رواية وردة الاڤوكاتو الفصل الحادي والعشرون 21 - بقلم بسنت محمد

يحيى: فكرة إن الناس كلها عرفت إن نادين بقت مراتي مفرحاني جداً، ومخليني نفسي أقول للكون كله إنها مراتي وأم ابني أو بنتي اللي جاي إن شاء الله. لكن ميرنا كتر خيرها عملت الواجب وزيادة. نهال: ميرنا خارجة لايف دلوقتي، افتح موبايلك بسرعة يا يحيى. يحيى: فتحت موبايلي لقيت ميرنا عاملة بث مباشر وبتعيط فيه للفانز بتوعها. وبت تقول إيه بقى في اللايف ده؟ ميرنا (ببكاء)

: أنا آسفة يا جماعة علشان أول مرة أخرج بالشكل ده ليكم. أنا حياتي اتدمرت من الإنسان اللي كنت فاكرة حياتي وروحي. الإنسان اللي وهبتله قلبي وكل حاجة فيا. الإنسان اللي فرحت بيه وقلت هو ده العوض اللي ربنا رزقني بيه. جوزي المحترم خانّي... وأنا شفت خيانته ليا بعيني. وبعد كده عرفت إنه متجوز عليا... من مين؟

من بنت عمه اللي ساكنة معانا في نفس البيت اللي بنعطف عليها عشان أهلها متوفين. خطفته مني ومثلت دور البنت المسكينة العاقلة المتدينة، وهي في الآخر بترسم على جوزي عشان تاخده مني. جوزي اللي محبتش حد قده... وفي الآخر يسبني ويتجوز دي. أنا بعتذر تاني يا جماعة عن الوضع الحالي اللي ظهرتلكم بيه. ادعولي ربنا يعوضني خير ويصبر قلبي على اللي عمله فيا. نهال: يا بنت الكدابة، دي اتجننت رسمي. يحيى: حسابها معايا تقل زيادة عن اللزوم...

تقل أوي يعني. أنور: ناوي على إيه؟ يحيى: هتعرف. نادين: أنا اتبهدلت يا يحيى... أنا كل الناس بتشتمني... شايف التعليقات... شايف اللي بتقوله واللي عمتي منيرة قالته. هو أنا وحشة إني وافقت عليك؟ هو أنا وحشة إني سمحت لنفسي أقرب لك؟ فاطمة (ردت عليها قبل يحيى ما يرد وقعدت جنبها وحضنتها) : انتي مش وحشة يا نانو...

انتي ست البنات. وكل اللي بتمرّي بيه ده اختبار من ربنا سبحانه وتعالى وعارفة إنك هتصبري على الابتلاء. انتي مخطفتيش يحيى منها... انتي وهو مكتوبين لبعض من قبل ما تتولدوا. وكلنا كنا عارفين حبكم لبعض من أول ما جيتي ورجعتي مصر...

لكن مفيش حد كان قادر يتكلم. والكلام اللي بيحصل منهم متخافيش عشان ربنا هيدافع عنك قصادهم لأن ملكيش ذنب في حاجة. مش ربنا سبحانه وتعالى قال "إن الله يدافع عن الذين آمنوا" وإنتي مؤمنة وهو معاكي. مش فاكرة السيدة عائشة أم المؤمنين رضي الله عنها وأرضاها في حادثة الإفك لما ربنا سبحانه وتعالى برأها من فوق سابع سما؟ ربنا مش هيسيبك أبداً... متخافيش. نادين: بس الناس مصدقاها وفي صفها جدا.

فاطمة: وإنتي ربنا عالم بالحقيقة ومعاكي وإحنا كمان معاكي. فطلعي كلامها من دماغك. نادين: ونعم بالله. نهال: أنا بحبك يا ماما ربنا يخليكي لينا. فاطمة: وما يحرمني منكم أبداً. نهال: عارفين يا جماعة البلوجرز وبتوع فيديوهات السوشيال ميديا دول أغلبهم حياته مصطنعة ومليانة كدب...

