رواية وقعت في حب انتقامه الفصل الحادي عشر 11 - بقلم ميرفت سعيد

روح لأسر اللي في دنيا تانية. دنيا مفيهاش غيره هو وحبيبته. حبيبته اللي أذاها وجرحها، هي دلوقتي بتعاقبه أكبر عقاب. وخايف إن العقاب ده يطول. هو معتش قادر. بيتمنى إنها تقوم له، وهو يعملها اللي هي عايزاه. هو تعبان جداً. حاسس بروحه بتتخد منه، والسواد بيهجم عليه. ومعتش قادر يقومه. استسلم. عمر بصراخ: أسر! كاميليا بخوف: أسر مالك؟ فوق. زياد بخوف: دكتور بسرعة. الدكاترة جت وأخدت أسر.

الدكتور: متقلقوش، هو كويس بس الضغط عالي. يا ريت تبعدوه عنه أي ضغط اليومين دول. هو مش حابب إنه يفوق. مش هيقوم دلوقتي. ولما يفوق حاولوا إنه ميتعبش، مش عايزين الضغط يرتفع تاني. عمر: تمام يا دكتور. روفان خرجت برا أوضة الكشف وقعدت على كرسي جنب العناية المركزة وبتعيط. زياد راح وراها. زياد وهو بيمسك إيديها: هتبقى كويسة. روفان: خايفة عليها أوي. زياد: أختك قوية. روفان: مين قال إنها قوية؟

اللي شوفته مش قليل يخليها أضعف من أي حد. زياد: إيه هو اللي شوفته؟

روفان بحزن: أنا ونور اتحرمنا من حنان الأم والأب. بابا كان بيشتغل 24 ساعة وماما برضو. من أول ما سافرنا وهما كده. نور كانت في الثانوي وأنا كنت في إعدادي. حتى أنا يعني حسيت بحنان. لأن نور كانت بالنسبة ليا الأم والأب. حتى لو بابا كان بيضربني، كانت تحوش عني وساعات تاخد الضرب مكاني. نور فضلت تحب أسر لحد دلوقتي. ولما بابا في مرة دخل عليها ولاقاها بتتابع صفحته على الفيس، ضربها وخد منها الفون وعاقبها شهر إنها متقعدش على أي مواقع تواصل. ده لما ماما تكرمت علينا وجابته منه. وكان عايز يجوزها عشان تنسى أسر. وفعلاً الكلام ده حصل.

زياد بصدمة: بجد؟ يعني نور اتجوزت؟ روفان: لا، يوم كتب الكتاب وهو جاي في الطريق عمل حادثة ومات. زياد: وباباكي عمل إيه؟ روفان: حاول يدور على عريس تاني. بس نور وقفت له لأول مرة وقالتله إنها مش هتتجوز خالص. ونزلت على مصر، بس خدتني معاها عشان مش عايزاني أفضل معاهم. زياد ابتسم: أحسن حاجة عملتها. روفان ابتسمت ابتسامة بسيطة: يارب نور تفوق بقا. أنا تعبت. زياد: إن شاء الله هتفوق ونطمنها. *** عند كاميليا وعمر.

كاميليا بتعيط بخوف على أخوها ونور برضو. عمر: مش بتهدي؟ إنتي من ساعة ما جيتي وإنتي مبطلتيش عياط كده هتتعبي. كاميليا ببكاء: هو ليه إحنا بيحصل معانا كده يا عمر؟ عمر: ظروف وهتتحسن. دلوقتي أسر يفوق ونور هتفوق برضه. كاميليا: أنا خايفة أوي على أسر ونور. عمر: اهدي بس إنتي كده هتتعبي. فجأة لقوا الممرضين بيخرجوا نور من العناية. روفان بخوف وصوت عالي: إنتوا بتعملوا إيه؟ زياد: اهدي، فيه إيه يا دكتور؟

الدكتور: المريضة عدت مرحلة الخطر وصحتها استقرت الحمدلله. فـ نقلناها أوضة عادية. روفان بفرحة: الحمدلله يارب. طب هي فاقت؟ الدكتور: أيوه، هي بتفوق دلوقتي. تقدروا تشوفوها. روفان وكاميليا وزياد راحوا لنور. وعمر راح لأوضة أسر. عمر: فوق يا حبيبي بقا. حبيبتك فاقت وبقت كويسة وخرجت من العناية وتتفوق دلوقتي. فوق بقا يا أسر. فوق بقا يا صاحبي. عمر كان لسه هيخرج. حس بإيد أسر بتتحرك. بيبص له، لقاه بيفتح عينه. عمر بفرحة: أسر!

أسر بتعب: نور... عمر بلهفة: نور كويسة يا أسر. نور كويسة. فاقت وروفان وكاميليا وزياد عندها. قوم إنت كمان عشان تروح لها. أسر بلهفة وفرحة: فـ فاقت. عمر: أه والله. أسر بيحاول يفك المحلول من إيده. عمر: استنى يا ابني هجيب ممرضة تفكه لك. الممرضة جت وفكت المحلول لأسر. هو كان خلصه، وعمر مسكه عشان يروحوا هناك. *** عند نور. بتفوق بتعب. بتفتح عينيها بصعوبة. روفان: حمدلله ياحبيبتي. كنت خايفة عليكي أوي يا نور. نور: رد.

روفان: مالك؟ نور ساكتة، مش بتتكلم. بتدور على حد، بس مش عارفة مين. أسر دخل بلهفة وجري عليها. مسك وشها بحب وخوف وبيفحصها بقلق: إنتي كويسة؟ فيكي حاجة؟ حـ حاسة بحاجة؟ حبيبتي ردي عليا. كاميليا بفرحة: أسر، حمدلله على سلامتك. أسر: نور ردي عليا. نور كانت ساكتة تمام. كانت بتبص ليهم نظرات غريبة. هما مش فاهمينها. نور بتوهان: إنت مين؟ إنتوا مين؟ كلهم بصدمة: إييييييييه؟