ناصر: متنساش تاخد فهمي معاك يا أيمن. أيمن: يلا يا فهمي قوم معايا. فهمي (بغضب) : لأ انزل انت يا أيمن أنا قاعد مع ناصر. ناصر (بنظرة حادة) : انزل يا فهمي مع أيمن. وخدوا وقتكم أنا مش مستعجل. أيمن أخد فهمي ونزلوا. ياسمين فتحت باب أوضتها وخرجت وراحت الأوضة اللي كانوا قاعدين فيها، لقيت ناصر قاعد لوحده. ياسمين: تاني؟ ناصر: شوفتي بقي! ياسمين: أيمن فين؟ ناصر: أخد فهمي ونزلوا زي المرة اللي فاتت.
ياسمين: انت اللي نزلت أيمن وفهمي؟ ناصر: أيوه. ياسمين: ليه؟ ناصر: عايزك يا قمر. جريت ياسمين على أوضتها وناصر جري وراها ومسكها. ياسمين: خلي بالك أيمن معرفش اللي حصل المرة اللي فاتت. ناصر: كدابة، أيمن عرف. وعموماً مش هتفرق عرف أو معرفش. ياسمين: انت عاوز مني إيه؟ ناصر: عايزك. ياسمين: لما انت بتحبني كده طيب ما تطلقني من أيمن وتتجوزني! ناصر: لأ، أنا مليش في الجواز والمسئوليات والكلمات دي. ياسمين: اومال ليك في إيه؟
ناصر: انتي عارفة يا جميل، ليا في الحب والمتعة والفرفشة وبس. ياسمين: يعني انت بتحبني وعاوزني أبقى معاك وقت ما تعوزني، إنما من بعيد وأنا مرات أيمن في نفس الوقت؟ ناصر: بالظبط كده. ياسمين: ولو أنا وافقت أنا بقي هستفيد إيه؟ ناصر: أنا عينيا ليكي، كل طلباتك مجابة، وقبل كل ده حبي ليكي. ياسمين: يعني لو عاوزة حاجة وقولتلك عليها هتجيبهالي؟ ناصر: جربي وانتي هتشوفي. ياسمين: طيب أنا عايزة هدية. ناصر: من عينيا.
ياسمين: عايزاها دلوقتي. ناصر: طيب غمضي عيونك. ياسمين: ليه؟ ناصر: غمضي بس. ياسمين: ماشي، اهو غمضت. ناصر: فتحي بقي. ياسمين: إيه ده! انت جبته امتى ده؟ ناصر: إيه رأيك؟ ياسمين: حلو أوي الخاتم ده. ناصر: شوفتي بقي، انتي بس تحلمي وتتمني وأنا أحققلك كل اللي نفسك فيه في لحظتها. ياسمين: انت بجد مش ممكن، ده ولا السحر! ناصر: علشان بحبك. ياسمين: ربنا يخليك ليا. ناصر: استاهل إيه بقي على الهدية دي؟ قالتله: تستاهل عمري كله!
وبعد حوالي ساعة نزل ناصر بعد ما ودعته ياسمين بقبلة حارة على باب الشقة. ياسمين قعدت لوحدها بعد ما فرطت في شرفها لأول مرة بإرادتها، وفكرت إنها لازم تستغل الموقف ده وتحاول تاخد من ناصر هدايا وفلوس على قد ما تقدر، وبعدين تهرب منه ومن أيمن وتبعد بعيد وتبدأ حياة جديدة. بعد نص ساعة طلع أيمن وسألها: ناصر فين؟ ياسمين: مشي. أيمن: أوعي يكون حصل بينكم حاجة؟ ياسمين (ضحكت أوي) : هو قالي إنك عارف باللي هيعمله معايا.
أيمن: لأ، ده كداب ابن ال… . يعني المهم عمل حاجة؟ ياسمين: أومال سيبته ونزلت ليه وانت عارف نيته وباللي عمله المرة اللي فاتت؟ أيمن (بارتباك) : هقولك، أصل أنا… ياسمين: ولا أصل ولا فصل، أنا داخلة أنام. أيمن: لأ استني علشان عاوزك. ياسمين: أنا هدخل أنام علشان تعبانة. *** فهمي اتصل بناصر قبل ما يروح بيته وقاله: انت فين يا ناصر؟ ناصر: روحت البيت. فهمي: انزل علشان عاوزك. ناصر: لأ تعبان وعاوز أنام، مش هينفع انزل دلوقتي.