إلا من رحم ربي طبعاً لأن فيهم الكويس أكيد. لكن حقيقي بيتاجروا بمشاعرهم وحياتهم عشان الشهرة والفلوس. أهي في ثانية رسمت حكاية على الناس والمصيبة إن الناس صدقتها. تخيلوا بقى إن في فئة كبيرة جداً من الشباب الصغير أو اللي اسمهم اندر ايدج حالياً بياخدوا النوعيات دي قدوة ليهم. فاطمة: والله ربنا يستر على عباده...

الناس بعدت عن ربنا سبحانه وتعالى ونسوا قد إيه حرام إننا نفضح حياتنا كده قدام الناس وإن لازم نحافظ على حيائنا وخصوصياتنا. ربنا يهدي عباده يارب ويعافينا مما ابتلاهم بيه. أنور: آمين... يلا نسيب نادين تريح بقى شوية. انتوا قولتم لمامتك عن اللي دكتور عماد قاله؟ يحيى/نادين: لا. أنور: طيب... فاطمة، نادين حامل. فاطمة: حامل إزاي يعني؟ (وبصت ليحيى) انت اتجوزتها يا ولا من ورانا وغفلتنا؟ يحيى: فيه إيه يا ماما؟ غفلتكوا إزاي يعني؟

دي مراتي وحلالي ودي حقوقي. فاطمة: مش تصبر لما نعمل فرح ونفرح البت زي باقي البنات. أنور: خلاص... ربنا يقومها بسلامة هي وحفيدك يارب. فاطمة (حضنت يحيى ونادين بفرحة) : ربنا يفرحكم يا حبايبي ويطمنكم على نونتكم ويفرحنا بيه. أنا كنت نفسي ده يحصل بس مكنتش قادرة أقول حاجة والله.

نهال: وأنا كنت عايزة جوازهم يبقى حقيقي ويفرحوا ببعض. كان صعبان عليا أشوفهم بيتعذبوا هما الاتنين ومش قادرين يتكلموا. ربنا يفرحكم ببعض يا روحي ويقومك بسلامة.

يحيى: حساب تقيل بيني وبين ميرنا، غير اللي عملته مع نادين والفضيحة اللي عملتها. لكن عرفت إنها شريكة فايز الأسيوطي في صفقات منتجات التجميل اللي بتعلن عنها وكانت عارفة اللي ناوي يعمله فيا هو وهشام وسكتت. وفكرة إنها تقتل روح بريئة جواها والروح دي تبقى جزء مني بتخلي النار تزيد جوايا. أنا ممكن أرفع عليها قضية تشهير وأجرجرها في المحاكم غير طبعاً طلاقها. لكن طلاقها في الوقت الحالي هيثبت على نادين الكلام اللي قالته. وغير شوية قضايا كده هي متورطة فيهم. لكن جات من عند ربنا وهي اللي حفرت قبرها بنفسها.

نادين: بعد يومين من اللي حصل لاقيت نهال زي عادتها اليومين دول بتجيب أخبار الكوارث وتدخل تصرخ بيها لغاية ما جابتلي رعب. نهال: ناااانو شوفتي اللي حصل؟ ربنا كريم أوي وبيرد المظالم والله. نادين: خير. نهال: اتفضلي اقري. نادين: "القبض على البلوجر المشهورة ميرنا عزيز لترويجها وبيعها لمنتجات غير مطابقة للمواصفات ولتسببها في أضرار جسيمة لمستخدميها". إيه ده مش فاهمة حاجة. هي عملت إيه؟

نهال: كملي الخبر. ميرنا كانت بتعلن على صفحتها عن منتجات للبشرة. أتقدم بلاغات ضد الشركة المستوردة للمنتج بأنه اتسببت في تشوهات لبنات كتير من اللي استخدموه. فطلع مين بقى اللي استورده؟!!! نادين: مين؟!! نهال: ميرنا. وكل أوراق المنتج باسمها. فاتحبست. شوفتي بقى. نادين (بدموع) : ويمكرون ويمكر الله. نهال: شوفتي ماما طلع معاها حق إزاي؟ نادين: الحمد لله.