بتكمل مع الأغنية

اللي شغالة وهي بتقول: مخصماك. وأبعد عني أنا مش طيقاك. سيبني مش عايزة أبقى معاك. متتورينيش وشك تاني. وائل بصدمة وهو بيشاور على نفسه: أنا. ونهى مكمله زي القطر: مخصماك. مجنون بجد أنا مش فهماك. مش عايزة عيني تكون شيفاك. ولا أسمع صوتك في وداني. يوسف ضحك أوي ووائل بصاله وهو بيضرب كف على كف من جنان مراته. وهي مكمله

بعنيها وبتشاور ع البنات: عينك رايحة ورا أي بنت. وأنا مش شاكة ده أنا اتأكدت. وبتشتكي لو جيت نكدت. والناس تقول غلبان ياحرام. شكلك عاوز علاقتنا تبوظ. وبتشتكي من لوى البوز. مش هتصالح غير وقت ما عوزه. متجيش تجر معايا كلام. مخصماك. أنت حد معندكش قلب. اركن العشره دي ع جنب. ده أنت نص كلامك كدب. نفسي بقى تبطل حوارات. ده انت ملك اللامبالاه. أنت حد تعبني معاه. واحد ماشي يرمي وراه. ماشي بمبدأ عدى وفات. مخصماك. { مخصماك -نوال }

نهى وندي كانوا بيمثلوا الأغنية وبيعملوا الترند بتاعها زي التيك توك. والبنات والأولاد بيقلدوهم في حركتهم. يوسف غصب عنه انفجر من الضحك. ووائل بغيظ منه قبل الأغنية ما تخلص: أنت بتتنيل تضحك على إيه. عاجبك اللي الهانم بتهببه. يوسف وهو مسخسخ على روحه من الضحك: هههههههه. مكنتش متخيل إنها هتقولك كده بصراحة. وائل بإبتسامة غلاسة: هتشوف آخرتها إيه. اصبر بس لما تخلص جنانها ده. أما ورتها. مابقاش أنا. ده أنا مستحلف لها.

يوسف بتتنيحة: نعم. يوسف بضحك: ههههه. دي قفشاك متلبس يا بوس. هترد عليها إزاي. وائل بإبتسامة عريضة وهو بيغمزله: هتشوف. لحظات ونهى خلصت وهي بتبصاله بحقد وغل وغيظ وشوية هتجيبه من كرشه. طبعًا البنات والأولاد كانوا بيصفروا وهايصين وهم بيسقفوا وبيضحكوا. وائل بصاله بنظرة تحدي وفي نفس الوقت بتوعد. ويوسف كان ساند ظهره ع التربيزة وهو مربع إيده ومستني يشوف وائل هيرد على مراته إزاي.

ندي نطت وقعدت ع الترابيزة جنبه وهو بصلها بإبتسامة عريضة وهو بيقولها: مستر وائل مستحلف لميس نهى. ندي ابتسمت أوي وهي بتسقف بإيدها: الله. ده هيبقا شو توحححححححفه. يوسف بتتنيحة: نعم ياختي. إنتي فرحانة فيهم. ندي بإبتسامة غلاسة وهي بتضربه في كتفه بكتفها: آه. عشان يحرم يبص ع البنات. ندي بغيظ: زيك كده. يوسف ابتسم أوي وهو بيقولها برخامة وغلاسة: بصراحة إحنا معذورين. ندي بغضب وغيظ: نعم ياخويا. أنت بتستهبل.

يوسف بضحكة غلاسة وهو بيرد لها كتف بكتف بس بالراحة وبهداوة: ههههه. آه. وباستعبط كمان. يا. يا مزه. ندي ضحكت أوي وهي بتداري وشها بكسوف. لحظات ويوسف وندي ونهى اتفاجئوا بوائل وهو مشغل أغنية لحماقي بيقول فيها: .... يتبع....