فهمي: انت كنت بتضحك عليا؟ ناصر: ضحكت عليك في إيه بس؟ فهمي: قولتلي هتخليني أعمل مع ياسمين اللي أنا عاوزه. ناصر: أيوه وقولتلك اتقل شوية. فهمي: طيب ما انت نزلتني مع أيمن تاني النهاردة، ولما قولت إني مش هنزل قولتلي لأ انزل معاه! ناصر: ياض يا أهبل، مينفعش من أولها كده. فهمي: إزاي يعني مش فاهم؟ ناصر: يعني لما آخد عليها هخليك تعمل اللي انت عاوزه بالطريقة. فهمي: أوعى تكون بتشتغلني يا ناصر، أحسن أزعل منك وأنا زعلي وحش؟
ناصر: تصدق عيب عليك يا صحبي! وبعدين انت بتهددني ياض ولا إيه؟ فهمي: مش بهددك، بس أنا بفهمك إن موضوع ياسمين ده مش هشيله من دماغي. ناصر: ماشي يا فهمي، متخافش، سيبني بقي علشان عاوز أنام. فهمي: طيب احكيلي الأول عملت معاها إيه النهاردة؟ ناصر (ضحك أوي) : لما تكبر هقولك. فهمي: بتكلم بجد، احكيلي عملت إيه النهاردة؟ ياسمين رضيت ولا قاومتك زي المرة اللي فاتت؟ ناصر: لما تشوفها ابقي اسألها، يلا بقي اقفل علشان أنام.
فهمي شعر إن ناصر كان بيضحك عليه من الأول وكان واخده سلمه علشان يطلع يسهر عند أيمن، ودلوقتي هو عاوزه يفضل ساكت ومش يفضحهم لحد ما يزهق من ياسمين ويسيبها. تاني يوم قابلت فهمي وهو راجع من الشغل وشوفته بيضحك أوي فسألته: مالك ياض يا فهمي بتضحك أوي كده ليه؟ قالي: شوفت يا محسن الواد ناصر ده طلع شيطان. محسن: حصل إيه تاني؟ فهمي: عمل مع ياسمين تاني زي المرة اللي فاتت. محسن: بتتكلم بجد؟ فهمي: أومال يعني بهزر.
محسن: وأيمن فين من اللي بيحصل ده؟ فهمي: أيمن عارف وساكت. محسن: بتتكلم جد يا فهمي؟ فهمي: أيوه يا محسن، ليك حق متصدقش، أنا نفسي مش مصدق! محسن: وإيه اللي يخليه موافق على اللي بيحصل ده؟ فهمي: مش عارف يا محسن، بس كسرة النفس وحشة، وهو عينه ونفسه مكسورة علشان الفلوس اللي بياخدها من ناصر. محسن: طيب ما يشوف شغلانة يشتغلها، حتى لو هيمسح سلالم أحسن له من اللي بيحصل ده؟
فهمي: ما انت عارف أيمن، ولا متعلم ولا معاه صنعة، ومن الآخر المخدرات هي اللي وصلته لكده. محسن: أنا هشوف له شغل يمكن يتعدل، أنا مش مصدق أيمن يطلع كده! فهمي: سلام بقي يا محسن علشان هشوف ناصر فين علشان نطلع نسهر عند الموزة بتاعتنا. فهمي مشي وراح قابل ناصر وطلعوا عند أيمن وسهروا زي كل يوم، وياسمين قعدت معاهم وهما بيشربوا وبيضحكوا، وبعدين قامت تحضرلهم العشا. بعدها قام ناصر وقال لأيمن إنه هيدخل الحمام.
ناصر اتأخر أكتر من ربع ساعة، ولما رجع فهمي شعر إنه حصل حاجة مع ياسمين! فهمي ناره اشتعلت وقال لأيمن إنه عاوز يدخل الحمام… يتبع…
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!