رواية و للنصيب رأي أخر الفصل الحادي والخمسون بقلم لوليتا محمد

خرجت ندى بسرعة من الجامعة، وانصدمت وتنحت أول ما لقيته واقف بعيد شوية عن عربيته وهو سادد مناخيره عشان مش عايز يشم حاجة. بعد ما قدرت تستوعب إللي هو عامله، مقدرتش تمسك نفسها وانفجرت من الضحك. يوسف بغيظ وغضب منها لما لقاها بتضحك على شكله ومنظره: عاجبك إللي أنا فيه؟ مش تشوفي المصيبة إللي أنا فيها. ندى، بعد ما قدرت تمسك نفسها شوية بس لسه بتضحك: ههه، مش قادرة يا يوسف، بحاول والله بس مش قادرة.

بضحكة خفيفة: ههه، إيه اللي أنت عامله ف نفسك ده؟ يوسف بغيظ: ما أنتش شامة الريحة؟ ندى انتبهت، لحظات وقالتله بصدمة: ده بجد؟ أنت جبت رنجة وفسيخ يا يوسف؟ يوسف وهو بيهز دماغه بـ "آه" وفي نفس الوقت بيبص بقرف: مش طايق الريحة، أعمل إيه؟ اتصرفي بسرعة يا ندى، مش طايق أركب عربيتي. ندى وهي لسه بتضحك: ههه، طب خلاص اهدى شوية. طلعت تليفونها وبتتصل بنهى. ندى بابتسامة هادية: الو، إزيك يا مامي.

نهى بهدوء: الحمد لله رب العالمين، ازيك أنتي يا ندى، أخبارك إيه؟ ندى وهي بتبص ليوسف وهو بيشيل السدادة ياخد نفسه ويرجع يحطهم من تاني: الحمد لله رب العالمين بخير. يوسف بيشاورلها تنجز، وهي بتهز راسها بـ "حاضر" وهي بتكتم ضحكتها عليه: مامي، يوسف عازمنا النهارده على آكلة إنما إيه، تححححححفة. نهى باستغراب: يوسف؟ يوسف بغيظ: أخلصي يا ندي، والله ما قادر أكتم نفسي أكتر من كده. نهى سمعت صوته فاستغربت

أكتر وسألت ندى بجدية: هو فيه إيه يا ندي؟ ندى بضحك: ههه، يوسف جابلنا رنجة وفسيخ يا مامي، وحاطتهم ف عربيته ومش طايق ريحتهم. نهى بصدمة: رنجة؟ ندى بابتسامة هادية: آه. نهى ضحكت جامد قوي من قلبها: ههه، مجنون، دخلها أمريكا إزاي؟ شكله هربها لهنا، لأنه استحالة يعرف يدخلها بشكل طبيعي. ندى بابتسامة: المهم، هنتصرف إزاي دلوقتي؟ نهى بضحك: ههه، طبعًا يجيبها على هنا.

بابتسامة هادية: وهاتي معاكي وأنتم جايين كابوتشا وبصل أخضر و3، 4 أزايز كولا. ندى بابتسامة هادية: حاضر يا مامي. ندى قفلت مع نهى، ونهى بضحك وهي بتتصل بوائل: ههه، رنجة وفسيخ يا يوسف، عرفتها منين دي. وائل رد على نهى اللي قالتله على تصرف يوسف واللي عمله. وائل بضحك: ههه يا نهار أبيض، فسيخ ورنجة. نهى بابتسامة هادية: معرفش عرفهم إزاي بصراحة. وائل بابتسامة هادية هو كمان: ندى، أكيد هي اللي قالتله عليها، مفيش غيرها.

نهى بابتسامة هادية: طيب، اعمل حسابك عشان هما دلوقتي جايين ف الطريق. وائل بابتسامة هادية: خلاص يا قلبي، هقفل شغلي وهاجي على طول، ناقصك حاجة أجيبهالك معايا؟ نهى بابتسامة هادية وحب: تؤتؤ، ولا أي حاجة. وائل بغلاسة: متأكدة؟ مش ناقصك أي حاجة؟ نهى بحب وشوق ظهر ف نبرة صوتها: متتأخرش عليا قلبي يا وائل. وائل بشوق وحب: مش هقدر أتأخر عليكي روحي يا نهى، مهما تعدي السنين وتفوت هتفضلي عايشة جوايا.

