رواية و لو بعد حين الفصل الحادي عشر 11 - بقلم خلود احمد

مضت على الورق وكانت بتبتسم ابتسامه مزيفه. المأذون: بارك الله لكما وبارك عليكما وجمع بينكما في خير. كلهم باركولهم وفايزه كانت بتزغرط. وبعدين ركبوا عربايتهم وراحوا القاعه. كلهم كانوا مبسوطين. أميره: طلعت سلمت عليها.. افردي وشك عشان محدش يلاحظ باين عليكي أوي. ليال: مش قادره أنا لحظه وهعيط. يوسف: مالك في حاجه؟ ليال: اتخنقت مش قادره. يوسف: نادى لعمر.. يلا ياعمر. عمر: مستعجل على إيه؟

يوسف: يا رخم ده وقت هزار ليال تعبانه يلا. عمر: تمام تمام. بعد ربع ساعه كانوا بيسلموا على أهل ليال ومشوا على بيت يوسف. كل واحد راح أوضته ويوسف وليال دخلوا الأوضه. أول ما دخلت لقت صورة كبيرة على الحيطه كانت صورة يوسف. الأوضه كانت منظمة وفيها بلكونه كبيرة بتطل على حديقة البيت اللي فيها حمام سباحة. ليال دخلت الحمام وقفت قدام المرايا وبصت لنفسها. كانت بتتنفس ببطء وبتدمع كل ما تفتكر الماضي.

شالت الطرحة من على راسها ورمتها على الأرض. كانت بتحاول تفتح سوستة الفستان مش عارفه. قامت قعدت في الأرض وفضلت تعيط. فضلت وقت كبير جوا. يوسف كان برا غير هدومه ببنطلون أسود وتيشرت. مسك الفون وقعد استغرب لما اتأخرت كتير جوا. يوسف: مالها دي اتأخرت ليه؟ قام يخبط عليها مش بترد. يوسف: ليال انتي كويسه؟ فضل يخبط ويحرك في الأوكره. يوسف بعد عن الباب وحط ايده على دقنه.. راحت فين دي؟ سمع صوت عياطها.

راح عند الباب بسرعه.. ليال انتي كويسه افتحي طيب متخافيش. فتحت الباب. يوسف دخل عندها.. انتي بتعيطي ليه في حاجه؟ ليال: مش عارفه افتح السوسته. يوسف مسح على وشه.. يارب صبرني انتي هبله يعني دي مستاهله عياط لفي هعملهالك. ليال: لا مش عايزاك تيجي ناحيتي أو تشوف جسمي. يوسف: مش هبص عليكي هغمض عيني وأخرجلك. ليال بصتله وخلاص. يوسف: صدقني. لفت ضهرها وهو غمض عينيه وعملهاله بعد محاولات كتيرة. وخرجت. غيرت وخرجت.

أخدت مخدة والغطا وراحت نامت على الكنبه. هو مرضاش يكلمها ونام على السرير من السكات. في نص الليل صحى كان الغطا واقع على الأرض. راح غطاها وقعد على الكرسي اللي جمبها بيتأمل ملامحها. يوسف: فيكي شبه كبير من ملك ولا أنا بقيت أشوف كل الناس شكلها؟ شعرها كان جاي على وشها. فضل يلعب في خصلات شعرها ويبتسم. هي حست بإيده فتحت عينيها وقامت بسرعة. ليال: في إيه؟ يوسف: مفيش حاجه مالك اهدى. ليال: أووف أنا خوفت. يوسف: هو أنا بخوف؟

ليال: الساعة كام دلوقتي؟ يوسف: 4 الفجر وراكي حاجه ولا إيه؟ ليال: دمك خفيف. وحطت ايدها على رقبتها.. آآآه. يوسف قام اخد الفوطة بتاعته.. السرير فاضي اهو قومي نامي عليه. ليال: مش عايزة منك حاجة. وكملت نوم على الكنبه. هو اخد دش وقعد يلعب رياضة شويه. الساعة جت 10 الصبح. يوسف: ليال انتي يابنتي أي النوم ده كله؟ ليال: اممم. يوسف: قومي بقي. ليال قامت اخدت هدوم ودخلت الحمام غيرت وخرجت. ليال: ها هنعمل إيه؟ يوسف: هننزل نفطر يلا.

