رواية واغواهم الشيطان الفصل السابع 7 - بقلم عادل عبد الله

فهمي مشي وراح قابل ناصر وطلعوا عند أيمن وسهروا زي كل يوم. وياسمين قعدت معاهم وهما بيشربوا وبيضحكوا، وبعدين قامت تحضرلهم العشا. قام ناصر وقال لأيمن إنه هيدخل الحمام. ناصر اتأخر أكتر من ربع ساعة، ولما رجع فهمي شعر إنه حصل حاجة مع ياسمين. فهمي ناره اشتعلت وقال لأيمن إنه عاوز يدخل الحمام. فهمي دخل ورا ياسمين المطبخ ومسكها وحاول معها، لكن ياسمين منعته وقالتله: "انت اتجننت يا فهمي؟ إيه اللي بتعمله ده؟! "بحبك يا ياسمين."

"بتحبني إيه يا مجنون، دا أنا مرات صاحبك!! "برضو بحبك أوي." "شيل اللي في دماغك ده خالص، مش هيحصل، فوق كده لنفسك، أنا مرات صاحبك." "يعني حلو مع ناصر ووحش معايا؟! ياسمين (بتعجب) : "ماله ناصر؟ فهمي: "أنا عارف اللي بيحصل بينك وبينه." "هو اللي قالك كده؟ "عرفت وخلاص، ملكيش دعوة مين اللي قالي." "لو هو اللي قالك كده يبقى كداب." "ولما بنزل أنا وجوزك وهو بيفضل قاعد هنا معاكي!! بيكون بيعمل إيه؟ يعني هكذب نفسي أنا كمان؟

"من الآخر ملكش دعوة، يلا بقي امشي بدل ما أصوت وأقول لأيمن وناصر على اللي أنت بتعمله ده." "انتي بتخوفيني بناصر وأيمن؟ أنا مبخافش، وعموماً خليكي فاكرة ناصر بيضحك عليكي وأيمن بيبيع ويشتري فيكي، وأنا بس اللي بحبك." "يلا يا فهمي ادخل لأصحابك، شكل السيجارتين ضيعوا دماغك." رجع فهمي وقعد معاهم بعد ما حس بإهانة منها. وايمن تايه من الشرب، وناصر أخد باله من إن فهمي اتأخر وشكله متغير.

ياسمين جهزتلهم العشا وراحت قعدت تتعشى معاهم، لكن كلهم كانوا بياكلوا من غير نفس. فهمي حس بإهانة وإنه بينضحك عليه من ناصر، وناصر حس إن فهمي عاوز يلعب على ياسمين من وراه، وأيمن ضايع ومش فايق للأكل من كتر الشرب، وياسمين مش عارفة وصلت لكده إزاي ولا هتكمل بعد كده إزاي. بعد العشا ناصر أخد فهمي ونزلوا علطول ومش كملوا سهرتهم. ناصر مسك فهمي وقاله: "انت خرجت ورا ياسمين ليه؟ فهمي: "اشمعنى انت خرجت وراها؟

دا انت اتأخرت أوي أكيد يعني…!! ناصر: "انت غبي." فهمي: "متغلطش فيا يا ناصر." ناصر: "هغلط فيك وفي أهلك كمان عشان بغبائك، انت كده هتضيع كل حاجة وهتطير البت مننا." فهمي: "قصدك إيه؟ ناصر: "قصدي ياسمين كده هتخاف وممكن تقفل على الموضوع كله ويبقى ولا أنا ولا انت." فهمي: "يعني انت عاوز تبسط نفسك وأقعد أنا أتحرق وأنا قاعد." ناصر: "ما انت لو صبرت أسبوعين تلاتة بس هتعمل اللي انت عاوزه." فهمي: "بتتكلم جد ولا بتضحك عليا؟

ناصر: "هو أنا ضحكت عليك قبل كده؟ فهمي: "لا." ناصر: "طيب خايف من إيه بقي!! فهمي: "بس أنا خايف البت تضيع مننا احنا الاتنين زي ما انت قولت." ناصر: "ماهو كله هيبقي بسببك، عموما أنا هتصرف متشغلش بالك." *** لما أنا عرفت من فهمي بالوضع اللي وصله أيمن قولت لازم أشوف له أي شغل شريف بدل اللي بيعمله في نفسه وفي مراته ده. دورت لأيمن على شغل تاني يوم لحد ما لقيت له شغلانة واتصلت بيه وقولتله: "عامل إيه يا أيمن؟

علفكرة لقيت لك شغل." أيمن: "شغل إيه وبكام؟ "مش مهم دلوقتي المهم إنك تشتغل بدل قعدتك كده علشان مش تحتاج وتمد إيدك للي يسوى واللي ميسواش." "ماشي يا محسن هنروح نشوف الشغل ده إمتى؟ "يا عم البس وانزل ونروح نشوفه دلوقتي." "خلاص ربع ساعة وهكون عندك." وفعلاً نزل أيمن ورحنا واستلم شغله. وبعد المغرب رجع ناصر وفهمي من شغلهم. اتقابلوا واتصل ناصر بأيمن علشان يطلعوا يسهروا زي كل يوم.