نهى غمضت عنيها وأخدت نفس جامد وخرجته بالراحة، لحظات وفتحت عنيها، وبابتسامة هادية وحب: هستناك يا حبيبي. وائل وهو بيقوم من مكتبه وبيخرج بلهفة وشوق لمراته: مسافة السكة وهكون عندك يا قلبي أنا. نهى اتنهدت بالراحة بعد ما قفلت مع وائل، وهي بتبص على الجنينة من الشباك وبتقول لنفسها بهدوء: بقي هي دي آخرتها يا نهى، بعد السنين دي كلها تتغربي وتعيشي بره مصر، والأدهى من كده، أنه بمزاجك وإرادتك.

بابتسامة حزينة: سبتي شغلك وبقيتي ست بيت وقاعدة ف البيت لوحدك بين أربع حيطان، جوزك ف شغله وبنتك ف جامعتها. بحزن ف نبرة صوتها: منك لله يا آسر أنت وعصام. غمضت عنيها بوجع للحظات. وفجأة فتحت عنيها وهي بتبتسم بهدوء: مش مهم، المهم إن ندى تبقى كويسة وأحسن من الأول ميت مرة. ابتسامتها زادت شوية: مين عالم، مش يمكن تلاقي نصيبها هنا. "وعسى أن تكرهوا شيئاً وهو خير لكم"، صدق الله العظيم.

فات شوية وقت كانت ندى ويوسف وصلوا البيت، ويوسف بسرعة حط الحاجة ف المطبخ وجري على الحمام يغسل وشه وإيده مكان الريحة. ندى كانت ملاحظة تصرفاته وهي عمالة تضحك عليه جامد أوي. نهى نزلت من فوق بعد ما ظبطت نفسها ولبسها عشان تعرف تقعد مع يوسف، ولاحظت ندى وهي بتضحك فسألتها عن سبب ضحكها وقالتلها عن يوسف وتصرفاته. يوسف خرج من الحمام وهو متغاظ أوي لما لقاهم هما الاتنين بيضحكوا عليه.

يوسف بغيظ: شوفتي يا ميس نهى، عاجبك إللي ندى بتعمله وضحكها عليا؟ ف اللحظة دي وائل دخل عليهم وقال برخامة: ما أنت اللي جبته لنفسك، حد يعمل كده ويجيب فسيخ ورنجة وتهريب كمان. ندى بصت لوائل بابتسامة هادية وهي بتجري عليه وبتبوسه ف خده بحب: بابي، حمد الله على السلامة. وائل باس ندي بحب: الله يسلمك يا قلبي. نهى بصت لوائل بشوق ظهر ف لمعة عينيها: حمد الله على السلامة يا حبيبي.

وائل بصّلها بشوق وقلبه بيدق جامد أوي، لأنه لاحظ نظرة عينيها وإحساسها له وصله إنه واحشها أوي حتى وهو قدام عينيها، فابتسم بحب وهو بيقرب منها بتلقائية وباس راسها بمنتهى الرقة والهدوء بس طول شوية. نهى ابتسمت أوي وهي مغمضة عينيها إنه قدر يفهم إحساسها وشعورها من غير ما تقوله حاجة ولا اللي حواليهم يفهموا أو يلاحظوا حاجة.

يوسف كان بيبصلهم هما التلاتة بهدوء بس كان مركز ف رد فعل كل واحد فيهم، بداية من تصرف ندى ووائل مع بعض، إلى نظرة وائل ونهى وتصرف وائل مع مراته. جسمه اتكهرب وارتبك وبص لبعيد وهو بيفتكر كلام وائل معاه عن نهى، وف لحظة غيرة، قارن اللي حصل قدامه من وائل ونهى بـ جاكلين ومعاملتها معاه قدام الناس. حس بالفرق الشاسع ما بينهم، حب متبادل مبني على الهدوء والراحة والطمأنينة بوجود الطرف التاني، حس إن في تفاهم بينهم.

