رواية رحلة فيروز الفصل الرابع 4 - بقلم سارة عبدالباري

يوسف أول ما شافها جرى وحضنها: حبيبتي اللي وحشتني أوي، حمد الله على السلامة يا قلبي. أسماء بفرحة: الله يسلمك يا بيه، أنت وحشتني أوي. يوسف: أنتي أكتر يا روحي، أحب أعرفك فيروز. أسماء بصت لفيروز بصدمة: أنتي! يوسف بدهشة: أنتوا تعرفوا بعض؟ فيروز بصت لأسماء: أنتي اسماء أخت يوسف؟ مش معقول. يوسف: لا فهموني يا جماعة، أنا مش فاهم حاجة.

أسماء: فيروز كانت بتدرس معايا، وكانت بتحذرني من الشلة اللي أنا ماشية معاها دايماً، بس أنا مكنتش بسمع كلامها. أكملت حديثها ببكاء: يارتني كنت سمعت كلامها، مكانش دا كله جرالي. يوسف ضمها لحضنه وعيونه دمعت بسبب المعاناة اللي أسماء كانت بتعشها: اهدى علشان خاطري. فيروز شدت أسماء من حضن يوسف: أوووعى كدا، سبني أسلم عليها. تعالي في حضن أخوكي يا فواز. أسماء بضحك: ده أنتي مشكلة يا فيروز.

يوسف بضحك: أنتي لسه شفتي يا بنتي، ده أنتي لسه هتشوفي العجب، فيروز دي تخصص مشاكل. فيروز بصتله بشر: قصدك إيه يا أستاذ يوسف؟ يوسف بصلها بغيظ: أستاذ؟ طب يلا من هنا، جبتولي صداع. فيروز سحبت أسماء من إيديها: تعالي يا بنتي نرغي مع بعض شوية. يوسف ابتسم برضا وفرح إن أسماء حبت فيروز، لأن ده هيفرق في حالتها النفسية جداً. في غرفة أسماء: فيروز: ها يا ستي، هتفضلي ساكتة كدا كتير؟

أسماء بضيق: مش عارفة يا فيروز، حاسة إن حياتي وقفت، مش عارفة أعمل إيه. فيروز: يابنتي حياتك وقفت إيه وهبل إيه؟ فوكي من الكلام ده، ووصلتي للاكتئاب دي. قومي خدي شاور وانزلي علشان هجهزلك عشة ملوكي. أسماء بابتسامة: حاضر يا ستي، عشر دقايق وهتلاقيني على السفرة. فيروز نزلت جهزت العشاء وحطت الأكل على السفرة. يوسف كان خارج من المكتب ولقى فيروز بتحط الأكل. يوسف: أنتي جهزتي الأكل بالسرعة دي؟

فيروز بابتسامة: أيوه، بالهنا والشفا. هنادي أسماء علشان تتعشى مع حضرتك. أسماء: أنا جيت أهو، يلا يا ستي علشان نتعشى مع بعض. فيروز بحرج: لا اتفضلوا أنتوا، أنا هتعشى مع بابا في الجنينة. أسماء بزعل: وأنا مش هاكل غير لما تاكلي معانا، ماتتكلم يا بيه يوسف. يوسف بص لفيروز برجاء: كلي معانا يا فيروز، أديكي شايفة أسماء مش هتاكل. وابتسم ابتسامة مكر: وهتبقى أنتي السبب. فيروز: خلاص هاكل معاكم. بدأوا ياكلوا في

صمت لحد ما أسماء اتكلمت: تسلم إيدك يا فيروز، الأكل تحفة. فيروز بابتسامة: بالهنا والشفا. يوسف: لا بجد، طلعتي طباخة شاطرة يا فيروز، من هنا ورايح أنتي اللي هتعملي الأكل. فيروز حست بالإهانة وبصت ليوسف بدموع: بس أنا بساعد دادة فاطمة، وهي تعبت النهارده علشان كدا أنا طبخت الأكل. يوسف بص لفيروز: أنا مش قصدي حاجة، وأسف إني زعلتك. فيروز: لا محصلش حاجة، بعد إذنكم. أسماء: طب كملي أكلك. فيروز: شبعت الحمد لله، تصبحوا على خير.

أسماء: وأنتي من أهله يا حبيبتي. أسماء بصت ليوسف: لي كدا يا بيه؟ أحرجتها جامد. يوسف: أنا مكنتش أقصد، واعتذرتلها قدامك. أسماء: فيروز دي طيبة جداً، أنا حبيتها أوي. يوسف بابتسامة: طب كويس جداً، خليكم صحاب، ولو احتجتي أي حاجة اطلبي مني، اتفقنا. أسماء بعد ما قامت باحتضانه: اتفقنا، ربنا يخليك ليا. يوسف: ويخليكي ليا يارب. في الجنينة يوسف كان بيتمشى وشاف فيروز. يوسف: مش قولتي هتنامي؟ فيروز بزعل: مش جايلى نوم، قولت أتمشى شوية.

يوسف: لسه زعلانة مني؟ عموماً أنا أسف مرة تانية، بس مقصدتش أزعلك. فيروز: أنا مش زعلانة خلاص، محصلش حاجة. يوسف: هصدقك وأكذب عينيّ. فيروز بضحك: لا بجد خلاص مش زعلانة. يوسف: طب ممكن تعمليلي كوباية قهوة، ده بعد إذنك طبعاً. فيروز بابتسامة: حاضر. فيروز عملت القهوة وودتها ليوسف المرسم. فيروز بصدمة: إيه ده؟ أنت رسمتني؟ يوسف: أيوه، إيه رأيك. فيروز بفرحة ودموع: تحفة بجد، تسلم إيدك. يوسف: طب أنتي بتبكي لي دلوقتي؟

أنا برسم فيها من فترة، اعتبريها اعتذار عن كل اللي حصل. فيروز: أنا لما ببقى مبسوطة ببكي، واعتذارك مقبول. يوسف بابتسامة: تصبحي على خير، وصحيح، مرسي على القهوة. فيروز: بالهنا على قلبك. في مكان آخر: جاسر كان بيتكلم في الموبايل: نفذ. مجهول ١: تحت أمر حضرتك، اعتبره حصل. جاسر أنهى المكالمة وعلى وشه ابتسامة شر: علشان تعرفي تتحديني يا يوسف.