ناصر: "إيه يا أيمن أنا هجيب العشا ولزوم السهرة وهنطلع لك أنا وفهمي." أيمن: "معلش يا ناصر أصل أنا استلمت شغل جديد، أجل السهرة لبكرة ونبقى نحدد معاد جديد نسهر فيه علشان برجع من شغلي بالليل متأخر." ناصر (بانزعاج) : "بجد اشتغلت؟ طيب كويس ده خبر حلو أوي. مبروك يا أيمن." أيمن: "الله يبارك فيك." ناصر: "طيب هقفل معاك بقي وأسيبك تشوف شغلك." قفل ناصر مع أيمن وكان واضح عليه الارتباك. فهمي قاله: "في إيه يا ناصر؟ أيمن قالك إيه؟

ناصر: "أيمن استلم شغل وبيقولي نأجل السهرة لحد ما يحدد معاد جديد علشان بيرجع من شغله متأخر." فهمي: "طيب وبعدين؟ هنعمل إيه يا ناصر؟ ناصر: "مش عارف، تعالي نشرب كوبايتين شاي على القهوة وأفكر هنعمل إيه." قعدوا شربوا الشاي وبعدين ناصر قال لفهمي: "أنا هروح أنام ونأجل الموضوع ده لبكرة." مشي فهمي وناصر عمل نفسه إنه مروح بيته وبعدين اتصل على ياسمين وقالها إنه عرف إن أيمن اشتغل وإنه هيروح لها البيت على ما أيمن يرجع من شغله.

وفعلاً ناصر راح لياسمين البيت وأول لما ياسمين شافته قالتله: "ينفع اللي صاحبك عمله ده يا ناصر؟ ناصر: "قصدك فهمي؟ "أيوه الزفت فهمي. شوفت طمعته فيا إزاي؟ ولا تلاقيك بتحكيله على اللي بيحصل بينا؟! "انتي اتجننتي يا بت؟ أحكيله إيه وطمعته إيه!!! ده عيل أهبل ملوش لازمة." "أهو بقي له لازمة لما عرف سرنا." "كبري دماغك منه." "ولما يفضحنا هنعمل إيه؟

"مفيش الكلام ده، أنا ثبته بكلمتين، وبعدين فهمي ده بالذات مفاتيحه معايا مفيش منه قلق خالص." "انت شايف كده؟ "سيبك بقي من أي حاجة وتعالي علشان انتي وحشاني أوي." وقعد ناصر معاها وقضوا ساعتين في الحرام، وقبل ما ينزل اداها هدية وفلوس وقالها إن كده أحسن لها، وإنه هيبقي يطلعلها كل يوم بعد رجوعه من شغله وقبل رجوع أيمن البيت.

وياسمين وافقت لأنها هتاخد من ناصر كل الفلوس اللي كان أيمن بياخدها منه وهتستفيد هي بدل أيمن جوزها اللي بيبيع شرفها ويقبض هو. في اليوم التالي أيمن اتصل بناصر وقاله: "معلش يا ناصر البارح رجعت من الشغل متأخر أوي، شكلنا مش هنعرف نسهر مع بعض إلا يوم الإجازة." ناصر: "اللي تشوفه يا صاحبي، المهم تشوف مصلحتك وأكل عيشك، سيبك من السهر ما إحنا ياما سهرنا وانبسطنا." أيمن: "أومال انت هتعمل إيه انت وفهمي؟

ناصر: "متشغلش بالك، هنسهر في أي مكان ونبقى نسهر مع بعض يوم الإجازة زي ما انت عايز." بعد رجوع ناصر من شغله قابل فهمي اللي سأله: "هنع مل إيه يا ناصر؟ هنسهر فين؟ ناصر: "مش عارف!! تعرف يا ضنايا يا فهمي شغل الواد أيمن ده عمل مصلحة." فهمي: "ليه بقي؟ ناصر: "خلينا نشوف أكل عيشنا يا عم الواحد زهق من السهر والشرب." فهمي: "انت اللي بتقول كده؟ ناصر: "أيوه وفيها إيه!! فهمي: "طيب وياسمين؟

ناصر: "مش عارف، بس هتوحشني أوي بنت الـ***." فهمي: "يعني هتبعد عنها؟ ناصر: "وأعمل إيه؟ ماهو أيمن دلوقتي هيشتغل وهيبقى معاه فلوس ومش هيحتاجني زي الأول." فهمي: "طيب ما تخليك معاها من غير ما أيمن يعرف؟ ناصر: "مش بقولك انت عبيط!! فهمي: "ليه؟ ناصر: "لما نطلع وأيمن موجود هيبقي شكلنا عادي قدام الناس، إنما علشان أطلع وهو مش موجود هتبقى شبهة والجيران هيدوروا ورانا بنعمل إيه فوق وهو مش موجود."

فهمي: "عندك حق يا ناصر، طول عمرك ناصح." أيمن كل يوم يرجع من شغله يلاقي مراته تعبانة ونايمة ولما يطلب حقه الشرعي كانت بترفض. حتى يوم إجازته لما طلبها رفضت فسألها: "انتي بترضي ليه؟ ياسمين: "تعبانة ومليش مزاج." أيمن: "لكن أنا محتاجلك." ياسمين: "وأنا أعملك إيه؟ أيمن: "هو ناصر بييجي هنا وأنا مش موجود؟ ياسمين: "انت هتعمل فيها مش عارف تاني؟ أيمن: "يبقى بييجي هنا يا فاجرة."

ياسمين: "أنا فاجرة بعد ما اتجوزتك عشان اتجوزت واحد بقرنينيتبع…