بالرغم إن وائل قاله ف مرة إن نهى مشكلة بس أحلى مشكلة ف حياته، ابتسم بهدوء غصب عنه لما افتكر، وقال لنفسه: ممكن فعلاً ألاقي واحدة يبقى بيني وبينها الراحة والتفاهم ده. فاق من أفكاره على صوت وائل وهو بيقوله: هربتها إزاي يا يوسف؟ يوسف بصّله بصدمة لقى نهى وندى بيضحكوا أوي وهما حاطين إيديهم على بقهم. ويوسف ابتسم بإحراج: يعني لازم تسألني السؤال ده قدامهم مستر وائل؟

نهى وندى ووائل مقدروش يمسكوا نفسهم أكتر من كده وانفجروا من الضحك لدرجة إن يوسف هو كمان اتعدى منهم وضحك زيهم. وائل بضحك: ههه، ما تقلقش، هما أصلاً متأكدين إنك عملت كده. يوسف بص لنهى وندى بسرعة: بجد؟ أنتوا كنتوا عارفين؟ نهى بابتسامة هادية: طبعًا يا يوسف، محدش هيسمح إنها تعدي من المطار من غير موافقة. يوسف وهو بيداري موقفه بهزار: احمم، يبقى تهريب. كلهم ضحكوا جامد.

شويه ونهى قالت لندى إنها تدخل معاها المطبخ عشان تساعدها ف الأكل. نهى كانت واقفة بتغسل الكابوتشا والفلفل والبصل. وبعد ما خلصت أخدتهم بره وقالت لوائل برخامة: اتفضلوا بقوا قطعولنا الحاجة دي عقبال ما نوضب إحنا الفسيخ والرنجة. وائل بصّلها بغيظ بس بحب. ويوسف بضحك: ههههه، مكنتش أعرف إن ميس نهى مسيطرة. نهى اتنحتت للحظات بس ضحكت أوي. ووائل بغيظ منه وهو بيضربه على دماغه: نعم يا خويا، إيه مسيطرة دي.

يوسف وهو بيتأوه: آآآه، سوري مستر وائل بس سمعتها مرة ف فيلم عربي. نهى ضحكتها زادت. ووائل بصّلها بحدة. وهي حطت إيديها على بقها ودارت وشها. ووائل رجع بص ليوسف بغضب شوية بس هزار: فيلم عربي، طب اتوكس وقطع البصل وأنت ساكت. وائل بص لنهى بغيظ: وأنتي بقى حسابك معايا بعدين. نهى بضحك: ههه، وأنا مالي يا لمبي، ما تشوف الأفلام اللي بيتفرج عليها دي. وائل كان لسه هيرد، ندى خرجت

من المطبخ وهي بتقول لنهى: مامي، أنا هخلص لك الكابوتشا والفلفل. نهى بغيظ: سيادتك بتهربي من تنضيف الرنجة؟ وائل ابتسم أوي وقرب من ودانها وقالها بصوت واطي: كده أحسن عشان نبقى براحتنا. نهى بصتله بتتنيحة وهو بيحط إيده ف وسطها وبيقول لندى بابتسامة: خلاص يا نودي، قطعي انتي ويوسف الحاجة وأنا هساعد مامي ف الرنجة. ندى ما فهمتش غرض وائل من كده بس فرحت إنها مش هتنضف الرنجة والفسيخ.

خدت الحاجة من المطبخ بسرعة وقعدت جنب يوسف وهو بيقطع البصل وهو بيقولها بدموع: يعني عشان أجرب الرنجة لازم أقطع بصل؟ ندى بضحك: ههههه، no pain, no gain. يوسف ابتسم أوي وهو بيقولها: ماشي يا ندي. وائل خد نهى ودخلوا المطبخ مع بعض. ويادوب نهى غسلت إيديها عشان تبدأ ف توضيب الأكل. وائل لفها ليه وهو بيبص ف عينيها بحنية وحاطط إيده ف وسطها: مالك يا قلبي أنا؟ نهى ابتسمت بوجع وهي بتبص ف عينه بعيون بتلمع بالدموع.

ووائل بحنية وهو بيمسح دموعها بإيده اللي بدأت تنزل منها غصب عنها: كل ده مخبياه عني؟ نهى مقدرتش تقاوم وجعها وتفضل متماسكة أكتر من كده، ف اترمت ف حضنه وهي بتعيط بس بصوت مكتوم عشان ندى ويوسف ما يسمعوش صوتها. وهو غمض عينه وبيحضنها جامد أوي. وهي قالتله بشوق وحب ودموعها بتنزل منها غصب عنها: أنت واحشني أوي يا وائل أوي بجد. وائل أخد نفس جامد وخرجه بالراحة وبهدوء فتح عينه وهو بيقولها بابتسامة هادية وحب وحنية وهو بيبعدها

