رواية ورطه رماديه الفصل الأول 1 - بقلم زهرة الربيع

انتي مين يا بت انتي وقاعده في شنطه العربيه ليه؟ قالت بسرعه: اشش وطي صوتك ليسمعوك. هكون قاعده ليه يعني باخد تان.. مستخبيه طبعًا. قال باستغراب: مستخبيه ليه.. ومن مين يعني؟ طلعت من العربيه وقالت: قولي الأول ساعتك كام؟ بص في الساعه وقال: 12. قالت بزهول: 12 بالليل؟ بصلها بضيق وقال: لا الضهر بس. الشمس بتستعبط شويه انهارده.. ملهاش مزاج تطلع. شدت شنطه صغيره بتاعتها علقتها على كتفها وقالت بسرعه:

بتستظرف حضرتك.. انا راحت عليا نومه في عربيتك.. لازم امشي بالأذن. ولسه هتجري مسك ايدها بسرعه وقال: استني هنا مش هتمشي قبل ما اعرف انتي مين وبتعملي ايه في عربيتي. قالت بغيظ وهيه بتمد ايدها: انا.. داليدا. سلم عليها وضغط على ايدها وقال بمعاكسه: حلوه يابلدي. دفعت ايده بغيظ وقالت: ادينا اتعرفنا.. سامو عليكو. ولسه هتمشي وقفها تاني وقال: قولتلك مش هتمشي غير لما اعرف حكايتك ايه اللي طلعك في عربيتي.. اتكلمي احسن لك.

داليدا اتنهدت وقالت: شوف يا... قال بسرعه: مؤمن.. اسمي مؤمن العنانى. داليدا قالت بضيق: ولو انو مش باين خالص.. ولا فيك ريحة الامان حتى.. بس مش مهم خليني اخلص.. انا اسمي داليدا وكنت هربانه من عمي علشان كان عايز يخطبني لابنو انهارده وانا مش حباه.. خلصنا كده. مؤمن قال بمعاكسه: معاكي حق.. اللي زيك لازم يتأنى.. ربما النصيب على الابواب ومحتاج اللي يفتحلو الباب.. افتحي بدل ما ينط من الشباك ويعملكو مصيبه. داليدا

ابتسمت على كلامو وقالت: انا ناقصه مجانين. ولسه هتمشي قال بسرعه: طب خليني اوصلك.. احنا في المقطم هنا والدنيا مش امان. داليدا اتفاجأت وقالت بزهول: في المقطم.. كمان.. يا ليله رمادي. مؤمن ضحك وقال: رمادي؟ داليدا اتنهدت وقالت: اه رمادي.. علشان ليله مش باينلها لا لون ولا ملامح.. بتستعبط كده من اولها. مؤمن ضحك وقال: طب اركبي معايا.. ونحددلها لون على الطريق. وقرب منها وقال بوقاحه: يمكن تطلع ليله حمرا واحنا مش واخدين بالنا.

بس اتفاجأ لما ضربتو بشنطتها على دماغه وقالت بغيظ: احترم اسمك حتى.. قال مؤمن قال. ومشيت بغضب. مؤمن فرك راسه بألم وقال: هو انا قولت ايه.. مش بحاول اساعدك.. انتي يا بت.. يابت استني الدنيا ليل.. بس جريت وموقفتش ابدا ولا سمعته. مؤمن اتنهد وابتسم على شكلها الجميل وكلامها وضحك بخفه وهو حاطط ايده على دماغه وركب عربيته ومشي هو كمان.

في صباح يوم جديد في شقه جميله جدا على البحر.. مؤمن قام من النوم واخد شور وخرج بقى بينشف شعره وحس بالم بسيط في دماغه فافتكر داليدا واللي عملته ونظراتها وكلامها.. ابتسم وقال: كان لازم يعني تتسحب من لسانك.. مش كنت تهدى شويه لحد ما تاخد رقمها حتى. وبدأ يلبس هدومه ونزل على شغله. لسه هيطلع في عربيته فيه واحد وقفه وقال: لو سمحت يا أستاذ.. مؤمن اتقدم عليه باستغراب وقال: نعم مين حضرتك؟

بس في ثواني وقع مغمى عليه لما حد ضربه بقوه من وراه على دماغه. بعد وقت مؤمن فتح عينه بشهقه قويه لما اتكب عليه ميه كتيره. بص حواليه بزهول لقى نفسه متكتف على كرسي وفيه راجل في الاربعين قصاده قال بغضب: شرفتنا يا مؤمن بيه. مؤمن بصلهم باستغراب وقال: هو.. هو فيه ايه.. انا بعمل ايه هنا.. انتو مين؟ الراجل قال وهو بيلف حواليه:

احنا مين دي سبها لظروفها.. انما عايزين ايه فاحنا مش عايزين غير حقنا.. هتقول معلومه واحده وهترجع بيتك صاغ سليم.. البنت فين؟ مؤمن قال باستغراب: بنت.. بنت مين؟ الراجل قال بغضب شديد: البنت اللي اتخبّت في عربيتك امبارح.. هيه فين؟ كانت هربانه مننا واستخبت في عربيتك اخر حاجه وبعد كده معرفناش نوصلها. اتسعت عينه بزهول وقال: انت انت عمها.. صح.. انت ليه عايز تجوزها غصب؟

اسمحلي اقولك انت الغلطان بقى لو معملتش كده مكانتش هربت وبس. قاطعه وقال بغضب: جواز ايه وهباب ايه.. هيه قالتلك انها هربانه مننا علشان عايزينها تتجوز؟ قال باستغراب: اه.. امال هيه هربت ليه؟ ضحك جامد وقرب منه وقال بهمس عند ودنه: هربت علشان حراميه.. وسرقتني.. اخدت التمثال بتاعي وهربت.. التمثال ده مش هيكفيني فيه عمرك وعمرها.. فهمت.. فتكلم احسن لك. مؤمن قال بغضب:

حيلك يا باشا.. تمثال ايه ده اللي يسوى عمري.. لا حاسب انت مش عارف انا من عيلة مين.. قولي على تمن التمثال ده ولا نوعه واجبلك غيره وبلاش تصدعوني.. انا عندي ميتنج مهم. الراجل وقف قدامه وكتف اديه وقال بغضب: تمام.. التمثال اللي معاها ده قطعة آثار.. تسوى ملايين.. ولو اتعرف ان لك دخل في الموضوع هتروح في داهيه.. انو والميتنج سوا في كلبش واحد.. ها ايه رأيك؟ مؤمن اتسعت عينه بصدمه رهيبه وقال بتلعثم: ااا.. آثار.... يا ليله رمادي.