نزلوا فطروا وقعدوا شوية معاهم وطلعوا تاني. ليال قعدت على التليفون كانت بتكلم أميره رسايل وبتضحك. يوسف: بتضحكي على خير وبتكلمي مين؟ ليال: وانت مالك؟ يوسف: بجد والله. ليال: آه والله ملكش دعوه بأي حاجة تخصني. يوسف اتضايق من أسلوبها خرج وقفل الباب جامد. نزل خد العربية وراح عند الشلة بتاعتهم. مي: جووو أي ياحبيبي جاي تاني يوم فرحك ليه؟ هي مزعلاكي؟ يوسف: محدش يقدر يزعلني بس انتي عرفاني بزهق بسرعة.

مي حطت ايدها على خده.. عارفه ياحبيبي والله ظلموك بالجوازة دي. يوسف: هنعمل إيه؟ مي: مش عارفه نشوف الشباب كده. عمر دخل الأوضة لقاها ضلمة وفي شمعة منورة على التسريحة. راح عندها لقي ورقة مكتوب عليها هالو دادى. عمر استغرب.. مروه! مروه فتحت النور وراحت عنده. عمر: ده إيه؟ مروه: تفتكر؟ عمر ضحك.. بجد. مروه ادتله اختبار الحمل.. آه والله بجد. عمر حضنها ولف بيها.. أحلى حاجة حصلت النهارده ياحبيبتي ربنا يحفظكم ليا يارب.

مروه: ويحفظك لينا يا أحلى بابا. باس راسها وايدها.. أنا مبسوط أوي يلا غيري هدومك بسرعة نروح نطمن عليه ونتغدى بره. مروه: بس. عمر: يلاااا مش عاوز أعذار. مروه ضحكت.. أمرك يا عموور. عمر: قلبه. الليل جه وعمر ومروه لسه بره. ليال زهقت قامت تلون في الكراريس بتاعتها. بعد شوية سمعت صوت العربية بتاعته قامت خبت الكراريس في الدولاب. يوسف دخل خد هدومه عشان يغير من غير ما يكلمها حتى.

تليفونه رن وهو في الحمام كان متسجل ميوش وجمبه قلب أحمر. ليال: اممم بقي كده. سابت الفون وقعدت. هو خرج كان بينشف شعره. ليال كانت حاطة رجل على رجل.. في واحدة رنت عليك. يوسف مسك الفون يشوف مين وحطه مكانه تاني.. وانتي مالك ومال خصوصياتي؟ ليال: خصوصيات إيه هو رن وأنا شوفت مين؟ يوسف: ملكيش حق إنك تشوفي مين. ليال وقفت.. لا والله انت بتتلكك بقي؟ يوسف قرب منها شوية.. وانت زعلانه كده ليه يعني غيرانه مثلا؟

ليال: أغير من إيه انت مجنون انت بتردهالي يعني؟ يوسف: هو أنا من حقي أعرف انتي بتكلمي مين وبتضحكي ومبسوطة كده عشان أنا الراجل مش انتي؟ ليال: لا مش من حقك برضه ولا انت هتعمل فيها جوزي أوي أنا وانت عارفين أنا وافقت عليك ليه. يوسف اتخنق.. والله محدش قالك توافقي كنتي قولتي لابوكي لأ.

ليال بصوت عالي.. وانت كنت تعرف أنا مريت بإيه عشان أبقى مجبورة أتجوزك انت معندكش دم يعني ولا إيه مش قولتلك أنا مش عايزاك يوم ما خرجنا سوا مرفضتش انت ونهيت الجوازة دي ليه من الأول؟ يوسف كان شارب ومش مركز في كلامها أوي. يوسف: اسكتي بقي. ليال قربت منه وخبطت على صدره بعصبية.. لا مش هسكت ولا انت لما تبقي غلطان تقولي اسكتي بقي. يوسف قرب منها وباسها. هي بعدت عنه بسرعة وضربته بالقلم. حطت ايدها على بوقها من الصدمة.