عنه وبيمسح دموعها بإيده: وبعدين معاكي؟ كفاية دموع بقى، مش عارف أشوف عنيكي. "من أغنية أديني رجعتلك، أديني بين إيديكي... " لعمرو دياب. نهى غصب عنها ف وسط دموعها ضحكت أوي وهي بتضربه ف دراعه بهزار: ههه، تصدق إنك رخيم، يعني ده وقت عمرو دياب؟ وائل وهو بيضحك وف نفس الوقت بيمسح دموعها: طب أعمل إيه بس؟ أنتي مش مديني فرصة. نهى بابتسامة وهي بتمسح باقي دموعها: فرصة ليه؟ وائل ابتسم أوي وهو بيشدها جامد عليه وبيـقرب

من شفايفها وبشوق: إني أعاقبك على دموعك دي. ندى قامت تدخل المطبخ عشان تدي الفلفل والكابوتشا اللي قطعتهم لنهى. اتـفـاجـأت إن وائل بيعاقب نهى بطريقته. فـ الأول اتـخـضـت، بس بعد كده ابتسمت بهدوء وهي بتلف وشها ناحية الصالة. يوسف هو كمان قام عشان يدخلهم البصل فسألها باستغراب: مادخلتيش ليه الحاجة؟ ندى ابتسمت أوي وبتلقائية ومن غير ما تستوعب هي بتقوله إيه: بابي بيحط قطرة لـ مامي.

يوسف باستغراب وعدم فهم: ميس نهى عينيها وجعاها، طب ما ندخل نساعد ف توضيب الحاجة. ندى بصتله بصدمة وساعتها بس استوعبت هي قالتله إيه. ويادوب يوسف خطى خطوة للمطبخ، كانت هي شداه من دراعه بسرعة: استنى بس يا يوسف، الموضوع مش كده. يوسف بتكشيرة: يعني إيه مش كده؟ ندى بلعت ريقها بتوتر: يعني... يعني... يوسف بشك: يعني إيه يا ندى؟ ندى مش عارفة تقوله إيه وهي باين عليها توترها.

يوسف بابتسامة رخامة: طب أنا هدخلهم عشان أطمن على عيون ميس نهى. ندى اتـصـدمـت منه خصوصًا إنه لف وشه ناحية المطبخ وهو بيقول بصوت عالي: ميس نهى. ندى بسرعة بس بتوتر: استنى يا يوسف هقولك. يوسف بصّلها وهو بيبتسم برخامة، وندى بغيظ منه لأنها مش ضامنة هو هيقولهم إيه: اتفرج على الفيلم العربي أم العروسة. يوسف باستغراب: فيلم عربي؟ ندى وهي بتبلع ريقها بتوتر: بس متقولش لبابي إني قلتلك عليه. نهى ووائل خرجوا على صوت يوسف.

ووائل بهدوء: خير يا يوسف؟ يوسف بص لندى لقاها بتبصله بتوتر ورجاء وهي بتهز رأسها بـ "لأ"، بس وائل مأخدش باله منها وهي بتعمل كده ليوسف. فـ يوسف ابتسم لها بهدوء وبص لوائل وقال له: إحنا خلصنا تقطيع الحاجة، اتفضل. ندى ابتسمت أوي وهي بتحط إيديها على قلبها وبتحاول تهدّي من الموقف اللي اتحطت فيه. ووائل أخد منه الحاجة ودخل المطبخ يساعد نهى. بعد ما وائل سابهم، ندى قالتله بغيظ وغضب مكتوم: تصدق إنك مستفز.

يوسف بغلاسة: طب قوليلي إيه علاقة الفيلم ده بـ مستر وائل ونهى؟ ندى بنرفزة وعصبية: لأ، ده أنت مستفز بجد، وشكلي هخبطك بحاجة ف وشك. يوسف بتتنيحة: تخبطيني بحاجة ف وشي؟ لأ ده أنتي مجنونة بجد. ندى بعصبية ونرفزة وهي بتسيبه وتمشي من المكان: يووووه، ربنا يصبرني ع اللي أنا فيه ده. ندى راحت تشغل التليفزيون عشان ما تدخلش معاه ف صدام. وهو بغلاسة ضحك عليها وراح وراها يتفرج معاها وبالمرة يرخم عليها.

