رواية رهف الفصل السادس عشر 16 - بقلم ندى رأفت "Miyano Shiho"

طلع ياسين علبة الدواء من الدرج وفتحها، فلقى الدواء خلص، فضحك ودخل العلبة تاني الدرج وقال: مش هلحق.. أجيب تاني.. أظاهر خلاص كده.. وخد نفس. وبعدها نزل تحت. والدة ياسين: يلا علشان منتأخرش يا ابني، كل ده بتعمل إيه فوق؟ ياسين راح لوالدته وحضنها جامد. والدة ياسين حست بشعور غريب وقالت: مالك يا ابني، في إيه؟ يوسف بسخرية: أظاهر بيخاف من الأفراح يا عمتو. ساب ياسين والدته وقال: يلا بقى علشان منتأخرش.

فخرجوا من الفيلا وركبوا العربيات، وكان لكل عربية سواق. ومشوا. في العربية... والدة ياسين مسكت إيد ياسين وقالت: إيه ده يا بني، إيدك باردة أوي. ياسين: لا يا ماما عادي، أظاهر بردت شوية بسبب تكيف العربية. والدة ياسين: اقفل التكيف يا ابني. تحب يا ياسين نرجع ونلبس جاكت أتقل من ده؟ ياسين: لا ملوش لازمة يا ماما، متقلقيش. والدة ياسين بقلق: ماشي يا ابني.

وقالت بينها وبين نفسها: هو أنا ليه حاسة إن قلبي مقبوض كده.. ولا.. ده.. يمكن إحساس عادي. ووصلت العربيات قدام الكوافير. ونزل ياسين ويوسف ومنتظرين. وبعد فترة.. خرجت إنجي. والكل قاعد يزغرط. ونزلّت لياسين وقالت: ها إيه رأيك يا حبيبي؟ ياسين كان هيرد، فطلعت رهف، وكانت ماسكة الفستان ومتبرجلة بيه. فقال ياسين: جميلة وجميلة أوي كمان. فبصت إنجي عليه، فلقته باصص على رهف، فبصتلها بغيظ. ودخلت العربية. نزلت رهف ليوسف.

يوسف: قمر يا حبيبتي. رهف بخجل: شكراً. ودخلت العربية. وبعدها ركب الكل العربيات واتجهوا للقاعة. في القاعة... بعد الزفة... والد إنجي: يلا بقى نكتب الكتاب. إنجي: خلينا نكتب كتاب يوسف على رهف الأول، علشان عايزة أزغرط لأخويا. والد إنجي: وما له.. يلا اتفضلوا اقعدوا هنا يا عرسان. قعد يوسف. وياسين باصص على رهف وهي متجه للكرسي. فبصتله وافتكرت (ياسين لما مسك

إيدها ولبسها الخاتم وقال: الخاتم ده أنا طلبت من بابا يعملهولي مخصوص ليكي، ودا علشان كل ما تبصيله تفتكريني) وافتكر ياسين (رهف وهي بتقول: هو انت مش راجع تاني ولا إيه يا ياسين؟ ياسين: إزاي دا أنا هرجع وهتجوزك) قعدت رهف على الكرسي. افتكر ياسين (رهف وهي بتقول: أنا بكرهك يا ياسين، بكرهك) وفجأة ابتدت تخف إيد ياسين اللي ماسك بيها إنجي. فلاحظت إنجي، وبصتله. ابتدت الرؤية عند ياسين تخف، وجفنه يتقل.

يوسف: إحنا مش هنكتب الكتاب ولا إيه. راح المأذون لسه هيتكلم، فجأة ساب ياسين إيد إنجي ووقع على الأرض. الصدمة سادت المكان للحظة. فجأة قالت إنجي: ياااااسين.