شويه ونهى نادت على ندى ويوسف عشان ياكلوا. يوسف أول ما بدأ يقعد على السفرة لاحظ إن الريحة اللي كان متضايق منها قلت كتير أوي عن الأول وشكل الأكل كان متوضب حلو. ابتسم بهدوء وهو بيقولهم: شكله يفتح النفس. نهى ابتسمت بهدوء هي ووائل اللي قاله بابتسامة هادية: بألف هنا يا يوسف، يلا يا حبيبي، بسم الله. كلهم بدأوا ياكلوا ما عدا ندى اللي كانت مركزة مع يوسف ورد فعله أول ما ياكل أول لقمة. يوسف بدأ بالرنجة الأول.

أول ما كلها من هنا، غمض عينه وهو بيقول بمنتهى الحماس: الله، حلوة أوي أوي. ندى ابتسمت أوي على شكله وكلامه. ويوسف فتح عينه وهو بيبصلهم بسعادة: أنا مكنتش متخيل إن طعمها حلو أوي كده. كلهم ابتسموا وهو بص لندى بابتسامة ورضا: thanks nada، لو مكنتيش قولتيلي عليها عمري ما كنت هجربها ولا آكلها، بجد، thank u. ندى كانت بصاله بمنتهى الهدوء بس كمان مستغرباه أوي.

بعد ما شكرها ابتسمت باقتضاب وبصت ف طبقها بس كانت مكشرة ومتضايقة لما افتكرت موقف جمعها بآسر بخصوص الرنجة. 《فلاش باااااااك》 ندى كانت ف بيتها وقبل ما تعرف إنها حامل. ندى بضيقة وخنقة: يا آسر ودي فيها إيه بس، كان نفسي فيها فجبتها من السوبر ماركت.

آسر بعصبية وصوت عالي: أنتي عارفة كويس يا ندى إني مش بطيق ريحتها تقومي جايباها البيت، ده أنا مش بحضر معاكوا ف شم النسيم وكنت برجع البيت متأخر يوم ما بتجيبوا الرنجة، تقومي جايباها هنا. ندى وهي دموعها بدأت تنزل منها: أنا ماجبتش فسيخ يا آسر عشانك والله، عشان ريحتها، بس الرنجة مش زيها، طب بس عشان خاطري جرب لقمة واحدة، واحدة بس والله هتعجبك. آسر بصّلها

بغضب: أنا هسيبلك البيت يا ندى لغاية ما تخلصي من القرف ده، أنا مش طايق نفسي ولا طايق ريحة البصل اللي مالية البيت، أرجع ألاقي ريحة للحاجات دي، سامعة؟ آسر سابها ونزل وهي عمالة تعيط. 《بااااااااك》 ندى فاقت على صوت يوسف وهو بيقول لوائل: مش عارف أبطل آكل مستر وائل، أنا واكل لغاية دلوقتي 3 عيش، غير البصل. نهى ووائل ضحكوا أوي. ونـدى ابتسمت بهدوء.

ووائل بضحك: ههه، يا ابني أنت هتعيد على نفسك اللقمة، كل كل، محدش واخد منها حاجة، دي اللمة الحلوة بالدنيا ومافيها. نهى بابتسامة: فيه مثل بيقول "كل اللي نفسك فيه كله... قبل ما ييجي اليوم وتـنـظـر له". يوسف بصلها بعدم فهم. ونـدى ووائل انفجروا من الضحك. ويوسف بصّ لهم بغيظ وهما بيضحكوا. ووائل بضحك: ههه حرام عليكي يا نهى، خفي عليه شوية. ندى بضحك: ههههه، ده هيسيب الأكل وهيفضل يقولنا اشرحيلي. يوسف بصّ

لها بغيظ وهو بيكمل أكله: لأ، مش هسيب الأكل بس برده هتشرحيلي يا ندى. ندى ووائل ونهى فضلوا يضحكوا عليه، ووائل غصب عنه فضل يشرح له المثل وهما بياكلوا ف جو ظريف ولطيف. بعد ما خلصوا أكل يوسف بتعب: آه، مش قادر، مكنتش متخيل إني هاكل كل ده. وبص كمان. ندى ابتسمت بهدوء وهي بتحط له الشاي: اشرب بقى كوباية الشاي دي عشان تحبس بيها. يوسف بتعب: يعني إيه أحبس؟ وائل بضحك: ههههه، مش وقته يا ابني، اشرب الأول وبعدين هنبقى نقولك.

بص، اعتبره سلو عاداتنا. يوسف بصّ له بعدم فهم، بس كان باين عليه إنه جاب آخره وهو مش فاهم حاجة. ونهى بضحك: ههه، هو أصلاً ما فهمش الأولاني يا وائل عشان يفهم التانية، ههه. بعد ما يوسف خلص قعدته معاهم وسابهم وروح بيته مقدرش ينكر من جواه إنه بجد بيعيش أيام جديدة وحلوة. وجود وائل وعيلته غيروا كتير ف تفكيره وطباعه وإحساسه. والأهم جو العيلة المصرية اللي كان مفتقدها. بعد ما أخد شاور، فضل يسترجع يومه كان عامل إزاي.

وافتكر موضوع الفيلم اللي ندى قالتله عليه. بسرعة فتح النت وحمل الفيلم وبدأ يتفرج عليه. وعرف السر اللي بيجمع بين وائل ونهى. ضحك أوي وطلع تليفونه وبعت لـ ندى على الواتس: "تعرفي إن فيلم أم العروسة طلع حلوة أوي، وخصوصًا الرخم الصغير". ندى أول ما قرأت الرسالة اتغاظت أوي منه. بس بعد كده ضحكت أوي لما قالها على الرخم الصغير، فـ بعتتله رسالة: "شكله مش هو لوحده اللي رخيم". يوسف ابتسم أوي على ردها.

سألها برخامة: "وياترى مين غيره؟ ندى ردت عليه وهي كمان بتبتسم: "من هنا لغاية بكرة فكر فيها". يوسف ابتسامته زادت أوي ومقدرش يقاوم. فـ اتصل بيها. وهي اتبسطت أوي وردت عليه بسرعة: عايز إيه؟ يوسف بابتسامة غلاسة: معنديش صبر لغاية بكرة، مين غيره اللي رخيم؟ ندى بغلاسة: تدفع كام وأنا أقولك؟ يوسف ضحك أوي: ههههه، أنتي كده بتثبتيلي إنك بيزنس ومان شاطرة. ندى ابتسمت أوي: عشان تعرف بس. المهم، خلصت الفيلم ولا لسه؟

يوسف بابتسامة: يعني... يوسف وندى فضلوا يرغوا مع بعض طول الليل من غير ما يزهقوا ولا يملوا من المكالمة. بالعكس كانوا سعداء وهما بيغلسوا ويرخموا ويهزروا مع بعض وهما حاسين بهدوء وراحة من جواهم. الأيام عدت على أبطالنا من غير زعل أو نكد أو مشاكل. وائل ف شغله، ونهى بقت ست بيت، وندى بين الشركة وكليتها، ويوسف دايماً معاها بالتليفون عشان يقدر يحدد مكانها ويبقي مطمن عليها.

ومن الوقت للتاني يوسف بيروح مع وائل يوم الجمعة يصلوا مع بعض ف المسجد ويروح ياكل ويقضي نص اليوم معاهم والنص التاني مع ندى لغاية ما تروح من كليتها. وف يوم من الأيام. وائل كان رايح بيته ف نهى اتصلت بيه وباين ف نبرة صوتها إنها فرحانة ومبسوطة. نهى بفرح: الو، أيوه يا وائل. وائل بحيرة: أيوه يا حبيبتي، عاملة إيه؟ شكلك فرحانة ومبسوطة. نهى بسعادة: الحمد لله رب العالمين، كسبنا القضية وندى خلاص اتخلعت من آسر.

وائل ابتسم أوي وبفرح: بجد؟ بجد يا نهى، يعني خلاص، كده آسر مش هيقدر يعمل حاجة تاني؟ نهى بفرح: خلاص يا وائل، كابوس وانزاح من علينا. وائل بسعادة: الحمد لله، الحمد لله رب العالمين. نهى بابتسامة: أنت فين دلوقتي؟ وائل بابتسامة هادية: ربع ساعة وهكون ف البيت. نهى بحب: ماشي يا قلبي، تيجي بالسلامة. وائل بحب: الله يسلمك. وائل قفل مع نهى من هنا، وقال لنفسه وهو بيتصل بندى: دي ندى هتفرح أوي لما تعرف إنها خلاص، خلصت من آسر نهائي.

ندى كانت ف الشركة لما وائل اتصل بيها. ردت بهدوء: الو. وائل بسعادة: أيوه يا حبيبتي، عاملة إيه؟ ندى وهي مستغربة صوته وفرحته: تمام يا بابي، الحمد لله بخير. بحيرة: شكل كده في حاجة مفرحاك، صح؟ وائل ضحك جامد أوي: ههه، باين عليا مش كده؟ ندى ابتسمت أوي وهي بتقوم من مكتبها وبتبص من الشباك: أها، خير يا بابي؟ وائل بفرح وحماس: مبروك يا قلبي، اتطلقتي من آسر.

ندى فجأة اتنحتت واتصدمت وبلعت ريقها بتوتر وهي بتحاول تستوعب اللي سمعته من أبوها. ووائل بيكمل كلامه بحماس: كده خلاص يا قلبي، مش هيقدر ييجي جنبك تاني، ولا حتى يقدر يردك غصب عنك. ندى لسه ساكتة ومصدومة زي ماهي. ووائل لاحظ إنه مش سامعلها صوت، فسألها باهتمام: ندى، سمعاني؟ ندى بوجع وصوت مبحوح شوية ودموعها بدأت تنزل منها غصب عنها وقلبها بيدق جامد أوي وجسمها بدأ يترعش: آه، أيوه يا بابي سمعاك.

وائل مش واخد باله من صوتها ولا قادر يحس بإللي هي فيه. قالها بتلقائية وحسن نية: تمام يا قلبي، حاولي ماتتأخريش النهارده، عشان أنا هحضرلك مفاجأة حلوة، ماشي. ندى وهي بتبلع ريقها بصعوبة وبتوتر وهي بتحاول تكتم دموعها: ح... حاضر يا بابي، م... مش هتتأخر. وائل وهو داخل على بيته: ماشي، يلا سلام. ندى قفلت من هنا، وسابت دموعها تنزل منها بقهرة ووجع. بعد ما فات شوية وقت. يوسف كان ف مكتبه بيلم حاجته عشان كان معاه ميعاد بره الشركة.

بعد ما خلص ونزل لغاية تحت، افتكر إنه نسي تليفونه التاني ف مكتبه. طلع على فوق وأخد تليفونه، وأول ما خرج بره المكتب اتفاجئ بندى طالعة على السلالم للسطح. يوسف كشر واستغرب تصرفها، فـ قرر إنه هيطلع وراها ويشوف هي طالعة السطح تعمل إيه. استنى شوية لغاية ما طلعت وطلع وراها. اتـفـاجـأ بيها قاعدة على الأرض فـ حالة انهيار تام ودموعها بتنزل منها بوجع وقهره وهي بتقول لنفسها بحرقة: ليه...... واجع لي قلبي ليه...... ليه يا آسر......

قولي ليه وصلتني لكده...... لا قربك ريحني ولا بعدك ريحني...... آآآه...... وجعني أوي. ندى وهي بتضرب قلبها بحرقة: وجعني... وجعني.... يوسف مقدرش يمسك نفسه وجري عليها بسرعة وهو بيقولها بوجع: ندى، أهدي يا ندى، في إيه بس، إيه اللي حصل؟ ندى بصتله بوجع وحرقة وصريخ ودموع وهي لسه بتضرب قلبها: خليه يقف، عشان خاطري، وقف وجع قلبي يا يوسف، وقفه، مش قادرة أستحمل والله ما قادرة. يوسف

بهدوء بس بحزن ووجع عليها: صرخي يا ندى، صرخي وزعقي وطلعي كل اللي جواكي، ما تسيبش ف قلبك أي صرخة وألم، زعقي وصرخي لغاية ما تخرجي كل وجعك، أنا هنا جنبك، مش هسيبك. ندى بصتله بنظرة وجعت قلبه أوي. ومرة واحدة اتـأوهـت جامد وبصوت عالي أوي. وبعد ما خلصت بصتله بابتسامة تمني وكأنها بتشكره على إنه سمحلها تخرج صرختها بره ضلوعها يمكن تلاقي راحتها. يوسف ابتسم بهدوء.

بس ابتسامته اتبدلت لتكشيرة أول ما لقى ندى جسمها كله مال لـ قدام وهي بين إيديه وهي ما بتنطقش بكلمة واحدة. يوسف نفسه بيطلع وينزل بسرعة وهو بيبصلها بصدمة ومش قادر يستوعب اللي حصلها وهو بينادي عليها وهي مش بترد عليه: ندى، ندى، ردي عليا يا ندى. يوسف دموعه بتنزل منه بغزارة غصب عنه وبزعق وهو بيضرب وشها ضربات خفيفة: ندى، ردي عليا، ردي يا ندى. يوسف بصدمة: نداااااا.